SAKARIAS
1 Li ta xvaxakibal yual kʼalal xchibal xa ox jabil ch-ajvalilaj li Darioe,+ kʼoponat tal yuʼun Jeova li j-alkʼop Sakarias*+ ti jaʼ xnichʼon Berekiase xchiʼuk ti jaʼ smom Idoe, xi albate: 2 «Li Jeovae ilin tajek ta stojolal li amoltotakike.+
3 »Xi xavalbe yaʼi li jteklume: ‹Xi chal li Jeova ti jaʼ bankilal yuʼun soltaroetike:* «‹Sutanik tal ta jtojolal›, xi li Jeova ti jaʼ bankilal yuʼun soltaroetike, ‹vaʼun chisut talel ta atojolalik ek›,+ xi li Jeova ti jaʼ bankilal yuʼun soltaroetike»›.
4 »‹Mu jechuk xapasik kʼuchaʼal la spasik li amoltotakike, yuʼun xi albatik yuʼun j-alkʼopetik ta voʼnee: «Xi chal li Jeova ti jaʼ bankilal yuʼun soltaroetike: ‹Avokolikuk, sutanik tal ta jtojolal, iktaik li chopol be atamojike xchiʼuk li kʼusitik chopol chapasike›»›.+
»‹Pe muʼyuk laj yaʼiik xchiʼuk muʼyuk la stsʼet chikintaik li kʼusi laj kale›,+ xi li Jeovae.
5 »‹¿Bu oy avi li amoltotakike? ¿Mi kuxiik ta sbatel osil li j-alkʼopetike? 6 Akʼo mi jech, li jkʼop xchiʼuk li jmantaltak laj kalbe li kajtuneltak ti jaʼ li j-alkʼopetike, ¿mi mu lajuk yilik kʼot ta pasel li amoltotakike?›.+ Jaʼ yuʼun, sutik talel ta jtojolal xchiʼuk xi laj yalike: ‹Li Jeova ti jaʼ bankilal yuʼun soltaroetike jech la spasbutik ti kʼu yelan li jtalelaltike xchiʼuk ti kʼusitik la jpastike, jech kʼuchaʼal snopoj xa onoʼox tspase›».+
7 Li ta skʼakʼalil 24 ta yuilal 11, jaʼ xkaltik, li ta yuilal sebate,* kʼalal xchibal xa ox jabil ch-ajvalilaj li Darioe,+ kʼoponat tal yuʼun Jeova li j-alkʼop Sakarias ti jaʼ xnichʼon Berekiase xchiʼuk ti jaʼ smom Idoe. 8 Xi laj yal li Sakariase: «Oy kʼusi li-akʼbat kil li ta akʼobaltike, oy jun vinik ti kajal ta jkot tsajal kaʼe, te paj ti bu oy li mirto teʼetik ta yalebaltike; ta spate oy yan kaʼetik, oy tsojik, oy ikʼ-ikʼtik stsajal xchiʼuk oy sakik».
9 Jaʼ yuʼun, xi laj kale: «Kajval, ¿buchʼutik ti kajajtik ta kaʼ leʼe?».
Li anjel ti yakal chchiʼinun ta loʼile xi la stakʼbune: «Voʼon chkakʼ avil buchʼutik jaʼ».
10 Vaʼun, li vinik ti te oy ti bu oy li mirto teʼetike xi laj yale: «Li buchʼutik kajajtik ta kaʼe jaʼ takbilik tal yuʼun Jeova sventa xanik li balumile». 11 Li buchʼutik kajajtik ta kaʼe xi laj yalbeik li yaj-anjel Jeova ti te vaʼal ti bu oy li mirto teʼetike: «Laj xa jxankutik sjunul li balumile, laj kilkutik ti muʼyuk kʼope xchiʼuk ti oy jun oʼontonale».+
12 Jaʼ yuʼun, xi laj yal li yaj-anjel Jeovae: «Kajval Jeova ti bankilalot yuʼun soltaroetike, ¿kʼu to sjalil muʼyuk chavakʼbe ta ilel xkʼuxul avoʼonton li Jerusalene xchiʼuk li jteklumetik ta Juda+ ti oy xa ta 70 jabil ilinemot ta stojolalike?».+
13 Li Jeovae ta slekil yoʼonton la stakʼbe li anjel ti yakal chchiʼinun ta loʼile xchiʼuk tspat oʼontonal ti kʼu yelan la stakʼbee. 14 Vaʼun, xi laj yalbun li anjel ti yakal chchiʼinun ta loʼile: «Avanan, xi xavale: ‹Xi chal li Jeova ti jaʼ bankilal yuʼun soltaroetike: «Jkʼanoj tajek xchiʼuk ta jvul tajek koʼonton ta stojolal li Jerusalen xchiʼuk Sione.+ 15 Solel ilinemun ta stojolal li mukʼtik lumetik ti jun noʼox yoʼontonike.+ Jnopoj ox chkakʼbe jutuk kastigo li jteklumale,+ pe li krixchanoetik ta mukʼtik lumetike la slajesik ta j-echʼel»›.+
16 »Jaʼ yuʼun, xi chal li Jeovae: ‹«Chkʼuxubaj koʼonton yan velta ta stojolal li Jerusalene,+ te ta jvaʼan yan velta li jnae+ xchiʼuk chichʼ pʼisel ta chʼojon li Jerusalen sventa xichʼ chaʼmeltsanele»,+ xi li Jeova ti jaʼ bankilal yuʼun soltaroetike›.
17 »Avanan to yan velta, xi xavale: ‹Xi chal li Jeova ti jaʼ bankilal yuʼun soltaroetike: «Li ta jteklumetik kuʼune ch-epaj yan velta li kʼusitik lek tee; voʼon li Jeovaune ta jpatbe yoʼonton yan velta li Sione+ xchiʼuk ta jtʼuj yan velta li Jerusalene»›».+
18 Laje, la jtoy jsat xchiʼuk laj kil chanib xulubil.+ 19 Jaʼ yuʼun, xi la jakʼbe li anjel ti yakal chchiʼinun ta loʼile: «¿Kʼusi smelolal leʼe?». Xi la stakʼbune: «Leʼe jaʼ li xulubiletik ti tanpuk bat yuʼun li Juda,+ Israel+ xchiʼuk Jerusalene».+
20 Vaʼun, li Jeovae laj yakʼbun kil chanvoʼ viniketik ti xtojobik lek spasel kʼusitike. 21 Xi la jakʼe: «¿Kʼusi chtal spasik?».
Xi laj yale: «Chtal sibtasik li xulubtak mukʼtik lumetike xchiʼuk tsjipbeik yalel li xulubik ti la stunesik sventa skontrainik li yosilal Juda yoʼ tanpuk xbate. Jaʼ li xulubiletik ti tanpuk bat yuʼunik li Juda ti muʼyuk xa buchʼu stoyoj sjol kome».
2 La jtoy muyel li jsate, vaʼun laj kil ti oy jun vinik ti stsakoj jlik chʼojon+ sventa spʼisobil kʼusitike. 2 Jaʼ yuʼun, xi la jakʼbee: «¿Bu chabat?».
Xi la stakʼbune: «Chbat jpʼis kʼu sjamlej xchiʼuk kʼu snatil li Jerusalene».+
3 Jaʼ to chkile lokʼ batel li anjel ti yakal toʼox chchiʼinun ta loʼile xchiʼuk laj kil ti tal nupatuk ta be yuʼun yan anjele. 4 Vaʼun, xi albate: «Batan ta anil xchiʼuk xi xbat avalbe li kerem ti leʼ oye: ‹«Ta skoj ti ch-epaj li krixchanoetik xchiʼuk li tsʼunbal chonbolometik ta Jerusalene,+ ta xichʼ naklebinel kʼuchaʼal jun jteklum ti muʼyuk smuroale.*+ 5 Chikʼot kʼuchaʼal kʼokʼ ti joyol ta spat xokone, kʼuchaʼal jun muro+ xchiʼuk chnoj ta jmukʼulal li Jerusalene», xi li Jeovae›».+
6 Xi chal li Jeovae: «¡Laʼik! ¡Laʼik! Jatavanik lokʼel tal li ta yosilal nortee».+
«Yuʼun tanpuk labatik kuʼun li ta xchanjotal stiʼiltak vinajele»,+ xi li Jeovae.
7 «¡Laʼ me, Sion! Jatavan lokʼel tal, voʼot ti te nakalot xchiʼuk li stseb Babiloniae.+ 8 Yuʼun kʼalal laj xa ox yichʼ mukʼibtasbel skʼoplal li Jeova ti jaʼ bankilal yuʼun soltaroetike,* la stakun batel ta stojolal li mukʼtik lumetik ti tspojboxuk li kʼusitik oy avuʼunike xchiʼuk xi laj yale:+ ‹Buchʼuuk noʼox ti tstaoxuk ta tijele jaʼ tstaik ta tijel li yuninal* jsate.*+ 9 Yuʼun li avie, ta jyeʼilan jkʼob ta stojolalik, jech xtok, ta xpojbatik yuʼun smosoik li kʼusitik oy yuʼunike›.+ Vaʼun, jech chanaʼik ti jaʼ la stakun tal li Jeova ti jaʼ bankilal yuʼun soltaroetike.
10 »Stseb Sion, avanan ta muyubajel;+ yuʼun chital xa,+ te chinaki ta atojolal»,+ xi li Jeovae. 11 «Li vaʼ kʼakʼale, epal mukʼta lumetik chtalik ta jtojolal voʼon li Jeovaune,+ vaʼun chkʼotik ta jteklumal; jech xtok, te chinaki ta atojolal, stseb Sion». Jech chanaʼik ti jaʼ la stakun tal ta atojolalik li Jeova ti jaʼ bankilal yuʼun soltaroetike. 12 Li Jeovae ta xuʼunin li Juda ti te oy ta chʼul osile xchiʼuk tstʼuj yan velta li Jerusalene.+ 13 Krixchanoetik, tsʼijlanik ta yeloval li Jeovae, yuʼun oy xa kʼusi tspas, chlokʼ xa tal li ta xchʼul naklebe.
3 Li Diose laj yakʼbun kil li mero bankilal pale Josue+ ti te vaʼal ta yeloval yaj-anjel Jeovae, li Satanase+ te vaʼal ta sbatsʼikʼob Josue sventa skontrain. 2 Vaʼun, li yaj-anjel Jeovae xi laj yalbe li Satanase: «Satanas,+ ¡jaʼ akʼo yutot li Jeovae! Jech, ¡jaʼ akʼo yutot li Jeova ti la stʼuj li Jerusalene!+ ¿Mi mu jaʼuk Josue ti laj yichʼ kilel lokʼel ta kʼokʼ kʼuchaʼal jtel siʼe?».
3 Li Josuee toj ikʼ li skʼuʼ spokʼ slapoj kʼalal te vaʼal ta yeloval li anjele. 4 Li anjele xi laj yalbe li yan anjeletik ti te vaʼajtike: «Lokʼbeik li skʼuʼ spokʼ ti toj ikʼe». Vaʼun, xi laj yalbe li Josuee: «Kʼelavil, laj xa jtupʼ li amule* xchiʼuk chavichʼ lapbel lekil kʼuʼil pokʼiletik».*+
5 Jaʼ yuʼun, xi laj kale: «Akʼo yichʼ akʼbel stsʼotobil sjol ti muʼyuk ikʼe».+ Vaʼun, laj yakʼbeik stsʼotobil sjol ti muʼyuk ikʼe xchiʼuk la slapbeik skʼuʼ spokʼ; jaʼo te nopol vaʼal li yaj-anjel Jeovae. 6 Li yaj-anjel Jeovae xi laj yalbe li Josuee: 7 «Xi chal li Jeova ti jaʼ bankilal yuʼun soltaroetike:* ‹Mi te chaxanav li ta jbetake xchiʼuk mi chapas skotol li kʼusi abainoj kuʼune, vaʼun bi, chatun kʼuchaʼal jchapanvanej ta jteklumal,+ chachabi* li kamakʼe* xchiʼuk chkakʼ jelavan tal ta keloval jech kʼuchaʼal li buchʼutik liʼ vaʼalike›.
8 »‹Mero bankilal pale Josue, avokoluk, chikintao xchiʼuk akʼo xchikintaik li achiʼiltak ti te onoʼox chchotiik ta avelovale, yuʼun chakʼotik kʼuchaʼal jun senyail ta sventa li kʼusi chkʼot ta pasel ta tsʼakale; ¡kʼelavilik!, yakal chkakʼ ta ojtikinel li kajtunel+ ti Kʼelom sbie.+ 9 ¡Kʼelavil li ton ti laj kakʼ ta yeloval li Josuee! Li ton taje jaʼ noʼox stuk ti oy vukpʼej satil tee; oy kʼusi yakal ta jtsʼiba te, jech xtok, ta jun noʼox kʼakʼal ta jtupʼbe skʼoplal mulil li ta jteklume›,+ xi li Jeova ti jaʼ bankilal yuʼun soltaroetike.
10 »‹Li vaʼ kʼakʼale, ta jujuntal chatakik ta ikʼel achiʼiltakik sventa xtalik li ta yolon steʼel a-uvaike xchiʼuk li ta yolon steʼel a-igoike›,+ xi li Jeova ti jaʼ bankilal yuʼun soltaroetike».
4 Li anjel ti yakal toʼox chchiʼinun ta loʼile sut tal xchiʼuk la stijun, jech kʼuchaʼal chichʼ tijel li buchʼu chvaye. 2 Vaʼun, xi laj yalbune: «¿Kʼusi te chavil?».
Jaʼ yuʼun, xi laj kale: «Te chkil jun kandelero ti pasbil ta oro+ sjunule, oy jun boch ta sjol. Oy vukub kantil ta sba li kandeleroe,+ jech, oy vukub kantil. Li vukub kantil oy ta sbae oy vukub stuvoal. 3 Li ta xokontake oy chaʼtekʼ oliva teʼ,+ jtekʼ ta batsʼikʼob xchiʼuk jtekʼ ta tsʼetkʼob».*
4 Vaʼun, xi la jakʼbe li anjel ti yakal toʼox chchiʼinun ta loʼile: «Kajval, ¿kʼusi smelolal li kʼusitik leʼe?». 5 Laje, xi la sjakʼbun li anjel ti yakal toʼox chchiʼinun ta loʼile: «¿Mi mu xanaʼ kʼusi smelolal li kʼusitik leʼe?».
Xi la jtakʼbee: «Mu jnaʼ, kajval».
6 Ta tsʼakal une, xi laj yalbune: «Li Jeovae xi chalbe li Sorobabele: ‹«Maʼuk ta skoj sjuʼel epal soltaroetik, maʼuk ta skoj sjuʼel krixchano,+ yuʼun jaʼ ta skoj j-espiritu+ ti jech chkʼotanuk ta pasele», xi li Jeova ti jaʼ bankilal yuʼun soltaroetike.* 7 ¿Kʼusi xuʼ avuʼun spasel, mukʼta vits? Ta yeloval li Sorobabele+ chakʼot ta stenlejaltik.*+ Jaʼ ta slokʼes li ton ta jol temploe, xi tsots ch-avanike: «¡Toj kʼupil sba! ¡Toj kʼupil sba!»›».
8 La skʼoponun tal yan velta li Jeovae, xi laj yale: 9 «Li Sorobabele laj xa yakʼbe snakleb li temploe*+ xchiʼuk jaʼ tstsutses xtok.+ Jech chanaʼik ti jaʼ la stakun tal ta atojolalik li Jeova ti jaʼ bankilal yuʼun soltaroetike. 10 Yuʼun ¿buchʼu spʼajoj li skʼakʼalil kʼalal laj yichʼ likesel li abtelale?+ Yuʼun ta xmuyubajik kʼalal chilik ti te stsakoj splomo* li Sorobabele. Li vukub kantile* jaʼ li sat Jeova ti chchaj ta kʼelel sjunul li balumile».+
11 Vaʼun, xi la jakʼbee: «¿Kʼusi smelolal li chaʼtekʼ oliva teʼ ti te oy ta xokontak kandelero ti jtekʼ ta batsʼikʼob xchiʼuk ti jtekʼ ta tsʼetkʼobe?».*+ 12 Xi la jakʼbe yan veltae: «¿Kʼusi smelolal li skʼobkʼobtak* oliva teʼ ti tstsʼujesik yalel kʼanal aseite li ta chib kʼanal tuvoetike?».
13 Jaʼ yuʼun, xi la sjakʼbune: «¿Mi mu xanaʼ kʼusi smelolal li kʼusitik leʼe?».
Xi la jtakʼbee: «Mu jnaʼ, kajval».
14 Xi laj yalbune: «Li chaʼtekʼ teʼe jaʼ skʼoplal li chaʼvoʼ buchʼu tʼujbil ti te vaʼajtik ta xokon li Yajval sjunul balumile».+
5 La jtoy muyel yan velta li jsate, vaʼun laj kil ti te xvilet jlik balbalvune. 2 Xi la sjakʼbun li anjele: «¿Kʼusi te chavil?».
Xi la jtakʼbee: «Te xvilet chkil jlik balbalvun, 20 xukʼubil* snatil xchiʼuk lajuneb xukʼubil sjamlej».
3 Vaʼun, xi laj yalbune: «Taje jaʼ li chopol kʼoptael ti tspuk sba batel ta sjunul li balumile. Yuʼun li ta jot balbalvune te tsʼibabil ti chopol kʼoptabil li buchʼu ch-elkʼaje+ xchiʼuk li ta jot balbalvune te tsʼibabil ti chopol kʼoptabil li buchʼu oy kʼusi jamal yaloje.+ Akʼo mi jech tsʼibabil li ta balbalvune, muʼyuk yichʼojik kastigo. 4 ‹Laj xa jtak lokʼel li chopol kʼoptaele, vaʼun te chbat ochuk ta sna li j-elekʼe xchiʼuk ta sna li buchʼu oy kʼusi jecheʼ yaloj ta jbie; te chkom-o li ta yut nae, jech te tslajes li nae, li steʼeltake xchiʼuk li stanaltake›, xi li Jeova ti jaʼ bankilal yuʼun soltaroetike».*
5 Vaʼun, li anjel ti yakal chchiʼinun ta loʼile nopaj talel ta jtojolal, xi laj yalbune: «Avokoluk, toyo muyel asat, kʼelavil li kʼusi yakal chlokʼ talele».
6 Jaʼ yuʼun, xi la jakʼbee: «¿Kʼusi leʼe?».
Xi la stakʼe: «Leʼe jaʼ li spʼisobil jun efa* ti yakal chlokʼ talele». Xi to laj yale: «Jaʼ jech xvinaj li chopol krixchanoetik ta sjunul balumile». 7 Laj kil ti laj yichʼ toyel li set-set smak ti pasbil ta plomoe xchiʼuk te chotol jun ants ta yut. 8 Jaʼ yuʼun, xi laj yale: «Li antse jaʼ skʼoplal li choplejale». Laje, la sjip ochel yan velta li ta spʼisobil efae, ta tsʼakal une, la snetʼ yalel ta anil li smak stiʼ ti pasbil ta plomoe.
9 Vaʼun, la jtoy muyel jsat xchiʼuk laj kil chaʼvoʼ antsetik ti lokʼik tale, te xviletik tal ta ikʼ. Oy xikʼik ti xkoʼolaj kʼuchaʼal xikʼ sigüenya mute. Laje, la xchechik muyel li spʼisobil efae. 10 Jaʼ yuʼun, xi la jakʼbe li anjel ti yakal chchiʼinun ta loʼile: «¿Bu chichʼik batel li spʼisobil efae?».
11 Xi la stakʼbune: «Te chichʼik batel ta yosilal Sinar*+ sventa xichʼ pasbel sna; vaʼun mi tsuts spasele, te chichʼ akʼel, yuʼun jaʼ te yavil».
6 Vaʼun, la jtoy muyel yan velta li jsate, laj kil chankot kareta ti te lokʼik tal ta oʼlol chaʼpʼej vitse, li vitsetike pasbil ta kovre. 2 Li baʼyel karetae nitbil ta tsajal kaʼetik, li xchibal karetae nitbil ta ikʼal kaʼetik.+ 3 Li yoxibal karetae nitbil ta sakil kaʼetik xchiʼuk li xchanibal karetae nitbil ta kaʼetik ti ep ta tos skolorale xchiʼuk ta pinto kaʼetik.+
4 Xi la jakʼbe li anjel ti yakal chchiʼinun ta loʼile: «Kajval, ¿kʼusi smelolal li karetaetik leʼe?».
5 Xi la stakʼbun li anjele: «Leʼe jaʼ li chanvoʼ anjeletik+ ta vinajel ti lokʼik tal kʼalal ay xa ox svaʼan sbaik ta yeloval li Yajval sjunul balumile.+ 6 Li kareta ti nitbil ta ikʼal kaʼetike yakal xa chbat ta yosilal norte;+ li sakil kaʼetike yakal xa chbatik ta yosilal smaleb kʼakʼal; li pinto kaʼetike yakal xa chbatik ta yosilal sur. 7 Li kaʼetik ti ep ta tos skolorale tskʼan xa tajek chbat xanik li balumile». Laje, xi laj yal li anjele: «Batanik, bat xanik li balumile». Vaʼun, lik xanik li balumile.
8 Ta tsʼakale, laj yaptaun xchiʼuk xi laj yalbune: «Kʼelavil, li kaʼetik ti chbatik ta yosilal nortee laj xa spajesbeik skʼakʼal yoʼonton Jeova li ta yosilal nortee».
9 La skʼoponun tal yan velta li Jeovae, xi laj yalbune: 10 «Tsobo li matanal ti yakʼoj tal li jteklum ti chukbil batele, ti jaʼ yichʼojik tal li Eldai, Tobiya xchiʼuk Jedayae. Li vaʼ kʼakʼale, skʼan xabat ta sna li Josias ti jaʼ xnichʼon Sofoniase xchiʼuk ikʼo batel li viniketik ti likik tal ta Babiloniae. 11 Tsako li plata xchiʼuk oro sventa xapas junuk koronae* xchiʼuk xojbo ta sjol li Josue+ ti jaʼ xnichʼon Jeosadake, jaʼ li mero bankilal palee. 12 Xi xavalbee:
»‹Xi chal li Jeova ti jaʼ bankilal yuʼun soltaroetike:* «Liʼ oy li vinik ti Kʼelom sbie.+ Te ta yavil chkʼelomaj lokʼel tal xchiʼuk jaʼ ta svaʼan li stemplo Jeovae.+ 13 Jaʼ tsvaʼanbe li stemplo Jeovae xchiʼuk jaʼ ch-och ta ajvalil. Ta xchoti li ta xchotleb sventa ajvalile xchiʼuk chventainvan, jech xtok, chkʼot ta pale akʼo mi te chotol li ta xchotleb sventa ajvalile,+ ta spas xchaʼtosal abtelal* sventa oyuk jun oʼontonal. 14 Li koronae* chtun ta snaʼobilik* te ta stemplo Jeova li Elem, Tobiya, Jedaya+ xchiʼuk En ti jaʼ xnichʼon Sofoniase. 15 Li buchʼutik nom oyike chtal skolta sbaik ta svaʼanel li stemplo Jeovae». Jech chanaʼik ti jaʼ la stakun tal ta atojolalik li Jeova ti jaʼ bankilal yuʼun soltaroetike. Mi la achikintaik lek li kʼusi chal Jeova ti jaʼ Adiosike, persa chkʼot ta pasel li kʼusitik taje›».
7 Kʼalal xchanibal xa ox jabil yochel ta ajvalil li Darioe, kʼoponat tal yuʼun Jeova li Sakariase,+ jaʼ li ta xchanibal kʼakʼal yochel li sbalunebal ue, jaʼ xkaltik, li ta yuilal kisleve.* 2 Li krixchanoetik ta Betele la stakik batel li Sareser, Reguem-Melek xchiʼuk li sviniktak sventa xbat skʼanbeik vokol* li Jeovae, 3 ti xi xbat yalbeik li paleetik ti te oyik ta sna* li Jeova ti jaʼ bankilal yuʼun soltaroetike* xchiʼuk li j-alkʼopetike: «¿Mi yuʼun skʼan xi-okʼkutik xchiʼuk mu xiveʼkutik li ta svoʼobal u+ jech kʼuchaʼal jpasojkutik tal ta epal jabiletike?».*
4 La skʼoponun tal yan velta li Jeova ti jaʼ bankilal yuʼun soltaroetike, xi laj yalbune: 5 «Xi xavalbe skotol li krixchanoetik ta jteklume xchiʼuk li paleetike: ‹Ti la apasik ayuno* xchiʼuk ti la-okʼik 70 jabil+ li ta svoʼobal u xchiʼuk ta svukubal ue,+ ¿mi ta melel jaʼ ta jventa la apasik li ayunoe? 6 Kʼalal laveʼik xchiʼuk la-uchʼbolajike, ¿mi mu jaʼuk jech la apasik ta skoj noʼox ti jech tskʼan avoʼontonike? 7 La achʼunbeik jechuk li kʼusi laj yal Jeova ta stojolal li j-alkʼopetik ta voʼnee.+ Jaʼ li kʼusi laj yal kʼalal oy toʼox jnaklejetik xchiʼuk jun toʼox yoʼontonik li ta Jerusalene xchiʼuk li ta jteklumetik ta spat xokone, kʼalal oy toʼox jnaklejetik li ta Negueb xchiʼuk li ta Sefelae›».
8 Kʼoponat tal yan velta yuʼun Jeova li Sakariase, xi albate: 9 «Xi chal li Jeova ti jaʼ bankilal yuʼun soltaroetike: ‹Tukʼ lek xachapanvanik,+ akʼbo abaik ta ilel tukʼil kʼanelal+ xchiʼuk kʼuxubino abaik. 10 Mu xaloʼlaik li ants ti chamem smalale xchiʼuk li olol ti chamem stote,*+ li jyanlume+ xchiʼuk li buchʼu povree;+ muʼyukuk kʼusi chopol xanop xapasbe abaik ta jujuntal›.+ 11 Pe muʼyuk la stsʼet chikintaik,+ valopatinvanik komel ta skoj ti pimik ta mantale+ xchiʼuk la smak xchikinik sventa mu xaʼiik.+ 12 La stsatsubtas yoʼontonik kʼuchaʼal jpʼej diamante,*+ muʼyuk la xchʼunbeik li smantal* xchiʼuk li kʼusitik laj yal Jeova ti jaʼ bankilal yuʼun soltaroetike, ti jaʼ laj yakʼbe snaʼ ta xchʼul espiritu li j-alkʼopetik ta voʼnee.+ Jaʼ yuʼun, tsots ilin li Jeova ti jaʼ bankilal yuʼun soltaroetike».+
13 «Xi chal li Jeova ti jaʼ bankilal yuʼun soltaroetike: ‹Jech kʼuchaʼal muʼyuk la xchikintabeikun kʼalal la jkʼoponike,+ jaʼ jech muʼyuk la jchikintabeik ek kʼalal la skʼoponikune.+ 14 Ta tsatsal ikʼ tanpuk batik kuʼun ta skotol li mukʼtik lumetik ti mu xojtikinike,+ solel xokol laj yiktaik komel li jteklume, muʼyuk buchʼu te chjelav xchiʼuk muʼyuk buchʼu te tsut batel;+ yuʼun solel xibal sba kom yuʼunik li jteklum ti kʼupil toʼox sbae›».
8 La skʼoponun tal yan velta li Jeova ti jaʼ bankilal yuʼun soltaroetike,* xi laj yalbune: 2 «Xi chal li Jeova ti jaʼ bankilal yuʼun soltaroetike: ‹Ta sjunul koʼonton ta jpakbe skʼoplal li Sione+ xchiʼuk ta skapemal jol ta jpakbe skʼoplal›».
3 «Xi chal li Jeovae: ‹Chisut batel ta Sion+ xchiʼuk te chinaki ta Jerusalen;+ li Jerusalene chʼul jteklum+ chichʼ biiltasel xchiʼuk chʼul vits chichʼ biiltasel li vits yuʼun Jeova ti jaʼ bankilal yuʼun soltaroetike›».+
4 «Xi chal li Jeova ti jaʼ bankilal yuʼun soltaroetike: ‹Li moletik xchiʼuk li yayiletike* chchotiik yan velta li ta chʼivitetik* ta Jerusalene, stsakoj snamteʼik ta jujuntal ta skoj ti ep xa sjabilalike.*+ 5 Li ta chʼivitetik* ta jteklume chnoj ta kʼox kerem tsebetik ti te chtajinike›».+
6 «Xi chal li Jeova ti jaʼ bankilal yuʼun soltaroetike: ‹Li vaʼ kʼakʼale, li skomenal* jteklume vokol ta chʼunel chaʼiik, jaʼuk li voʼone mu jechuk ta xkil›, xi li Jeova ti jaʼ bankilal yuʼun soltaroetike».
7 «Xi chal li Jeova ti jaʼ bankilal yuʼun soltaroetike: ‹Ta jpoj lokʼel tal jteklumal li ta mukʼtik lumetik ta slokʼeb kʼakʼal xchiʼuk ta smaleb kʼakʼale.*+ 8 Chkikʼik sutel tal ta Jerusalen+ xchiʼuk te chnakiik; vaʼun chkʼotik ta jteklumal xchiʼuk voʼon chikʼot ta Sdiosik,+ jun Dios ti xuʼ spat yoʼontonik ta stojolale xchiʼuk ti tukʼe›».
9 «Xi chal li Jeova ti jaʼ bankilal yuʼun soltaroetike: ‹Tsotsuk avoʼontonik,*+ voʼoxuk ti chachikintaik li kʼusitik chalik li j-alkʼopetike,+ jaʼ li kʼusitik laj yichʼ alel kʼalal laj yichʼ akʼbel li snakleb sna Jeova ti jaʼ bankilal yuʼun soltaroetike, ti jaʼ sventa xichʼ vaʼanel li temploe. 10 Kʼalal skʼan toʼox xkʼot ta pasel taje, muʼyuk chichʼik tojel li krixchanoetike mi jaʼuk li chonbolometike;+ muʼyuk buchʼu jun yoʼonton xlokʼ x-och ta skoj li jkontrainvaneje, yuʼun laj kakʼ ti skontrain sbaik ta jujuntal li krixchanoetike›.
11 »Xi chal li Jeova ti jaʼ bankilal yuʼun soltaroetike: ‹Pe li avie, mu xa jechuk ta jpasbe kʼuchaʼal ta voʼne li skomenal* jteklum liʼe.+ 12 Yuʼun chichʼ tsʼunel li sbekʼ tsʼunobil ti chakʼ jun oʼontonale; li steʼel uvae chakʼ sat, li balumile oy kʼusi chakʼ chʼiuk+ xchiʼuk li ta vinajele chyal talel job osil; taje jaʼ chkakʼbeik ta xrextoik* li skomenal* jteklum liʼe.+ 13 Jteklum Juda xchiʼuk jteklum Israel, jech kʼuchaʼal laj avichʼik chopol kʼoptael yuʼun li mukʼtik lumetike,+ jaʼ jech chakʼotik ta jun bendision ta skoj ti ta jkoltaoxuke.+ ¡Mu xaxiʼik!+ Tsotsuk avoʼontonik›.*+
14 »Xi chal li Jeova ti jaʼ bankilal yuʼun soltaroetike: ‹«Jpʼel ta koʼonton laj kakʼ talel vokolil ta atojolalik ta skoj ti la sabeikun jol li amoltotakike xchiʼuk muʼyuk chopol laj kaʼi jba»,+ xi li Jeova ti jaʼ bankilal yuʼun soltaroetike. 15 «Li avi eke, jpʼel ta koʼonton ta jpasbe kʼusi lek li Jerusalene xchiʼuk li jteklum Judae.+ ¡Mu xaxiʼik!»›.+
16 »‹Liʼe jaʼ li kʼusitik skʼan xapasike: melel kʼusi xavalbe abaik ta jujuntal.+ Kʼalal chachapanvanik li ta ochebaletik avuʼunike, skʼan tukʼuk li kʼusi chapasike xchiʼuk ti xakoltaik yantik sventa junuk yoʼontonike.+ 17 Muʼyukuk kʼusi chopol xanop xapasbe abaik ta jujuntal+ xchiʼuk mu me lekuk xavaʼiik li kʼusi jecheʼ chichʼ alel ta jamale;+ yuʼun jpʼajoj skotol li kʼusitik taje›,+ xi li Jeovae».
18 La skʼoponun tal yan velta li Jeova ti jaʼ bankilal yuʼun soltaroetike, xi laj yalbune: 19 «Xi chal li Jeova ti jaʼ bankilal yuʼun soltaroetike: ‹Li spasel ayuno* ta xchanibal ue,+ li spasel ayuno ta svoʼobal ue,+ li spasel ayuno ta svukubal ue+ xchiʼuk li spasel ayuno ta slajunebal ue+ jaʼ yorail sventa xmuyubaj xchiʼuk ti xkuxet yoʼonton li jteklum Judae, jaʼ yorail kʼinetik sventa muyubajel.+ Jaʼ yuʼun, kʼanik li kʼusi melele xchiʼuk li jun oʼontonale›.
20 »Xi chal li Jeova ti jaʼ bankilal yuʼun soltaroetike: ‹Chkʼot yorail ti chtalik li jteklumetik xchiʼuk li jnaklejetik ta epal lumetike; 21 li jnaklejetik ta jun jteklume chbatik ta yan jteklum xchiʼuk xi chalbeike: «Batik, bat jkʼanbetik vokol li Jeovae xchiʼuk bat jsaʼtik li Jeova ti jaʼ bankilal yuʼun soltaroetike. Chibatkutik ek».+ 22 Epal jteklumetik xchiʼuk tsatsal mukʼtik lumetik chtal saʼik ta Jerusalen li Jeova ti jaʼ bankilal yuʼun soltaroetike+ xchiʼuk chtal skʼanbeik vokol li Jeovae›.
23 »Xi chal li Jeova ti jaʼ bankilal yuʼun soltaroetike: ‹Li vaʼ kʼakʼale, oy lajunvoʼ viniketik ta skotol jeltos kʼopetik ta mukʼtik lumetik+ ti tstsakbeik lek yok skʼuʼ spokʼ jun juda vinike xchiʼuk ti xi chalbeike: «Ta jkʼan chbat jchiʼinotkutik,*+ yuʼun laj kaʼikutik ti te oy ta atojolalik li Diose»›».+
9 Xi laj yichʼ alele:
«Li Jeovae laj yal kʼusi chkʼot ta stojolal li yosilal Adrake,
pe jaʼ mas kʼelbil batel li Damaskoe,+
yuʼun li Jeovae skʼeloj batel skotol li krixchanoetike+
xchiʼuk skotol li nitilulal yuʼun Israele,
2 jech xtok, laj yal kʼusi chkʼot ta stojolal li Amat+ ti te oy ta stsʼakile*
xchiʼuk ta stojolal li Tiro+ xchiʼuk Sidone,+ yuʼun toj echʼ xa noʼox pʼij chaʼi sbaik.+
3 Li Tiroe la spas smuroal.*
4 Pe li Jeovae ta xichʼbe batel li kʼusitik oy yuʼune
xchiʼuk ta sjipbe batel ta nab* li yajsoltarotake;+
xchiʼuk chkʼakʼ ta kʼokʼ li Tiroe.+
5 Li Askelone ta xil taje, vaʼun ta xiʼ;
solel ta xat yoʼonton li Gasae,
li Ekron eke ta xat yoʼonton, yuʼun ta kʼexlal xa kom li spatobil yoʼontone.
Chlaj skʼoplal li ajvalil ta Gasae
xchiʼuk chʼabal xa jnaklej chkom li ta Askelone.+
6 Te chnaki ta Asdod li buchʼu maʼuk mero nichʼonile
xchiʼuk ta jlajesbe skʼoplal li stoyobbail jfilisteae.+
7 Ta jlokʼesbe ta ye li kʼusitik bonol ta chʼichʼe
xchiʼuk ta jlokʼesbe li kʼusitik ibalik sba* ti skatsʼoj xae
xchiʼuk li skomenal* ti jaʼ toʼox yuʼune jaʼ chuʼunin li Diose;
chkʼot kʼuchaʼal jun bankilal* ta Juda+
xchiʼuk li Ekrone chkʼot kʼuchaʼal li jebus vinike.+
8 Ta jpas jkarpana kʼuchaʼal jun jchabivanej* ta spat xokon jna+
sventa muʼyuk buchʼu te xjelav xchiʼuk muʼyuk buchʼu te sut tal;
muʼyuk xa te chjelav mi junuk jkʼel-abtel,*+
yuʼun laj xa kil jtuk li kʼusi kʼot ta pasele.*
9 Stseb Sion, kuxetuk tajek avoʼonton.
Stseb Jerusalen, avanan ta skoj ti kuch avuʼune.
¡Kʼelavil! Chtal xa ta atojolal li ajvalil avuʼune.+
10 Chkikʼ lokʼel ta Efrain li kareta sventa paskʼope
xchiʼuk chkikʼ lokʼel ta Jerusalen li kaʼe.
Chkichʼ batel li arko sventa paskʼope.
Li ajvalil avuʼune jaʼ chalbe skʼoplal jun oʼontonal ta stojolal li mukʼtik lumetike;+
li ajvalilal* tspase chlik ta jot stiʼil nab kʼalal to ta jot stiʼil nab
xchiʼuk chlik ta ukʼum Eufrates kʼalal to ta spajeb balumil.+
11 Yan li voʼote, ants, ta skoj li chʼichʼ ti la jpastik-o tratoe,
ta jlokʼes li jchukeletik avuʼun ti te tikʼilik li ta chʼen ti chʼabal yaʼlele.+
12 Jchukeletik ti oy spatobil avoʼontonike, sutanik batel li ta tsatsal pojobbaile.+
Xi chkalbot li avie:
‹Ants, chib to velta ti kʼu yepal chkakʼbot atojole.+
13 Yuʼun ta jlapʼun kʼuchaʼal j-arko li Judae.
Li Efraine ta jtunes kʼuchaʼal jun flecha ta sventa li arkoe,
Sion, ta jtij likel li akeremtak
sventa skontrainbeik li skeremtak Gresiae
xchiʼuk chakʼot kuʼun kʼuchaʼal s-espada jun jpaskʼop›.
14 Li Jeovae jamal chakʼ ta ilel ti te xchiʼuk li steklumale
xchiʼuk li sflechae stsʼayluj to chlokʼ tal kʼuchaʼal saksevul.*
Li Ajvalil Jeova ti jaʼ Mukʼul Jpasmantale ta sjupan li kachue+
xchiʼuk jmoj chtal xchiʼuk li tsatsal ikʼ ta sure.
15 Li Jeova ti jaʼ bankilal yuʼun soltaroetike* tspakbe skʼoplal li steklumale.
Ta xjipbatik ton ta jimichʼ yuʼun li jkontrainvaneje,+ pe tstsal yuʼunik.
Ta x-uchʼbolajik xchiʼuk xvochetik* noʼox, xkoʼolaj kʼuchaʼal yuchʼojik vino;
chichʼik nojesel kʼuchaʼal boch,
ta xtʼuxiik jech kʼuchaʼal chichʼ tʼuxubtasel ta chʼichʼ jujujot xchikin li skajleb matanale.+
16 Li vaʼ kʼakʼale, ta xpojatik yuʼun li Jeova ti jaʼ Sdiosike,
jech chpojatik kʼuchaʼal tspoj xchij li jchabichije;+
yuʼun ta xkʼotik kʼuchaʼal kʼupil sba tonetik ta jun korona* ti stsʼayayetik li ta yosile.+
17 Yuʼun ¡toj echʼ xa noʼox slekil yoʼonton
xchiʼuk toj echʼ xa noʼox li yutsilale!+
Li keremetik xchiʼuk li tojol tsebetike
jaʼ ta stsatsubtasatik yuʼun li veʼlile xchiʼuk li achʼ vinoe».+
10 «Kʼanbeik Jeova ti xakʼ talel voʼ li ta yorail voʼtik ta primaverae.*
Li Jeovae jaʼ tspas li pimil ikʼal tok ti xkuchoj voʼe,
jaʼ chakʼ talel voʼ ta sventa li krixchanoetike+
xchiʼuk jaʼ chakʼ chʼiuk kʼusitik ta osiltik ta sventa akotolik.
Chalik vaychiletik ti muʼyuk sbalile
xchiʼuk muʼyuk stu ti tspatik oʼontonale.
Jech oxal, xtal xbatik kʼuchaʼal chijetik.
Chil svokolik, yuʼun chʼabal jchabichij.
3 Chtil skʼakʼal koʼonton ta stojolal li jchabichijetike
xchiʼuk chkakʼbe stoj smulik li jnitvanejetik ti ch-ilbajinvanike.*
Yuʼun li Jeova ti jaʼ bankilal yuʼun soltaroetike* laj xa yakʼ batel sat ta stojolal li xchijtake,+ ta stojolal li jteklum Judae
xchiʼuk kʼotem xa yuʼun kʼuchaʼal skaʼ sventa paskʼop ti lek tsotse xchiʼuk ti jun yutsile.
4 Ta stojolal li Judae te chlik tal li jbeiltasvaneje,*
te chlik tal li ajvalil ti chkoltavane,*
te chlik tal li arko sventa paskʼope;
te chlokʼ tal skotol li jkʼel-abtelaletike,* te chlik tal skotolik.
5 Chkʼotik kʼuchaʼal jpaskʼopetik,
chpechʼilanik ta tekʼel li achʼeltik ta kayeetik li ta yorail paskʼope.
Tspasik kʼop, yuʼun te chiʼinbilik yuʼun li Jeovae;+
li buchʼutik kajajtik ta kaʼetike chichʼik akʼel ta kʼexlal.+
6 Voʼon chkakʼ tsatsubuk li jteklum Judae
xchiʼuk voʼon ta jpoj li snitilulal Josee.+
Ta xkikʼik sutel tal ta slumalik,
yuʼun chkakʼ ta ilel xkʼuxul koʼonton ta stojolalik;+
xkoʼolaj kʼuchaʼal muʼyuk onoʼox la jtenik batel;+
yuʼun voʼon li Jeova ti Sdiosikune xchiʼuk voʼon ta jtakʼbe li s-orasionike.
7 Li snitilulal Efraine chkʼotik kʼuchaʼal jun tsatsal jpaskʼop
xchiʼuk xkuxet yoʼontonik, xkoʼolaj kʼuchaʼal xkuxet yoʼontonik ta vino.+
Kʼalal chil xnichʼnabik taje, chmuyubajik;
xkuxet yoʼontonik ta stojolal li Jeovae.+
8 ‹Ta jpiobtaik* tal xchiʼuk ta jtsobik tal;
ta jmanik sutel tal,+ vaʼun ta x-epajik
xchiʼuk jech-o epik.
9 Akʼo mi la jpukik batel kʼuchaʼal sbekʼ tsʼunobil li ta jteklumetike,
chivul ta sjolik li ta namal lumetike;
chichʼ akʼbel yipik yan velta xchiʼuk li xnichʼnabike xchiʼuk tsutik talel.
10 Chkikʼik lokʼel tal li ta yosilal Ejiptoe
xchiʼuk ta jtsobik lokʼel tal li ta Asiriae;+
chkikʼik tal li ta yosilal Galaade+ xchiʼuk li ta Libanoe
xchiʼuk muʼyuk xa bu xokol chkom jutebuk yuʼunik.+
11 Mi makatik ta be yuʼun li nabe,
te chi-echʼ batel xchiʼuk ta jpajes ti xvaʼi xkoti noʼox syukʼbenale.+
Mi makatik ta be yuʼun li Niloe, ta jtakijesbe skotol li yaʼlele.
Ta xkakʼ ta kʼexlal li jtoyba Asiriae
xchiʼuk ta xichʼ kʼasel li xvaxton Ejiptoe.+
12 Voʼon li Jeovaune, ta xkakʼbe stsatsalik+
xchiʼuk chichʼik ta mukʼ jbi ta skoj li stalelalike›,+ xi li Jeovae».
11 «Libano, jamo li ochebaletik avuʼun
sventa xkʼakʼ ta kʼokʼ li sedro teʼetik avuʼune.
2 Enebro teʼ, ¡avanan, yuʼun yal xa ta lum li sedro teʼe;
laj xa yichʼ lajesel li mukʼtik teʼetike!
¡Tulanetik ta Basan, avananik,
yuʼun yal xa ta lum li pimil teʼtikaltike!
3 ¡Chikintao! X-avetik li jchabichijetike,
yuʼun laj xa skʼoplal li smukʼulalike.
¡Chikintao! Xloket snukʼik* li chʼiom leonetike,*
yuʼun li chʼixtikaltik ta stiʼil sjunul Jordane laj xa yichʼ lajesel.
4 »Xi chal li Jeova ti jaʼ Jdiose: ‹Chabio li chijetik ti nopbil xa chichʼ milele,+ 5 ti chmilatik yuʼun li buchʼutik manatik yuʼune,+ pe ti muʼyuk smul ch-ilatike. Li buchʼutik chchonike+ xi chalike: «Akʼo yichʼ kʼupil kʼoptael li Jeovae, yuʼun chikʼot ta jkʼulej». Jech xtok, li jchabichijetik yuʼunike muʼyuk xkʼuxul yoʼontonik ta stojolalik›.+
6 »‹Yuʼun muʼyuk chkakʼ ta ilel xkʼuxul koʼonton ta stojolal li jnaklejetik ta jteklume. Chkakʼ ti x-ochik ta skʼob li xchiʼiltakik ta jujuntale xchiʼuk ta skʼob li ajvalil yuʼunike; jech xtok, tslilinik li jteklume xchiʼuk muʼyuk ta jpojik lokʼel ta skʼobik›, xi li Jeovae».
7 Laje, lik jchabi li chijetik ti nopbil xa chichʼ milele,+ voʼoxuk ta akojik, chijetik ti abol abaike. Jaʼ yuʼun, la jsaʼ chaʼtel vachʼ, li jtele Slekil Oʼontonal laj kakʼbe sbi, yan li jtele Jtsobvanej laj kakʼbe sbi,+ vaʼun lik jchabi li chijetike. 8 Vaʼun, ta jun noʼox u la jnuts lokʼel oxvoʼ jchabichij, yuʼun echʼ koʼonton yuʼunik xchiʼuk la spʼajikun ek. 9 Xi laj kale: «Muʼyuk xa ta jchabioxuk. Akʼo chamuk li buchʼu chcham xae xchiʼuk akʼo lajuk li buchʼu chlaj xae. Ti jaykot kuxul to chkome, akʼo stibe sba sbekʼtalik ta jujuntal». 10 Jaʼ yuʼun, la jtsak li jvachʼ ti Slekil Oʼontonal sbie,+ vaʼun la jkʼas, jech tuchʼ li trato la jpas xchiʼuk li jteklumale. 11 Jaʼ yuʼun, jech tuchʼem kom li vaʼ kʼakʼale, li chijetik ti abol sbaik ti skʼelojikune laj yakʼik venta ti jaʼ jun aʼyej likem talel ta stojolal li Jeovae.
12 Laje, xi laj kalbeike: «Mi lek chavaʼiike, tojikun; pe mi muʼyuk lek chavaʼiike, mu xatojikun». Vaʼun, la stojikun, laj yakʼbeikun 30 ta sep plata.+
13 Xi laj yalbun li Jeovae: «Jipo ochel li ta stsobobil takʼine, jaʼ li epal takʼin ti xitojolin-o chalike».+ Jech oxal, la jtsak li 30 ta sep platae xchiʼuk la jip ochel li ta stsobobil takʼin ta sna Jeovae.+
14 Ta tsʼakale, la jkʼas li xchaʼtelal jvachʼ ti Jtsobvanej sbie,+ jaʼ jech chʼakik li Juda xchiʼuk Israel ti xchiʼil toʼox sbaike.+
15 Laje, xi laj yalbun li Jeovae: «Avi une, tsakbo li kʼusitik tstunes li jun jchabichij ti muʼyuk kʼusi xtojob spasele.+ 16 Yuʼun chkakʼ ti xtots junuk jchabichij li ta jteklume. Muʼyuk ta xchabi li chijetik ti chlajik xae;+ muʼyuk chbat saʼ tal li chʼiom chijetike, mi jaʼuk chpoxta ti yayijemike,+ mi jaʼuk tsmakʼlin ti bu lekik toe. Jaʼ noʼox ta slilin ta tiʼel li chij ti lek jupʼeme,+ kʼalal ta svoy tskʼokbe lokʼel.+
17 ¡Abol sba li jchabichij kuʼun ti muʼyuk kʼusi xtun-oe,+ ti chikta komel li chijetike!+
Jun espada tsyayijesbat li sbatsʼikʼobe xchiʼuk li sbatsʼisate.
Ta xtakij ta j-echʼel li skʼobe
xchiʼuk chtupʼ* ta j-echʼel li sbatsʼisate».
12 Xi laj yichʼ alele:
«Li Jeovae oy kʼusi laj yal ta stojolal li Israele». Xi chal li Jeova
ti jaʼ la xlichʼan batel li vinajele,+
ti jaʼ laj yakʼbe snakleb li balumile+
xchiʼuk ti jaʼ laj yakʼbe yip xkuxlejal* li krixchanoe:
2 «Li Jerusalene ta xkakʼ kʼotuk kʼuchaʼal jun kopa* vino ti xtamlajet chkom yuʼun li jteklumetik ti te oy ta spat xokone; chkakʼ ti xichʼ setuel li Juda jech kʼuchaʼal chichʼ setuel li Jerusalene.+ 3 Li vaʼ kʼakʼale, li Jerusalene chkakʼ kʼotuk kʼuchaʼal alal ton* ta stojolal skotol li jteklumetike. Jpʼel skʼoplal tsots tsyayijes sbaik li buchʼutik tskʼan tspetike;+ jech xtok, skotol li mukʼtik lumetik ta balumile tstsob sbaik sventa xbat skontrainik.+ 4 Li vaʼ kʼakʼale, chkakʼ xiʼikuk skotol li kaʼetike xchiʼuk chkakʼ likuk xchuvajik li buchʼutik te kajajtik batele. Te chkakʼ-o batel jsat ta stojolal li Judae, pe chkakʼ tupʼuk sat skotol li skaʼtak jteklumetike», xi li Jeovae. 5 «Li bankilaletik* ta Judae xi chal ta yoʼontonike: ‹Li jnaklejetik ta Jerusalene jaʼ kʼotem ta kipaltik ti likem tal ta stojolal li Jeova ti jaʼ bankilal yuʼun soltaroetike,* ti jaʼ li Sdiosike›.+ 6 Li vaʼ kʼakʼale, li bankilaletik ta Judae ta xkʼotik kuʼun kʼuchaʼal yav kʼokʼ ti joyol ta teʼetike xchiʼuk chkakʼ kʼotikuk kʼuchaʼal toj ti tsanal skʼakʼal ti bu lamal tsʼunobil ti tuchʼbil xae,+ jaʼ ta xchikʼik skotol li jteklumetik ta spat xokon ti te oy ta batsʼikʼob xchiʼuk ta tsʼetkʼobe.*+ Li jnaklejetik ta Jerusalene te ta xnakiik ta slumalik ta mas tsʼakal, jaʼ li ta Jerusalene.+
7 »Li Jeovae baʼyel ta skoltabe li snitilulal* Juda sventa mu masuk xjelav yutsilal li snitilulal* Davide xchiʼuk sventa mu masuk to xjelav yutsilal li jnaklejetik ta Jerusalen kʼuchaʼal li Judae. 8 Li vaʼ kʼakʼale, li Jeovae chkʼot kʼuchaʼal makobbail ta sjoylejal li jnaklejetik ta Jerusalene;+ xchiʼuk li buchʼu tsmak* yakane* ta xkʼot kʼuchaʼal li Davide, li snitilulal* Davide chkʼot kʼuchaʼal Dios, jech kʼuchaʼal yaj-anjel Jeova ti jbabe chbat yuʼunike.+ 9 Li vaʼ kʼakʼale, jpʼel ta koʼonton ta jlajesbe skʼoplal skotol li mukʼtik lumetik ti chtal skontrainik li Jerusalene.+
10 »Chkakʼ tal j-espiritu ta stojolal li snitilulal* Davide xchiʼuk ta stojolal li jnaklejetik ta Jerusalene; lek ta xkilik xchiʼuk ta skʼanbeikun vokol, ta to xilik li buchʼu la spajbeik lansae,+ ta to xokʼitaik jech kʼuchaʼal ta xokʼitaik li jun noʼox skeremike; ta smil sbaik ta okʼel ta stojolal jech kʼuchaʼal ta smil sbaik ta okʼel ta stojolal li ba nichʼonile. 11 Li vaʼ kʼakʼale, ta to x-okʼik ta jyalel li ta Jerusalene, jech kʼuchaʼal x-avetik ta okʼel ta Adadrimon li ta stenlejaltik Meguidoe.+ 12 Li jteklume ta x-okʼik. Ta jujuvokʼ utsʼ alalil ta x-okʼik, li snitilulal Davide slekoj ch-okʼik, li yajniltakik xtoke slekoj ch-okʼik; li snitilulal Natane+ slekoj ch-okʼik, li yajniltakik xtoke slekoj ch-okʼik; 13 li snitilulal Levie+ slekoj ch-okʼik, li yajniltakik xtoke slekoj ch-okʼik; li snitilulal Simeie+ slekoj ch-okʼik, li yajniltakik xtoke slekoj ch-okʼik; 14 xchiʼuk skotol li yan utsʼ alaliletike ta jujuvokʼ utsʼ alalil ta x-okʼik, li yajniltakik xtoke slekoj ch-okʼik.
13 »Li vaʼ kʼakʼale, ta xichʼ jokʼel jun poso ta sventa li snitilulal Davide xchiʼuk ta sventa li jnaklejetik ta Jerusalen yoʼ xichʼik sakubtasel ta smulik xchiʼuk ta xchopolilike.+
2 »Li vaʼ kʼakʼale, ta jtupʼbe skʼoplal sbiik li santoetik ta jteklume+ xchiʼuk muʼyuk xa chichʼik vulesel ta jolil; jech xtok, ta jtupʼbe skʼoplal ta jteklum li j-alkʼopetike+ xchiʼuk muʼyuk xa buchʼu tskʼan tspas li kʼusitik toj ibalik sbae»,* xi li Jeova ti jaʼ bankilal yuʼun soltaroetike.* 3 «Mi oy jun vinik ti chal yan velta albil kʼope, xi ch-albat yuʼun li stot smeʼ ti akʼbat xkuxlejale: ‹Ta xacham, yuʼun laj aval jutbil kʼop* ta sbi Jeova›. Ta skoj ti laj yal albil kʼope, ta xpajbat kuchilo yuʼun li stot smeʼ ti akʼbat xkuxlejale.+
4 »Li vaʼ kʼakʼale, chkʼexavik ta jujuntal li j-alkʼopetik kʼalal chalik li kʼusi akʼbat yilike; jech xtok, muʼyuk xa tslapik li kʼuʼil pokʼil ti pasbil ta tsots*+ sventa xloʼlavanike. 5 Xi chale: ‹Maʼuk j-alkʼopun. Jaʼun noʼox jun j-abtel ta osiltik, yuʼun la smanun jun vinik kʼalal keremun toʼoxe›. 6 Mi oy buchʼu xi la sjakʼbee: ‹¿Kʼuxi yayij li abekʼtal* leʼe?›, xi tstakʼe: ‹Te laj kichʼ yayijesel ta sna kamigotak›».*
yayijeso li jchabichije,+ vaʼun tanpuk chbat li chijetike;+
xchiʼuk ta jtukʼibtas li buchʼutik muʼyuk tsots skʼoplalike», xi li Jeova ti jaʼ bankilal yuʼun soltaroetike.
8 Xi chal li Jeovae: «Ta sjunul li jteklume,
jutuk mu skotoluk li krixchanoetike ta xichʼik milel xchiʼuk ta xchamik;
jayvoʼ xa noʼox te chkomik.
9 Li jayvoʼ te chkomike ta jlekubtasik ta kʼokʼ
xchiʼuk ta jsakubtasik jech kʼuchaʼal chichʼ sakubtasel li platae,
ta jchaj ta kʼelel kʼu yelanik jech kʼuchaʼal chichʼ chajel ta kʼelel li oroe.+
Tskʼanik vokol ta jbi,
vaʼun ta jtakʼbeik.
Xi chkale: ‹Jaʼik jteklumal›,+
xchiʼuk xi chalik eke: ‹Jaʼ Jdiostik li Jeovae›».
14 «¡Kʼelavil! Chkʼot skʼakʼalil ti ta yeloval asat chchʼakbe sbaik li kʼusitik avuʼun* ti tspojboxuke, li vaʼ kʼakʼale, jaʼ skʼakʼalil li Jeovae. 2 Ta jtsob skotol mukʼtik lumetik sventa xtal stsakik ta kʼop li Jerusalene; ch-och ta kʼabal li jteklume, chichʼ pojel batel li kʼusitik oy ta naetike xchiʼuk chlajik ta tsatsal tsakel li antsetike. Chichʼik chukel batel j-oʼlol li jnaklejetik ta jteklume, pe li jayvoʼ te chkome muʼyuk xa chichʼik ikʼel lokʼel li ta jteklume.
3 »Li Jeovae chlokʼ tal xchiʼuk tstsak ta kʼop li vaʼ mukʼtik lumetike,+ jech kʼuchaʼal tspas ta skʼakʼalil paskʼope.+ 4 Li vaʼ kʼakʼale, te tstekʼan yakan li ta vits Olivatike,+ te ta yeloval Jerusalen ta stukʼil slokʼeb kʼakʼal. Li vits Olivatike ta xjav ta oʼlol, te chlik javuk ta stukʼil slokʼeb kʼakʼal kʼalal to ta stukʼil smaleb kʼakʼal,* li ta oʼlole jamal lek stenlejaltik chkom; li j-oʼlol vitse chbat ta norte, li j-oʼlol xtoke chbat ta sur. 5 Te chajatavik batel li ta stenlejaltik ti kakal ta oʼlol yuʼun li vitsetik kuʼune, yuʼun li stenlejaltik ta oʼlol vitsetike chkʼot kʼalal to ta Asel. Skʼan xajatavik batel, jech kʼuchaʼal lajatavik batel kʼalal echʼ nikel ta skʼakʼalil li Usias ti jaʼ ajvalil ta Judae.+ Vaʼun, ta xtal li Jeova ti jaʼ Jdiose, te chchiʼin tal skotol li buchʼutik chʼulike.+
6 »Li vaʼ kʼakʼale, muʼyuk xa kʼusi chojobinaj,+ skotol li kʼusitik oye mu xa xbakʼ ta skoj li sike. 7 Li jun kʼakʼal taje, chichʼ naʼel ti jaʼ skʼakʼalil li Jeovae.+ Muʼyuk sjelbenal li kʼakʼaltik xchiʼuk li akʼobaltike; kʼalal chmal xa batel kʼakʼale, staoj-o yav sak li osile. 8 Li vaʼ kʼakʼale, chbein lokʼel tal+ ta Jerusalen li voʼ ti chakʼ kuxlejale,+ li j-oʼlole chbat li ta nab* ta slokʼeb kʼakʼale,+ yan li j-oʼlole chbat li ta nab* ta smaleb kʼakʼale.+ Jech-o chbein ta verano* xchiʼuk ta invierno.* 9 Li Jeovae chkʼot ta Ajvalil ta spʼejel balumil.+ Li vaʼ kʼakʼale, jaʼ noʼox stuk Jeova chichʼ ichʼel ta mukʼ+ xchiʼuk jaʼ noʼox stuk sbi chichʼ kʼupil kʼoptael.+
10 »Sjunul li jteklume chkʼot kʼuchaʼal li yosilal Arabae,+ te chlik ta Gueba+ xchiʼuk chkʼot kʼalal to ta Rimon+ ta sural Jerusalen; chichʼ chaʼvaʼanel li Jerusalene xchiʼuk chichʼ naklebinel yan velta,+ te chlik ta ochebal ti Benjamin+ sbie, chkʼot kʼalal to ta Baʼyel Ochebal xchiʼuk kʼalal to ta ochebal ti Eskina sbie, jech xtok, te chlik ta Tayal kʼelob osil Ananel+ xchiʼuk chkʼot kʼalal to ti butik chichʼ pitsʼbel s-uva li ajvalile. 11 Te chnaki li krixchanoetike; muʼyuk xa chichʼ alel yan velta ti chichʼ lajesel li jteklume,+ vaʼun li krixchanoetik ta Jerusalene jun yoʼonton te chnakiik.+
12 »Liʼe jaʼ li chameletik ti chakʼ tal Jeova ta stojolal skotol li jteklumetik ti tstsakik ta kʼop li Jerusalene:+ chlik kʼaʼuk sbekʼtalik kʼalal vaʼajtik toe, te chkʼaʼ ta yavil li sbekʼ satike xchiʼuk te chkʼaʼ ta yeik li yokʼike.
13 »Li vaʼ kʼakʼale, ta xtakbatik tal mukʼta xiʼel yuʼun li Jeovae; ta jujuntal tstsakbe skʼob li xchiʼilike xchiʼuk tstsak sbaik ta kʼop ta jujuntal.+ 14 Li Juda eke tstikʼ sba ta paskʼop li ta Jerusalene; ta xichʼ tsobbel skʼulejal skotol li mukʼtik lumetik te ta spat xokone, li oroe, li platae xchiʼuk li kʼuʼil pokʼiletike, mu xa noʼox albajuk yepal chichʼ tsobbel.+
15 »Li chameletik taje chvul ta stojolal li kaʼetik eke, li mulaetike, li kameyoetike, li vuroetike xchiʼuk skotol li tsʼunbal chonbolometik ti te oyik li ta skarpana jkontrainvanejetike.
16 »Skotol li buchʼutik kuxul to chkomik ta skotol li mukʼtik lumetik ti chtal skontrainik Jerusalene jujun jabil+ chtal snijan sbaik ta stojolal* li Ajvalile, li Jeova ti jaʼ bankilal yuʼun soltaroetike,*+ jech xtok, chtal spasik li Skʼinal Axibalnaetike.*+ 17 Pe mi oy junuk mukʼta lum ta balumil ti muʼyuk chmuy tal ta Jerusalen sventa chtal snijan sba ta stojolal li Ajvalile, li Jeova ti jaʼ bankilal yuʼun soltaroetike, muʼyuk ta xtal voʼ ti bu oyike.+ 18 Jech xtok, mi muʼyuk xmuyik tal xchiʼuk mi muʼyuk x-ochik ta jteklum li jnaklejetik ta Ejiptoe, muʼyuk chakʼ voʼ ti bu oyike. Jaʼ noʼox chvul ta stojolalik li chameletik ti chakʼ tal Jeova ta stojolal li mukʼtik lumetik ti muʼyuk chmuyik tal sventa spasik li Skʼinal Axibalnaetike. 19 Taje jaʼ stojobil smul li Ejiptoe xchiʼuk jaʼ stojobil smul skotol li mukʼtik lumetik ti muʼyuk chmuyik tal sventa spasik li Skʼinal Axibalnaetike.
20 »Li vaʼ kʼakʼale, xi chichʼ tsʼibael li ta skampanail snukʼ kaʼetike: ‹Te likem ta stojolal Jeova li kʼusi chʼule›.+ Jech xtok, li pʼinetik*+ te ta sna Jeovae ta xkʼot kʼuchaʼal li bochetik+ ti te oy ta yeloval li skajleb matanale. 21 Skotol li pʼinetik* ta Jerusalen xchiʼuk ta Judae chʼul ta xkʼot xchiʼuk jaʼ chuʼunin li Jeova ti jaʼ bankilal yuʼun soltaroetike xchiʼuk skotol li buchʼutik chtal yakʼik milbil matanale tstunesik jlomuk sventa tslakanik-o li bekʼete. Li vaʼ kʼakʼale, muʼyuk xa chkom junuk jkanaan krixchano* li ta sna Jeova ti jaʼ bankilal yuʼun soltaroetike».+
Jaʼ skʼan xal ‹svulesoj ta sjol li Jeovae›.
Kʼelo Glosario, Jeova ti bankilal yuʼun soltaroetike.
Kʼelo Apendise B15.
Jaʼ xkaltik, ti muʼyuk joybil ta muroe.
Kʼelo Glosario, Jeova ti bankilal yuʼun soltaroetike.
O «yunenal».
O «tstaik ta tijel li sbekʼ jsate».
O «apaltaile».
O «lapbel kʼuʼil pokʼiletik sventa kʼin».
Kʼelo Glosario, Jeova ti bankilal yuʼun soltaroetike.
O «oy ta aba skʼelel».
O «stiʼ jnae». Kʼelo Glosario, amakʼ.
O «surtokʼob».
Kʼelo Glosario, Jeova ti bankilal yuʼun soltaroetike.
O «pachʼaltik».
Literal «li nae».
Li plomoe ol xchiʼuk oy yakʼil ti tstunesik sventa lek tukʼ xbat li kʼusi tsvaʼanike.
O jaʼ van skʼoplal «satile».
O «surtokʼobe».
Jaʼ xkaltik, skʼobkʼobtak teʼ ti chojol ep sate.
Li jun xukʼubile jaʼ 44.5 sentimetro snatil. Kʼelo Apendise B14.
Kʼelo Glosario, Jeova ti bankilal yuʼun soltaroetike.
Literal «Leʼe jaʼ li efa», taje jaʼ skʼoplal jun moch ti tspʼisik-o jun efae. Li jun efae jaʼ 22 litro. Kʼelo Apendise B14.
Jaʼ xkaltik, li Babiloniae.
O «korona ti stuk noʼox jeche».
Kʼelo Glosario, Jeova ti bankilal yuʼun soltaroetike.
Jaʼ xkaltik, li yabtel ta ajvalil xchiʼuk ta paleale.
O «korona ti stuk noʼox jeche».
O «sventa xvul ta sjolik».
Kʼelo Apendise B15.
O «skʼunibtasbeik sat».
O «stemplo».
Kʼelo Glosario, Jeova ti bankilal yuʼun soltaroetike.
Literal «¿Mi yuʼun skʼan xi-okʼ xchiʼuk mu xiveʼ li ta svoʼobal u jech kʼuchaʼal jpasoj tal ta epal jabiletike?».
Kʼelo Glosario, ayuno.
O «ti meʼone».
O jaʼ van skʼoplal «jpʼej tsatsal ton», xkoʼolaj kʼuchaʼal jpʼej esmeril ton.
O «chanubtasel yuʼun».
Kʼelo Glosario, Jeova ti bankilal yuʼun soltaroetike.
O «meʼeletike».
O «kayeetik; ti bu oy ep krixchanoetik».
Literal «ta skoj ti ep xa skʼakʼalilike».
O «Li ta kayeetik; Ti bu oy ep krixchanoetik».
O «skomelal».
O «ta slokʼeb kʼakʼal kʼalal to ta smaleb kʼakʼale».
Literal «Oyuk yip li akʼobike».
O «skomelal».
O «spukulalik; sparteik».
O «skomelal».
Literal «Oyuk yip akʼobik».
Kʼelo Glosario, ayuno.
Literal «Chibatkutik xchiʼuk voʼoxuk».
Yikʼaluk jaʼ skʼoplal li yosilal Adrake o li Damaskoe.
O «snakʼobbail».
O «lum».
Jaʼ van skʼoplal «ta ba nab».
Kʼelo Glosario, ibal sba.
O «skomelal».
Li «bankilal» chal liʼe jaʼ skʼoplal li buchʼu tspas mantal ta jchop nitilulale.
O «jtsop soltaro».
O «j-ilbajinvanej».
Yaʼeluke, jaʼ li svokol steklumale.
O «xchiʼuk kuchem xa yuʼun; xchiʼuk kolem xa».
O «tot vuro».
Kʼelo Glosario, ajvalilal.
O «saktsel».
Kʼelo Glosario, Jeova ti bankilal yuʼun soltaroetike.
O «x-avlajetik».
O «diadema».
Jaʼ xkaltik, yorail uninaltik.
O «diosetik ta yut nae; santoetike».
Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
Literal «li tot tentsunetike».
Kʼelo Glosario, Jeova ti bankilal yuʼun soltaroetike.
Literal «li tayal kʼelob osil ta eskinae», jaʼ skʼoplal jun vinik ti toj tsots skʼoplale; jun bankilal.
Literal «li estakae», jaʼ skʼoplal ti buchʼu chkoltavane; jun ajvalil.
O «jkʼelvanejetike».
O «jxuxubtaik».
O «Xlaket snukʼik; X-avetik».
O «chʼiom leonetik ti xtinlajet sjolike».
Literal «ch-ikʼub».
O «xchʼulel».
O «boch».
O «alal ikatsil».
Li «bankilal» chal liʼe jaʼ skʼoplal li buchʼu tspas mantal ta jchop nitilulale.
Kʼelo Glosario, Jeova ti bankilal yuʼun soltaroetike.
O «surtokʼobe».
Literal «skarpanatak».
Literal «sna».
O «chtʼab».
O «li buchʼu mas kʼune».
Literal «sna».
Literal «sna».
Kʼelo Glosario, ibal sba.
Kʼelo Glosario, Jeova ti bankilal yuʼun soltaroetike.
O «nopbil kʼop; epal kʼop».
Taje jaʼ stsotsil chij o stsotsil yan chonbolometik.
Jaʼ xkaltik, ta stiʼ yoʼonton o ta spat.
O «li buchʼutik skʼanojikune».
Jaʼ xkaltik, li jteklum ti chalbe skʼoplal ta versikulo 2.
Literal «ta nab».
Jaʼ xkaltik, li nab Muertoe.
Jaʼ xkaltik, li nab Mediterraneoe.
Jaʼ xkaltik, yorail kʼepelaltik.
Jaʼ xkaltik, yorail siktik.
O «yichʼik ta mukʼ».
Kʼelo Glosario, Jeova ti bankilal yuʼun soltaroetike.
O «Nakʼobbailetik ti te noʼox kʼuk sjalil chtune».
O «pʼinetik ti lek mukʼ stiʼ sventa smeltsanobil veʼlil».
O «pʼinetik ti lek mukʼ stiʼ sventa smeltsanobil veʼlil».
O jaʼ van skʼoplal «jpʼolmajel».