Proverbios
8 ¿Mi mu teuk x-avet li pʼijilale?
¿Mi mu tsotsuk chkʼopoj li yaʼibel smelolale?+
2 Te ta toyol stselejaltik+ ta xokon be,
te tsvaʼan sba ti bu chchʼak sba li beetike.
4 «Krixchanoetik, voʼoxuk ta jkʼoponoxuk;
ta jtoy yechʼomal ke ta atojolal akotolik.*
5 Voʼoxuk ti muʼyuk apʼijilike, ayanuk apʼijilik;+
voʼoxuk ti boloxuke, akʼo pʼijubuk li avoʼontonike.
6 Chikintaik, yuʼun tsots skʼoplal li kʼusi chkale,
tukʼ li kʼusi chlokʼ ta kee;
7 yuʼun lek kʼun chlokʼ tal ta ke li kʼusi melele;
xchiʼuk tspʼaj kʼusi toj chopol li kee.
8 Tukʼ skotol li kʼusi chlokʼ ta kee.
Mi jpʼeluk ti muʼyuk stukʼile o ti toj chopole.
9 Skotol jamal ta aʼiel chaʼi li buchʼu oy spʼijile
xchiʼuk tukʼ chaʼi li buchʼutik staoj yojtikinobil yuʼunike.
10 Jaʼ tʼujik li tukʼibtasel kuʼune, maʼukuk li platae
xchiʼuk jaʼ tʼujik li yojtikinobile, maʼukuk li lekil oroe.+
11 Yuʼun li pʼijilale mas to lek kʼuchaʼal li kʼupil sba tonetik ta nabe;*
mi jaʼuk stakʼ koʼoltasel xchiʼuk skotol li kʼusitik oy ta avoʼonton chakʼane.
12 Voʼon li pʼijilalune, jmoj nakalun xchiʼuk li pʼijubtasele,
jtaoj li yojtikinobile xchiʼuk ti xitojob snopele.+
13 Li xiʼtael* Jeovae jaʼ skʼan xal ti chichʼ pʼajel li kʼusi chopole.+
Jpʼajoj li buchʼu tstoy sba stuke, li buchʼu mukʼ yakʼoj sbae,+ li be ti toj chopole xchiʼuk li chopol kʼopojele.+
14 Oy kuʼun lekil tojobtasel xchiʼuk pʼijilal;+
15 Voʼon ta jkoj ti jech-o chventainvanik li ajvaliletike
xchiʼuk ti chakʼik mantal li bankilal j-abteletike.+
16 Voʼon ta jkoj ti jech-o chventainvanik li jnitvanejetike
xchiʼuk ti tukʼ chchapanvanik li bankilaletike.
17 Jkʼanojik li buchʼutik skʼanojikune
xchiʼuk ta staikun li buchʼutik ta saʼikune.+
18 Te oy ta jtojolal li kʼulejale xchiʼuk li mukʼulale,
li kʼulejal ti te oy-oe* xchiʼuk li tukʼilale.
19 Li kʼusitik chkakʼe mas to lek kʼuchaʼal li oroe, akʼo mi jaʼ li lekil oroe,
li kʼusi chkakʼe mas to lek kʼuchaʼal li mas lekil platae.+
20 Te chixanav batel ta sbelel tukʼilal,
ochemun lek ta sbelel li tukʼilale;
21 ep tajek chkakʼbe xrexto* li buchʼutik skʼanojikune
xchiʼuk ta jnojesbe li skʼejobil* kʼusitik yuʼunike.
22 Jaʼ la spasun li Jeovae. Voʼon baʼyel la spasun ta skotol li yabteltake,+
voʼon ti mas sob la spasun ta voʼnee.+
23 Leʼ xa onoʼox ta voʼne laj kichʼ vaʼanele,+
leʼ xa onoʼox ta slikebale, jaʼo kʼalal chʼabal toʼox li balumile.+
24 Laj kichʼ pasel* kʼalal chʼabal toʼox li natil voʼe,+
jaʼo kʼalal chʼabal toʼox li nioʼ ti xtuktun* chlokʼ tal yaʼlele.
25 Jaʼo laj kichʼ pasel kʼalal chʼabal toʼox akʼbil ta yavil li vitsetike,
kʼalal chʼabal toʼox li bikʼtal vitsetike.
26 Jaʼo kʼalal chʼabal toʼox spasoj li balumil xchiʼuk li osiletike
o li baʼyel pukuk* ti meltsaj-o li balumile.
27 Te oyun kʼalal la smeltsan li vinajele;+
kʼalal laj yakʼbe stsʼakil ti bu kʼalal chpaj li vinajele xchiʼuk li nabe,+
28 kʼalal laj yakʼ* ta akʼol li toketike,
kʼalal la snakan li yaviltak natil voʼe,
29 kʼalal laj yakʼ mantal ta sventa li nab
ti mu xjelav batel mas li yaʼlel ti bu kʼalal albil mantale,+
kʼalal laj yakʼbe snaklebtak li balumile,
30 vaʼun jaʼo te oyun ta xokon kʼuchaʼal jun bankilal* j-abtel.+
Voʼon ti buchʼu mas la skʼanun tajek+ jujun kʼakʼale
xchiʼuk limuyubaj skotol ora ta yeloval;+
31 limuyubaj yuʼun li balumil ti xuʼ xichʼ naklebinele
xchiʼuk jaʼ la jkʼan tajek li xnichʼnab krixchanoetike.
32 Avi une, kuni nichʼnab, chikintabeikun;
jech, xmuyubajik noʼox li buchʼutik jaʼ stamojik batel li jbetake.
33 Chikintaik li tukʼibtasele,+ vaʼun chata apʼijilik
xchiʼuk mu me xachʼay ta avoʼontonik li tukʼibtasele.
34 Xmuyubaj noʼox li vinik ti chchikintabune,
ti sob chtal* jujun kʼakʼal ta stiʼ jnae,
ti te smalaoj ta stsʼel stiʼ jnae.
35 Yuʼun li buchʼu tstaikune tstaik kuxlejal+
xchiʼuk lek ch-ilatik yuʼun li Jeovae.
36 Yan li buchʼu muʼyuk tstsakun ta ventae chakʼbe sba svokol stuk
xchiʼuk li buchʼutik spʼajojikune skʼanojik li lajelale».+