JONAS
1 Li Jonas*+ ti jaʼ xnichʼon Amitaie lik kʼoponatuk yuʼun Jeova, xi albate: 2 «Likan, batan ta Ninive+ ti jaʼ jun mukʼta jteklume, albo yaʼi ti chichʼ lajesele, yuʼun kiloj xa li xchopolilike».
3 Pe li Jonase jatav ta stojolal Jeova, bat ta Tarsis. Yal batel ta Jope, vaʼun te la sta jkot varko ti chbat ta Tarsise. La stoj spasaje, vaʼun la xchiʼin batel li buchʼutik te oyik ta varko ti chbatik ta Tarsise, yuʼun tskʼan ti nom xa oy ta stojolal li Jeovae.
4 Vaʼun, li Jeovae laj yakʼ taluk tsatsal ikʼ li ta nabe, jaʼ yuʼun lik jun mukʼta tsatsal ikʼaloʼ ti jutuk xa mu la slilin li varkoe. 5 Li j-abteletik ta varkoe xiʼik tajek, jaʼ yuʼun lik skʼanbeik vokol sdiosik ta jujuntal sventa xkoltaatik. Sventa mu xa oluk xkom li varkoe, lik sjipik lokʼel li kʼusitik te xkuchojik batele.+ Pe li Jonase jaʼo yalem batel ta yavil ikatsil li ta varkoe. Te xpuchʼanoj sba xchiʼuk batem tajek xchʼulel ta vayel. 6 Li kapitan yuʼun varkoe nopaj batel ta stojolal li Jonase xchiʼuk xi laj yalbee: «¿Kʼu yuʼun ti liʼ noʼox vayalote? ¡Likan, kʼanbo vokol li adiose! Li melel Diose yikʼaluk van xakʼ ta ilel ti kʼuxutik ta yoʼonton sventa mu xijchame».+
7 Vaʼun, xi laj yalbe sbaik ta jujuntale: «Laʼik, kakʼtik suerte+ sventa jnaʼtik buchʼu ta smul li jvokoltike». Vaʼun laj yakʼik li suertee, jaʼ kʼot ta stojolal li Jonase.+ 8 Xi laj yalbeik li Jonase: «Albunkutik, avokoluk, ¿buchʼu ta smul li jvokoltike? ¿Kʼusi avabtel xchiʼuk bu likemot tal? ¿Bu alumal xchiʼuk bu jchopukal utsʼ alalil likemot tal?».
9 Xi la stakʼe: «J-ebreo vinikun, kichʼoj ta mukʼ* li Jeova Dios ta vinajele, jaʼ li buchʼu la spas li nabe xchiʼuk li takin balumile».
10 Vaʼun, li viniketike mas to xiʼik, yuʼun albatik xa onoʼox yuʼun Jonas ti yakal chjatav ta stojolal li Jeovae. Jaʼ yuʼun, xi la sjakʼbeike: «¿Kʼu yuʼun ti jech la apase?». 11 Xi to la sjakʼbeike: «¿Kʼusi ta jpasbotkutik sventa stsʼiji li nabe?». Jech laj yalik ta skoj ti yantik stsatsaj li ikʼaloʼe. 12 Xi takʼbatike: «Toyikun, jipikun yalel sventa stsʼiji li nabe, yuʼun jnaʼoj ti voʼon ta jmul ti jech chavil avokolik ta skoj li tsatsal ikʼaloʼe». 13 Pe li viniketike tsots laj yakʼik persa xlechuik lokʼel* ta takin balumil li svarkoike, pe muʼyuk lokʼ yuʼunik, yuʼun yantik to stsatsaj batel li ikʼaloʼe.
14 Vaʼun, xi la skʼanbeik vokol li Jeovae: «¡Jeova, avokoluk, mu me xichamkutik ta skoj li vinik liʼe! Mu me xavakʼ jmulinkutik ti jech chcham kuʼunkutik li vinik ti chʼabal smule, yuʼun li voʼote, Jeova, laj xa apas li kʼusi tskʼan avoʼontone». 15 Vaʼun, la stoyik li Jonase xchiʼuk la sjipik yalel ta nab, jech tsʼiji li nabe. 16 Kʼalal laj yilik jech kʼot ta pasele, li viniketike lik xiʼtaik* li Jeovae,+ jech oxal laj yakʼbeik matanal xchiʼuk laj yalik ta jamal ti chtunik ta stojolal li Jeovae.
17 Vaʼun, li Jeovae la stak batel jkot mukʼta choy sventa xbikʼat li Jonase. Te echʼ oxib kʼakʼal xchiʼuk oxib akʼobal li ta xchʼut choye.+
2 Vaʼun, kʼalal te oy ta yut xchʼut choy li Jonase,+ la skʼopon li Jeova ti jaʼ Sdiose, 2 xi laj yale:
«Kʼalal oy jvokole, la jkʼanbe koltael li Jeovae, vaʼun la stakʼbun.+
Xi-avet ta skʼanel vokol+ kʼalal te oyun ta yutil* to Mukinale.*
Laj avaʼibun li kʼusi laj kale.
Te lik svolun li syukʼbenaltak nab avuʼune.+
4 Xi laj kale: ‹¡Jipbilun xa lokʼel ta asat!
¿Kʼuxi xa noʼox chkil yan velta li chʼul templo avuʼune?›.
5 La sbalalinun ta jyalel li voʼe, laj yakʼ ta vokol li jkuxlejale;*+
limutʼij* yalel kʼalal to ta xchak li nabe.
La stsʼot sba ta jol li tsʼiʼleletik chchʼi ta yut nabe.
6 Kʼalal to ta yibel vitsetik liyal batel.
Te xa ox bajal likom-o yuʼun li stiʼ balumile.
Pe kuxul la atoyun lokʼel* li ta chʼene, Dios Jeova.+
7 Kʼalal chicham xa laj kaʼie, li buchʼu vul ta jole jaʼ li Jeovae.+
Kʼot ta atojolal li j-orasione, li ta chʼul templo avuʼune.+
8 Li buchʼu chichʼik ta mukʼ li santoetik ti muʼyuk sbalile chiktaik komel li bu chlik talel tukʼil kʼanelale.*
9 Yan li voʼone ta jkʼupil kʼoptaot ta jkʼopojel xchiʼuk ta xkakʼbot milbil matanal.
Ta jpas ta melel li kʼusi laj kalbot ta jpase.+
Li koltaele te chlik talel ta stojolal Jeova».+
10 Ta tsʼakale, li choye albat mantal yuʼun Jeova, jech oxal li choye la xeta lokʼel ta takin balumil li Jonase.
3 Li Jonase lik kʼoponatuk ta xchibal velta yuʼun li Jeovae, xi albate:+ 2 «Totsan batel, batan li ta mukʼta jteklum Ninivee,+ albo yaʼiik li aʼyej ta xkalbot tale».
3 Ta skoj ti la xchʼunbe smantal Jeova li Jonase,+ tots batel, bat li ta Ninivee.+ Li Ninivee jaʼ jun mukʼta jteklum* ti oxib kʼakʼal ta xanel sjunule. 4 Vaʼun, li Jonase och batel li ta jteklume. Jun kʼakʼal xanav batel, xi chalilane: «Leʼ xa noʼox ta 40 kʼakʼal chichʼ lajesel li Ninivee».
5 Pe li krixchanoetik ta Ninive ti tsots skʼoplalik xchiʼuk li buchʼutik muʼyuk tsots skʼoplalike laj yakʼ xchʼunel yoʼontonik ta stojolal Dios.+ Laj yalik ti tspasik ayunoe* xchiʼuk la slapik chʼixal kʼuʼil.* 6 Kʼalal kʼot ta xchikin ajvalil ta Ninive li aʼyej taje, tots ta xchotleb* xchiʼuk la slokʼ li skʼuʼ spokʼ sventa ajvalile. La slap chʼixal kʼuʼil xchiʼuk te bat chotluk ta tantik. 7 Jech xtok, laj yal jun mantal sventa sjunlejal li jteklum Ninivee, xi laj yale:
«Ta smantal ajvalil xchiʼuk li yaj-abteltake chavichʼik albel ti mu xuʼ xveʼ jutebuk mi junuk krixchano, mi jkotuk chonbolom, mi vakax o mi chij. Jech, mu xuʼ xaveʼik mi jaʼuk xuʼ xavuchʼik jutebuk voʼ. 8 Kʼalal ta krixchano xchiʼuk kʼalal ta chonbolom lapik chʼixal kʼuʼil. Tsots kʼanbeik vokol li Diose xchiʼuk iktaik komel li chopol be atamojike. Jech, iktaik skotol li tsatsal utsʼintael chapasike. 9 ¡Yikʼaluk chchaʼnop to* li kʼusi snopoj tspas li melel Diose xchiʼuk tskʼunibtas li skʼakʼal yoʼonton sventa mu xijchame!».
10 Kʼalal laj yakʼ venta melel Dios li kʼusi la spasike, ti laj yiktaik komel li chopol be stamojik batele,+ la xchaʼnop to* li kʼusi chopol snopoj tspasbe jteklume. Jech oxal, muʼyuk xa laj yakʼ taluk ta stojolalik li lajelal yaloje.+
4 Pe taje chopol tajek laj yaʼi li Jonase, jaʼ yuʼun kap tajek sjol. 2 Jech oxal, xi lik skʼopon li Jeovae: «Kʼelavil, Jeova, ¿mi mu jaʼuk li kʼusi la jvul-o koʼonton kʼalal te toʼox oyun ta jlumale chaʼa? Jaʼ yuʼun, lijatav batel ta Tarsis,+ yuʼun jnaʼoj ti oy xkʼuxul avoʼontone, ti oy slekil avoʼontone, ti mu aniluk chlik skʼakʼal avoʼontone, ti oy tukʼil kʼanelal avuʼune+ xchiʼuk ti chajel li kʼusi anopoj sventa muʼyuk xa chavakʼ kastigoe. 3 Jaʼ yuʼun, Jeova, avokoluk, akʼo chamkun, jaʼ lek ti chamkune, jaʼ altik ti kuxulun toe».+
4 Xi la sjakʼ li Jeovae: «¿Mi lek ti vi yelan ilinemot tajeke?».
5 Vaʼun, li Jonase lokʼ batel li ta jteklume, bat chotluk ta stukʼil slokʼeb kʼakʼal yuʼun li jteklume. Te la spas jun axibalna sventa x-axinaj,* vaʼun te choti sventa tsmala kʼusi chkʼot ta pasel ta stojolal li jteklume.+ 6 Laje, li Jeova Diose laj yakʼ chʼiuk jpets tsu* sventa xakʼ yaxinal* ta stojolal li Jonase xchiʼuk sventa x-echʼ yuʼun li svokole. Xkuxet xa tajek yoʼonton laj yaʼi Jonas ta skoj li jpets tsue.
7 Ta sob yokʼomale, li melel Diose laj yakʼ ochuk xchanul li jpets tsue, vaʼun takij ta skoj ti la xkʼuxe. 8 Kʼalal lokʼ talel kʼakʼale, li Diose laj yakʼ taluk kʼixin ikʼ ti te lokʼ talel li ta stukʼil slokʼeb kʼakʼale. Vaʼun, li Jonase chlaj xa ta kʼakʼal xchiʼuk chyal xa ta lum laj yaʼi. Te xvulvun-o ti tskʼan chchame, xi chale: «Jaʼ lek ti chamkune, jaʼ altik ti kuxulun toe».+
9 Xi jakʼbat yuʼun Dios li Jonase: «¿Mi lek ti vi yelan ilinemot tajek ta skoj li jpets tsue?».+
Vaʼun, xi takʼav li Jonase: «Oy jderecho sventa tsots xi-ilin xchiʼuk ti jaʼ xa xicham-oe». 10 Pe xi albat yuʼun li Jeovae: «Kʼux ta avoʼonton ti takij li jpets tsue ti mu voʼotuk la-abtej xchiʼuk ti mu voʼotuk laj avakʼ chʼiuke, ti ta jun noʼox akʼobal chʼi tale xchiʼuk ti ta jun noʼox akʼobal takije. 11 ¿Mi mu jechuk kʼux ta koʼonton xanaʼ ek li Ninivee,+ ti jaʼ jun mukʼta jteklum ti oy mas ta 120 mil krixchanoetik ti mu snaʼik li kʼusi lek xchiʼuk li kʼusi chopole* xchiʼuk ti oy ep xchonbolomike?».+
Jaʼ skʼan xal ‹paloma›.
Literal «jxiʼtaoj».
O «sjam batel sbeik».
Kʼelo Glosario, xiʼtael Dios.
Literal «xchʼut».
O «Seole», jaʼ xkaltik, li mukinal ta komon yuʼun krixchanoetike. Kʼelo Glosario, mukinal.
O «te lik stsʼotun yalel».
Li ta ebreo kʼope jaʼ nefex. Kʼelo Glosario, nefex.
O «limuk; libutʼij».
Literal «la atoy muyel jkuxlejal».
O jaʼ van skʼoplal «stukʼil yoʼontonike».
Literal «mukʼta jteklum ta sat Dios».
Kʼelo Glosario, ayuno.
Kʼelo Glosario, chʼixal kʼuʼil.
O «xchotleb sventa ajvalil».
O «chopol chaʼi sba ta skoj».
O «chopol laj yaʼi sba ta skoj».
O «xkeovaj».
O jaʼ van skʼoplal «chʼupakʼteʼ».
O «skeoval».
O «mu snaʼik bu sbatsʼikʼobik xchiʼuk bu stsʼetkʼobike».