Deuteronomio

15 »Li ta vukvuk jabile jaʼ sjabilal avuʼunik li kolebale.+ 2 Xi yelan skʼan xapasike: skotol li buchʼu oy kʼusi yakʼojbe xchʼamun xchiʼile muʼyuk xa tskʼanbe sutel li kʼusi laj yakʼbe xchʼamune. Mu xuʼ skʼanbe sutel yil li yermanoe mi jaʼuk li xchiʼil ta krixchanoale, yuʼun chichʼ pasel jun kolebal sventa Jeova.+ 3 Xuʼ jaʼ persa xakʼanbe yil li jyanlumetike,+ pe mu xa xakʼanbe sutel avermano kʼusiuk noʼox ti laj avakʼbe xchʼamune. 4 Akʼo mi jech, muʼyuk onoʼox buchʼu tspas ta povre ti bu nakalote, yuʼun li Jeovae ta jpʼel skʼoplal chakʼbot bendision+ li ta osil bu chakʼ avuʼunin li Jeova Dios avuʼune, 5 pe jaʼ noʼox me jech chkʼot ta pasel mi ta jpʼel skʼoplal chachʼun li kʼusi chlokʼ ta ye Jeova Dios avuʼune, mi chavakʼ lek ta akuxlejal skotol li mantaletik yakal chkalbot avie.+ 6 Yuʼun li Jeova Dios avuʼune ta onoʼox xakʼbot bendision jech kʼuchaʼal yalojbot ta jamale xchiʼuk voʼot oy kʼusi chavakʼbe xchʼamun* li jyanlumetike, pe li voʼote mu persauk oy kʼusi chakʼanbe ta chʼom;+ jech xtok, chapas ta mantal epal lumetik, pe li voʼote muʼyuk tspasoxuk ta mantal.+

7 »Mi oy pas ta povre junuk avermano li ta osil bu chakʼ naklan li Jeova Dios avuʼune, mu me xatsatsubtas avoʼonton, ta slekiluk me avoʼonton xavakʼbe kʼusitik oy avuʼun li avermano ti abol sbae.+ 8 Oyuk slekil avoʼonton ta stojolal+ xchiʼuk persa skʼan xavakʼbe xchʼamun* li kʼusi chtun yuʼune o li kʼusi palta yuʼune. 9 Kʼelo me aba ti mu xiuk chopol xanop ta avoʼontone: ‹Chnopaj xa talel li svukubal jabile, li sjabilal kolebale›,+ vaʼun muʼyuk xa slekil avoʼonton ta stojolal li avermano ti povree xchiʼuk ti muʼyuk xa kʼusi chavakʼbe jutebuke. Mi la skʼan parte ta stojolal li Jeovae, jaʼ amul chkʼot.+ 10 Ta slekiluk avoʼonton xavakʼbe,+ mu me ta sujeluk xavakʼbe, yuʼun jaʼ ta skoj slekil avoʼonton chakʼbot bendision li Jeova Dios avuʼun ta skotol li kʼusi chapase xchiʼuk ta skotol kʼusiuk noʼox ti chavabtelane.+ 11 Yuʼun oy onoʼox buchʼu povre li ta balumile.+ Jaʼ yuʼun, xi yakal chkalbot mantale: ‹Oyuk slekil avoʼonton ta stojolal avermano ti chil svokol xchiʼuk ti ta povreal oy li ta alumale›.+

12 »Mi oy junuk avermano ti jaʼ j-ebreo vinik o j-ebreo ants ti amanoje xchiʼuk mi vakib xa jabil tun ta atojolale, skʼan xakolta batel li ta svukubal jabile.+ 13 Pe mu me xokoluk skʼob xbat avuʼun mi la akolta batele. 14 Ta slekiluk avoʼonton xavakʼbe batel jaykotuk achij, jlomuk a-aseite, avino o yan kʼusitik ti lokʼ ta avosile. Skʼan xavakʼbe jech kʼuchaʼal yakʼojbot bendision li Jeova Dios avuʼune. 15 Vuleso me ta ajol ti la-echʼ ta mosoil li ta yosilal Ejiptoe xchiʼuk ti la spojot lokʼel li Jeova Dios avuʼune. Jaʼ yuʼun, jech yakal chkalbot mantal avi ti akʼo jech xapase.

16 »Pe mi xi chalbot li amosoe: ‹¡Mu jkʼan xkiktaot!›, ta skoj ti skʼanojot xchiʼuk skʼanoj li buchʼutik te oy ta anae xchiʼuk ta skoj ti xkuxet noʼox yoʼonton echʼ ti kʼu sjalil la xchiʼinote,+ 17 skʼan xaxikʼan ta tiʼ na sventa xajombe xchikin ta jichʼil takʼin ti oy sniʼe, vaʼun jaʼ xa amoso chkom-o ti kʼu sjalil kuxule. Jech skʼan xapasbe xtok li akiarae. 18 Mu chopoluk xavaʼi ti chayiktaot mi la akolta batele, yuʼun li vakib jabil abtej avuʼune j-oʼlol to x-echʼ yepal sbalil ti kʼu yepal ch-abtej li jun jsaʼabtele, jech xtok, laj yakʼbe bendision skotol kʼusitik la apas li Jeova Dios avuʼune.

19 »Skʼan xachʼultajes sventa Jeova Dios avuʼun skotol li sba yol avakax xchiʼuk achije.+ Mu me xavakʼ abtejuk li sba yol avakaxe* xchiʼuk mu me xalokʼbe stsotsil li sba yol achije. 20 Skʼan xatiʼ jujun jabil xchiʼuk li buchʼutik te oy ta ana ta yeloval li Jeova Dios avuʼune, te xatiʼik ti bu stʼujoj Jeovae.+ 21 Pe mi oy xchopolile —mi koxo, mi maʼsat o kʼusiuk noʼox yan xchopolil ti xvinaj leke—, mu xamilbe ta smoton li Jeova Dios avuʼune.+ 22 Skʼan te xatiʼ ta yut ateklumal xchiʼuk xuʼ stiʼik ek li buchʼutik ibal sbaike* xchiʼuk li buchʼutik lekike, jech xatiʼ kʼuchaʼal chatiʼ jkotuk gasela o jkotuk teʼtikalchije.+ 23 Pe mu me xatibe li xchʼichʼele,+ skʼan xamal batel ta balumil jech kʼuchaʼal chamal voʼe.+