MALAKIAS

1 Liʼe jaʼ jun aʼyej ti tsots skʼoplale:

Li Jeovae xi laj yalbe Israel ta stojolal li Malakiase:*

2 Xi chal li Jeovae: «Kakʼojboxuk ta ilel ti jkʼanojoxuke».+

Yan li voʼoxuke xi chavalike: «¿Kʼuxi avakʼoj ta ilel ti akʼanojunkutike?».

Xi chal li Jeovae: «¿Mi mu jaʼuk xchiʼil ta vokʼel Esau li Jakobe+ chaʼa? Pe jaʼ la jkʼan li Jakobe, 3 yan li Esaue la jpʼaj;+ xchiʼuk mu kʼusi x-ayan laj kiktabe+ li ta vitsetik yuʼune xchiʼuk li xrextoe* jaʼ laj kakʼbe li teʼtikal tsʼiʼetik ta takixokol balumile».+

4 «Akʼo mi xi chal li Edome: ‹Kichʼojkutik lajesel, pe chisutkutik batel xchiʼuk ta jchaʼvaʼankutik ti butik jinemike›, xi chal li Jeova ti jaʼ bankilal yuʼun soltaroetike:* ‹Jaʼ ta svaʼanik, pe voʼon ta jlilin xchiʼuk tsbiinik «yosilal choplejal» xchiʼuk «krixchanoetik ti pʼajbil komik ta sbatel osil yuʼun li Jeovae».+ 5 Chavil ta asat atukik, vaʼun xi chavalike: «Akʼo yichʼ mukʼibtasbel skʼoplal Jeova li ta yosilal Israele»›».

6 «Paleetik, xi chkalboxuk voʼon li Jeovaun ti bankilalun yuʼun soltaroetike, voʼoxuk ti apʼajojik li jbie:+ ‹Chichʼ ta mukʼ stot li jun nichʼonile+ xchiʼuk chichʼ ta mukʼ yajval li jun mosoile. Pe mi voʼon atotikune,+ ¿bu ti chavichʼikun ta mukʼe?*+ Mi voʼon avajvalikune,* ¿bu ti chavichʼikun ta mukʼe?

»›Pe xi chavalike: «¿Kʼuxi ti jpʼajojkutik abie?»›.

7 »‹Jaʼo kʼalal chavakʼik sokem veʼlil* ta skajleb jmotone›.

»‹Xi chavalik xtoke: «¿Kʼuxi ti jsokesojotkutike?»›.

»‹Jaʼo kʼalal xi chavalike: «Skʼan xichʼ pʼajel li xmexa Jeovae».+ 8 Kʼalal chavakʼik ta milbil matanal li chonbolom ti maʼsate, xi chavalike: «Muʼyuk chopol». Kʼalal chavakʼik jkotuk chonbolom ti koxo o ti ipe, xi chavalike: «Muʼyuk chopol»›».+

Xi chal li Jeova ti jaʼ bankilal yuʼun soltaroetike: «Avokoluk, akʼbo kik li ajvalil avuʼune. ¿Mi xmuyubaj van ta atojolal o mi lek van ta xchʼamot?».

9 Xi chal li Jeova ti jaʼ bankilal yuʼun soltaroetike: «Avokoluk, li avie kʼanbeik vokol li Dios sventa xakʼbutik ta ilel slekil yoʼontone. Kʼalal te atsakojik tal ta akʼobik li matanale, ¿mi ta van xchʼamoxuk ta slekil yoʼonton?».

10 Xi chal li Jeova ti jaʼ bankilal yuʼun soltaroetike: «¿Buchʼu van oy ta yoʼonton avuʼunik tskʼan tsmak li stiʼtak temploe?*+ Yuʼun li voʼoxuke chakʼan atojolik+ kʼalal chatsanbeik skʼakʼal li skajleb matanal kuʼune. Mi jsetʼuk jun koʼonton avuʼunik xchiʼuk mi jutebuk kʼupil sba chkil li matanal avichʼojik tale».+

11 Xi chal li Jeova ti jaʼ bankilal yuʼun soltaroetike: «Yuʼun toj mukʼ chkʼot ta stojolal mukʼtik lumetik li jbie,+ chlik ta slokʼeb kʼakʼal kʼalal to ta smaleb kʼakʼal. Ta buyuk noʼox xtomet xchʼailal* chichʼ akʼel li milbil matanale xchiʼuk chichʼ akʼel matanaletik ta skoj li jbie, kʼuchaʼal jun lekil matanal. Yuʼun toj mukʼ chkʼot ta stojolal mukʼtik lumetik li jbie».+

12 «Yan li voʼoxuke yakal chasokesbeik skʼoplal*+ kʼalal xi chavalike: ‹Sokesbil li xmexa Jeovae xchiʼuk skʼan xichʼ pʼajel li veʼlil te oye›.+ 13 Xi chavalik xtoke: ‹¡Kʼelavil! ¡Taʼlo xa xkaʼikutik!› xchiʼuk solel apʼajojik», xi li Jeova ti jaʼ bankilal yuʼun soltaroetike. Xi chal li Jeovae: «Chavikʼik tal li chonbolometik ti elkʼanbile, ti koxoike xchiʼuk ti ipike. Jech, ¡jaʼ chavakʼik tal ta matanal taje! ¿Mi ta van jchʼam li kʼusi atsakoj tal ta akʼobike?».+

14 Xi chal li Jeova ti jaʼ bankilal yuʼun soltaroetike: «Toj chopol xchiʼuk toj manya li buchʼu oy jkot stot xchonbolom ta skoral* ti muʼyuk ipe,* pe ti jaʼ chakʼ ta milbil matanal ti bu oy xchopolil* kʼalal chakʼ ye ti oy kʼusi chakʼbe li Jeovae. Yuʼun voʼon mukʼul Ajvalilun+ xchiʼuk labal sba chkʼot ta stojolal mukʼtik lumetik li jbie».+

2 «Li avie, paleetik, jaʼ ta aventaik li mantal liʼe.+ 2 Mi mu xakʼan xachikintaik xchiʼuk mi mu xavakʼ ta avoʼontonik smukʼibtasbel skʼoplal li jbie, ta jtak talel ta atojolalik chopol kʼoptael+ xchiʼuk ta jkʼatajes ta chopol kʼoptael li bendisionetik avuʼunike.+ Jech, jkʼatajesoj xa ta chopol kʼoptael li bensidionetike, yuʼun muʼyuk avakʼoj ta avoʼontonik», xi li Jeova ti jaʼ bankilal yuʼun soltaroetike.*

3 «¡Kʼelavilik! Jaʼ ta akojik ta jsokes* li kʼusitik atsʼunojike+ xchiʼuk ta jvijboxuk talel ikʼobal* ta asatik, li yikʼobal chonbolometik ti chavakʼik ta chikʼbil matanal ta kʼinetik avuʼunike; te chavichʼik kuchel batel xchiʼuk te chavichʼik jipel batel.* 4 Vaʼun, te chavakʼik venta ti voʼon kakʼojboxuk li mantal taje, sventa teuk-o li jtratokutik xchiʼuk Levie»,+ jech yaloj li Jeova ti jaʼ bankilal yuʼun soltaroetike.

5 «Li jtrato la jpas xchiʼuk Levie jaʼ sventa kuxlejal xchiʼuk jun oʼontonal, ta skoj li bendisionetik taje, jaʼ tijbat yoʼonton sventa xichʼun ta mukʼ. La xiʼtaun,* jech, te vaʼal kom ta skoj ti labal sba laj yil li jbie. 6 Te oy ta ye li mantal* sventa melele+ xchiʼuk muʼyuk kʼusi chopol laj yichʼ tael li ta yanal yee.* Jun yoʼonton echʼ ta jtojolal, tukʼ li kʼusitik la spase+ xchiʼuk ep buchʼutik laj yiktaik yuʼun spasel li kʼusi chopole. 7 Yuʼun li palee jaʼ oy ta sba xchanubtasel ta sventa Dios li jteklume xchiʼuk li krixchanoetik eke skʼan saʼik li mantal* chlokʼ ta yee,+ yuʼun jaʼ yaj-almantal li Jeova ti jaʼ bankilal yuʼun soltaroetike.

8 »Pe li voʼoxuke kʼejpʼujemoxuk* lokʼel li ta bee. Ep buchʼutik smakoj* yakan avuʼunik ta sventa li mantale.*+ La asokesik li trato xchiʼuk jlevietike»,+ xi li Jeova ti jaʼ bankilal yuʼun soltaroetike. 9 «Jaʼ yuʼun, chkakʼ ti xavichʼik pʼajele xchiʼuk ti bikʼituk akʼoplal xakomik ta sjunul li jteklume, yuʼun muʼyuk la atamik batel li beetik kuʼune, kʼajomal latʼujvanik kʼalal la atunesik li kʼusi chal mantale».+

10 «¿Mi mu junuk noʼox jtotik jkotoltik?+ ¿Mi mu junuk noʼox Dios ti la spasutike? Jaʼ yuʼun, ¿kʼuchaʼal ti ta jloʼla jbatik ta jujuntale+ xchiʼuk ti ta jsokesbetik skʼoplal li trato la spasik li jmoltotaktike? 11 Valopatinvan xa li Judae xchiʼuk oy kʼusi toj chopol yichʼoj pasel li ta Israel xchiʼuk ta Jerusalene; yuʼun li Judae sokesojbe xa skʼoplal li kʼusi chʼul* yuʼun Jeova+ ti skʼanoje xchiʼuk jaʼ kʼotem ta slekom li stseb yan diose.+ 12 Li Jeovae chakʼbe slajeb ta skarpana Jakob ti buchʼuuk noʼox jech tspas taje, mu ventauk buchʼu,* akʼo mi xakʼbe jun matanal li Jeova ti jaʼ bankilal yuʼun soltaroetike».+

13 «Oy to* kʼusi chapasik xtok. Ta skoj taje, te xmalmun yaʼlel satik ta okʼel xchiʼuk te chbat sjikʼ yoʼontonik li ta skajleb smoton Jeovae, jaʼ yuʼun muʼyuk xa tstsak ta venta li matanal avuʼunike xchiʼuk mi jaʼuk xa lek chil li kʼusi atsakoj batel ta akʼobike.+ 14 Yan li voʼoxuke xi chavalike: ‹¿Kʼu yuʼun?›. Yuʼun li Jeovae kʼotem kʼuchaʼal testigo avuʼun xchiʼuk li avajnil ta akeremale, ti la amukul satie, akʼo mi jaʼ achiʼil xchiʼuk jaʼ avajnil ti apasoj trato xchiʼuke.*+ 15 Pe oy jun ti mu jechuk la spase, yuʼun te oy ta stojolal uni juteb li xchʼul espiritu Diose. ¿Kʼusi oy ta yoʼonton ti jech la spase? Jaʼ oy ta yoʼonton li snitilulal Diose. Jaʼ yuʼun, kʼelo me abaik ta skoj li atalelalike xchiʼuk mu xamukul sati li avajnilik ta akeremalike. 16 Yuʼun li voʼone jpʼajoj* li buchʼu tsutes-o snup xchiʼile»,+ xi li Jeova ti jaʼ Dios yuʼun Israele, «jech xtok, jpʼajoj li buchʼu pixil ta choplejal li skʼuʼ spokʼe»,* xi li Jeova ti jaʼ bankilal yuʼun soltaroetike. «Kʼelo me abaik ti kʼu yelan atalelalike xchiʼuk mu xaloʼlavanik.+

17 »Lubem xa avuʼunik Jeova ta skoj li kʼusi chavalike.+ Pe xi chavalike: ‹¿Kʼuxi ti lubem kuʼunkutike?›. Jaʼo kʼalal xi chavalike: ‹Lek ch-ilatik yuʼun Jeova skotol li buchʼutik tspasik kʼusi chopole xchiʼuk xmuyubaj yoʼonton yuʼunik›+ o jaʼo kʼalal xi chavalike: ‹¿Bu oy li tukʼil Diose?›».

3 Xi chal li Jeova ti jaʼ bankilal yuʼun soltaroetike:* «¡Kʼelavilik!, ta jtak tal kaj-almantal ti jaʼ tsjam batel* li jbee.+ Vaʼun, ta anil noʼox chtal ta stemplo li Kajvaltik ta melele,+ jaʼ li buchʼu chasaʼike; jech xtok, chtal li j-almantal sventa trato ti xamuyubaj chamalaike. Chtal ta melel».

2 «Pe ¿buchʼu van stsʼik yuʼun mi kʼot skʼakʼalil chtale xchiʼuk buchʼu van ti vaʼal chkom mi vul ta lokʼele? Yuʼun xkoʼolaj kʼuchaʼal kʼokʼ ti chunijes takʼin sventa xlokʼ li yikʼobale xchiʼuk xkoʼolaj kʼuchaʼal xavon+ jchukʼometik. 3 Ta xchoti kʼuchaʼal li buchʼu ta xunijes xchiʼuk ta sakubtas platae,+ ta sakubtas li xnichʼnab Levie; ta slekubtas kʼuchaʼal oro xchiʼuk plata, ta skoj taje, chkʼotik ta krixchanoetik ti xuʼ xa xakʼik lekil matanal jech kʼuchaʼal lek chil li Jeovae. 4 Vaʼun, lek chil* ta melel Jeova li matanal chakʼ Juda xchiʼuk Jerusalene, jech kʼuchaʼal ta voʼnee.+

5 »Chinopaj tal ta atojolalik sventa xavichʼik chapanel xchiʼuk chkalbe ta anil ta jamal smulik li j-akʼchameletike,+ li buchʼutik tsloʼla snup xchiʼilike, li buchʼutik jecheʼ chakʼ ye kʼusi tspasike,+ li buchʼutik mu skʼan skolta* jyanlume+ xchiʼuk li buchʼutik tsloʼla jsaʼabtele,+ li ants ti chamem smalale xchiʼuk li buchʼu chamem stote.*+ Li buchʼutik taje muʼyuk xiʼtaojikun»,* xi li Jeova ti jaʼ bankilal yuʼun soltaroetike.

6 «Yuʼun voʼon Jeovaun, muʼyuk chijel.*+ Voʼoxuk xnichʼnaboxuk Jakob; jaʼ yuʼun muʼyuk lajem-o akʼoplalik. 7 Leʼ xa onoʼox ta skʼakʼalil amoltotakik ti kʼejpʼujemoxuk* lokʼel li ta jmantaltake xchiʼuk muʼyuk achʼunojik.+ Sutanik tal ta jtojolal, vaʼun chisut tal ta atojolalik ek»,+ xi li Jeova ti jaʼ bankilal yuʼun soltaroetike.

Pe xi chavalike: «¿Kʼuxi xa noʼox ti chisutkutik tal ta atojolale?».

8 «¿Mi xuʼ oy kʼusi xelkʼanbe Dios li jun noʼox krixchanoe? Pe oy kʼusi yakal chavelkʼanbeikun».

Xi chavalike: «¿Kʼusi ti kelkʼanojbotkutike?».

«Jaʼo kʼalal muʼyuk chavichʼik tal li diesmoetike* xchiʼuk li matanaletike. 9 Ta melel, chopol akʼoplal chakomik,* yuʼun oy kʼusi chavelkʼanbeikun... jech yakal tspas sjunul li jteklume. 10 Ichʼik tal skotol li diesmo* ti bu chichʼ kʼejel*+ sventa oyuk-o veʼlil li ta jnae;+ avokolikuk, akʼikun ta preva ta sventa taje. Te xavilik mi muʼyuk ta jam tal li vinajele+ xchiʼuk te xavilik mi muʼyuk ta jmal tal* epal bendision ta atojolalik jaʼ to ti kʼuxi oy xa avuʼunik skotole»,+ xi li Jeova ti jaʼ bankilal yuʼun soltaroetike.

11 Xi chal li Jeova ti jaʼ bankilal yuʼun soltaroetike: «Ta jtsak ta utel ta akojik li jlajesvaneje,* vaʼun muʼyuk xa tslajes li kʼusitik chlokʼ ta avosilike xchiʼuk chakʼ xa sat li steʼeltak uva ta avosilike».+

12 Xi chal li Jeova ti jaʼ bankilal yuʼun soltaroetike: «Skotol li mukʼtik lumetike chalik ti xamuyubajike,+ yuʼun chakʼotik ta jun kʼupil sba lum».

13 Xi chal li Jeovae: «Toj tsotsik li kʼusitik avalojik ta jtojolale».

Yan li voʼoxuke xi chavalike: «¿Kʼuxi ti oy kʼusitik toj tsotsik kalojkutik ta atojolale?».+

14 «Xi chavalike: ‹Muʼyuk kʼusi sbalil ti chijtun ta stojolal Diose.+ ¿Kʼuxi jtaojbetik sbalil ti ta jpastik li kʼusi oy ta jbatik yuʼune xchiʼuk ti chkat koʼontontik ta skoj jmultik ta yeloval li Jeova ti jaʼ bankilal yuʼun soltaroetike? 15 Li avie, xmuyubajik noʼox chkilkutik li jtoyba krixchanoetike. Jech xtok, lek chbat xkuxlejalik ek li buchʼutik tspasik kʼusitik chopole.+ Muʼyuk chkʼexavik chakʼik ta preva li Diose, pe muʼyuk tstabeik stojobil›».

16 Li vaʼ kʼakʼale, la xchiʼin sbaik ta loʼil ta jujuntal li buchʼutik xchiʼil sbaik ti xiʼtaojik li Jeovae, vaʼun la stsʼet chikinta Jeova xchiʼuk laj yaʼi li kʼusi chalike. Te une, te ta yeloval lik yichʼ tsʼibael jlik livro sventa svulesobil ta jolil,+ te tsʼibabil sbiik li buchʼutik xiʼtaojik li Jeovae xchiʼuk li buchʼutik tsnopbeik skʼoplal* li sbie.+

17 Xi chal li Jeova ti jaʼ bankilal yuʼun soltaroetike: «Ta xkuʼuninik+ mi kʼot skʼakʼalil ti ta jlikes jun jteklum ti stuk noʼox jeche.*+ Ta jkʼuxubinik, jech kʼuchaʼal jun vinik ti chkʼuxubin li skerem ti chtun ta stojolale.+ 18 Vaʼun, te chavilik yan velta ti mu koʼoluk li buchʼu tukʼe xchiʼuk li buchʼu toj chopole,+ li buchʼu chtun ta stojolal Diose xchiʼuk li buchʼu muʼyuk chtun ta stojolale».

4 Xi chal li Jeova ti jaʼ bankilal yuʼun soltaroetike:* «¡Kʼelavilik!, chtal jun kʼakʼal ti xtiltun* skʼakʼal kʼuchaʼal jun ornoe,+ jaʼo kʼalal chkʼotik kʼuchaʼal jobel skotol li jtoybaetike xchiʼuk li buchʼutik tspasik kʼusitik chopole. Tslajesatik mi vul li skʼakʼalile, tslajesbat kʼalal ta yibelik xchiʼuk kʼalal ta skʼobkʼobtakik. 2 Pe li voʼoxuk ti avichʼojik ta mukʼ* li jbie ta xojobaj ta atojolalik li kʼakʼal ti chakʼ talel tukʼilale xchiʼuk ti chpoxtavan li xojobale.* Ta xapʼitik kʼuchaʼal chʼiom tot vakaxetik ti jupʼesbilike».

3 Xi chal li Jeova ti jaʼ bankilal yuʼun soltaroetike: «Li voʼoxuke chapechʼilanik ta tekʼel li buchʼutik toj chopolike, yuʼun chkʼotik kʼuchaʼal pukuk* ta xpachʼomal avakanik mi kʼot skʼakʼalil ta jpas taje».

4 «Vuleso ta ajolik li Smantal kajtunel Moisese, li jmantaltake xchiʼuk li kʼusitik kʼotem ta nopel kuʼun ti laj kakʼ ta Oreb sventa xchʼun sjunul li Israele.+

5 »¡Kʼelavilik! Ta jtakboxuk tal li j-alkʼop Elias+ yoʼ to muʼyuk talem li skʼakʼalil Jeovae, ti toj tsots skʼoplale xchiʼuk ti toj labal sbae.+ 6 Ta skʼatajesbe jech yoʼonton totiletik kʼuchaʼal yoʼonton xnichʼnabike+ xchiʼuk ta skʼatajesbe jech yoʼonton li nichʼnabiletik kʼuchaʼal yoʼonton stotike, sventa mu xtal jyayijes li balumile, ti xkakʼbe slajeb ta j-echʼele».

Liʼ tsuts sjelubtasel li Tsʼibetik ta Ebreo xchiʼuk ta Arameo Kʼope, jaʼ xa chlik tal li Tsʼibetik ta Griego Kʼope