Jeremias

44 Li Jeremiase oy kʼusi albat yuʼun Dios ta stojolal skotol li judaetik ti te nakalik ta yosilal Ejiptoe,+ jaʼik li buchʼutik te nakalik ta Migdol,+ ta Tapanes,+ ta Nof*+ xchiʼuk li ta yosilal Patrose,+ xi albate: 2 «Xi chal li Jeova ti jaʼ bankilal yuʼun soltaroetike,* ti jaʼ li Dios yuʼun Israele: ‹Avilojik skotol li vokoliletik kakʼoj tal ta stojolal li Jerusalene+ xchiʼuk ta stojolal skotol li jteklumetik ta Judae, avi une jinemik xa xchiʼuk chʼabal xa buchʼu te nakal.+ 3 Jaʼ ta skoj li kʼusitik chopol la spasik sventa tsabeikun jole, jaʼo kʼalal bat yakʼbeik milbil matanal+ li yan diosetike xchiʼuk ti tunik ta stojolale, akʼo mi mu xavojtikinik xchiʼuk akʼo mi muʼyuk laj yojtikinik li amoltotakik eke.+ 4 Jech-o la jtak talel ta atojolalik skotol li j-alkʼopetik ti jaʼik kajtuneltake, ep ta velta jech la jpas,* xi laj yalike: «Avokolikuk, mu xa xapasik li kʼusitik toj chopol ti jpʼajoj ta jyalele».+ 5 Pe muʼyuk laj yaʼiik xchiʼuk muʼyuk la stsʼet chikintaik sventa xiktaik spasel li kʼusi chopol ti chakʼbeik milbil matanal li yan diosetike.+ 6 Jaʼ yuʼun, li skapemal jol xchiʼuk li skʼakʼal koʼonton ti solel xtiltune la jmal talel ta stojolal li jteklumetik ta Judae xchiʼuk li ta skayealtak Jerusalene, vaʼun lilijem xchiʼuk xokol kom, jech kʼuchaʼal oy li avie›.+

7 »Avi une, xi chal li Jeova Dios ti jaʼ bankilal yuʼun soltaroetike, li Dios yuʼun Israele: ‹¿Kʼu yuʼun ti chavakʼbe aba avokol atukike? ¿Kʼu yuʼun ti chavakʼik lajuk-o skʼoplal ta Juda li viniketike, li antsetike, li ololetike xchiʼuk li uni kʼoxetik ti chchuʼunik toe? 8 ¿Kʼu yuʼun ti chasabeikun jol ta skoj li kʼusitik chapasike, ti chavakʼbeik milbil matanal yan diosetik li ta yosilal Ejipto ti bu bat naklanike? Ta xlaj akʼoplalik, chavichʼik chopol kʼoptael xchiʼuk chavichʼik labanel yuʼun li mukʼtik lumetik ta balumile.+ 9 ¿Mi yuʼun chʼay xa ta ajolik li kʼusitik toj chopol la spasik li amoltotakike, li kʼusitik toj chopol la spasik li ajvaliletik ta Judae,+ li kʼusitik toj chopol la spasik li yajniltakike+ xchiʼuk li kʼusitik toj chopol la apasik li voʼoxuk eke xchiʼuk li kʼusitik toj chopol la spasik li avajnilike,+ ti te la apasik ta yosilal Juda xchiʼuk ta skayealtak Jerusalene? 10 Muʼyuk sbikʼtajesoj-o sbaik li avie, muʼyuk xiʼtaojikun,* muʼyuk xchʼunojik li kʼusitik kaloje+ xchiʼuk li jmantal ti kalojboxuke xchiʼuk ti kalojbeik li amoltotakike›.+

11 »Jaʼ yuʼun, xi chal li Jeova ti jaʼ bankilal yuʼun soltaroetike, li Dios yuʼun Israele: ‹Kʼotem xa ta nopel kuʼun ti chkakʼ talel vokolil ta atojolalik sventa jlajes sjunul li Judae. 12 Li skomenal* Juda ti jpʼel ta yoʼonton batik ta yosilal Ejipto sventa te xnakiike te chlaj skotolik ta yosilal Ejipto.+ Chlajik ta espada xchiʼuk chlajik ta tsatsal viʼnal. Li buchʼutik tsots skʼoplalike xchiʼuk li buchʼutik muʼyuke koʼol chlajik ta espada xchiʼuk ta tsatsal viʼnal. Chichʼik chopol kʼoptael, ta xakʼ xiʼel li kʼusi chkʼot ta stojolalike, jaʼ skʼelobil chkʼotik ti chopol skʼoplalike xchiʼuk ta xichʼik labanel.+ 13 Ta xkakʼbeik kastigo ta espada, ta tsatsal viʼnal xchiʼuk ta tsatsal chamel li buchʼutik te nakalik ta yosilal Ejiptoe, jech kʼuchaʼal laj kakʼbe kastigo li Jerusalene.+ 14 Jech xtok, li skomenal* Juda ti bat nakiikuk ta yosilal Ejiptoe muʼyuk buchʼu chkol yuʼunik xchiʼuk muʼyuk buchʼu kuxul chkom sventa sut tal li ta yosilal Judae. Oy tajek ta yoʼontonik tsutik tal sventa xnakiik te, pe muʼyuk xa tsutik tal, jaʼ xa noʼox tsutik tal li jayvoʼ chkolik komele›».

15 Skotol li viniketik ti snaʼojik ti chakʼbeik milbil matanal yan diosetik li yajnilike xchiʼuk skotol li ajnilaletik ti te vaʼajtik ti ep stsoboj sbaike xchiʼuk skotol li buchʼutik te nakalik ta yosilal Ejipto+ ta Patrose+ xi la stakʼbeik li Jeremiase: 16 «Muʼyuk ta jchʼunkutik li kʼusi laj avalbunkutik ta sbi Jeovae. 17 Yuʼun jpʼel skʼoplal ta jpaskutik li kʼusi lokʼem ta kekutike, chkakʼbekutik milbil matanal li Meʼ Ajvalil ta Vinajele* xchiʼuk ta jmalbekutik matanal vino.+ Yuʼun jech onoʼox jpasojkutik tal ta jteklumetik ta Juda xchiʼuk ta skayealtak Jerusalen xchiʼuk jech onoʼox spasojik tal li jmoltotakutike, li ajvaliletik kuʼunkutike xchiʼuk li bankilaletik kuʼunkutike, jaʼo kʼalal oy toʼox lek jpankutike xchiʼuk kʼalal oy toʼox ep kʼusitik kuʼunkutike, kʼalal mi jsetʼuk* toʼox chkil jvokolkutike. 18 Ti kʼu xa sjalil muʼyuk chkakʼbekutik milbil matanal li Meʼ Ajvalil ta Vinajele* xchiʼuk ti muʼyuk ta jmalbekutik matanal vinoe, chʼabal xa kʼusi oy kuʼunkutik, lajemunkutik xa ta espada xchiʼuk ta tsatsal viʼnal».

19 Xi laj yalik li antsetik eke: «Kʼalal laj kakʼbekutik milbil matanal li Meʼ Ajvalil ta Vinajele* xchiʼuk kʼalal la jmalbekutik matanal vinoe, ¿mi mu lajuk jakʼbe jmalalkutik kʼalal la jpaskutik pan sventa matanal ti jaʼ slokʼol li Meʼ Ajvalil ta Vinajele xchiʼuk kʼalal la jmalbekutik matanal vinoe?».

20 Vaʼun, li Jeremiase xi laj yalbe skotol li krixchanoetike, li viniketik xchiʼuk yajnilike xchiʼuk skotol li krixchanoetik ti te xvulajetik ta stojolale: 21 «Li milbil matanal laj avakʼik ta jteklumetik yuʼun Juda xchiʼuk ta skayealtak Jerusalene,+ ti te laj yakʼik ek li amoltotakike, li ajvaliletik avuʼunike, li bankilaletik avuʼunike xchiʼuk skotol li krixchanoetik ta jteklume la svules ta sjol li Jeovae, muʼyuk chʼayem ta sjol. 22 Laj une, mu xa stsʼik laj yaʼi Jeova li kʼusitik toj chopol la apasike xchiʼuk li kʼusitik toj ibal sba* la apasike, jaʼ yuʼun lajem kom li alumalike, ta xakʼ xiʼel ti kʼu yelan kome, laj yichʼ chopol kʼoptael xchiʼuk chʼabal xa junuk jnaklej kom, jech kʼuchaʼal oy avie.+ 23 Ti jech kʼotem avokolik li avie, jaʼ ta skoj ti laj avakʼik li milbil matanaletike xchiʼuk ti la asaʼ amulik ta stojolal Jeova kʼalal muʼyuk laj avichʼik ta mukʼ li kʼusitik chal Jeovae, li smantaltake, li kʼusitik la svules ta ajolike xchiʼuk li kʼusitik snopoj tspase».+

24 Li Jeremiase xi to laj yalbe skotol li krixchanoetike xchiʼuk skotol li antsetike: «Judaetik ti te oyoxuk ta yosilal Ejiptoe, chikintaik li kʼusi chal Jeovae. 25 Xi chal li Jeova ti jaʼ bankilal yuʼun soltaroetike, li Dios yuʼun Israele: ‹Li kʼusi lokʼ ta aveik xchiʼuk li kʼusi lokʼ ta ye li avajnilike kʼot xa ta pasel avuʼunik, yuʼun xi laj avalike: «Jpʼel skʼoplal ta jpaskutik ti kakʼoj ke chkakʼbekutik milbil matanal li Meʼ Ajvalil ta Vinajele* xchiʼuk ti ta jmalbekutik matanal vinoe».+ Antsetik, voʼoxuke jpʼel skʼoplal chkʼot ta pasel avuʼunik li kʼusi jamal laj avalike xchiʼuk chapasik li kʼusi avakʼoj ave chapasike›.

26 »Jaʼ yuʼun, judaetik ti te nakaloxuk ta yosilal Ejiptoe, chikintaik li kʼusi chal Jeovae: ‹Xi chal li Jeovae: «Jamal chkal ta jbi ti muʼyuk xa junuk juda vinik ti xi tstunesik jbi ta sjunul li yosilal Ejiptoe:+ ‹¡Jamal chkal ta skoj kuxul Ajvalil Jeova ti jaʼ Mukʼul Jpasmantale!›.+ 27 Avi une, kakʼoj tal jsat ta stojolalik sventa xkakʼbe svokolik, maʼuk sventa slekilalik;+ skotol li juda viniketik ti te oyik ta yosilal Ejiptoe chlajik ta espada xchiʼuk ta tsatsal viʼnal, jaʼ to mi laj skʼoplalik ta j-echʼele.+ 28 Uni jayvoʼ xa noʼox ti muʼyuk chlajik ta espadae xchiʼuk chlokʼik tal ta yosilal Ejipto sventa xtalik li ta yosilal Judae.+ Vaʼun, skotol li skomenal* Juda ti bat nakiikuk ta yosilal Ejiptoe te chakʼik venta buchʼu skʼop ti kʼot ta pasele: ¡mi jaʼ li kʼusi laj kale o mi jaʼ li kʼusi laj yal stukike!»›».

29 «Xi chal li Jeovae: ‹Liʼe jaʼ me senyail avuʼunik ti chkakʼboxuk kastigo li ta jteklum liʼe, sventa xanaʼik ti jpʼel skʼoplal chkʼot ta pasel kuʼun ti kaloj chkakʼ tal avokolike. 30 Xi chal li Jeovae: «Li faraon Ofra ti jaʼ ajvalil ta Ejiptoe chkakʼ ta skʼob li yajkontratake xchiʼuk ta skʼob li buchʼutik tskʼan chmilat yuʼune, jech kʼuchaʼal la jpas ta stojolal li Sedekias ti jaʼ ajvalil ta Judae, ti laj kakʼ ta skʼob li Nabukodonosor* ti jaʼ ajvalil ta Babiloniae, ti jaʼ yajkontrae xchiʼuk ti tskʼan chmilate»›».+