NAUM
1 Liʼe jaʼ jun aʼyej ta sventa li Ninivee:+ jaʼ li livro ti chalbe skʼoplal li kʼusi laj yichʼ akʼbel yil Naum* ti jaʼ j-elkos vinike:
2 li Jeovae jaʼ jun Dios ti stuk noʼox ta skʼan ichʼel ta mukʼe+ xchiʼuk ti tspak sutele;
li Jeovae ta spak sutel xchiʼuk chapal xa sventa xakʼ ta ilel li skapemal sjole.+
Li Jeovae ta spakbe sutel li yajkontratake
xchiʼuk stsoboj skʼakʼal yoʼonton ta stojolal li yajkontratake.
3 Li Jeovae mu ta aniluk snaʼ x-ilin+ xchiʼuk toj echʼem sjuʼel,+
pe li Jeovae persa onoʼox chakʼbe kastigo li buchʼu tsaʼ smule.+
Kʼalal chanave, xvoʼoʼet noʼox yuʼun ikʼ xchiʼuk tsatsal ikʼaloʼ,
Ta xtakij li kʼusitik chʼiem ta Basan xchiʼuk ta Karmeloe+
xchiʼuk ta xtakij li nichimetik ta Libanoe.
5 Li vitsetike ta xnikik ta stojolal
xchiʼuk li bikʼtal vitsetike ta x-unijik yalel.+
Li balumile ta xnik ta stojolal,
li jteklum xchiʼuk skotol li buchʼutik te nakalike ta xnikik ek.+
6 ¿Buchʼu van xuʼ te vaʼal xkom kʼalal kapem sjole?+
¿Buchʼu van xkuch yuʼun kʼalal xtiltun skʼakʼal yoʼontone?+
Li skapemal sjole ta xtil kʼuchaʼal li kʼokʼe
xchiʼuk jaʼ ta skoj ti chlilij li mukʼta tonetike.
7 Toj lek yoʼonton li Jeovae,+ jaʼ jun tsatsal pojobbail li ta skʼakʼalil vokolile.+
Chchabi* li buchʼutik tsaʼ snakʼobbailik ta stojolale.+
8 Ta jun nojelal ta voʼ ta sbekʼ* batel, ta stupʼbe skʼoplal ta j-echʼel te ta yavil*
xchiʼuk chichʼik nutsel ta ikʼal osil li yajkontratake.
9 ¿Kʼusi van chopol xuʼ xlik anopik ta stojolal li Jeovae?
Li stuke chlajesvan ta j-echʼel.
Muʼyuk xa chtal vokolil yan velta.+
10 Yuʼun li jnaklejetik ta Ninivee jechik kʼuchaʼal li chʼix ti stsʼotoj sba leke
xchiʼuk xkoʼolajik kʼuchaʼal li buchʼutik yakubemik ta skoj servesae;*
pe ta xkʼakʼik kʼuchaʼal takin jobel.
11 Te chlik tal ta atojolal li buchʼu oy kʼusi chopol tsnop ta stojolal Jeovae,
chakʼ tojobtasel ti mu kʼusi xtun-oe.
12 Xi chal li Jeovae:
«Akʼo mi tsots toʼox yipik xchiʼuk epik tajek li j-asiriaetike,
ta onoʼox xichʼik kʼokel lokʼel xchiʼuk chichʼik tsakel ta kʼop.*
Laj kakʼ toʼox avokol Juda, pe muʼyuk xa mas chkakʼ avokol.
13 Li avie, ta jkʼasbe li skʼatlom teʼ Asiria ti te oy ta atojolale+
xchiʼuk ta jtuchʼ ta oʼlol li achukobiltake.
14 Ninive,* xi yaloj mantal ta atojolal li Jeovae:
‹Muʼyuk te chkom-o li abie.
Ta jlajesbe skʼoplal li santoetike xchiʼuk li lokʼoletik ti pasbil ta unijesbil takʼin ti te oy ta sna* li adiostake.
Ta jpas amukinal, yuʼun solel pʼajbilot›.
15 ¡Kʼelavil! Te tekʼel yakan ta ba vitsetik li buchʼu yichʼoj talel lekil aʼyejetike,
ti chalbe skʼoplal jun oʼontonale.+
Juda, paso li kʼinetik avuʼune+ xchiʼuk kʼotuk ta pasel avuʼun li kʼusi avaloje,
yuʼun li chopol krixchanoetike muʼyuk xa chtal stsakot ta kʼop.
Ta xichʼik lajesbel skʼoplalik ta j-echʼel».
2 Ninive, muy xa talel ta atojolal li buchʼu tanpuk chabat yuʼune.+
Chabio li muroetike.
Chabio li bee.
Chapano aba ta paskʼop xchiʼuk tsobo tal skotol li avajsoltarotake.
2 Yuʼun li Jeovae chakʼbe yan velta yutsilal li Jakobe
xchiʼuk chakʼbe yutsilal li Israele.
Yuʼun lajesatik* yuʼun li jkontrainvaneje+
xchiʼuk lajesbatik li skʼelomtakike.
3 Li s-eskudo* sviniktak ti lek tsotsike bonbil ta tsoj,
li yajsoltarotake kuxul tsoj li skʼuʼ spokʼ slapojike.
Li stakʼinaltak skaretaik sventa paskʼope xnopʼopʼet kʼuchaʼal kʼokʼ
li ta yorail kʼalal chchapan sbaik ta paskʼope,
jech xtok, tsjimulanik li lansaetik ti pasbil ta enebro teʼe.
4 Li karetaetik sventa paskʼope solel xjipetik talel ta anil li ta kayeetike.
Xyal xmuyik noʼox ta anil li ta chʼivitetike.*
Xojobinajik noʼox kʼuchaʼal toj ti tsanem skʼakʼale xchiʼuk xjaplajetik* kʼuchaʼal saksevul.*
5 Li ajvalile ta stsob li tsatsal jpaskʼopetik yuʼune.
Chmak* yakanik kʼalal jaʼo chanavik batele.
Chbatik ta anil ti bu oy li smuroal jteklume;
lek tsots li smakobbail chakʼbeike.
6 Chichʼ jambel sbe li ukʼumetike
xchiʼuk ta xlom yalel li pasob mantale.
7 Yichʼoj xa nopel li kʼusi chkʼot ta stojolale: laj xa yichʼ tʼananel,
ta xichʼ ikʼel batel xchiʼuk ta x-okʼ li skiaratake;
kʼalal jaʼo tsmaj stiʼ yoʼontonike, xvuʼetik* ta okʼel kʼuchaʼal paloma.
8 Ti kʼu xa sjalil oy li Ninivee+ xkoʼolaj kʼuchaʼal stankeal voʼ,
pe li avie, ta xa xmal lokʼel li voʼe.
Oy junantik ti xi chaptaike: «¡Pajan to! ¡Pajan to!».
Pe muʼyuk tsut talel.+
9 ¡Pojik batel plata, pojik batel oro!
Yuʼun muʼyuk xa noʼox spajeb li skʼulejale,
jmoj te tsobbil xchiʼuk li jeltos kʼusitik ep sbalile.
10 ¡Li jteklume xokol kom, jinem kom xchiʼuk lilijem kom!+
Lik xiʼuk li yoʼontonike, lik xpux sba li sjol yakanike xchiʼuk lik nikuk li xchukbenalike;*
sakpakʼan kom sat skotolik.
11 ¿Bu oy li snakʼobbail leonetike, ti jaʼ te chveʼik li chʼiom leonetike,*+
ti jaʼ te tsbeiltas lokʼel tal xnichʼon li leone,
ti muʼyuk buchʼu tsibtasatike?
12 Li tot leone ep tajek la slilinbe tal ta tiʼel sveʼel li xnichʼnabe
xchiʼuk la smilbe tal sveʼel li meʼ leonetik yuʼune.
Noj yuʼun ta veʼlil li snae,
ti bu tsnakʼ* sbae noj ta chonbolometik ti smilojane.
13 Xi chal li Jeova ti jaʼ bankilal yuʼun soltaroetike:* «¡Kʼelavil! Ta jtsakot ta kʼop,+
ta jchikʼ ta kʼokʼ li akaretatak sventa paskʼope,+
chlajik ta espada li chʼiom leonetik avuʼune.*
Ta jpojbot li kʼusi ataoj ta tsakele
xchiʼuk muʼyuk xa chichʼ aʼibel yechʼomal ye li j-almantaletik avuʼune».+
3 ¡Toj abol sba li jmalchʼichʼ jteklume!
Solel noj ta jloʼlavanej xchiʼuk ta j-elekʼ.
¡Mi jsetʼuk* chikta sba ta spojel batel li kʼusitike!
2 Xkaʼi ti kʼu to yelan stsʼitlajet* li nukule xchiʼuk ti kʼu to yelan xchakʼlajet li syantailtak karetae
xchiʼuk laj kil kʼu yelan chlik anilajuk li kaʼe xchiʼuk ti kʼu yelan toyolik chvil li karetae.
3 Laj kil li jkajlej ta kaʼe, li espada ti stsʼayayet noʼoxe xchiʼuk li lansa ti stsʼayayet noʼox xojobale,
mu xa noʼox albajuk yepal ti buchʼutik lajike xchiʼuk solel busul noʼox li animaetike,
buyuk xa noʼox telajtik.
Li krixchanoetike ta smak-o* yakanik li animaetik ti te telajtike.
4 Taje jaʼ ta skoj ti mu xa noʼox albajuk la xchon sba li jchonbail antse,
jaʼ li buchʼu toj kʼupil sba xvinaje xchiʼuk ti toj alakʼ sbae, ti jaʼ meʼ j-akʼchamele,
jaʼ li buchʼu tsloʼla mukʼtik lumetik ta skoj ti chchon sbae xchiʼuk ti tsloʼla jteklumetik ta skoj ti chakʼ chamele.
5 Xi chal li Jeova ti jaʼ bankilal yuʼun soltaroetike:* «¡Kʼelavil! Ta jtsakot ta kʼop,*+
ta jvalkʼun muyel kʼalal to ta asat li akʼuʼ apokʼe;
chkakʼ ti xilik mukʼtik lumetik ti tʼanalote
xchiʼuk ti xilik jteklumetik ti ta kʼexlal lakome.
7 Skotol li buchʼutik ta xilikote ta xjatavik avuʼun+ xchiʼuk xi chalike:
‹¡Laj xa yichʼ lajesel li Ninivee!
¿Buchʼu van chkʼuxubaj ta yoʼonton?›.
¿Bu van ta jta talel ti buchʼu xuʼ spat avoʼontone?
8 ¿Mi voʼot mas to xjelav alekil kʼuchaʼal li No-Amon*+ ti te toʼox chchoti ta xokon yoktak ukʼum Niloe?+
Li stuke joyol toʼox ta voʼ;
jaʼ toʼox skʼulejal li nabe xchiʼuk jaʼ toʼox smuroal li nabe.
9 Li ta Etiopia xchiʼuk ta Ejiptoe jaʼ toʼox te chlik talel li sjuʼel ti muʼyuk spajebe.
Li Put+ xchiʼuk jlibiaetike jaʼ toʼox avajkoltavanejtak.+
10 Pe laj yichʼ chukel batel li No-Amon eke;
laj yichʼ ikʼel batel.+
Li yalabtak eke laj yichʼik bojilanel ta jujun xchikin kayeetik.
Laj yichʼ akʼel suerte ta stojolal li sviniktak ti ichʼbilik toʼox lek ta mukʼe
xchiʼuk skotol li sviniktak ti tsots skʼoplalike laj yichʼik chukel batel ta kadena.
Chasaʼ anakʼobbail ta skoj li jkontrainvaneje.
12 Skotol li nakʼobbailetik avuʼune xkoʼolaj kʼuchaʼal steʼel igo ti tokʼonik xa li sba sate;
mi laj yichʼ lilinele, tikʼil chkʼot ta ye li buchʼutik tslajese.
13 ¡Kʼelavil! Li avajsoltarotake xkoʼolajik kʼuchaʼal antsetik.
Li yochebaltak alumale ta xichʼ jambel xchaʼpechal stiʼ sventa x-och li avajkontratake.
Chkʼakʼ ta kʼokʼ li skʼatlom teʼaltak ochebaletik avuʼune.
14 Lupo avaʼal sventa xachapan aba mi tal avichʼ setuele.+
Tsatsubtaso li anakʼobbailtake.
Ochan batel li ta achʼeltike xchiʼuk pechʼilano ta tekʼel li achʼele;
paso ladriyoetik.
15 Akʼo mi jech, ta onoʼox xalaj ta kʼokʼ.
Ta xalaj ta espada.+
Ta slajesoxuk jech kʼuchaʼal chlajesvan li chʼiom kʼulubetike.+
¡Epajan tajek kʼuchaʼal li chʼiom kʼulubetike!
Jech, ¡epajan tajek kʼuchaʼal li chʼiom kʼulubetike!
16 Solel epajem li jpʼolmajeletik avuʼune, jaʼ xkom to yepal li kʼanaletik ta vinajele.
Li chʼiom kʼulube ta xpoch lokʼel li snukulile, vaʼun chvil batel.
17 Li jchabivanejetik avuʼune xkoʼolajik kʼuchaʼal kʼulub,
li bankilaletik avuʼune xkoʼolajik kʼuchaʼal epal kʼulubetik.
Te tspas snaik ta koraletik* kʼalal oy sike,
pe ta xvilik batel kʼalal mi xojobinaj lokʼel tal li kʼakʼale,
vaʼun muʼyuk buchʼu snaʼ bu oyik.
18 Ajvalil ta Asiria, li jchabichijetik avuʼune ta xa x-och svayelik;
li bankilaletik avuʼune te chkom ta snaik.
Li ateklumale spukoj xa sba batel ta vitstikaltik
xchiʼuk muʼyuk buchʼu chbat tsobatikuk tal.+
19 Muʼyuk xa xpoxil li avokole.
Mu xa xkol-o li ayayijemale.
Skotol li buchʼutik chaʼiik li kʼusi kʼotem ta atojolale ta xtʼax skʼobik;+
yuʼun ¿buchʼu muʼyuk yiloj svokol ta skoj ti solel muʼyuk xkʼuxul avoʼontone?».+
Jaʼ skʼan xal ‹jpat-oʼontonal›.
O «slumal».
O «Te ta sjol».
O «smes».
Jaʼ xkaltik, li Ninivee.
O «servesa ti pasbil ta trigoe».
O jaʼ van skʼoplal «xchiʼuk te ch-echʼik batel ta stojolal».
O «J-asiria».
O «stemplo».
Jaʼ xkaltik, li Israele.
O «smakobbail».
O «ti bu oy ep krixchanoetike».
O «stsʼaylajetik».
O «saktsel».
O «Chtʼab».
O «xjuetik».
O «xchʼutike».
O «chʼiom leonetik ti xtinlajet sjolike».
O «tsmuk».
Kʼelo Glosario, Jeova ti bankilal yuʼun soltaroetike.
O «achʼiom leontak ti xtinlajet sjolike».
O «jutebuk».
O «sjislajet».
O «xtʼab-o».
Kʼelo Glosario, Jeova ti bankilal yuʼun soltaroetike.
Jaʼ xkaltik, Ninive.
Jaʼ xkaltik, Tebas.
O «amuk».
Jaʼ skʼoplal mok ti pasbil ta tonetike.