Jeremias
15 Vaʼun, xi laj yalbun li Jeovae: «Akʼo mi xtal vaʼiikuk ta keloval li Moises xchiʼuk li Samuele,+ muʼyuk onoʼox ta jkʼuxubin li jteklum liʼe. Lokʼeso batel ta jtojolal. Akʼo batikuk. 2 Pe mi xi tsjakʼbeikote: ‹¿Bu chibatkutik un?›, xi xatakʼbe yaʼiike: ‹Xi ta xal li Jeovae:
«Oy jlom avuʼunik ti chchamik ta skoj chamele,
oy jlom avuʼunik ti chichʼik milel ta espadae,+
oy jlom avuʼunik ti chchamik ta skoj tsatsal viʼnale
xchiʼuk oy jlom avuʼunik ti chichʼik chukel batele»›.+
3 »Xi chal li Jeovae: ‹Chkakʼ talel chantos vokolil* ta stojolalik:+ chlajik ta espada, chichʼik jochel batel ta tsʼiʼetik, chichʼik tiʼel ta mutetik xchiʼuk chichʼik lilinel ta tiʼel ta jtiʼvanej chonbolometik ta balumil.+ 4 Jpʼel skʼoplal xibal sba chkom kuʼun ta sba sat skotol mukʼtik lumetik ta balumil,+ taje jaʼ ta skoj li kʼusi la spas ta Jerusalen li Manases ti jaʼ ajvalil ta Judae xchiʼuk ti jaʼ xnichʼon Esekiase.+
5 Jerusalen, ¿buchʼu van chakʼ ta ilel xkʼuxul yoʼonton ta atojolal,
buchʼu van kʼux ta xaʼi avokol
xchiʼuk buchʼu van te chvaʼi sventa tsjakʼ mi lek oyote?›.
6 Xi chal li Jeovae: ‹Laj xa aviktaun komel.+
Jech-o yakal chanamaj batel ta jtojolal.*+
Jaʼ yuʼun, ta jyeʼ talel jkʼob ta atojolal xchiʼuk ta jlajesot.+
Tavan xa xkaʼi ti chkʼuxubaj koʼonton* ta atojolale.
7 Ta jipik lokʼel ta stiʼtak jteklum ta chavchav teʼ.*
Ta jmilbe li yalab xnichʼnabike.+
Ta jtupʼbe skʼoplal li jteklumale,
yuʼun mu skʼan xiktaik komel li be bu stamojik batele.+
8 Ta xkakʼ ti ep tajek xkom meʼon antsetik yuʼunike, jaʼ xkom to yepal li jiʼ* ta nabe.
Ta jtak talel jun jmilvanej ta stojolalik ta oʼlol kʼakʼal, ta stojolal li meʼiletik xchiʼuk li keremetike.
Ta anil noʼox chkakʼ talel at-oʼonton xchiʼuk xiʼel ta stojolalik.
9 Li ants ti ayan vukvoʼ yalabe kʼunibem xa;
vokol xa tajek chichʼ ikʼ.
Akʼo mi kʼakʼaltik to, xkoʼolaj kʼuchaʼal ta ikʼ osil oy,
taje ch-akʼat ta kʼexlal xchiʼuk ta labanel›.*
‹Xchiʼuk ti jayvoʼ kuxul chkomike
chkakʼ ti xmilatik yuʼun yajkontraik ta espadae›, xi li Jeovae».+
10 Toj abol jba, kuni meʼ, yuʼun li-ayan avuʼun,+
ti jlikesej kʼop vinikun noʼoxe xchiʼuk ti ch-ayan kʼop kuʼun ta sjunul li lume.
Muʼyuk kʼusi kakʼoj ta chʼom xchiʼuk muʼyuk kʼusi jkʼanoj ta chʼom,
pe skotolik chchopol kʼoptaikun.
11 Xi chal li Jeovae: «Jpʼel skʼoplal ta jkoltaot sventa lekuk oyot;
jpʼel skʼoplal chikʼopoj ta atojolal li ta yorail vokolile,
li ta yorail kʼalal chakʼ vokolil li jkontrainvaneje.
12 ¿Mi oy van buchʼu xlilij yuʼun li tsatsal takʼine,
li tsatsal takʼin ti likem tal ta nortee xchiʼuk li kovree?
13 Ta skoj li kʼusitik chopol apasoj ta sjunul li avosilale,
chkakʼ batel ta pojel li kʼusitik oy avuʼune xchiʼuk li akʼulejale,+ mi jutebuk chavichʼ tojbel.
14 Chkakʼbe batel avajkontratakik
sventa xichʼik batel ta jun lum ti mu xavojtikinike.+
Yuʼun lik tsanuk kʼokʼ ta skoj li skʼakʼal koʼontone
xchiʼuk xtiltun ta atojolalik».+
15 Kajval Jeova, aviloj li jvokole,
vulesun me ta ajol xchiʼuk akʼo tal asat ta jtojolal.
Pakbun sutel jkʼoplal ta stojolal li kajkontratake.+
Ta skoj ti mu xtal ta anil li skʼakʼal avoʼontone, mu me teuk noʼox akʼeloj xlaj jkʼoplal.
Teuk me ta ajol ti kuchem kuʼun chopol kʼoptael ta akoje.+
16 Kʼalal vul ta jtojolal li akʼope, la jlajes kʼuchaʼal veʼlil;+
li akʼope jaʼ xmuyubaj-o koʼonton xchiʼuk jaʼ xkuxet-o koʼonton,
yuʼun kichʼoj abi, Kajval Jeova, Dios kuʼun ti voʼot bankilalot yuʼun soltaroetike.*
17 Muʼyuk ta jchiʼin ta chotlej li buchʼutik batem ta yoʼontonik kʼine xchiʼuk muʼyuk chimuyubaj xchiʼukik.+
Ta skoj ti voʼot chabeiltasun ta akʼobe, jtuk chichoti,
yuʼun oy tajek skʼakʼal koʼonton ta skoj li kʼusitik chopol spasojike.+
18 ¿Kʼu yuʼun mu x-echʼ li kʼusi kʼux chkaʼie xchiʼuk kʼu yuʼun mu xpoxtaj li jyayijemale?
Mu xa xkol li jyayijemale.
¿Mi chakʼot kuʼun kʼuchaʼal snioʼal voʼ ti chloʼlavane,
ti mu stakʼ jpat koʼontonkutik yuʼune?
19 Jaʼ yuʼun, xi chal li Jeovae:
«Mi lasut tal ta jtojolale, lek chkilot yan velta
xchiʼuk te chavaʼi ta yeloval jsat.
Mi chachʼak lokʼel kʼusitik ep sbalil ta stojolal li kʼusi mu kʼusi xtun-oe,
chakʼot kuʼun ta kajkʼopojel.
Vaʼun, ta sutik tal ta atojolal,
mu voʼotuk chabat ta stojolalik».
20 Xi chal li Jeovae: «Chakʼot kuʼun kʼuchaʼal jun tsatsal muro ti pasbil ta kovre ta stojolal li jteklum liʼe,+
jpʼel skʼoplal tstsakikot ta kʼop,
yuʼun te jchiʼukot sventa ta jkoltaot xchiʼuk sventa ta jpojot.
21 Voʼon ta jpojot lokʼel ta skʼob li buchʼutik toj chopolike
xchiʼuk ta jkoltaot lokʼel ta skʼob li buchʼutik muʼyuk xkʼuxul yoʼontonike».