Salmos
Kʼejimol. Salmo yuʼun David.
108 Dios kuʼun, staoj-o yav li koʼontone.
Chikʼejin xchiʼuk ta jtij son ta sjunul koʼonton.*+
2 Julavan, stijobil son ti oy avakʼiltake; julavan ek, arpa.+
Ta xjulav kuʼun li xojobal kʼakʼal kʼalal jaʼ to chlokʼ tale.
3 Kajval Jeova, ta jkʼupil kʼoptaot ti bu oy li jteklumetike;
ta jkʼupil kʼoptaot ta kʼejimoletik* ti bu oy li mukʼtik lumetike.
4 Yuʼun toj mukʼ li tukʼil kʼanelal avuʼune, jech staylej kʼuchaʼal li vinajele+
xchiʼuk ti tukʼ chavakʼ abae kʼotem kʼalal to vinajel.
5 Dios kuʼun, akʼo xavichʼ toybel akʼoplal li ta sba vinajele;
teuk oy ta sba spʼejel balumil li amukʼulale.+
6 Pojunkutik ta abatsʼikʼob xchiʼuk takʼbun
sventa xapoj li buchʼutik akʼanojane.+
7 Xi kʼopojem li chʼul* Diose:
«Chimuyubaj tajek, ta jpuk batel kʼuchaʼal rextoil* li Sikeme;+
jech xtok, ta jpʼis li stenlejaltik Sukote.+
8 Jaʼ kuʼun li Galaade,+ jaʼ kuʼun xtok li Manasese
xchiʼuk jaʼ kʼotem ta jkasko* li Efraine;+
li Judae jaʼ jvaxton sventa komandante.+
9 Li Moabe jaʼ li jlechlech boch ta jpok-o kakan xchiʼuk jkʼobe.+
Te ta jten batel jxonob ta stojolal li Edome.+
Xi-avet noʼox ta stojolal li Filistea ta skoj ti la jpas kanale».+
10 ¿Buchʼu van chikʼun batel li ta jteklum ti joyobtabil ta muroe?
¿Buchʼu tsbeiltasun batel kʼalal to ta Edom?+
11 Dios, ¡ta melel voʼot ti chabeiltasunkutik batele!
Pe li avi une, Dios, chaviktaunkutik komel xchiʼuk muʼyuk xa jmoj chabat xchiʼuk li kajsoltarotakutike.+