Salmos
146 ¡Kʼupil kʼoptaik li Jeovae!*+
Akʼo jkʼupil kʼopta ta sjunul koʼonton li Jeovae.+
2 Ta jkʼupil kʼopta Jeova ti kʼu sjalil kuxulune.
Ta jkʼupil kʼopta ta kʼejimoletik* li Jdios yoʼ to kuxulune.
3 Mu xapat avoʼontonik ta stojolal li bankilaletike
mi jaʼuk ta stojolal li xnichʼon krixchano ti mu xuʼ yuʼun xkoltavane.+
4 Chlokʼ li yip xkuxlejale,* tsut ta pukuktik* li stuke;+
li vaʼ kʼakʼale, chlaj skʼoplal li kʼusitik tsnope.+
5 Xmuyubaj noʼox li buchʼu kʼotem ta jkoltavanej yuʼun li Sdios Jakobe,+
ti jaʼ spatoj yoʼonton ta stojolal li Jeova ti jaʼ Dios yuʼune,+
6 ti jaʼ li Jpasvanej yuʼun vinajel xchiʼuk balumile,
li nabe xchiʼuk skotol li kʼusitik oy tee,+
ti jaʼ li buchʼu tukʼ-o yakʼoj sba ta sbatel osile,+
7 ti jaʼ li buchʼu tukʼ chchapan li buchʼutik lajemik ta loʼlaele,
ti jaʼ li buchʼu chakʼbe sveʼel li buchʼutik chviʼnajike.+
Yakal tskolta lokʼel jchukeletik* li Jeovae.+
8 Yakal tsjambe sat maʼsatetik li Jeovae;+
yakal tstoy Jeova li buchʼutik nijajtik xae;+
skʼanoj buchʼutik tukʼ li Jeovae.
9 Li Jeovae yakal chchabi li jnaklejetik ti yan-o slumal bu likemik tale;
yikoj li buchʼu chamem stote xchiʼuk li ants ti chamem smalale,+
yan li buchʼutik toj chopolike chtuchʼbe ta be li kʼusi snopoj tspasike.*+
10 Jaʼ chkʼot ta Ajvalil sbatel osil li Jeovae,+
Sion, li Adiose chkʼot ta Ajvalil ti jaykʼol kuxlejal ch-echʼe.
¡Kʼupil kʼoptaik li Jeovae!*