Jeremias
20 Li pale Pasjur ti jaʼ xnichʼon Imere xchiʼuk ti jaʼ bankilal j-abtel xtok li ta sna Jeovae te xchikintaoj li kʼusitik laj yal Jeremias ti chkʼot ta pasele. 2 Vaʼun, li Pasjure la smaj li j-alkʼop Jeremiase xchiʼuk la stikʼ ta latsʼob teʼ*+ ti te oy ta ochebal ti Benjamin sbie, ti te oy ta sna Jeovae. 3 Pe li ta yokʼomale, kʼalal lokʼesat yuʼun Pasjur ta latsʼob teʼ li Jeremiase, li Jeremiase xi laj yalbee:
«Li Jeovae maʼuk xa Pasjur abi yuʼun, jaʼ xa Magormisabib.*+ 4 Yuʼun xi chalbot li Jeovae: ‹Chanikik kuʼun ta xiʼel xchiʼuk li avamigotake, te akʼeloj chmilatik ta espada yuʼun yajkontratakik;+ chkakʼ ta skʼob ajvalil ta Babilonia sjunul li Judae, vaʼun li ajvalile chikʼ batel ta Babilonia xchiʼuk tsmil ta espada.+ 5 Chkakʼbe ta skʼob yajkontraik skotol skʼulejal li jteklum liʼe,+ skotol li kʼusi oy yuʼune, skotol li kʼusitik ep sbalil yuʼune xchiʼuk skotol li skʼulejal ajvaliletik ta Judae. Chichʼik pojbel li kʼusitik oy yuʼunike, ch-uʼuninbatik xchiʼuk ch-ichʼbatik batel ta Babilonia.+ 6 Yan li voʼote, Pasjur, chavichʼ chukel batel xchiʼuk skotol li buchʼutik te nakalik ta anae. Chabatik ta Babilonia, vaʼun te chacham xchiʼuk te chavichʼ mukel xchiʼuk skotol li avamigotake, yuʼun naka jutbil* li kʼusitik laj avalbe yaʼiik ti chkʼot ta pasele›».+
7 Kajval Jeova, laj alo’laun, laj kak’ jba ta lo’lael ek.
Laj avakʼ ta ilel ti voʼot toj echʼem ajuʼele, la atsalun.+
Skotol kʼakʼal chkichʼ labanel;
skotolik chakʼikun ta kʼexlal.+
8 Kʼalal chkal batel li akʼope, skʼan xi-avan xchiʼuk skʼan tsots xkal batel:
«¡Chtal jsaʼkʼop xchiʼuk jlajesvanej!».
Kʼalal chkal batel li skʼop Jeovae, jaʼ chkichʼ-o chopol kʼoptael xchiʼuk labanel skotol kʼakʼal.+
Pe li ta yut koʼontone xkoʼolaj kʼuchaʼal kʼokʼ ti xtiltune* xchiʼuk xkoʼolaj kʼuchaʼal kʼokʼ ti xtiltun ta jbakile,
mu xa stsʼik laj kaʼi
xchiʼuk mu xa xkuch laj kaʼi.+
10 Yuʼun laj kaʼi ti chchopol loʼiltavanik tajeke,+
vaʼun lixiʼ tajek, xi laj yalike:
«¡Tikʼbeik smul, bat jtikʼbetik smul!».
Skotol li buchʼutik chalbeikun ti junuk noʼox koʼontone te smalaojik ti xiyal ta lume,+ xi laj yalike:
«Xuʼ van xloʼlaj kuʼuntik
sventa stsal kuʼuntik xchiʼuk ti jpakbetik sutele».
11 Pe li Jeovae te la xchiʼinun kʼuchaʼal jun tsatsal jpaskʼop.+
Jaʼ yuʼun, li buchʼutik tsnutsikune tsmak* yakanik xchiʼuk muʼyuk chkuch yuʼunik.+
Solel chichʼik akʼel ta kʼexlal, yuʼun muʼyuk chkʼot ta pasel li kʼusi snopoj tspasike.
Muʼyuk chichʼ chʼayel ta jolil ti laj yichʼik akʼel ta kʼexlal ta sbatel osile.+
12 Pe li voʼote, Kajval Jeova ti bankilalot yuʼun soltaroetike,* chachaj ta kʼelel li buchʼu tukʼe;
avilojbe yoʼonton li krixchanoe xchiʼuk li kʼusi oy ta yutil to snopbene.*+
Akʼbun kil ti kʼu yelan chapakbe sutel li kajkontratake,+
yuʼun kakʼoj xa ta akʼob sventa voʼot xapakbun jkʼoplal.+
13 ¡Kʼejintaik li Jeovae! ¡Kʼupil kʼoptaik li Jeovae!
Yuʼun la spoj lokʼel ta skʼob jpaschoplejaletik li buchʼutik abol sbaike.
14 ¡Akʼo yichʼ chopol kʼoptael ti kʼusi kʼakʼalil livokʼe!
¡Akʼo mu xichʼ kʼupil kʼoptael ti kʼusi kʼakʼalil livokʼ yuʼun jmeʼe!+
15 Akʼo yichʼ chopol kʼoptael li vinik ti ay yalbe jun lekil aʼyej li jtote, ti xi laj yalbee:
«¡Vokʼ xa jun anichʼon, jaʼ jun kerem!».
Vaʼun, muyubaj-o tajek yuʼun li jtote.
16 Li vinik taje jaʼuk jech xkʼot kʼuchaʼal li jteklumetik ti muʼyuk chopol laj yaʼi Jeova kʼalal la sjinese.
Akʼo kʼotuk ta xchikin ti oy buchʼu x-avet ta sob ta skoj svokole xchiʼuk ti oy buchʼu x-avet ta paskʼop ta oʼlol kʼakʼale.
17 ¿Kʼu yuʼun muʼyuk la smilun kʼalal te oyun ta yalajeb jmeʼ
sventa jaʼuk xkʼot ta jmukinale
xchiʼuk ti teuk-o tikʼilun li ta yalajebe?+
18 ¿Kʼu yuʼun ti lilokʼ talel ta yalajeb jmeʼ
ti jaʼ noʼox chkil vokolil xchiʼuk at-oʼontone
xchiʼuk ti ta kʼexlal tstsuts ti kʼu sjalil kuxulune?+