SVENTA EFESIOS

1 Voʼon Pabloun, yajtakbolun Kristo Jesus ti jech tskʼan yoʼonton Diose, jaʼ sventa li buchʼutik chʼul ti te oyik ta Efeso+ ti jmoj tukʼ oyik xchiʼuk li Kristo Jesuse:

2 Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.

3 Muyubtabiluk li Dios ti jaʼ Stot li Kajvaltik Jesukristoe, yuʼun laj yakʼbunkutik bendision, jaʼ li bendision ta mantal te ta vinajel ta skoj ti jmoj oyunkutik xchiʼuk Kristoe.+ 4 Yuʼun kʼalal muʼyuk toʼox bu pasbil li balumile, la stʼujunkutik sventa jmojuk oyunkutik xchiʼuk Kristo sventa chʼulunkutik xchiʼuk chʼabaluk jpaltailkutik*+ ta stojolal Dios ta skoj li kʼanelale. 5 Yuʼun laj xa onoʼox stʼujutik+ sventa xijkʼot ta xnichʼnab+ ta stojolal Jesukristo jech kʼuchaʼal oy ta yoʼonton xchiʼuk ti jech tskʼan yoʼontone+ 6 sventa xichʼ kʼupil kʼoptabel li smukʼul slekil yutsil yoʼonton+ ti laj yakʼbutik ta slekil yoʼonton ta stojolal li buchʼu skʼanoje.+ 7 La skoltautik Dios yoʼ jtatik pojelal ta sventa li xchʼichʼel Xnichʼone,+ jech, la jtatik perton ta skoj li jmultike,+ jaʼ ta skoj li skʼulejal slekil yutsil yoʼontone.

8 Ep laj yakʼbutik pʼijilal xchiʼuk yaʼibel smelolal ta skoj slekil yutsil yoʼonton 9 yoʼ xkojtikintik li kʼusi chʼul ti mukul skʼoplal+ ta sventa li kʼusi tskʼan yoʼontone. Yuʼun jaʼ jech ta yoʼonton ti jech la snop tspas 10 ti tsventain li kʼusitik mi tsuts skʼakʼalil ti kʼusi ora albile. Taje jaʼ sventa tstsob skotol ta stojolal Kristo li kʼusitik oy ta vinajel xchiʼuk li kʼusitik oy ta sba balumile.+ Ta melel, tstsob skotol ta stojolal, 11 jech, jaʼ li buchʼu jmoj oyunkutik xchiʼuke, jech xtok, laj yichʼ alel ti chkichʼ jrextokutike,*+ yuʼun laj xa onoʼox kichʼkutik tʼujel jech kʼuchaʼal onoʼox tskʼan tspas li buchʼu tʼujvan ti chkʼot ta pasel yuʼun skotol li kʼusi tsnop tspas jech kʼuchaʼal tskʼan yoʼontone 12 sventa jkʼupil kʼoptakutik xchiʼuk xkalbekutik smukʼulal ti voʼonkutik baʼyel xa onoʼox ta jmalakutik li Kristoe. 13 Pe la amalaik ek kʼalal laj xa ox avaʼiik ta sventa li kʼusi melel ti jaʼ li lekil aʼyejetik sventa akolebalike. Laj avichʼ aseyoalik+ ek ta stojolal chʼul espiritu ti yaloj xa onoʼox chakʼ Dios ta stojolal Kristo kʼalal mi laj xa ox avakʼ xchʼunel avoʼontonike, 14 ti jech kʼuchaʼal jun prental* ti albil xa onoʼox skʼoplal ta sventa li jrextotike,*+ ti jaʼ sventa xichʼ pojel+ li kʼusi jaʼ yuʼun Dios+ sventa xichʼ kʼupil kʼoptabel li smukʼulale.

15 Jech oxal, li voʼon eke, ti laj kaʼi li xchʼunel avoʼontonik ta stojolal Kajvaltik Jesus xchiʼuk li kʼanelal chavakʼik ta ilel ta stojolal skotol li buchʼutik chʼule, 16 jech muʼyuk bu kiktaoj jba ta stojel ta vokol ta aventaik. Ta jtaoxuk ta alel kʼalal ta jpas j-orasione 17 sventa xakʼboxuk ajuʼelik li Totil ti oy smukʼulale, ti jaʼ li Sdios Kajvaltik Jesukristoe yoʼ xapʼijubik xchiʼuk xavaʼibeik smelolal kʼalal yakal chavojtikinik batele.+ 18 La sjamboxuk anopbenik li stuke sventa xavojtikinik li spatobil oʼontonale xchiʼuk xavojtikinik li kʼusitik lekik chakʼbe xrextoin* li buchʼutik chʼule,+ 19 jech xtok, mu xa noʼox stakʼ albel smelolal li stsatsal juʼel ta jtojolaltik ti jchʼunolajelutike.+ Li stsatsal juʼele jaʼ te vinaj 20 kʼalal la xchaʼkuxes Kristo xchiʼuk kʼalal la xchotan ta sbatsʼikʼob+ te ta vinajele, 21 jaʼ mas toyol kʼot skʼoplal kʼuchaʼal li yantik ajvaliletike, li buchʼutik oy yabtele, li buchʼutik oy sjuʼele, li buchʼutik tspasvanik ta mantale xchiʼuk skotol li biiletik ti chichʼ alele,+ maʼuk noʼox ta skotol li kʼusitik oy ta balumile,* jaʼ jech ta sventa xtok li kʼusitik chtal ta mas tsʼakale. 22 Jech xtok, laj yakʼbe ta yok skʼob+ skotol li kʼusitike xchiʼuk laj yakʼ kʼotuk ta jolil sventa skotol li kʼusitik oy ta tsobobbail+ 23 ti jaʼ sbekʼtale,+ ti nojem ta stalelaltake xchiʼuk ti jaʼ tstsʼaki yuʼun skotol li kʼusitike.

2 Jech xtok, lakuxiik yan velta yuʼun li Diose manchuk mi chamemoxuk toʼox ta skoj apaltailik* xchiʼuk ta skoj amulik,+ 2 ti jech toʼox la apas abaik kʼuk sjalil jech kʼuchaʼal tspas skotol li kʼusitik oy ta balumile,*+ jech kʼuchaʼal tspas li ajvalil yuʼun ikʼe,+ li ikʼ+ ti tspas ta mantal li krixchanoetike xchiʼuk ti ch-abtej avi ta stojolal li xnichʼnabtak toybaile. 3 Ta melel, te kapal jkʼoplaltik ek, yuʼun jech toʼox la jpas jkotoltik kʼuk sjalil jech kʼuchaʼal tskʼan jbekʼtaltike,+ la jpastik li kʼusi tskʼan jbekʼtaltike xchiʼuk li kʼusi tskʼan jnopbentike,+ ta jvokʼeltik onoʼox xnichʼnabutik skʼakʼal oʼontonal+ jech kʼuchaʼal li yantike. 4 Ta skoj ti lek tajek chkʼuxubinvan li Diose+ xchiʼuk ti la skʼanutik ta skoj ti toj mukʼ li kʼanelal yuʼune,+ 5 jmoj laj yakʼ xijkuxi yan velta xchiʼuk Kristo kʼalal chamemutik toʼox ta skoj jpaltailtike.*+ Laj xa avichʼik koltael lokʼel ta skoj li slekil yutsil oʼontonale. 6 Jech xtok, jmoj la xchaʼkuxesutik xchiʼuk jmoj la xchotanutik te ta vinajel yoʼ jmoj oyutik xchiʼuk li Kristo Jesuse+ 7 sventa mi vul li achʼ balumile,* xuʼ xakʼbutik ta ilel li slekil yutsil yoʼonton ti mu albajuk yepal ta skoj ti jmoj oyutik xchiʼuk li Kristo Jesuse.

8 Lakolik lokʼel ta sventa xchʼunel avoʼontonik+ ta skoj li slekil yutsil oʼontonal taje, maʼuk ta skoj kʼusitik chapasik ti jech la ataik li kolebal taje. Moʼoj, jaʼ jun matanal yuʼun Dios. 9 Maʼuk, maʼuk ta sventa avabtel+ atukik ti jech la ataike sventa muʼyuk buchʼu xtoyet xa chaʼi sba. 10 Spasbenutik yok skʼob Dios, laj kichʼtik pasel+ sventa jmoj oyutik xchiʼuk Kristo Jesus+ sventa jpastik lekil abtelaletik, baʼyel xa onoʼox yaloj Dios ti jech ta jpastike.

11 Jaʼ yuʼun, teuk me ta ajolik ti maʼuk judaoxuke, «muʼyuk yichʼoj sirkunsision»* xi akʼoplalik yuʼun li buchʼutik «yichʼojik sirkunsision» ta stojolal jun vinike. 12 Li vaʼ kʼakʼale, chʼabal toʼox te Kristo ta atojolalik, nom toʼox oyoxuk ta stojolal li krixchanoetik ta Israele, muʼyuk toʼox te akʼoplalik li ta trato ta sventa li kʼusi albile;+ muʼyuk toʼox spatobil avoʼontonik xchiʼuk muʼyuk toʼox te oy Dios ta atojolalik liʼ ta balumile.+ 13 Pe li avi ti jmoj xa oyoxuk xchiʼuk li Kristo Jesuse nopol xa oyoxuk ta stojolal Dios ta sventa xchʼichʼel Kristo manchuk mi nom toʼox oyoxuk kʼuk sjalil. 14 Yuʼun jaʼ kʼotem ta jun oʼontonal kuʼuntik li Kristoe,+ jaʼ la spas ta jchop li chaʼchop toʼoxe+ xchiʼuk jaʼ la sjines li muro ti chchʼakvan toʼox ta oʼlole.+ 15 Ta skoj sbekʼtal laj skʼoplal yuʼun li kontrainele, la slajesbe skʼoplal li Smantal Moises ti yichʼoj epal mantaletike sventa xichʼ pasel ta jchop* li chaʼchop toʼoxe sventa jmoj xkʼotik+ xchiʼuk jun xa yoʼontonik. 16 Jech xtok, jaʼ sventa lek xchaʼta yav yuʼun ti kʼu yelan xil sbaik xchiʼuk Dios li chaʼchop jteklume yoʼ jun sbekʼtal chkʼotik ta sventa li jtel teʼ sventa vokolile,*+ yuʼun jaʼ ta stojolal stuk ti laj skʼoplal yuʼun li kontrainele.+ 17 Tal xchiʼuk laj yal lekil aʼyejetik sventa jun oʼontonal ta atojolalik ti nom toʼox oyoxuke xchiʼuk laj yakʼbe jun oʼontonal li buchʼutik nopol oyike, 18 yuʼun jaʼ ta stojolal jun noʼox chʼul espiritu ti xuʼ xijnopaj ta stojolal li Totile manchuk mi chaʼchop jteklumutik.

19 Jaʼ yuʼun, maʼuk xa yan krixchanooxuk xchiʼuk maʼuk xa jyanlumoxuk,+ yuʼun jmoj xa alumalik+ xchiʼuk li buchʼutik chʼule xchiʼuk jaʼ yutsʼ yalaloxuk li Diose,+ 20 jech xtok, laj avichʼik vaʼanel li ta snakleb nae, li snakleb na taje jaʼ li jtakboletik xchiʼuk li j-alkʼopetike,+ pe li Kristo Jesuse jaʼ li ton ta chikin na sventa li snakleb nae.+ 21 Li jpʼej na ti jmoj oy xchiʼuk li Kristoe lek stsʼakanoj sba,+ yakal chvaʼi batel sventa xkʼot ta xchʼul templo Jeova.*+ 22 Ti jech jmoj oyoxuk xchiʼuke, jmoj yakal chavichʼik vaʼanel ek sventa xakʼotik ta jpʼej na ti bu xuʼ xnaki Dios ta xchʼul espiritue.+

3 Jech oxal, li voʼon Pabloun ti jchukelun+ ta skoj Kristo Jesus ta aventaik ti voʼoxuk jyanlum krixchanooxuke... 2 Ta melel, avaʼiojbeik skʼoplal li kʼusi jbainoj+ ta sventa li slekil yutsil yoʼonton Dios ti li-akʼbat ta akojike, 3 ti li-akʼbat kojtikin li kʼusi chʼul ti mukul skʼoplal kʼalal oy kʼusi li-akʼbat jnaʼ jech kʼuchaʼal laj xa onoʼox kalboxuk jutuk skʼoplale. 4 Jaʼ yuʼun, kʼalal mi la akʼelik li karta liʼe, te chavakʼik venta ti xkaʼibe lek smelolal li kʼusi chʼul ti mukul skʼoplal+ ta sventa li Kristoe. 5 Ti kʼu xa sjalil echʼem tal li jaykʼol kuxlejale, muʼyuk bu laj yichʼ akʼbel yojtikinik xnichʼnab krixchanoetik li kʼusi mukule, yan li avie akʼbil xa snaʼik yuʼun chʼul espiritu li chʼul jtakboletik xchiʼuk li j-alkʼopetik yuʼune.+ 6 Li kʼusi mukule jaʼ ti yakal chkʼotik ta yajtsʼaklom Kristo li jyanlumetik koliyal li lekil aʼyejetike, ti persa onoʼox chichʼ xrextoik* ek jech kʼuchaʼal voʼonkutike, ti xkʼotikuk ta stsʼakbenaltak bekʼtalile+ xchiʼuk ti teuk skʼoplalik ek kʼuchaʼal voʼonkutik ta sventa li kʼusi albile. 7 Likʼot ta jtunel ta sventa li kʼusi chʼul ti mukul skʼoplale, taje jaʼ ta skoj li matanal muʼyuk tojbil ti ta slekil yutsil yoʼonton laj yakʼbun ta sjuʼel li Diose.+

8 Li voʼon ti mas bikʼit jkʼoplal ta stojolal skotol li buchʼutik chʼul ti bikʼit skʼoplalike+ laj kichʼ akʼbel li slekil yutsil oʼontonal+ taje sventa chkalbe jyanlumetik li lekil aʼyejetik ta sventa li kʼulejal yuʼun Kristo ti mu tabajuk spajebe 9 xchiʼuk sventa xkakʼbe yil skotol krixchanoetik kʼuxi ch-abtej li kʼusi chʼul ti mukul skʼoplale,+ ti voʼne xa onoʼox tajek mukul yuʼun li Dios ti jaʼ la spas skotol li kʼusitike. 10 Taje jaʼ ta stojolal tsobobbail+ akʼo yichʼ akʼbel snaʼ ajvaliletik xchiʼuk li buchʼutik oy yabtelik ta vinajel ti ep tajek ta chop kʼu yelan chvinaj li spʼijil Diose.+ 11 Jaʼ ta skoj li kʼusi tskʼan tspas sbatel osil ti jech kʼot ta nopel yuʼun tspas ta sventa li Kristo+ ti jaʼ li Kajvaltik Jesuse. 12 Jaʼ ta sventa ti jech jamal chijkʼopoje xchiʼuk ti jpatoj koʼontontik chijnopaj ta stojolal Dios+ ta skoj ti oy xchʼunel koʼontontik ta stojolal Kristoe. 13 Jaʼ yuʼun, ta jkʼanboxuk vokol ti mu me xalubtsajik ta skoj ti chkil tsots jvokol ta akojike, yuʼun jaʼ sventa avichʼobilik ta mukʼ li jvokoltake.+

14 Jaʼ yuʼun, ta jkejan jba ta stojolal li Totile. 15 Jaʼ koliyal ti oy skotol li utsʼ alaliletik ta vinajel xchiʼuk li ta sba balumile. 16 Ta jkʼanbe ta orasion Dios ti oy ep smukʼulale ti akʼo stsatsubtas avoʼontonik+ ta sjuʼel xchʼul espiritue. 17 Ta jkʼanbe ta orasion Dios ti oyuk ta avoʼontonik Kristo xchiʼuk ti akʼanojikuk yantik ta skoj li xchʼunel avoʼontonike.+ Lekuk tsʼunuloxuk-o+ xchiʼuk teuk oyoxuk-o li ta snakleb nae+ 18 sventa koʼoluk lek xavaʼibeik smelolal xchiʼuk li buchʼutik chʼul ti kʼu sjamleje, ti kʼu snatile, ti kʼu stayleje, ti kʼu snatil xyal li kʼusi melele 19 xchiʼuk ti xavojtikinik li kʼanelal yuʼun Kristo+ ti jaʼ mas to mukʼ kʼuchaʼal li yojtikinobile sventa xakʼboxuk Dios skotol li stalelale.

20 Li avi une, li buchʼu yakal ch-abtej sjuʼel ta jtojolaltike+ x-echʼ to ta xakʼbutik li kʼusi ta jkʼantike o li kʼusi jnopojtike.+ 21 Jaʼuk akʼo yichʼ albel smukʼulal Dios ta stojolal li tsobobbaile xchiʼuk ta stojolal li Kristo Jesuse, jechuk-o akʼo yichʼ albel skʼoplal sbatel osil ta skotol li jaykʼol kuxlejale. Jechuk.

4 Jaʼ yuʼun, ti jchukelun+ ta skoj Kajvaltike ta jkʼanboxuk vokol ti oyuk lek amelolike,+ yuʼun jaʼ sventa ti laj avichʼik takel ta ikʼele, 2 bikʼituk me tajek xavakʼ abaik*+ xchiʼuk manxoukoxuk me, oyuk me smalael avuʼunik,+ tsʼikbo me abaik ta jujuntal ta skoj ti akʼanoj abaike,+ 3 junuk me avoʼontonik ta jujuntal,+ akʼbeik me yipal ta sjunul avoʼontonik sventa jmojuk oyoxuk ta skoj li chʼul espiritue. 4 Jun noʼox bekʼtalil oy+ xchiʼuk jun noʼox chʼul espiritu oy+ jech kʼuchaʼal jun noʼox spatobil avoʼontonik+ ti laj avichʼik-o takel ta ikʼele; 5 jun noʼox Kajvaltik,+ jun noʼox xchʼunel oʼontonal xchiʼuk jun noʼox ichʼvoʼ; 6 jun noʼox Dios ti jaʼ Totil ta skotole, ti sventainoj skotol krixchanoetike, ti tstunes skotol krixchanoetik sventa spas li kʼusitike xchiʼuk oy ta skʼob skotol li krixchanoetik.

7 Tana un, li slekil yutsil oʼontonal laj kichʼtik ta jujuntale jech pʼisbil laj kichʼtik jech kʼuchaʼal laj yakʼbutik Kristo li matanal ti muʼyuk tojbile.+ 8 Yuʼun xi chale: «Kʼalal muy batel ta toyole, oy buchʼutik la xchuk muyel; laj yakʼ viniketik jech kʼuchaʼal matanal».+ 9 Pe ¿kʼusi smelolal ti «muy batel» xie? Jaʼ skʼan xal ti yal toʼox talel ta balumile. 10 Li buchʼu yalem tale jaʼ li buchʼu mas to toyol muy batel+ ta sjunlej vinajel+ sventa stsʼaki yuʼun skotol li kʼusitike.

11 Laj yakʼ jlom kʼuchaʼal jtakboletik,+ kʼuchaʼal j-alkʼopetik,+ kʼuchaʼal j-al lekil aʼyejetik,+ kʼuchaʼal jchabichijetik xchiʼuk jchanubtasvanejetik+ 12 sventa stukʼibtaselik* li buchʼutik chʼule, sventa xtunik ta stojolal yantik xchiʼuk sventa stsatsubtasbel li sbekʼtal* Kristoe,+ 13 jaʼ to mi jmoj xa li xchʼunel koʼontontike xchiʼuk mi jmoj xa xkojtikintik lek li Xnichʼon Diose sventa chijyijub ta mantal+ jaʼ to mi lek xa tsʼakal la jtabetik staylej li Kristoe. 14 Jaʼ yuʼun, mu xa me jpas jbatik jech kʼuchaʼal ololetik ti chjipatik batel yuʼun li yok nabe xchiʼuk ti ch-ikʼatik batel ta jujujot ta kʼusiuk noʼox chanubtasel+ ta skoj spetsʼ li viniketike, ta skoj smanyailik ti kʼu yelan tsnop chloʼlavanike. 15 Ti kʼusi mas leke jaʼ ti meleluk li kʼusi chkaltike xchiʼuk kakʼtik ta ilel ti kʼanvanemutike, chʼikutik ta skotol kʼusitik jech kʼuchaʼal tskʼan li jolil ti jaʼ li Kristoe.+ 16 Lek tsʼakal skotol bekʼtalil+ ta stojolal li Kristoe xchiʼuk pasbil sventa tskolta sbaik ti kʼu yelan tsʼakajtik kʼalal oy kʼusi chtun yuʼune. Kʼalal lek ch-abtej ta jujutos li stsʼakalul jbekʼtaltike, tskolta sbaik sventa xchʼi-o batel li bekʼtalile sventa tstsatsubtas sba stukik ta sventa li kʼanelale.+

17 Jaʼ yuʼun, xi chkalboxuke, xi jamal chkalboxuk ta stojolal Kajvaltike: mu xa me xapasik jech kʼuchaʼal tspas li jyanlumetik+ ti solel bolibem* li snopbenike.+ 18 Oy ta ikʼal osil li snopbenike xchiʼuk nom oyik li ta kuxlejal ti jaʼ chakʼ Diose, jaʼ ta skoj ti muʼyuk kʼusi snaʼike xchiʼuk ta skoj ti pimubem yoʼontonike. 19 Solel mu xa snaʼ xkʼexavik li ta stalelalike xchiʼuk jaʼ xa yakʼoj ta yoʼontonik spasel li talelal ti toj kʼexlal sba*+ sventa tspasilanik skotol li kʼusitik ibal sba* ti mu x-echʼ yoʼontonik spasele.

20 Pe muʼyuk bu la achanik ti jaʼ jech li Kristoe, 21 taje anaʼojik ta skoj ti laj avaʼiik xchiʼuk ti laj avichʼik chanubtasel jech kʼuchaʼal laj yakʼ ta chanel Jesus li kʼusitik melele. 22 Laj avichʼik chanubtasel ti skʼan xajipik lokʼel li amol talelalik+ ti jaʼ toʼox jechoxuk ta voʼnee xchiʼuk ti tsok batel ta skoj li kʼusi tskʼan avoʼontonik ti tsloʼlaoxuke.+ 23 Jaʼ yuʼun, skʼan jechuk-o achʼubuk batel ti kʼu yelan chanopike+ 24 xchiʼuk skʼan xalapik li achʼ talelal+ ti jech laj yichʼ pasel jech kʼuchaʼal la skʼan yoʼonton li Diose, ti laj yichʼ pasel ta batsʼi tukʼilal xchiʼuk ta stukʼil oʼontonale.

25 Jaʼ yuʼun, meleluk xa xakʼopon abaik ta jujuntal xchiʼuk li achiʼilik+ ta skoj ti laj xa ajipik komel li loʼlavaneje, yuʼun stsʼakbenalutik jun noʼox bekʼtalil.+ 26 Akʼo mi ilinemoxuk, mu me xasaʼ amulik;+ mu me jechuk ilinemoxuk-o kʼalal chchʼay xa ox batel kʼakʼale;+ 27 mu me xajambeik jsetʼuk* sbe* li Diabloe.+ 28 Mu xa me x-elkʼaj li buchʼu ch-elkʼaje; li kʼusi mas leke akʼo tsots abtejuk, akʼo spas lekil abtelal ta skʼob+ sventa oyuk kʼusi xakʼbe jutebuk li buchʼu oy kʼusi chtun yuʼune.+ 29 Mu me xlokʼ ta aveik jpʼeluk kʼop ti tsokesvane,+ jaʼ noʼox xavalik li kʼusi lek ti tstsatsubtasvan kʼalal jech chtune sventa stabe sbalil avuʼunik li buchʼu chchikintae.+ 30 Jech xtok, mu me xavakʼbeik yat yoʼonton* li xchʼul espiritu Dios+ ti jaʼ aseyoalik+ sventa xakolik ta skoj pojelal mi la sta skʼakʼalile.+

31 Jipik lokʼel skotol li kʼusi toj chopol oy ta avoʼontonike,+ li skʼakʼal avoʼontonike, ti chavilta abaike, ti tsotsik xa aveik chakʼopon abaike, ti chachopol kʼopta abaike+ xchiʼuk skotol li kʼusitik tsokesvane.+ 32 Jaʼ mas lek ti oyuk slekil avoʼontonik ta jujuntale, kʼuxuk tajek ta avoʼonton+ xavaʼi abaik xchiʼuk pasbo abaik perton ta sjunul avoʼontonik ta jujuntal jech kʼuchaʼal ta sjunul yoʼonton la spasboxuk perton Dios ta stojolal li Kristo eke.+

5 Jaʼ yuʼun, chanbeik li kʼusi tspas Diose,+ yuʼun skʼanbil nichʼnaboxuk 2 xchiʼuk jechuk-o me xakʼan abaik+ jech kʼuchaʼal la skʼanutik* li Kristoe,+ ti laj yakʼ sba stuk ta jkojtik* jech kʼuchaʼal matanal xchiʼuk milbil matanal ti lek xmuet chaʼi li Diose.+

3 Mu me xavalbeik skʼoplal jutebuk li mulivajele,* skotol li kʼusitik ibal sbae* o li kʼusitik mu x-echʼ ta oʼontonal spasele,+ yuʼun mu jechuk stalelal tspasik li buchʼutik chʼule;+ 4 jech xtok, mu me xavalbeik skʼoplal li talelal ti toj kʼexlal sbae, li bol kʼopojele, li bol ixtol loʼile+ —skotol li kʼusitik muʼyuk leke—, li kʼusi mas lek xuʼ xapasike jaʼ ti xatojbeik ta vokol li Diose.+ 5 Yuʼun xavojtikinik xchiʼuk anaʼojik lek liʼe: li jmulivajele,*+ li buchʼu ibal sba kʼusi tspase xchiʼuk li buchʼu mu x-echʼ yoʼonton ta skʼanel li kʼusitik+ ti jaʼ skʼan xal yichʼel ta mukʼ santoetike mu xuʼ xichʼ xrextoik* ta Ajvalilal* yuʼun Kristo xchiʼuk li ta Ajvalilal yuʼun Diose.+

6 Mu me buchʼu sloʼlaoxuk ta skʼopojel ti muʼyuk sbalile, yuʼun ta skoj taje chtal skʼakʼal yoʼonton Dios ta stojolal li xnichʼnabtak toybaile. 7 Jaʼ yuʼun, mu me teuk kapal akʼoplalik xchiʼukik; 8 yuʼun oy toʼox kʼuk sjalil ti oyoxuk ta ikʼ osile, pe li avie oyoxuk xa ta sak osil+ ta skoj ti jmoj oyoxuk xchiʼuk li Kajvaltike.+ Jechuk-o me xaxanavik jech kʼuchaʼal xnichʼnab lus, 9 yuʼun li luse jaʼ chakʼ skotol li yutsil oʼontonale, li tukʼilale xchiʼuk li kʼusi melele.+ 10 Jechuk-o me xavakʼik batel venta li kʼusi lek chil+ Kajvaltike; 11 mu xa me xapasik li abtelal ti mu snaʼ satin ti jaʼ sventa ikʼ osile;+ jaʼ mas lek akʼik ta ilel ti kʼu yelan yabteltake. 12 Yuʼun kʼexlal sba akʼo mi kʼajomal noʼox chavalbeik skʼoplal li kʼusi tspasik ta mukule. 13 Jaʼ yuʼun, skotol li kʼusi akʼbil ta ilele* jaʼ ch-akʼat ta ilel yuʼun li luse, yuʼun lus xa chkʼot skotol li kʼusi chichʼ akʼel ta ilele. 14 Jaʼ yuʼun, xi laj yichʼ alele: «Voʼot ti te vayalote, julavan xchiʼuk likan talel ti bu oy animaetike,+ vaʼun chojobaj Kristo ta atojolal».+

15 Jaʼ yuʼun, kʼelik me lek ti mu me bol krixchanouk ti kʼu yelan chapas abaike, jaʼ lek pʼij xapas abaik, 16 lek me xatunesik li jujun kʼakʼal chjelav avuʼunike,*+ yuʼun sok xa tajek li kʼakʼale. 17 Jech oxal, iktaik xa ti mu xatojobik snopele, jaʼ lek jechuk-o me xavakʼik venta li kʼusi tskʼan yoʼonton Jeovae.*+ 18 Jech xtok, mu me xayakubik ta skoj vino+ ti muʼyuk xa stukʼil smelolal yuʼun li talelale, jaʼ lek jechuk-o xanojes abaik ta chʼul espiritu. 19 Ta salmoetik xakʼopon abaik ta jujuntal, ta kʼupil kʼoptael xchiʼuk ta kʼejimoletik sventa yichʼobil ta mukʼ Dios. Kʼejinanik+ xchiʼuk kʼejintaik kʼejojetik+ ta avoʼontonik ta stojolal Jeova.*+ 20 Jechuk-o xatojbeik ta vokol+ Jtotik Dios skotol li kʼusitike, jech xapasik ta sbi li Kajvaltik Jesuse.+

21 Ichʼo abaik ta mukʼ ta jujuntal+ ta skoj ti axiʼtaojik li Kristoe. 22 Akʼo yichʼ ta mukʼ smalal li ajnilaletik+ jech kʼuchaʼal chichʼik ta mukʼ li Kajvaltike, 23 yuʼun li malalile jaʼ jolil ta stojolal li yajnile+ jech kʼuchaʼal jaʼ jolil ta stojolal tsobobbail li Kristo+ ti jaʼ la skolta li bekʼtalil taje. 24 Jech ta melel, jech kʼuchaʼal yichʼojik ta mukʼ Kristo li tsobobbaile, li ajnilaletik eke skʼan xichʼ ta mukʼ smalalik ta skotol ora. 25 Malaliletik, jechuk-o me xakʼan avajnilik+ jech kʼuchaʼal la skʼan tsobobbail li Kristo eke xchiʼuk ti laj yakʼ sba ta stojolal+ 26 sventa xchʼultajese. La sakubtas ta voʼ, jaʼ xkaltik, ta skʼop Dios.+ 27 Ti jech la spase jaʼ sventa junuk yutsil ta sat li tsobobbaile, ti sakuke, ti lekuke, ti muʼyuk kʼusi jsetʼuke,*+ jaʼ tskʼan ti chʼuluke xchiʼuk ti muʼyukuk xchopolile.+

28 Jaʼuk me jech akʼo skʼan yajnilik li malaliletik jech kʼuchaʼal skʼanoj sbekʼtal stukike. Skʼanoj sba stuk li buchʼu skʼanoj yajnile, 29 yuʼun muʼyuk buchʼu spʼajoj li sbekʼtal stuke, ti kʼusie, tsmakʼlin xchiʼuk chkʼuxubin jech kʼuchaʼal tspas Kristo ta stojolal li tsobobbaile, 30 yuʼun jaʼutik stsʼakbenal li sbekʼtale.+ 31 «Jaʼ yuʼun, ta xikta komel stot xchiʼuk smeʼ li vinike, jaʼ xa chchiʼin-o ta naklej li yajnile,* vaʼun tspas ta jun sbekʼtalik li chaʼvoʼike».+ 32 Toj mukʼ skʼoplal li kʼusi chʼul ti mukul skʼoplale.+ Ta melel, jaʼ yakal chkalbe skʼoplal li Kristo xchiʼuk li tsobobbaile.+ 33 Akʼo mi jech, ta jujuntaloxuk skʼan me xakʼan avajnilik+ jech kʼuchaʼal akʼanoj aba atukike; jech xtok, akʼo me yichʼ lek ta mukʼ smalal li ajnilale.+

6 Alab nichʼnabiletik, chʼunbo me smantal atot ameʼik+ jech kʼuchaʼal lek chil li Kajvaltike, yuʼun tukʼ ta sat li Diose. 2 «Ichʼo ta mukʼ atot ameʼ»,+ taje jaʼ li baʼyel mantal ti jmoj te tsakal skʼoplal xchiʼuk li kʼusi xi albile: 3 «Sventa lekuk xabat xchiʼuk jal xakuxi liʼ ta sba balumile». 4 Totiletik, mu me xasabeik skʼakʼal yoʼonton li anichʼnabike,+ tukʼibtasik me sventa xachabiik+ xchiʼuk albeik mantal* jech kʼuchaʼal tskʼan Jeovae.*+

5 Mosoiletik, chʼunbeik me smantal li krixchanoetik ti jaʼ avajvalike,+ ichʼik me ta mukʼ xchiʼuk xiʼtaik me ta sjunul avoʼontonik jech kʼuchaʼal chachʼunbeik smantal li Kristoe, 6 pe maʼuk noʼox me jech xapasik kʼalal oy buchʼu skʼelojoxuk sventa lek xa xiloxuk li krixchanoetike,+ jechuk me xapasik jech kʼuchaʼal smoso Kristo. Ta sjunuluk me avoʼonton xapasik li kʼusi tskʼan yoʼonton Diose.+ 7 Ta sjunuluk me avoʼonton xatunik ta mosoil ta stojolal Jeova,*+ maʼuk ta stojolal krixchanoetik, 8 yuʼun anaʼojik ti tstojboxuk sutel Jeova*+ li kʼusitik lek chapasik ta jujuntale akʼo mi mosoiloxuk o mi kolemoxuk. 9 Jechoxuk ek ti yajvaloxuk mosoile jaʼuk me jech xapasbeik li amosoike xchiʼuk mu xa me xasibtasik, yuʼun anaʼojik ti te oy ta vinajel li Avajvalik xchiʼuk ti jaʼ Yajvalik eke,+ muʼyuk tʼujbil yajval yuʼun.

10 Ta slajebal xa une, jechuk me xata-o batel ajuʼelik+ ta stojolal li Kajvaltike xchiʼuk xatabeik-o batel li stsatsal yipe. 11 Lapik me li abtejebal+ likem talel ta stojolal Dios ti lek tsʼakale sventa mu stsaloxuk li kʼusitik manya* tspas Diabloe; 12 yuʼun yakal ta jtsak jbatik ta kʼop,+ pe maʼuk xchiʼuk li buchʼu oy sbekʼtal xchiʼuk oy xchʼichʼele, jaʼ yakal ta jtsak jbatik ta kʼop xchiʼuk li ajvaliletike, li buchʼutik oy yabtelike, li ajvaliletik ta balumile* xchiʼuk li pukujetik+ ti toj chopolik ti ta vinajel oyike. 13 Jech oxal, tsakik me li abtejebal likem talel ta stojolal Dios+ ti lek tsʼakale sventa xkuch avuʼunik mi tal li chopol kʼakʼale, vaʼun muʼyuk xa bu chavichʼik tsalel mi pas xa ox avuʼunik skotol taje.

14 Tsotsanik-o me, teuk me lek chukul ta achʼutik jech kʼuchaʼal jun chukil li kʼusi melele,+ lapik me li tukʼilal ti xkoʼolaj ta smak oʼontonale+ 15 xchiʼuk lapik me li axonobike sventa lek chapaloxuk ta yalel batel li lekil aʼyejetik sventa jun oʼontonale.+ 16 Pe maʼuk noʼox, tsakik me li xchʼunel avoʼontonik jech kʼuchaʼal junuk mukʼta eskudo*+ sventa xtupʼ avuʼunik skotol sflecha* li Satanas* ti tsanajtik skʼakʼal tsjip tale.+ 17 Jech xtok, xojik me ta ajolik kʼuchaʼal smak jolil li kolebale+ xchiʼuk tsakik me li espada chakʼ chʼul espiritue, jaʼ xkaltik, li skʼop Diose,+ 18 jech xtok, pasik orasion+ skotol ora jech kʼuchaʼal tskʼan chʼul espiritue,+ kʼusiuk noʼox xakʼanik ta orasion xchiʼuk kʼusiuk noʼox xavokolajetik-o. Taje jaʼ sventa vikʼiluk-o asatik skotol ora xchiʼuk ti xakʼanik vokol ta stojolal skotol li buchʼutik chʼule. 19 Jechuk me xapasik orasion ta jtojolal ek sventa xitojob ta kʼopojel kʼalal ta jam ke sventa tsots koʼonton chkakʼ ta ojtikinel li kʼusi chʼul ti mukul skʼoplal kʼalal ta jchol li lekil aʼyejetike,+ 20 yuʼun yajkʼopojelun Dios+ ti chkal lekil aʼyejetike, ti chukulun ta kadenae sventa tsotsuk koʼonton chkalbe skʼoplal taje jech onoʼox kʼuchaʼal skʼan xikʼopoje.

21 Pe sventa xanaʼik ek ti kʼusi ta jnuptane xchiʼuk ti kʼu yelan oyune, jaʼ chakʼ anaʼik+ skotol li ermano Tikiko+ ti lek kʼanbil xchiʼuk ti jaʼ tukʼil jtunel ta stojolal Kajvaltike. 22 Ti jech ta jtakboxuk tale jaʼ sventa xanaʼik kʼu kelankutik xchiʼuk sventa spatboxuk avoʼontonik.

23 Junuk yoʼonton li ermanoetike xchiʼuk oyuk ta stojolalik li kʼanelal ti jmoj oy xchiʼuk xchʼunel oʼontonal ti te likem talel ta stojolal li Jtotik Diose xchiʼuk ti te likem talel ta stojolal Kajvaltik Jesukristoe. 24 Teuk oy li slekil yutsil oʼontonal ta stojolal skotol li buchʼutik skʼanoj ta melel li Kajvaltik Jesukristoe.