Baʼyel Kronikas

17 Kʼalal te xa ox oy ta sna* li Davide, xi laj yalbe li j-alkʼop Natane:+ «Kʼelavil, li voʼone nakalun ta jpʼej na ti pasbil ta sedro teʼetike,+ yan li xkaxail strato Jeovae te noʼox oy ta yut karpana ti pasbil ta pokʼe».+ 2 Li Natane xi la stakʼbe li Davide: «Paso li kʼusi oy ta avoʼontone, yuʼun liʼ xchiʼukot li melel Diose».

3 Ta yakʼobalil noʼox xi tal albatuk yuʼun Dios li Natane: 4 «Xi xbat avalbe li kajtunel Davide: ‹Xi chal li Jeovae: «Mu voʼotukot chavaʼan li na ti bu xuʼ xinakie.+ 5 Yuʼun kʼalal la jlokʼes tal li Israel kʼalal to avie, muʼyuk onoʼox bu xinaki ta jpʼejuk na, ta jujun karpana noʼox xchiʼuk ta jujun axibalna noʼox linaki ti butik li-echʼ tale.*+ 6 Ti kʼu xa sjalil la jchiʼin tal li Israele, muʼyuk xi laj kalbe junuk jchapanvanej ta Israel ti la jtʼuj sventa sbeiltas li jteklumal Israele: ‹¿Kʼu yuʼun ti muʼyuk apasojbeikun jpʼejuk jna ta sedro teʼetike?›»›.

7 »Xi xavalbe li kajtunel Davide: ‹Xi chal li Jeova ti jaʼ bankilal yuʼun soltaroetike:* «Voʼon ay kikʼot talel li ta yaxaltik ti bu chachabi chije sventa xakʼot ta jnitvanej yuʼun li jteklumal Israele.+ 8 Te ta jchiʼinot ti buyuk noʼox chabate+ xchiʼuk te akʼeloj ta jlajesbe skʼoplal* skotol li avajkontratake;+ jech xtok, chkakʼ ta ojtikinel abi jech kʼuchaʼal li viniketik ti tsots yabtelik liʼ ta balumile.+ 9 Ta jsabe lek bu xuʼ xnakiik sventa te xkomik-o li jteklumal Israele, te chnakiik xchiʼuk muʼyuk xa buchʼu tsaʼatik ta kʼop; jech xtok, muʼyuk xa ch-akʼbat svokolik yuʼun li chopol viniketik jech kʼuchaʼal la spasik ta voʼne+ 10 ti kʼalal lik jvaʼan jchapanvanejetik ta stojolal li jteklumal Israele.+ Voʼon ta jtsal skotol li avajkontratake.+ Xi chkalbot ta jamal xtoke: ‹Tsvaʼan ta ajvalil avutsʼ avalal li Jeovae›.

11 »›»Mi lacham xa ox xchiʼuk mi labat xa ox xchiʼuk li amoltotake, ta jvaʼan ta ajvalil jun anitilulal, jaʼ junuk akerem,+ lek staoj yav chkom kuʼun li ajvalilal* tspase.+ 12 Jaʼ tsvaʼanbun jpʼej jna,+ lek staoj yav chkom kuʼun sbatel osil li ajvalilal tspase.+ 13 Voʼon chikʼot ta stot, jaʼ chkʼot ta jnichʼon.+ Muʼyuk chkikta jba ta yakʼbel ta ilel tukʼil kʼanelal+ jech kʼuchaʼal laj kikta jba ta yakʼbel ta ilel tukʼil kʼanelal li buchʼu baʼyuk echʼ avuʼune.+ 14 Ta sbatel osil ta jchotan ta jchotleb ti bu ta jpas mantale xchiʼuk te oy-o sbatel osil li ajvalilal yuʼune+ xchiʼuk jaʼ ch-ajvalilaj-o li snitilulale»›».+

15 Li Natane laj yalbe David skotol li kʼusi albate xchiʼuk skotol li kʼusi akʼbat yile.

16 Vaʼun, li ajvalil Davide te bat chotluk ta yeloval li Jeovae, xi laj yalbee: «Jeova Dios, muʼyuk tsots jkʼoplal xchiʼuk muʼyuk tsots skʼoplal li kutsʼ kalale, jaʼ yuʼun mu jta-o ti liʼ to laj avikʼun tale.+ 17 Pe maʼuk noʼox un, Kajval Dios, chaval xtok li kʼusi chkʼot ta pasel ta jelavel ta stojolal li yutsʼ yalal avajtunele,+ jech xtok, Kajval Jeova, jech chavilun jech kʼuchaʼal li buchʼu lek toybil skʼoplale.* 18 ¿Kʼusi xa mas xuʼ chalbot li avajtunel David ti laj avichʼ ta mukʼe? Yuʼun xavojtikinun lek.+ 19 Kajval Jeova, ti jech laj avakʼ ta ojtikinel skotol li kʼusitik labalik sba apasoje, jaʼ ta skoj li avajtunele xchiʼuk ti jech tskʼan avoʼontone.+ 20 Kajval Jeova, muʼyuk buchʼu yan jech kʼuchaʼal voʼote+ xchiʼuk atuk noʼox Diosot;+ jnaʼojkutik ta skoj li kʼusi kʼotem ta jchikinkutike. 21 Jech xtok, ¿mi oy yan jteklum jech kʼuchaʼal li ateklumal Israele?+ Li melel Diose bat spoj lokʼel sventa xkʼot ta steklumal.+ Puk batel akʼoplal ta skoj li kʼusitik mukʼtik xchiʼuk labalik sba la apase,+ yuʼun ta sat ateklumal la anuts lokʼel li yan jteklumetike,+ jaʼ li ateklumal ti la apoj lokʼel ta Ejiptoe. 22 Jaʼ ateklumal-o sbatel osil li jteklum Israele;+ li voʼot ek une, Kajval Jeova, lakʼot ta Sdiosik.+ 23 Li avi une, Kajval Jeova, li kʼusi jamal laj avalbe avajtunele xchiʼuk li kʼusi laj aval ta stojolal li yutsʼ yalale jechuk-o komuk sbatel osil; kʼotuk ta pasel avuʼun li kʼusi jamal laj avale.+ 24 Toybiluk skʼoplal+ xchiʼuk te oyuk-o sbatel osil* li abie sventa xi xalik li krixchanoetike: ‹Li Jeova ti jaʼ bankilal yuʼun soltaroetik ti jaʼ Dios yuʼun Israele jaʼ Sdios li Israele›, jech xtok, jaʼ akʼo ajvalilajikuk-o li snitilulal avajtunel Davide.+ 25 Li voʼote, Dios kuʼun, laj avakʼbe snaʼ avajtunel ti chavakʼ ochuk ta ajvalil li yutsʼ yalale. Jaʼ yuʼun, li avajtunele spatoj yoʼonton ti tskʼoponot tale. 26 Kajval Jeova, voʼot li melel Diosote xchiʼuk voʼot li kʼusitik lekik avaloj chavakʼbe li avajtunele. 27 Jaʼ yuʼun, kʼotuk ta avoʼonton yakʼbel bendision li snitilulal avajtunel ti jaʼ ch-ochik ta ajvalil avuʼun sbatel osile, yuʼun li voʼote, Kajval Jeova, avakʼojbe bendision xchiʼuk jech-o tstaik bendision sbatel osil».