Deuteronomio

2 »Laje, lijsut tal xchiʼuk lijbat ta takixokol balumil, jaʼ la jtamtik batel li sbelel Tsajal nab jech kʼuchaʼal laj yalbun+ Jeovae. Ep kʼakʼal lijxanav ta sjoylejal li vits Seire. 2 Ta tsʼakale, xi laj yalbun li Jeovae: 3 ‹Toj jal xa laxanavik ta sjoylejal li vitse, batanik xa ta norte. 4 Xi xavalbe mantal li jteklume: «Cha-echʼik ta stsʼak yosilik li achiʼilik ta vokʼele, jaʼ li snitilulal Esau+ ti te nakalik ta Seire.+ Chiʼ avuʼunik,+ jaʼ yuʼun skʼan me xavichʼ lek apʼijilik. 5 Mu me xatsakik ta kʼop,* yuʼun muʼyuk chkakʼboxuk jutebuk li yosilike mi jaʼuk chkakʼboxuk ti kʼu smukʼul yav avakanike, yuʼun jaʼ kakʼojbe ta xrexto*+ Esau li vits Seire. 6 Skʼan xatojbeik li veʼlil chalajesike xchiʼuk skʼan xatojbeik li voʼ chavuchʼike,+ 7 yuʼun yakʼojbot bendision li Jeova Dios avuʼun ta skotol li kʼusi chapase. Snaʼoj lek ti butik la-echʼ li ta mukʼta takixokol balumile. Te xchiʼinojot li Jeova Dios avuʼun li 40 jabil laxanave, muʼyuk kʼusi la spas palta avuʼun»›.+ 8 Jech oxal, te lij-echʼ ta stsʼel ti bu oyik li jchiʼiltaktik ta vokʼele, jaʼ li snitilulal Esau+ ti te nakalik ta Seire. Muʼyuk lij-echʼ li ta sbelel Araba ti te xlik ta Elat xchiʼuk ta Esion-Guebere.+

»Lijsut noʼox ta anil xchiʼuk jaʼ la jtamtik batel li sbelel takixokol balumil ta Moabe.+ 9 Xi laj yalbun li Jeovae: ‹Mu me xakontrainik xchiʼuk mu me xapasik kʼop xchiʼuk li Moabe, yuʼun muʼyuk chkakʼboxuk avuʼuninik jutebuk li yosilike, yuʼun jaʼ kakʼojbe xrextoinik* snitilulal Lot+ li yosilal Are. 10 (Te toʼox nakal li j-emimetike,+ jaʼ toʼox jun mukʼta jteklum, toj epik xchiʼuk toj natik li krixchanoetik jech kʼuchaʼal li j-anaketike. 11 Li jrefaetik+ eke ojtikinbilik kʼuchaʼal j-anaketik,+ pe j-emimetik ch-albatik yuʼun li jmoabetike. 12 Ta voʼnee te toʼox nakalik ta Seir li j-oreoetike,+ pe pojbat yosilik yuʼun li snitilulal Esaue, milatik xchiʼuk jaʼ xa te nakiik+ li snitilulal Esaue. Jech la spasik jech kʼuchaʼal tspas j-israeletik kʼalal chuʼuninik li osil ti albilik ta melel yuʼun Jeovae). 13 Avie batanik, tuchʼik jelavel li stenlejaltik* Serede›. Jech oxal, echʼ jtuchʼtik li stenlejaltik* Serede.+ 14 Ti kʼu sjalil laj yichʼ kuʼuntike jaʼ 38 jabil ti te lijlik ta Kades-Barnea kʼalal to ta stenlejaltik* Serede, jaʼ to ti kʼuxi chamik skotol li buchʼutik tspasik kʼop li ta jkʼol kuxlejale. Chamik jech kʼuchaʼal onoʼox albatik ta jamal+ yuʼun li Jeovae. 15 Li skʼob Jeovae skontrainoj li jkʼol kuxlejal taje sventa tslajesbe skʼoplal jaʼ to ti kʼuxi cham skotolike.+

16 »Kʼalal naka noʼox chamik skotol li viniketik te ta jteklum ti tspasik kʼope,+ 17 la xchiʼinun ta loʼil yan velta li Jeovae, xi laj yalbune: 18 ‹Chajelav batel avi li ta yosilal Moabe, jaʼ xkaltik, li Are. 19 Mi lanopaj batel ta stojolal li j-ammonetike, mu me xatsak ta kʼop mi jaʼuk xasabe sjol, yuʼun muʼyuk chkakʼbot avuʼunin jutebuk li yosil j-ammonetike, yuʼun jaʼ kakʼojbe xrextoinik* li snitilulal Lote.+ 20 Li osil taje nabil ti jaʼ toʼox yuʼunik li jrefaetike.+ (Te toʼox nakalik li jrefaetike, jsamsumimetik ch-albatik yuʼun li j-ammonetike. 21 Jaʼ toʼox jun mukʼta jteklum, toj epik xchiʼuk toj natik li krixchanoetik jech kʼuchaʼal li j-anaketike;+ pe laj yichʼik lajesel yuʼun Jeova ta sat li j-ammonetike, nutsatik lokʼel yuʼun li j-ammonetike, vaʼun jaʼ xa te lik nakiikuk. 22 Jaʼ jech la spas ta stojolal li snitilulal Esau ti te xa nakalik ta Seire.+ Taje jaʼo kʼalal laj xa ox slajesbe skʼoplal j-oreoetik+ ta sat li j-ammonetike sventa xuʼuninbeik li yosilike, vaʼun te xa nakalik kʼalal to avie. 23 Li j-avimetike nom toʼox tajek bu nakiik, te to bat nakiikuk ta stsʼel Gasa,+ jaʼ to ti kʼuxi milatik yuʼun li jkaftoretik+ ti te likemik ta Kaftore,* vaʼun jaʼ xa te nakiik li jkaftoretike).

24 »›Likanik, echʼ tuchʼik li stenlejaltik Arnone.*+ Laj avakʼ venta ti laj xa kakʼ ta akʼob li ajvalil Seon+ ta Esbon ti jaʼ j-amorreo vinike. Lik xa uʼuninbo li yosile xchiʼuk bat tsako ta kʼop. 25 Li avi kʼakʼale, chlik kakʼ xiʼikuk tajek avuʼun mi laj yaʼiik akʼoplal skotol li krixchanoetik oy ta sjunul yolon vinajele. Chlik svul tajek yoʼontonik xchiʼuk chlik tʼelikuk* avuʼun›.+

26 »La jtak batel j-almantaletik ti te to likik batel ta takixokol balumil ta Kedemot+ sventa xbat skʼelik li ajvalil Seon ta Esbone, xi laj kal batel mantal ta slekil koʼontone:+ 27 ‹Akʼo jelavkun ta avosil. Tukʼ chijelav ta be, muʼyuk chikʼejpʼuj* ta batsʼikʼob mi jaʼuk ta tsʼetkʼob.*+ 28 Jaʼ noʼox ta jlajes li veʼlil xchiʼuk jaʼ noʼox chkuchʼ li voʼ ti kʼu yepal chachonbune. Jaʼ noʼox akʼo jelavkun ta kakan li ta avosile 29 —taje jaʼ li kʼusi la spasik ta jtojolal li snitilulal Esau ti te nakalik ta Seire xchiʼuk li jmoabetik ti te nakalik ta Are— jaʼ to mi lijelav ta jot Jordan ti bu oy li balumil yaloj chakʼbunkutik li Jeova Dios kuʼunkutike›. 30 Pe li ajvalil Seon ta Esbone muʼyuk xakʼ jelavkutik, yuʼun li Jeova Dios avuʼune yijub yoʼonton yuʼun+ xchiʼuk tsatsub yoʼonton yuʼun. Ti jech la spase jaʼ sventa xakʼbot ta akʼob jech kʼuchaʼal yakal chkʼot ta pasel avie.+

31 »Xi laj yalbun li Jeovae: ‹Kʼelavil ti laj xa kakʼbot ta akʼob li Seon xchiʼuk yosile. Lik uʼuninbo li yosile›.+ 32 Kʼalal lokʼ ox stsakutik ta kʼop Seon xchiʼuk li steklumal te ta Jaase,+ 33 laj yakʼ ta jkʼobtik ti Jeova Dios kuʼuntike, jech te la jtsaltik xchiʼuk xnichʼnabtak xchiʼuk skotol li steklumale. 34 Li vaʼ kʼakʼale, och ta jkʼobtik skotol li jteklumetik yuʼunike xchiʼuk la jlajesbetik skʼoplal skotol, la jlajesbetik skʼoplal li viniketike, li antsetike xchiʼuk li ololetike. Mi junuk kuxul kom.+ 35 Jaʼ noʼox laj kikʼtik lokʼel li chonbolometik xchiʼuk li kʼusitik la jpojtik li ta jteklumetik ti och ta jkʼobtike. 36 Chlik ta Aroer+ ti te xkom ta stiʼil stenlejaltik Arnon* (te tsakal skʼoplal li jteklum ta stenlejaltike) kʼalal to ta Galaad. Mi junuk jteklum kol kuʼuntik. Laj yakʼbutik ta jkʼobtik+ skotol li Jeova Dios kuʼuntike. 37 Akʼo mi jech, muʼyuk lanopaj batel ta yosil li j-ammonetik+ ti jaʼ skotol li stiʼil stenlejaltik* Jaboke+ xchiʼuk li jteklumetik ta vitstikaltike mi jaʼuk ta yan osil ti laj yal Jeova Dios kuʼuntik ti mu stakʼ xijnopaj batele.