ABAKUK
1 Liʼe jaʼ li kʼusi albat j-alkʼop Abakuk* kʼalal oy kʼusi akʼbat yile:
2 Kajval Jeova, ¿kʼu to sjalil liʼ xi-avet ta skʼanel koltaele?+ ¿Bakʼin to chatakʼbun?
¿Kʼu to sjalil liʼ xivokolet ta skʼanel koltaele? ¿Bakʼin to chapojun lokʼel li ta choplejale?+
3 ¿Kʼu yuʼun chavakʼ kil li kʼusi chopole?
¿Kʼu yuʼun te noʼox atsʼikoj li utsʼintaele?
¿Kʼu yuʼun ti liʼ noʼox jkʼeloj li lajesel xchiʼuk choplejale?
¿Kʼu yuʼun ti naka saʼkʼop xchiʼuk ti naka paskʼop tspasike?
4 Chʼabal xa yip li mantale,
muʼyuk xa tukʼ kʼusi chichʼ pasel.
Yuʼun li buchʼu toj chopole chakʼbe svokol li buchʼu tukʼe;
muʼyuk xa chichʼ tsakel ta mukʼ li kʼusi tukʼe.+
5 «¡Kʼelavilik li mukʼtik lumetike, tukʼulano lek avilik!
Labaluk sba xavilik xchiʼuk chʼayaluk to xkʼot avoʼontonik;
yuʼun oy kʼusi chkʼot ta pasel li ta akʼakʼalilike,
pe mu xachʼunik akʼo mi xavichʼik albel.+
6 Ta jtsob talel li jkaldeaetike,+
jaʼ li mukʼta lum ti chʼabal xkʼuxul yoʼontonike xchiʼuk ti anil noʼox kʼusi tspasike.
Naka smakel yuʼunik li epal osile
sventa xichʼik komel li naetik ti maʼuk yuʼunike.+
7 Toj xibal sbaik ta kʼelel xchiʼuk chakʼik tajek xiʼel.
Jaʼ chal stukik li kʼusi tukʼe xchiʼuk jaʼ tspasik mantal.*+
8 Li skaʼike mas toj echʼem x-anilajik kʼuchaʼal leopardoetik,
mas to toj simaronik kʼuchaʼal li loboetik* chanavik ta akʼobaltike.+
Solel xyoletik* noʼox talel ta anil li skaʼik sventa paskʼope;
nom to bu chtots talel li skaʼike.
Solel xviletik talel ta anil jech kʼuchaʼal jkot aguila kʼalal tstsak sveʼele.+
9 Jaʼ noʼox batem ta yoʼontonik spasel kʼusitik chopol.+
Xkoʼolajik kʼuchaʼal ikʼ chlik talel ta slokʼeb kʼakʼal ti kʼu yelan stsinojbeik talel yipale,+
vaʼun solel ep buchʼutik chchukik batel jech kʼuchaʼal li jiʼe.*
10 Tslabanik li ajvaliletike
xchiʼuk tstseʼintaik li bankilaletik ti tsots yabtelike.+
Tseʼej noʼox chaʼiik li kʼusitik lek joyajtik ta muroe;+
tstokanik lum sventa xluchlebik, vaʼun ch-och ta skʼobik.
11 Xviletik noʼox talel jech kʼuchaʼal ikʼ, ch-echʼ xtuchʼik li balumile,
pe oy smul chkʼotik,+
12 Kajval Jeova, ¿mi mu voʼotukot ti te onoʼox oyot sbatel osile?+
Chʼul Dios kuʼun, mu xanaʼ xacham.*+
Kajval Jeova, voʼot laj avakʼbe yabtelik sventa xachapanvan;
Mukʼta Ton kuʼun,+ voʼot la avaʼanan sventa xavakʼ kastigo.*+
13 Toj echʼ xa noʼox chʼul li sbekʼ asate, mu kʼelbaj chaʼi li kʼusi chopole,
mu stsʼik avuʼun li kʼusi chopole.+
Pe ¿kʼu yuʼun ti te noʼox akʼeloj li buchʼu chopole,+
ti muʼyuk kʼusi chavalbe li chopol vinik ti chakʼbe svokol li buchʼu mas tukʼ kʼuchaʼal stuke?+
14 ¿Kʼu yuʼun kolem noʼox avuʼun li vinik jech kʼuchaʼal li choyetik ta nabe,
ti muʼyuk buchʼu tspasatik ta mantal jech kʼuchaʼal li chonetik ti xkilet chanavik ta balumile?
15 Ta stsakobil choy chnitatik lokʼel skotolik.*
Tsyak ta snutiʼal stsakobil choy,
vaʼun chchup lokʼel li ta snutiʼal stsakobil choye.
Jech oxal, xkuxet tajek yoʼonton.+
16 Jaʼ yuʼun, jaʼ chakʼbe milbil matanal* li snutiʼal stsakobiltak xchoye.
Jun to noʼox smuil* kʼusi tsta ta skoj li stsakobil xchoye
xchiʼuk jun to noʼox yutsil sveʼel.
17 ¿Mi jech-o tskokonbe sbel li snutiʼal stsakobil xchoye?*
¿Mi jech-o muʼyuk xkʼuxul yoʼonton tsjop ta milel li mukʼtik lumetike?+
Te ta jmala kʼusi chalbun ti tskʼan akʼo xkal batele
xchiʼuk sventa jnaʼ kʼusi ta jtakʼ mi laj kichʼ tukʼibtasele.
2 Vaʼun, xi laj yalbun li Jeovae:
«Tsʼibao ta pechpech ton li kʼusi chkakʼbot avile,+ lek xpʼejlajet xatsʼiba
3 Yuʼun li kʼusi cha-akʼbat avile jaʼ to chkʼot ta pasel ti kʼusi ora albile,
anil chkʼot ta pasel, maʼuk jutbil kʼop.*
Yuʼun persa onoʼox chkʼot ta pasel.
¡Ta yorail noʼox chvul!
4 Kʼelavil li buchʼu xtoyet chaʼi sbae;
muʼyuk kʼusi tukʼ oy ta yoʼonton.
Pe ta skoj ti tukʼ chakʼ sba* li buchʼu tukʼe, jaʼ ta xkuxi.+
5 Ta skoj ti jloʼlavanej li vinoe,
li jtoyba vinike muʼyuk tsta li kʼusi oy ta yoʼontone.
Mu xnoj ta veʼel jech kʼuchaʼal mu xnoj li Mukinale;*
xkoʼolaj kʼuchaʼal lajelal ti mu x-echʼ yoʼontone.
Naka stsobel batel yuʼun li mukʼtik lumetike
xchiʼuk naka stsobel batel yuʼun li jujun jteklume.+
6 ¿Mi mu chlikuk slabanik ta skoj ti chlik yalik pʼijil loʼiletik, ti chalik li kʼusi chib smelolale xchiʼuk li kʼusi mukul skʼoplale?+
Xi chalike:
‹¡Toj abol sba li buchʼu tstsob li kʼusi maʼuk yuʼune!
¿Kʼu to sjalil jech tspas?
¡Toj abol sba li buchʼu tsaʼ mas yile!
7 ¿Mi mu ta aniluk chtal stsakoxuk ta kʼop li buchʼutik oy avil yuʼune?
Chlik vikʼuk satik, chtal stsakoxuk ta majel,
jech cha-och ta skʼobik jech kʼuchaʼal kʼalal oy kʼusi tspojik batele.+
8 Ta skoj ti la apojbe li kʼusitik oy yuʼun li mukʼtik lumetike,
jaʼ jech tspasboxuk li yantik jteklumetike,+
jaʼ jech tspasboxuk ta skoj ti la amalbe xchʼichʼel viniketike,
ti la asokes li balumile,
ti la asokes li jteklumetik xchiʼuk li jnaklejetik tee.+
9 ¡Toj abol sba li buchʼu tsnojes ta xchopol kanal li snae
sventa toyol chbat yakʼ stas
xchiʼuk sventa xkol li ta vokolile!
10 Laj avakʼ ta kʼexlal atuk li anae.
La asaʼ amul atuk kʼalal la abekʼ* lokʼel epal jteklumetike.+
11 Yuʼun te ch-avan tal jpʼej ton li ta sba muroe
xchiʼuk jaʼ chtakʼav jtel stsʼamteʼal jol na.
12 ¡Toj abol sba li buchʼu tsvaʼan ta chʼichʼ junuk jteklume,
ti jaʼ tsvaʼan-o junuk jteklum li kʼusitik muʼyuk tukʼe!
13 ¿Mi mu jaʼuk chakʼ kʼotuk ta pasel Jeova ti jaʼ bankilal yuʼun soltaroetik* ti kʼokʼ noʼox tsmakʼlinik li jteklumetike
xchiʼuk ti jech noʼox tsmil sbaik ta abtel li mukʼtik lumetike?+
14 Yuʼun li balumile chnoj ta krixchanoetik ti chojtikinbeik li smukʼulal Jeovae
jech kʼuchaʼal noj ta voʼ li nabe.+
15 ¡Toj abol sba li buchʼu oy kʼusi chakʼbe yuchʼ xchiʼiltake,
ti tskap ta skapemal jolil xchiʼuk ta skʼakʼal oʼontonal sventa syakubtasane,
ti tskʼan tstʼanan sventa xkʼexavik yuʼune!
16 Muʼyuk chavichʼ ichʼel ta mukʼ, jaʼ noʼox chavichʼ labal pʼajel.
Uchʼan ek xchiʼuk akʼbo yil yantik ti muʼyuk avichʼoj sirkunsisione.*
Persa chavuchʼbe sbel li skopa Jeova ti te stsakoj ta sbatsʼikʼobe+
xchiʼuk chjoypʼij ta kʼexlal li avutsilale.
17 Voʼot chkʼot ta aba li kʼusi chopol laj yichʼ pasbel li Libanoe,
voʼot chkʼot ta aba li lajelal ti xiʼik-o tajek li jtiʼvanej chonbolometike,
jaʼ jech chkʼot ta atojolal ta skoj ti la amalbe xchʼichʼel viniketike,
ti la asokes li balumile,
ti la asokes li jteklumetik xchiʼuk li jnaklejetik tee.+
18 ¿Kʼusi sbalil chichʼ tabel li pasbil lokʼole,
li unijesbil lokʼol ta takʼin xchiʼuk li slokʼol jutkʼop* jchanubtasvaneje?
Pe li buchʼu la spase spatoj-o yoʼonton,
jaʼ yuʼun jech-o tspas jecheʼ diosetik ti mu xkʼopoje.+
19 ¡Toj abol sba li buchʼu xi chalbe jtel siʼe: «¡Julavan!».
O ti xi chalbe jpʼej umaʼ tone: «¡Julavan! ¡Chanubtasunkutik!»!
20 Pe te oy ta xchʼul templo li Jeovae.+
¡Sjunul li balumile, akʼo tsʼijiikuk ta stojolal!›».+
3 S-orasion j-alkʼop Abakuk ti laj yal kʼuchaʼal sonetik sventa at-oʼontone:
2 Kaʼioj akʼoplal, Kajval Jeova.
Kajval Jeova, labalik sba chkil li kʼusitik la apase.
¡Chaʼpaso xtok li ta jkʼakʼalilkutike!
Akʼo ta ojtikinel li ta jkʼakʼalilkutike.
Xavakʼ to me ta ilel xkʼuxul avoʼonton kʼalal oy jvokolkutike.+
La xpix sjunul vinajel li smukʼulale;+
li balumile noj kom ta krixchanoetik ti tskʼupil kʼoptaike.
4 Li xojobale xkoʼolaj kʼuchaʼal xojobal lus.+
Li ta skʼob ti jaʼ te mukul li yipe,
te stsʼayluj lokʼel chib xojobal lus.
5 Jaʼ jelavem batel yuʼun li chamele,+
te tijil batel ta spat li tsatsal kʼokʼe.
6 Paj ta xanbal, vaʼun nik li balumile.+
Nik yuʼun mukʼtik lumetik akʼo mi naka noʼox la skʼel.+
Laj yichʼik pechʼel ta tekʼel li vitsetik ti voʼne te oyike
xchiʼuk la snijan sbaik li voʼne bikʼtal vitsetike.+
Laj yuʼunin li voʼne beetike.
7 Laj kil ti oy svokolik ti bu yakʼoj skarpanaik ta Kusane.
Lik nikuk spokʼaltak li karpana ta yosilal Madiane.+
8 ¿Mi jaʼ kontra chavil li ukʼumetike, Kajval Jeova?
¿Mi jaʼ kontra chavil li ukʼumetik ti tsanal skʼakʼal avoʼontone?
¿Mi jaʼ kontra chavil li nab ti ilinemot tajeke?+
9 Laj xa alokʼes li a-arkoe, chapal xa avuʼun.
Li vachʼetike* laj xa yichʼ akʼbel yabtel.* (Sela)
Chachʼak ta ukʼum li balumile.
10 Li vitsetike xbaletik likel ta xkʼuxul kʼalal laj yiloxuke.+
Echʼ sbekʼ* balumil li tsatsal voʼe.
Tsots avan li mukʼta nabe+
xchiʼuk la stoy muyel skʼob.
11 Li kʼakʼal xchiʼuk li lunae* mu xa xbakʼik kom ti bu nakalik ti jun yutsile.+
Li aflechatake xojobinaj noʼox lokʼel kʼuchaʼal lus.+
Xlapʼlajet noʼox xojobal li alansae.
12 Ta skapemal ajol la axan li balumile.
Ta skʼakʼal avoʼonton la apechʼilan ta tekʼel li mukʼtik lume.
13 Lokʼ akolta li ateklumale sventa xakolta li buchʼu atʼujoje.
La apechʼ ta tekʼel li jnitvanej* ti te oy ta sna li buchʼu toj chopole.
Jech chvinaj kʼalal ta snakleb xchiʼuk kʼalal to ta sjol.* (Sela)
14 Ta yabtejebtak* stuk la ajombe sjol yajsoltarotak
kʼalal ta anil tal stsakikun ta kʼope.
Xmuyubajik xa tajek chakʼbeik svokol ta mukul li buchʼu oy svokole.
15 Te la-echʼ ta nab xchiʼuk li akaʼtake,
te la-echʼ ti butik xvaʼi xkoti li mukʼta nabe.
Lik alubuk li jbakiltake+
xchiʼuk lik nikuk li kakantake.
Pe te tsʼijil jmalaoj ti kʼusi ora chvul li vokolile,+
yuʼun jaʼ chkʼot ta stojolal li jteklum ti yakal tsaʼunkutik ta kʼope.
17 Manchuk mi mu xakʼ xnich li teʼel igoe
xchiʼuk mi mu satin li uvae;
manchuk mi mu xakʼ sat li oliva teʼe
xchiʼuk mi muʼyuk kʼusi xchʼi li ta osile;
manchuk mi te tsakchʼay ta skoral* li chijetike
xchiʼuk mi chʼabal vakax li ta sveʼeb chonbolometike,
18 li voʼone ximuyubaj noʼox ta stojolal li Jeovae;
xkuxet noʼox koʼonton ta stojolal li Dios ti jaʼ tskoltaune.+
19 Jaʼ kipal li Jeova ti jaʼ Mukʼul Jpasmantale,+
xkoʼolaj kʼuchaʼal yakan teʼtikalchij chbat yuʼun li kakane.
Te chbat yakʼ xanavkun ta toyolaltik.+
Sventa bankilal jtijson; la jtij li stijobil json ti oy yakʼiltake.
Jaʼ van skʼan xal ‹meyel›.
O «ti kʼu yelan tskʼanik tsakel ta mukʼe».
Li loboe xkoʼolajtik kʼuchaʼal okʼil.
O «xtoletik; xviletik».
O «yiʼe».
O jaʼ van skʼoplal «jaʼ kʼotem ta sdiosik li sjuʼelike».
O jaʼ van skʼoplal «muʼyuk chichamkutik».
O «xatukʼibtasvan».
Jaʼ xkaltik, jaʼ li jkaldeaetik ti chkontrainvanike.
O «jaʼ chchikʼbe smoton ti xtomet muyel xchʼailal».
Literal «Oy lek s-aseiteal».
O jaʼ van skʼoplal «tsnit lokʼel ta sna li s-espadae».
O «lekuk xcholet ta kʼelel yuʼun».
O «nopbil kʼop; epal kʼop».
O «Akʼo mi chjalij to yilel».
O «malao me ta sjunul avoʼonton».
O jaʼ van skʼoplal «xchʼunel yoʼonton; kʼusi xchʼunoj».
O «Seole», jaʼ xkaltik, li mukinal ta komon yuʼun krixchanoetike. Kʼelo Glosario, mukinal.
O «la ames».
Kʼelo Glosario, Jeova ti bankilal yuʼun soltaroetike.
O jaʼ van skʼoplal «xchiʼuk tamlajetan». Kʼelo Glosario, sirkunsision.
O «jnopkʼop; j-epalkʼop».
Kʼelo Glosario, sela.
O «koltavanik».
O jaʼ van skʼoplal «Li flechaetike».
O jaʼ van skʼoplal «Vinaj xa li kʼusi jamal laj yalik li jujuchop nitilulale».
O «smes».
O «li ue».
Literal «jolil».
Literal «snukʼ».
Literal «xvachʼtak».
Literal «lik syukʼ sba li jchʼute».
O «spakʼal kee».
O «smokal».