MIKEAS
1 Kʼalal jaʼo ch-ajvalilajik li Jotan,+ Akas+ xchiʼuk Esekias+ ti jaʼ ajvaliletik ta Judae,+ kʼoponat yuʼun Jeova li Mikeas*+ ti likem ta Moresete, jaʼo kʼoponat kʼalal akʼbat yil li kʼusi chkʼot ta stojolal li Samaria xchiʼuk Jerusalene:
2 «¡Chikintao avaʼi akotolik!
Balumil, tsʼetano achikin xchiʼuk voʼoxuk ti te oyoxuke,
li Kajvaltik Jeova ti jaʼ Mukʼul Jpasmantale jaʼ kʼotuk ta testigo ti oy amulike+
—te oy ta xchʼul templo li Jeovae—.
3 ¡Kʼelavilik!, li Jeovae chlokʼ talel ti bu nakale;
chyal talel, te tstekʼan batel yakan ti butik toyajtik ta balumile.
4 Te ch-ul ta yakan li vitsetike,+
chlik javuk li stenlejaltike
jech kʼuchaʼal kʼalal ch-ul ta kʼokʼ li serae,
jech kʼuchaʼal kʼalal ch-ul batel li voʼ ta kʼal vitse.
5 Ti jech chkʼot ta pasele, jaʼ ta skoj li stoyobbail Jakobe,
¿Buchʼu ta smul ti tstoy sba li Jakobe?
¿Mi mu jaʼuk li Samariae?+
¿Buchʼu ta smul ti oy tayal kʼopojebaletik* ta Judae?+
¿Mi mu jaʼuk li Jerusalene?
6 Ta jines li Samariae, te busul chkom kuʼun ta osiltik,
stuk xa xokol balumil chkom sventa te xichʼ tsʼunel uva;
ta jip batel ta stenlejaltik li stanaltake,
vaʼun jaʼ xa noʼox chvinaj kuʼun li snaklebtake.
7 Chichʼ lilinel li lokʼoletik spasoje+
xchiʼuk chkʼakʼ ta kʼokʼ skotol li matanaletik ti jaʼ stojole.*
Ta jlajesbe skʼoplal skotol li lokʼoletik yuʼune.+
Ti jech ep la stsobe, jaʼ ta skoj ti laj yichʼ tojel kʼalal la xchon sbae,
pe ta tsʼakale, li stojole chchaʼkʼot ta stojol jchonbail antsetik».
Jaʼ jech chi-avan ta at-oʼonton jech kʼuchaʼal teʼtikal tsʼiʼetik,
jaʼ jech chi-okʼ jech kʼuchaʼal avestrusetik.
La sta to batel yochebal jteklumal li svokole, kʼot kʼalal to ta Jerusalen.+
10 «Mu xavalik batel ta Gat;
mu me xa-okʼik jutebuk.
Te xabalalin aba ta pukuktik* li ta Bet-Afrae.*
11 Jnaklejetik ta Safir, tʼanal xchiʼuk ta kʼexlal xaxanavik.
Muʼyuk lokʼemik talel li jnaklejetik ta Saanane.
Oy at-oʼonton li ta Bet-Esele, muʼyuk xa buchʼu tskoltaoxuk.
12 Li jnaklejetik ta Marote jaʼ smalaojik li kʼusitik leke,
pe te kʼot ta yochebal Jerusalen li kʼusi chopol lik talel ta stojolal Jeovae.
13 Jnaklejetik ta Lakis,+ chapanik li karetaetik ti jochbil ta kaʼetike.
Voʼot ta amul ti lik saʼ smul li stseb Sione,
voʼot ta akoj ti la stoy sba li Israele.+
14 Jaʼ yuʼun, chbat avakʼbe komel smoton li Moreset-Gate sventa xajip ta avoʼonton.
Toj ep la sloʼlaik ajvaliletik ta Israel li naetik ta Aksibe.+
15 Jnaklejetik ta Maresa,+ ta jtakboxuk talel li jtsalvaneje.*+
Chkʼot kʼalal to ta Adulam+ li yutsilal Israele.
16 Tʼaxpʼuno ajolik, tuchʼo stsotsil ajolik ta skoj ti akʼanoj li anichʼnabike.
Tʼaxluk ajolik kʼuchaʼal aguila,
yuʼun laj xa xchukoxuk batel ta takixokol balumil».+
2 «¡Toj abol sba li buchʼutik tsnop ch-ilbajinvanike,
li buchʼutik tsnopik kʼusitik chopol kʼalal te puchʼul ta stemike!*
Chlik spasik jaʼ noʼox mi sakub tal osile,
yuʼun xuʼ yuʼunik spasel.+
2 Chpichʼ oʼontaik osil, vaʼun chbat spojik;+
chpichʼ oʼontaik naetik, vaʼun chbat spojik;
lek xaʼi chloʼlavanik sventa spojbeik sna li vinike+
xchiʼuk sventa spojbeik li xrextoe.*
3 Jaʼ yuʼun, xi chal li Jeovae:
‹Yakal ta jnop chkakʼbe svokol li utsʼ alalil liʼe,+ pe muʼyuk chakolik ek.+
Chlaj skʼoplal ti xtoyet chaxanavike,+ yuʼun jaʼ xa yorail vokolil.+
4 Li vaʼ kʼakʼale, li krixchanoetike chlik yalik jun pʼijil loʼil ta atojolalik,
chlik okʼikuk ta at-oʼonton ta atojolalik.+
Xi chalike: «¡Laj xa kichʼtik-o tenel komel!+
Laj xa yichʼ jelbel yajval li xrexto* jteklumale —¡kʼuxi xa noʼox ti jech laj kichʼ pojbele!—.+
Jaʼ xa laj yakʼbe kosiltik li buchʼu muʼyuk tukʼ yoʼontone».
5 Li ta stsobobbail Jeovae muʼyuk xa buchʼu x-ayan avuʼun yoʼ spʼis ta chʼojon
li osil sventa xichʼ chʼakele.
6 Xi chalike: «¡Mu xa xavalik batel albil kʼop!
Mu xa xuʼ xalbeik batel skʼoplal;
¡muʼyuk tstautik ta be li kʼexlale!».
7 ¿Mi mu xiuk chavale, snitilulal Jakob:
«¿Mi mu xa xmalaj yuʼun li Jeovae?*
¿Mi jaʼ yabteltak leʼe?»?
¿Mi mu tauk stsatsubtasbat yoʼonton buchʼutik tukʼik li kʼusitik chkale?
8 Pe li avie, lik xa kontrainvanuk li jteklumale.
Jech xtok, ta sat krixchanoetik tspojbeik komel xchiʼuk slujoal* skʼuʼ spokʼik li buchʼutik te chjelavike,
jaʼ li buchʼutik jun yoʼonton te chjelavik jech kʼuchaʼal li buchʼutik jun yoʼonton tsutik tal ta paskʼope.
9 Naka xjochel lokʼel avuʼunik li antsetik te ta jteklumal ti jun yoʼonton te nakalike;
jech xtok, chalokʼesbeikun kutsilal sbatel osil ta stojolal li yalabike.
10 Totsanik, batanik, yuʼun liʼe maʼuk sventa xkuxobil avoʼontonik.
Ta skoj li kʼusitik ibal sbae,*+ oy lajelal, tsots tajek li lajelale.+
11 Oy buchʼu jecheʼ chlik snuts ikʼ, chlik loʼlavanuk xchiʼuk xi chlik sjut kʼope:*
«Chkalboxuk ti oy noʼox avinoik likele xchiʼuk yan poxetik sventa xavuchʼik»,
¡vaʼun li ta jteklume tukʼ xa chkʼot skʼoplal li buchʼu jech chale!+
Jun avavilik chkakʼoxuk jech kʼuchaʼal jun skoralik* li chijetike
xchiʼuk jech kʼuchaʼal kʼalal jmoj chveʼik ta yaxaltike;+
chlik to yichʼ aʼiel ti oy krixchanoetike›.+
13 Jaʼ jbabe chbat yuʼunik li buchʼu tsjam batel bee;
vaʼun te xa tijil chlokʼik talel li ta tiʼ na eke.+
Jaʼ jbabe chbat li ajvalil yuʼunike,
jaʼ jnitvanej yuʼunik li Jeovae».+
3 Xi laj kale: «Aʼio avaʼiik, avokolikuk, joliletik yuʼun Jakob
xchiʼuk voʼoxuk li komandanteoxuk ta jteklum Israele.+
¿Mi mu jaʼuk skʼan xavojtikinik li kʼusi tukʼe?
2 Pe jaʼ apʼajojik li kʼusi leke,+ jaʼ akʼanojik li kʼusi chopole;+
chachobeik snukulil li jteklumale xchiʼuk stuk xa sbakil chivil chkom avuʼunik.+
3 Chatibeik sbekʼtal xtok li jteklumale+
xchiʼuk chachobeik lokʼel li snukulilike,
chakʼasbeik sbakilik, lilijem chkom avuʼunik.+
Jaʼ jech chapasbeik kʼalal oy kʼusi chalakanik ta pʼin* jech kʼuchaʼal kʼalal chalakanik bekʼet ta pʼine.
4 Li vaʼ kʼakʼale, chlik skʼanbeik vokol li Jeovae,
pe muʼyuk chtakʼbatik.
5 Li Jeovae xi chalbe li j-alkʼopetik ti yakal chchʼayik ta be li jteklumale,+
ti xi chalik kʼalal jaʼo oy kʼusi chkʼux* ta stanal yeike:+ ‹Oy jun oʼontonal›,+
pe ti tstsakik ta kʼop kʼalal muʼyuk kʼusi chtikʼbat ta yeike:
6 ‹Oyoxuk ta akʼobaltik,+ muʼyuk kʼusi cha-akʼbat avilik;+
naka ikʼ osil oy ta atojolalik, mu spas avuʼunik li tʼunole.*
7 Chichʼik akʼel ta kʼexlal li viniketik ti oy kʼusi ch-akʼbat yilike+
xchiʼuk muʼyuk xa kʼusi tstaik li jtʼunoletike.*
Skotolik chlik xpix li yisimike,*
yuʼun muʼyuk chtakʼbatik yuʼun li Diose›».
8 Yan li voʼone jaʼ chakʼbun kip li s-espiritu Jeovae,
jaʼ tskoltaun sventa tukʼuk kʼusi jpas xchiʼuk oyuk juʼel
sventa xkalbe Jakob ti jtoybae xchiʼuk sventa xkalbe Israel ti oy smule.
9 Aʼio avaʼiik, avokolikuk, joliletik ta snitilulal Jakob
xchiʼuk voʼoxuk li komandanteoxuk ta jteklum Israele,+
voʼoxuk ti apʼajojik li tukʼilale xchiʼuk ti chaxotpʼinik skotol li kʼusi tukʼe,+
10 ti ta chʼichʼ chavaʼanik li Sione xchiʼuk ti jaʼ chavaʼanik-o Jerusalen li kʼusitik muʼyuk tukʼe.+
11 Li jnitvanejetik* yuʼune chchon sbaik ta takʼin* kʼalal chchapanvanike,+
li paleetik yuʼune tojbil chchanubtasvanik,+
li j-alkʼopetik yuʼune chlik xchanik tʼunol* ta skoj ti tskʼanik takʼine.*+
Pe spatoj yoʼontonik ta stojolal Jeova* xtok, xi chalike:
«¿Mi mu liʼuk xchiʼukutik li Jeovae?+
Muʼyuk chtal jutebuk vokolil ta jtojolaltik».+
12 Jaʼ yuʼun, voʼoxuk ta amulik
ti chichʼ lokel kʼuchaʼal osil li Sione
xchiʼuk tokol chkom slilijemal li Jerusalene,+
li vits ti bu oy li temploe chnoj ta teʼetik.+
4 Li ta slajebaltik kʼakʼale,
li vits ti bu oy sna Jeovae+
jaʼ mas toyol chkʼot kʼuchaʼal li yan vitsetike xchiʼuk lek nakal chkom,
chichʼ toyel muyel ta yakʼol li bikʼtal vitsetike
xchiʼuk te chbatik li jteklumetike.+
2 Epal mukʼtik lumetik te chbatik xchiʼuk xi chalike:
«Laʼik, muykutik batel li ta vits yuʼun Jeovae,
li ta sna Sdios Jakobe.+
Jaʼ ta xchanubtasutik ta sventa li beetik yuʼune
xchiʼuk te chijxanav li ta sbetake».
Yuʼun te chlokʼ tal mantal* li ta Sione
xchiʼuk te chlokʼ tal ta Jerusalen li skʼop Jeovae.
3 Jaʼ chchapan li epal jteklumetike+
xchiʼuk jaʼ tsbeiltas li mukʼtik lumetik ti lek xuʼ yuʼunik ti nom to oyike.
4 Ta jujuntal te chchoti* ta yolon steʼel s-uvaik xchiʼuk ta yolon steʼel s-igoik,+
muʼyuk buchʼu tsibtasatik,+
yuʼun jaʼ lokʼ ta ye stuk Jeova ti jaʼ bankilal yuʼun soltaroetike.*
5 Skotol li yantik jteklume ta sbi sdios stukik chanavik,
yan li voʼotike sbatel osil chijxanavutik ta sbi li Jeova Dios kuʼuntike.+
6 Xi chal li Jeovae: «Li vaʼ kʼakʼale,
ta jtsob tal li koxoetike,
li buchʼutik tanpuk oyike+
xchiʼuk li buchʼutik tsots laj kakʼbeik svokole.
7 Jaʼ skomenal* chkʼot kuʼun li koxoetike,+
chkʼot ta tsatsal lum kuʼun li buchʼutik nom to oyike;+
li Jeovae te to ta vits Sion chlik sventain talel,
avi xchiʼuk kʼalal to ta sbatel osil.
8 Voʼot li tayal kʼelob osil sventa chijetike,
li tsopajtik ton yuʼun stseb Sione,+
chchaʼtal ta melel li baʼyel ajvalil avuʼune,+
jaʼ li ajvalilal* ti te chlik talel ta stojolal li stseb Jerusalene.+
9 Li avi une, ¿kʼu yuʼun ti xa-avet noʼoxe?
¿Mi yuʼun chʼabal ajvalil avuʼun?
¿Mi yuʼun cham li jtojobtasvanej avuʼun
ti mu xa x-echʼ xkʼuxul chavaʼi jech kʼuchaʼal jun ants ti kʼalal ch-alaje?+
10 Baletan ta xkʼuxul xchiʼuk avetan, stseb Sion,
jech kʼuchaʼal jun ants ti ch-alaje,
yuʼun chalokʼ batel li ta jteklume, ta osiltik xa chbat naklan.
Kʼalal to ta Babilonia chabat,+
vaʼun te to chavichʼ pojel lokʼel tal,+
te to chbat xchaʼmanot lokʼel Jeova ta skʼob li avajkontratake.+
11 Chlik skontrainikot li mukʼtik lumetike;
xi chalike: ‹Akʼo yichʼ sokesel,
chkil to ta jsatik ti jech chichʼ pasbel li Sione›.
12 Pe mu snaʼik li kʼusi tsnop Jeovae,
mu xaʼibeik smelolal li kʼusi tskʼan tspase;*
yuʼun jech chichʼik tsobel jech kʼuchaʼal chichʼ tsobel li jchol sat tsʼunobil ti te chichʼ akʼel ta yikʼaobile.
13 Likan, stseb Sion, majo li sbekʼ tsʼunobile;+
yuʼun ta jkʼatajes ta tsatsal takʼin li axulubtake,
ta jkʼatajes ta kovre li avoytake,
Chavakʼbe Jeova skotol li kʼusi la staik ta skoj ti chloʼlavanike,
li kʼusitik oy yuʼunike jaʼ chavakʼbe li Yajval spʼejel balumile».+
5 «Tseb, avie yakal chaboj aba,
yuʼun yakal tstsakoxuk ta kʼop;
joyobtabilutik sventa stsakutik ta kʼop.+
Tsjisbeik vachʼ ta xokon sat li jchapanvanej yuʼun Israele.+
ti batsʼi bikʼitot ti te kapalot li ta smilal xa noʼox yuʼun Judae,
te chlokʼ tal ta atojolal li buchʼu tspas mantal kuʼun ta Israele,+
voʼne xa onoʼox likem stsʼunbal, ep xa onoʼox kʼakʼal te oy.
3 Jaʼ yuʼun, li Diose chikta komel li steklumale
jaʼ to mi vokʼ yol li buchʼu albil skʼoplal chvokʼ yole.
Li yan xchiʼiltake ta sutik batel li ta steklumal Israele.
4 Li buchʼu chvokʼe jaʼ ta xlik, vaʼun ta sjuʼel Jeova chkʼot ta jchabichij,+
ta xlik stsak yabtel ta smukʼulal sbi li Jeova Dios yuʼune.
Mi tal spoj kosiltik li j-asiriaetike xchiʼuk mi tal xpechʼ ta tekʼel li tsatsal tayal kʼelob osil kuʼuntike,+
chlik jvaʼantik vukvoʼ jchabichijetik sventa xbat stsakik ta kʼop, jech, ta jvaʼantik vaxakvoʼ jnitvanejetik ta balumil.
6 Jaʼ chbat stsakik ta kʼop xchiʼuk s-espadaik li yosilal Asiriae+
xchiʼuk li ta jujun yochebal yosil Nemrode.+
Jaʼ tspojutik lokʼel ta skʼob li j-asiria vinik+
mi tal spoj li kosiltike xchiʼuk mi tal xpechʼilan ta tekʼel li jlumaltike.
7 Li skomenal* Jakobe te chkʼotik ta jujun jteklum
ti xkoʼolajik kʼuchaʼal tsʼujul ti likem tal ta stojolal Jeovae,
xkoʼolajik kʼuchaʼal tsatsal voʼ ti chkʼot ta tsʼiʼleltike
ti muʼyuk spatoj yoʼonton ta stojolal junuk vinike,
mi jaʼuk spatoj yoʼonton ta stojolal li xnichʼnabtak viniketike.
8 Li skomenal* Jakobe te chkʼotik ta jujun mukʼtik lum,
te chkʼotik ta jujun jteklum,
jech kʼuchaʼal jkot leon ti te xkotet ti bu oy jtiʼvanej chonbolometik ta teʼtike,
jech kʼuchaʼal chʼiom leon* ti te xkotet ti bu oy chijetike,
ti te ch-echʼ batel ti bu oy li chijetike, xjipet noʼox ta stsakel xchiʼuk tslilinan ta tiʼel;
muʼyuk buchʼu chpojbat lokʼel ta skʼob.
9 Ayeʼoj noʼox akʼob ta stojolal li avajkontratake,
chichʼik lajesel ta j-echʼel skotol li avajkontratake».
10 Xi chal li Jeovae:
«Li vaʼ kʼakʼale, ta jchʼaybe stsʼunbal li akaʼtake, ta jlilin ta j-echʼel li akaretatake.
11 Ta jlajes li jteklumetik te oy ta avosile,
ta jines skotol li tsatsal pojobbailetik avuʼune.
12 Ta jchʼaybe skʼoplal li akʼchamel chapase,*
ta jchʼaybe stsʼunbal li buchʼutik chchanik majia te ta alumale.+
13 Ta jlilin li lokʼoletik apasoje xchiʼuk ta jlilin li vaʼanbil tonetik avuʼune,
vaʼun muʼyuk xa chanijan aba ta stojolal li yabtel akʼobe.+
15 Ta skapemal jol xchiʼuk ta skʼakʼal koʼonton chkakʼbe stoj
li mukʼtik lumetike, yuʼun mu skʼan xchʼunik
mantal».
6 Avokoluk, jteklum, chikintao avaʼi li kʼusi chal Jeovae.
Likan, bat kʼano chapanel ta yeloval li vitsetike,
akʼo yaʼi bikʼtal vitsetik li kʼusi chavale.+
2 Chikintao avaʼiik, vitsetik, li kʼusi tskʼan-o chapanel li Jeovae,
voʼoxuk li snakleboxuk balumile,+
yuʼun li Jeovae tstikʼbe smul li steklumale,
jaʼ oy skʼop xchiʼuk li Israele:+
3 «Jteklumal, ¿kʼusi chopol la jpasbot?
¿Kʼusi ti tavan xavaʼi kuʼune?+
Alo kaʼitik li jmule.
4 Voʼon la jlokʼesoxuk tal li ta yosilal Ejiptoe,+
la jmanoxuk lokʼel li ta snail mosoile;+
la jtakboxuk tal ta atojolalik li Moises, Aaron xchiʼuk Miriame.+
5 Jteklumal, avokoluk, vuleso ta ajol li kʼusi la xchapan ox li ajvalil Balak ta Moabe+
xchiʼuk li kʼusi la stakʼ Balaam xnichʼon Beore+
—jaʼ li kʼusi kʼot ta pasel ta Sitim+ kʼalal to ta Guilgale—+
sventa xanaʼik ti tukʼ li kʼusitik tspas Jeovae».
6 ¿Kʼusi chkichʼbe batel sventa xbat jkʼel li Jeovae?
¿Kʼusi chkichʼbe batel sventa xbat jnijan jba ta stojolal li Dios ta toyole?
¿Mi chkichʼbe batel ta chikʼbil matanal
chʼiom tot vakaxetik ti jun to jabil yichʼojike?+
7 ¿Mi lek van chaʼi Jeova mi ta smilal noʼox tot chij chkakʼbee
xchiʼuk ti chkakʼbe epal aseitee?+
¿Mi chkakʼbe li sba jnichʼon ta skoj li jtoyobbaile,
mi chkakʼbe li jnichʼon ta skoj li jmule?+
8 Krixchano, yalojbot Dios li kʼusi lek ta pasele.
¿Kʼusi tskʼanbot ti akʼo xapas* li Jeovae?
¡Jaʼ ti xapas li kʼusi tukʼe,*+ ti tukʼuk-o xavakʼ abae*+
xchiʼuk ti bikʼituk xavakʼ aba kʼalal chaxanav+ xchiʼuk li Adiose!+
Chikintaik kʼusi chal li vachʼe xchiʼuk li Dios ti jaʼ la svaʼane.+
10 Li ta sna li buchʼu toj chopole, ¿mi oy to te kʼejel* li kʼulejal laj yichʼ tael ta skoj li kʼusi chopol laj yichʼ pasele
xchiʼuk mi oy to te junuk ibal sba* efa* ti muʼyuk tsʼakale?
11 ¿Mi sak to van jtalelal* mi muʼyuk tsʼakal li jkilo ta jtunese
xchiʼuk mi ch-elkʼanvan li stanal jkiloe?+
12 Yuʼun li jkʼulejetik yuʼune naka choplejal tspasik,
naka jut kʼop* tspasik li jnaklejetik yuʼune;+
lek xloʼlavan li yokʼik ti te sukul ta yeike.+
13 «Jaʼ yuʼun, yayijem chakom kuʼun mi la jmajote,+
xokol chakom kuʼun ta skoj li amultake.
Li kʼusi chavichʼ batele muʼyuk lek chkʼot avuʼun,
mi lek kʼot avuʼun xtoke, chkakʼbe ta skʼob li avajkontratake.
15 Chatsʼunolaj, pe muʼyuk chatsobbe sat.
Chatʼus ta avakan li sat olivae, pe muʼyuk chatunesbe li s-aseiteale;
chapas achʼ vino, pe muʼyuk chavuchʼ vino.+
16 Yuʼun jaʼ chachʼunbeik smantal li Omrie xchiʼuk jaʼ chapasik skotol li kʼusi tspas snitilulal Akabe,+
jaʼ lek chavaʼi chachʼunik li tojobtasel chakʼike.
Jaʼ yuʼun, chiʼik-o avuʼun yantik ta skoj li kʼusitik chopol chanuptane
xchiʼuk chlik piobajikuk* ta stojolal li jnaklejetik yuʼune;+
voʼoxuk chavichʼik pʼajel yuʼun li yan jteklumetike».+
7 ¡Toj abol jba! Xikoʼolaj kʼuchaʼal li buchʼu
chbat skʼel mi oy kʼusi sta mi laj xa ox yichʼ tsobel li kʼusi chlokʼ ta veranoe,*
ti chbat xkʼuxkʼulta* mi laj xa ox stsobik li uvae,
pe ti muʼyuk tsta jchojuk uva sventa slajese,
mi jaʼuk sat igo ti sob chlokʼ ti ta jloʼ tajek kaʼie.
2 Chʼay xa stsʼunbal* ta balumil li buchʼu tukʼ chakʼ sbae,
muʼyuk xa buchʼu ti oy kʼusi tukʼ tspase.+
Tsnakʼ* sbaik sventa smalik chʼichʼ.+
Ta jujuntal tsyakik ta nutiʼ sventa stsakobil choy li xchiʼilik ta vokʼele.
3 Li skʼobike xchanoj lek spasel li kʼusi chopole;+
li bankilale tskʼan ta persa smoton,
li jchapanvaneje tskʼan stojol,+
li buchʼu tsots skʼoplale chakʼ ta ojtikinel li kʼusi oy ta yoʼontone,+
jmoj chchap skʼopik.*
4 Li buchʼu lek xtojob yuʼunike xkoʼolaj kʼuchaʼal chʼix,
li buchʼu mas tukʼ yuʼunike mas to chopol kʼuchaʼal koral* ti pasbil ta chʼixe.
Chkʼot skʼakʼalil li kʼusi laj yal li jkʼel-osiletik ta toyol avuʼune, tsta yorail ti chachapanvane.+
Vaʼun, ch-och xiʼel ta yoʼontonik.+
5 Mu xachʼunbeik kʼusi chal li achiʼilike
mi jaʼuk xapat avoʼontonik ta stojolal li avamigoik ti mas lek xavil aba achiʼukike.+
Kʼelo me kʼusi chavalbe li buchʼu te napʼal ta stiʼ avoʼontone.
6 Yuʼun tspʼaj stot li nichʼonile,
tskontrain smeʼ li tsebe+
xchiʼuk tskontrain smeʼalib* li alibale;+
te noʼox ta sna chlokʼ yajkontratak li vinike.+
7 Pe li voʼone lek vikʼil jsat ta stojolal li Jeovae.+
Chkakʼ ta ilel smalael kuʼun* ta stojolal li Dios ti jaʼ jkoltavanej kuʼune.+
Chchikintabun li Jdiose.+
8 Kajkontra,* mu me xkuxetuk xa avoʼonton ta jtojolal.
Yuʼun manchuk mi lilom, chitots likel;
manchuk mi ta ikʼ osil oyun, jaʼ chkʼot ta lus kuʼun li Jeovae.
9 Ta jtsʼikbe li skʼakʼal yoʼonton Jeovae
—yuʼun laj xa jta jmul ta stojolal—+
jaʼ to mi tal spakbun jkʼoplal mi laj kichʼ chapanele, tukʼ chchapanun.
Te chikʼun batel ti bu oy luse;
chkil ta jsat ti tukʼ kʼusitik tspase.
10 Chil ta sat ek li kajkontrae,
jaʼ pixil chkom ta kʼexlal li buchʼu xi laj yalbune:
«¿Bu oy li Jeova Dios avuʼune?».+
Chkil ta jsat li kʼusi tsnuptane.
Jaʼ xa chichʼ pechʼilanel ta tekʼel jech kʼuchaʼal li achʼel ta kayetike.
11 Jaʼo skʼakʼalil chlik avaʼan ta ton li amurotake;
li vaʼ kʼakʼale, ta to xjam batel ti bu kʼalal stsʼaktak li osile.*
12 Li vaʼ kʼakʼale, te to ta Asiria xchiʼuk ta jteklumetik yuʼun Ejipto
chlikik talel li buchʼutik chtal skʼelote,
te chlikik talel ta Ejipto kʼalal to ta Ukʼum,*
te chlikik talel ta jujujot stiʼiltak nab xchiʼuk ta jujujot vitsetik.+
13 Li lume xokol chkom ta skoj smul li jnaklejetik yuʼune,
jaʼ ta skoj li kʼusitik la spasike.*
14 Mako batel ta avachʼ li ateklumal jech kʼuchaʼal tspas li jchabichije,+ jaʼ li chijetik ti kʼotem ta arextoe.*
Jaʼ li buchʼu stuk toʼox te nakal ta yut teʼtike —te ta oʼlol li kʼusitik tsʼunbile—.
Te akʼo smakʼlin sbaik ta Basan xchiʼuk ta Galaad+ jech kʼuchaʼal ta voʼnee.
15 «Chkakʼbe yil kʼusitik labal sba
jech kʼuchaʼal kʼalal lalokʼ talel ta yosilal Ejiptoe.+
16 Chil ta satik li mukʼtik lumetike xchiʼuk chlik kʼexavikuk manchuk mi lek xuʼ yuʼunik.+
Tsmak ta skʼob li yeike
xchiʼuk chmak li xchikinike.
17 Chlik sloʼik lum jech kʼuchaʼal kiletel chonetik;+
xtʼelelet* xa chlokʼik talel ta snakʼobbailik jech kʼuchaʼal li chonetik ti xkilet ta lumtik chanavike.
Solel xiʼemik xa tajek chtalik ta stojolal li Jeova Dios kuʼuntike,
vaʼun chiʼik avuʼun».+
18 ¿Mi oy yan Dios jech kʼuchaʼal li voʼote
ti chchʼay ta yoʼonton li mulile+ xchiʼuk ti muʼyuk tstsak ta venta li stoyobbail skomenal* xrextoe?*+
Mu teuk-o tsanal skʼakʼal yoʼonton sbatel osil,
yuʼun jaʼ tskʼupin li tukʼil kʼanelale.+
19 Chlik to xkʼuxubinutik yan velta;+ jaʼ tstsal* li jmultike.
Ta yutil to nab chbat ajipbe skotol li smulike.+
20 Tukʼ chavakʼ aba ta stojolal li Jakobe,
chavakʼbe ta ilel tukʼil kʼanelal li Abraane,
jech onoʼox kʼuchaʼal jamal laj avalbe li jmoltotakutike.+
Taje jaʼ skomkom bi Miguel ti jaʼ skʼan xal ‹¿buchʼu xkoʼolaj jech kʼuchaʼal li Diose?› o Mikaya ti jaʼ skʼan xal ‹¿buchʼu xkoʼolaj jech kʼuchaʼal li Jeovae?›.
Literal «sna».
Kʼelo Glosario, tayal kʼopojebal.
O «ti jaʼ stojol kʼalal la xchon sbae».
O «vix-akan; chʼabal jxonob».
O «lumtik».
O «li ta sna Afrae».
O «li buchʼu tspoj kʼusitik oy avuʼunike».
O «svayebike».
O «spukulale; spartee».
O «spukulal; sparte».
O «¿Mi mu xa xmalaj yuʼun li s-espiritu Jeovae?».
O jaʼ van skʼoplal «tspojbeik komel slujoal».
Kʼelo Glosario, ibal sba.
O «snop kʼope; epal kʼopojuke».
O «skomelal».
O «smokalik».
O «jpʼej pʼin ti lek mukʼ stiʼe».
O jaʼ van skʼoplal «kʼalal jaʼo oy kʼusi tsmatsʼ».
Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
O «tsmuk».
Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
O «smak li yeike».
Literal «joliletik».
O «tstsakik michʼob kʼabal».
Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
O «platae».
O «Pe ta alele spatoj la yoʼontonik ta stojolal Jeova».
O «chanubtasel».
Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.
O «Li jun mukʼta lume muʼyuk xa tstsak s-espada ta skontrainel li yan mukʼta lume».
O «te chnaki».
Kʼelo Glosario, Jeova ti bankilal yuʼun soltaroetike.
O «skomelal».
Kʼelo Glosario, ajvalilal.
O «li tojobtasel yuʼune».
O «lum».
O «skomelal».
O «skomelal».
O «chʼiom leon ti xtinlajet sjol».
Literal «ta akʼobe».
Kʼelo Glosario, chʼul poste.
O «tskʼanbot sutel».
O «tukʼukote».
O «ti oyuk slekil avoʼontone xchiʼuk ti tukʼuk xakʼanvane». Literal «ti xakʼan li tukʼil kʼanelale».
Kʼelo Glosario, xiʼtael Dios.
O «nakʼal».
Kʼelo Glosario, ibal sba.
Kʼelo Apendise B14.
O «Mi muʼyuk van jmul».
O «nop kʼop; epal kʼop».
O «xchʼoʼet».
O «xuxubajikuk».
Jaʼ xkaltik, yorail kʼepelaltik.
Kʼelo Glosario, kʼuxkʼultael.
O «Ul xa batel».
O «Tsmuk».
Literal «jmoj kʼusi tsjalik».
O «mok».
O «smel-alib».
O «Oy tajek smalael kuʼun».
Kʼalal «kajkontra» xi li ta ebreo kʼope, jaʼ skʼoplal jun ants.
O jaʼ van skʼoplal «nom to ta xkʼot li mantale».
Jaʼ xkaltik, li Eufratese.
Literal «jaʼ ta skoj li sat yabtelike».
O «apukulale; apartee».
O «chnikik; chbakʼik».
O «skomelal».
O «spukulale; spartee».
O «jaʼ chpechʼ ta tekʼel».