SVENTA FILIPENSES

1 Voʼon Pablo xchiʼuk Timoteo ti jaʼ smosounkutik Kristo Jesuse, jaʼ sventa skotol li buchʼutik chʼul ti jmoj oyik xchiʼuk Kristo Jesus ti te oyik ta Filipose+ xchiʼuk li jkʼelvanejetik xchiʼuk li siervo ministerialetike:*+

2 Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.

3 Skotol ora ta jtojbe ta vokol Jdios kʼalal chavulik ta jole, 4 chkalbe koliyal kʼalal jaʼo ta jkʼan vokol ta atojolalik skotol veltae. Jech xkuxet noʼox koʼonton ta jpas orasion jujun velta.+ 5 Ti jech ta jpase, jaʼ ta skoj ti ta sba onoʼox kʼakʼal lakoltavanik sventa xpuk batel li lekil aʼyejetike xchiʼuk ti jech chapasik-o avie. 6 Yuʼun jpatoj koʼonton ta sventa liʼe: li buchʼu la slikes jun lekil abtelal ta atojolalike jaʼ to te tstsuts yuʼun+ mi sta skʼakʼalil li Kristo Jesuse.+ 7 Lek tajek ti jech ta jnop ta atojolalike, yuʼun oyoxuk ta koʼonton, la akoltaikun kʼalal chukulune+ xchiʼuk kʼalal chichʼ pakbel skʼoplal sventa oyuk jderechotik ta sventa li lekil aʼyejetike.+ Jaʼ yuʼun, jmoj ta jtabetik sbalil li slekil yutsil oʼontonale.

8 Jaʼ testigo kuʼun Dios ti solel ta jnaʼoxuke xchiʼuk ti kʼuxoxuk ta koʼonton jech kʼuchaʼal li Kristo Jesuse. 9 Liʼe jaʼ li kʼusi yakal ta jkʼan-o ta j-orasione: ti epajuk batel mas li kʼanelal avuʼunike,+ li yojtikinel leke+ xchiʼuk ti xatojobikuk lek ta yaʼibel smelolale+ 10 sventa xanaʼik stʼujel li kʼusitik mas tsots skʼoplale,+ sventa muʼyukuk apaltailik* xchiʼuk mu xamakbeik* yakan yantik+ kʼalal to mi la sta skʼakʼalil li Kristoe, 11 jech xtok, ta skoj ti jaʼ tskoltaoxuk Jesukristoe,+ tukʼuk me avabtelik ti jaʼ sventa smukʼulal xchiʼuk skʼupil kʼoptael li Diose.

12 Kermanotak, oy ta koʼonton ti akʼo xanaʼik ti jaʼ sventa xichʼ akʼel ta ojtikinel mas li lekil aʼyejetik ta skoj li kʼusitik la jnuptane. 13 Ti jech chukulun+ ta skoj Kristoe vinajem xa lek skʼoplal+ ta stojolal li jchabivanejetik yuʼun ajvalile xchiʼuk ta stojolal li yantike. 14 Jaʼ yuʼun, mas xa ep li ermanoetik ti chtunik ta stojolal Kajvaltik ti tukʼ oyik ta skoj ti tikʼilun ta chukele, jech xtok, muʼyuk xa bu chiʼik xchiʼuk mas xa oy ta yoʼontonik chalik batel li skʼop Diose.

15 Melel onoʼox ti oy junantik ta skoj noʼox xpichʼetel yoʼontonik xchiʼuk ta skoj chkontrainvanik ti chcholbeik skʼoplal li Kristoe, pe li yantike ta slekil yoʼonton chcholik. 16 Ta skoj kʼanelal chalbeik skʼoplal Kristo li buchʼutik taje, yuʼun snaʼojik ti vaʼanbilun sventa jpakbe skʼoplal li lekil aʼyejetike;+ 17 pe li yantike chkontrainvanik ti jech tspasike, maʼuk ta slekil yoʼonton tspasik, yuʼun yakal chakʼik jvokol ti tikʼilun ta chukele. 18 ¿Kʼusi chkʼot ta pasel ta skoj taje? Ti kʼusi noʼoxe mi ta slekil yoʼontonik ti jech tspasike o mi maʼuk, yakal chichʼ albel skʼoplal li Kristoe, jaʼ yuʼun chakʼ xkuxetel koʼonton. Ta melel, jech-o xkuxet koʼonton, 19 yuʼun jnaʼoj ti jaʼ ta jta-o jkolebal ti chapasik orasione+ xchiʼuk ti tskoltaun li chʼul espiritu ti jaʼ chakʼ li Jesukristoe.+ 20 Jaʼ onoʼox jech oy tajek ta koʼonton xchiʼuk oy spatobil koʼonton ti muʼyuk bu chkakʼ jba ta kʼexlal jsetʼuke,* yuʼun jamal chikʼopoj jech onoʼox kʼuchaʼal li ta voʼnee. Li avie, chichʼ mukʼibtasbel skʼoplal Kristo ta skoj jbekʼtal akʼo mi kuxulun o mi chamemun.+

21 Yuʼun mi kuxulune, jaʼ sventa Kristo;+ mi lichame, jaʼ chkʼot ta jkanal.+ 22 Jaʼ yuʼun, mi jech kuxulun jech kʼuchaʼal bekʼete, chakʼ mas sat li kabtele, akʼo mi jech, muʼyuk bu chkakʼ ta ojtikinel li kʼusi ta jtʼuje. 23 Solel mu jnaʼ bu junukal ta jtʼuj ta xchaʼtosal taje; oy ta koʼonton ti akʼo xkichʼ koltael sventa teuk oyun xchiʼuk li Kristoe,+ yuʼun ta melel mas onoʼox lek.+ 24 Pe jaʼ mas tsots skʼoplal chkaʼi ti ta bekʼetuk to kuxulune sventa xatabeik sbalil. 25 Jaʼ yuʼun, ta skoj ti jpatoj koʼonton ta sventa taje, jnaʼoj ti liʼ to oyun-oe xchiʼuk ti liʼ to jchiʼukoxuk-o akotolik sventa xachʼiik ta mantal xchiʼuk ti xkuxetuk noʼox avoʼontonik ta skoj li xchʼunel avoʼontonike, 26 sventa mas to xamuyubajik ta stojolal Kristo Jesus kʼalal mi te xa ox jchiʼukoxuk yan veltae.

27 Jaʼ noʼox ti xavichʼuk me amelolalik ta skoj li lekil aʼyejetik ta sventa Kristoe+ akʼo mi te chkiloxuk mi libate o mi chʼabal te oyun. Vaʼun, xuʼ xkaʼi xchiʼuk xuʼ jnaʼ akʼoplalik ti jmoj anopbenike, ti jmoj avoʼonton+ chavakʼbeik yipal ta skoj li xchʼunel avoʼontonik ta sventa li lekil aʼyejetike 28 xchiʼuk ti mu jsetʼuk* chaxiʼik yuʼun li avajkontraike. Taje jaʼ sprevail ti chichʼik lajesele,+ pe jaʼ sventa akolebalik li voʼoxuke;+ taje likem tal ta stojolal Dios. 29 Yuʼun laj avichʼik akʼbel matanal ta sventa Kristo li voʼoxuke, pe maʼuk noʼox ti chavakʼ xchʼunel avoʼontonik ta stojolale, yuʼun chavil avokolik ta skoj xtok.+ 30 Yuʼun li jvokol laj avilik la jnuptane jaʼ yakal chanuptanik ek+ xchiʼuk jech-o chavaʼiik ti yakal ta jnuptane.

2 Ta skoj ti jmoj oyoxuk xchiʼuk li Kristoe, ta skoj ti chatsatsubtasbeik yoʼonton xchiʼuk chapatbeik yoʼonton yantik ta skoj ti akʼanojike, ta skoj ti oy ta avoʼontonik li yantike, ti akʼanojik xchiʼuk ti kʼux ta avoʼontonike, 2 kuxetuk me lek koʼonton avuʼunik ta skoj ti koʼol anopbenike, ti koʼol akʼanoj abaike, ti koʼol lek oyoxuke xchiʼuk ti koʼol kʼusi chanopike.+ 3 Mu me xa-ilinik+ xchiʼuk mu me tsotsuk akʼoplal xavaʼi aba atukik,+ jaʼ lek bikʼit xavakʼ abaik,* jaʼ masuk tsots skʼoplal xavilik li yantike.+ 4 Oyuk-o me ta avoʼontonik li yantike,+ maʼuk noʼox me xanop akʼoplal atukik.+

5 Jechuk me anopbenik jech kʼuchaʼal snopben echʼ li Kristo Jesuse,+ 6 yuʼun manchuk mi jech toʼox yelan kʼuchaʼal jun Dios,+ mi jsetʼuk bu la snop ti tskoʼoltas sba jech kʼuchaʼal li Diose.+ 7 Moʼoj; mu jechuk la spas, yuʼun laj yikta komel skotol li kʼusi oy yuʼune, kʼot jech kʼuchaʼal jun mosoil+ xchiʼuk pas ta jun krixchano.*+ 8 Maʼuk noʼox taje, yuʼun la sbikʼtajes sba kʼalal tal kʼuchaʼal jun krixchanoe xchiʼuk laj onoʼox xchʼun mantal manchuk mi chichʼ milel,+ jech, cham ta jtel teʼ sventa vokolil.*+ 9 Ta skoj taje, li Diose laj yakʼbe tsots yabtel+ xchiʼuk ta slekil yoʼonton laj yakʼbe li biil ti mas toyol kʼot skʼoplal kʼuchaʼal li yan biiletike+ 10 sventa skejan sba skotolik ta sbi Jesus —li buchʼutik te oy ta vinajele, li buchʼutik te oy ta sba balumile xchiʼuk li buchʼutik te oy ta yut balumile—+ 11 xchiʼuk akʼo yalik ta jamal skotolik ti jaʼ Kajvaltik li Jesukristo+ sventa smukʼulal li Jtotik Diose.

12 Jaʼ yuʼun, voʼoxuk ti jkʼanojoxuke, ti nopem onoʼox xavaʼiik xchʼunel mantal kʼalal te oyune, ti mas anil chachʼunik kʼalal muʼyuk te oyune, pasik-o me li kʼusi chata-o akolebalike, xiʼanik xchiʼuk nikanik. 13 Yuʼun jaʼ chakʼboxuk avipalik li Diose sventa oyuk ta avoʼontonik spasel xchiʼuk ti xuʼuk avuʼunik spasel li kʼusitik lek chile. 14 Mu me ta bikʼtal kʼopojeluk+ xapasik skotol li kʼusitike o ti chavut abaike+ 15 sventa mu xatabat amulik xchiʼuk manxoukoxuk, xnichʼnaboxuk Dios+ li ta jkʼol kuxlejal ti toj chopol ti muʼyuk tspas li kʼusi tukʼe,+ li voʼoxuke chaxojobajik ta stojolal liʼ ta balumile.+ 16 Tsots me xatsakik li aʼyej sventa kuxlejale+ yoʼ oyuk kʼusi ximuyubaj-o li ta skʼakʼalil Kristoe. Jaʼ jech ta jnaʼ ti mu altikuk noʼox li-anilaj xchiʼuk ti mu jecheʼuk noʼox tsots li-abteje. 17 Manchuk mi jech chkichʼ malel kʼuchaʼal matanal vino+ li ta sba milbil matanal+ ta skoj li chʼul abtelal* ti jaʼ tsbeiltasoxuk ta sventa li xchʼunel oʼontonale, jaʼ ximuyubaj-o yuʼun xchiʼuk xijmuyubaj jkotoltik. 18 Jaʼ jech skʼan xamuyubajik ek xchiʼuk jmojuk noʼox kuxetuk koʼontontik.

19 Jaʼ yuʼun, oy ta koʼonton ta jtakboxuk noʼox talel Timoteo+ mi jech tskʼan Kajvaltik Jesuse sventa jta spatobil koʼonton kʼalal chkaʼi akʼoplalike. 20 Yuʼun muʼyuk buchʼu yan ti lek baxbol kʼuchaʼal stuke, ti oy ta yoʼonton chchabioxuke. 21 Yuʼun skotol li yantike jaʼ noʼox tsaʼik li kʼusi tskʼan stukike, maʼuk tsaʼik li kʼusi tskʼan Jesukristoe. 22 Pe li voʼoxuke anaʼojik ti laj yakʼ ta ojtikinel ti lek sta-o li abtelale, ti xkoʼolaj kʼuchaʼal jun nichʼonil+ xchiʼuk stot kʼalal la xchiʼinun ta abtel sventa xichʼ akʼel ta ojtikinel li lekil aʼyejetike. 23 Jaʼ yuʼun chaʼa, jaʼ ta jkʼan ta jtakboxuk talel ta ora mi laj kil li kʼusi chkʼot ta jtojolale. 24 Ta melel, jpatoj koʼonton ta stojolal Kajvaltik ti jutuk xa skʼan xbat jkʼeloxuk eke.+

25 Pe li avie, tsots skʼoplal chkil ti ta jtakboxuk sutel li Epafrodito ti jaʼ kermanoe, ti jaʼ jchiʼil ta abtel xchiʼuk ti jaʼ yajsoltaro Kristoe, ti jaʼ la atakik talel sventa xakʼbun li kʼusitik chtun kuʼune,+ 26 yuʼun tskʼan tajek tskʼeloxuk akotolik xchiʼuk chat tajek yoʼonton ta skoj ti laj avaʼiik ti ipaje. 27 Ta melel, ipaj onoʼox xchiʼuk jutuk xa mu cham; pe kʼuxubinat yuʼun Dios; mu stukuk noʼox kʼuxubinat, yuʼun la xkʼuxubinun ek sventa mu xa jta mas yatel koʼonton. 28 Jaʼ yuʼun, ta ora noʼox ta jtakboxuk talel sventa xkuxet noʼox avoʼontonik yan velta mi laj avilike xchiʼuk sventa mu xa masuk ta jvul koʼonton ek. 29 Kuxetuk me avoʼontonik xachʼamik ta sventa Kajvaltik jech kʼuchaʼal nopem onoʼox xavaʼiik spasele; jechuk-o me xakʼuxubinik li viniketik ti jech tspasik kʼuchaʼal li Epafroditoe,+ 30 yuʼun jutuk xa mu cham ta spasbel li yabtel Kristoe. Ti laj yakʼ ta vokol xkuxlejale jaʼ sventa tskoltaun ta sventa li kʼusitik chtun kuʼune xchiʼuk jaʼ kʼot ta akʼexolik ti muʼyuk bu liʼ oyoxuke.+

3 Jaʼ yuʼun, kuni ermanotak, jechuk-o me xkuxet avoʼontonik ta stojolal li Kajvaltike.+ Muʼyuk bu chopol chkaʼi ti ta jtsʼibaboxuk talel yan velta li kʼusi laj xa onoʼox jtsʼibae, yuʼun jaʼ sventa alekilalik.

2 Kʼelo me abaik ta stojolal li tsʼiʼetike,* kʼelo me abaik ta stojolal li buchʼutik tspasik choplejale, kʼelo me abaik ta stojolal li buchʼutik chtuchʼik bekʼtalile.+ 3 Yuʼun voʼotik kichʼojtik li melel sirkunsisione,*+ yakalutik spasel chʼul abtelal ta xchʼul espiritu Dios xchiʼuk xijmuyubaj ta stojolal li Kristo Jesuse+ xchiʼuk maʼuk jpatoj koʼontontik ta sventa li bekʼete. 4 Akʼo mi jech, voʼon oy jrason ti jech jpatoj koʼonton ta sventa li bekʼete.

Voʼon mas oy jrason kʼuchaʼal li yan viniketike, yuʼun 5 laj kichʼ sirkunsision kʼalal vaxakib toʼox kʼakʼal kichʼoje,+ yutsʼ yalalun Israel, snitilulalun Benjamin, j-ebreoun xchiʼuk j-ebreo li jtot jmeʼe;+ jfariseoun toʼox ta sventa li mantale;+ 6 la jkontrain tsobobbail+ ta skoj ti oy ta koʼonton spasel li kʼusitike xchiʼuk la jpas skotol li kʼusi tukʼ chal mantale. 7 Akʼo mi jech, li kʼusi tsots toʼox tajek skʼoplal laj kile mu xa kʼusi stu chkil* ta skoj li Kristoe.+ 8 Ta melel, mu kʼusi xtun-o skotol chkil xtok ta skoj ti toj echʼ xa noʼox ep sbalil li yojtikinel Kristo Jesus ti jaʼ Kajvale. Jaʼ ta skoj ti kiktaoj skotol li kʼusitike xchiʼuk jech xa chkil kʼuchaʼal jtsop kʼaʼep sventa jaʼ xkʼot ta jkanal li Kristoe 9 xchiʼuk ti jmojuk oyun xchiʼuk xi-ilate, pe maʼuk ta sventa jtukʼilal jtuk ta sventa ti ta jpas li kʼusi chal Mantale, jaʼ ta skoj li tukʼilal ta sventa xchʼunel oʼontonal+ ta stojolal li Kristoe,+ li tukʼilal yuʼun Dios ta skoj xchʼunel oʼontonale.+ 10 Ti kʼusi ta jkʼane jaʼ ti xkojtikin li stuke xchiʼuk li juʼelal ta sventa li xchaʼkuxesele+ xchiʼuk ti xkil jvokol jech kʼuchaʼal laj yil svokole,+ ti xicham jech kʼuchaʼal chame+ 11 sventa xkil mi jta ta persa ti voʼon baʼyel xichaʼkuxi talele.+

12 Maʼuk skʼan xal ti yuʼun jtaoj xa li jmotone o ti yuʼun tukʼibtasbilun xae, moʼoj, jnutsoj-o batel+ sventa xkil mi jta, yuʼun jaʼ la stʼujun-o li Kristo Jesuse.+ 13 Ermanoetik, maʼuk ti yuʼun jtaoj xa chkile; pe oy jtos kʼusi ti jpʼel skʼoplale: jaʼ ti ta jchʼay ta jol li kʼusi komem xa ta patile,+ jaʼ chkakʼ persa ti chi-anilaj batel sventa jta li kʼusi oy ta jelavele,+ 14 jnutsoj batel li matanal ta jkʼan ta jta+ sventa li takel ta ikʼel ta akʼol+ yuʼun Dios ta stojolal Kristo Jesuse. 15 Jaʼ yuʼun, li voʼotik ti yijutik xa ta mantale+ jechuk me jnopbentik kʼuchaʼal taje; mi oy yan-o kʼu yelan chbat anopbenike, jaʼ chakʼ anaʼik Dios li talelal ti laj kalbetik skʼoplale. 16 Akʼo mi jech, ti bu xa kʼalal chʼiemutike jaʼuk me jech lek xchapet jpastik batel li kʼusi jtamojtik xa batele.

17 Ermanoetik, chanbeikun batel+ akotolik xchiʼuk akʼo me asatik ta stojolal li buchʼutik jech yakal tspasik batel jech kʼuchaʼal laj kakʼkutik avilike. 18 Yuʼun oy ep buchʼutik ti skontrainojik li jtel teʼ sventa vokolil* yuʼun Kristoe —chkalbe onoʼox skʼoplalik, pe chi-okʼ xa chkalbe skʼoplalik li avie—. 19 Jaʼ slajebik li lajelale, jaʼ sdiosik li xchʼutike, jaʼ smukʼulalik li xkʼexlalike xchiʼuk jaʼ yakʼoj ta snopbenik li kʼusitik ta balumile.+ 20 Pe te oy ta vinajel+ li jlumaltike,+ jmalaojtik tajek jun jkoltavanej ti jaʼ te chlik talele, ti jaʼ li Kajvaltik Jesukristoe,+ 21 jaʼ tskʼatajes li jbekʼtaltik ti kʼune sventa xkoʼolaj kʼuchaʼal li sbekʼtal ti jun yutsile+ ti jaʼ tstunes li stsatsal juʼel ti xuʼ yuʼun x-akʼbat ta yok skʼob skotol li kʼusitike.+

4 Jaʼ yuʼun, kuni ermanotak, ti jkʼanojoxuk xchiʼuk ti oyoxuk tajek ta koʼontone, ti xkuxeteloxuk koʼonton xchiʼuk ti voʼoxuk jkoronaoxuke,+ teuk-o me oyanik+ ta stojolal Kajvaltik jech kʼuchaʼal laj kalboxuke.

2 Ta xkalbeik mantal Evodia xchiʼuk Sintike ti akʼo jmojuk snopbenik ta stojolal li Kajvaltike.+ 3 Voʼot ti lekil jkoltavanejote, ta jkʼanbot ek ti jech-o xakolta li antsetik taje ti jmoj tsots chi-abtejkutik* sventa li lekil aʼyejetike, jech xakolta xtok li Klemente xchiʼuk li yantik jchiʼiltak ta abtel ti te tsakal sbiik li ta svunal kuxlejale.+

4 Kuxetuk avoʼontonik skotol ora ta stojolal li Kajvaltike. Xi chkal yan veltae: ¡kuxetuk avoʼontonik!+ 5 Akʼo vinajuk ta stojolal skotol krixchanoetik ti lek xatojobik snopele.+ Nopol xa xtal li Kajvaltike. 6 Mu me kʼusi xavul-o avoʼontonik jsetʼuk,*+ jaʼ lek albeik Dios ta orasion li kʼusi chavul-o avoʼontonike, ta sjunul avoʼontonik xakʼanik vokol xchiʼuk tojik ta vokol kʼalal chapasik orasione;+ 7 vaʼun li jun oʼontonal+ yuʼun Dios ti toj echʼ xa noʼox lek ti jaʼ mu sta li snopben krixchanoetike chchabi avoʼontonik+ xchiʼuk anopbenik ta stojolal li Kristo Jesuse.

8 Ta slajeb xa une, kermanotak, oyuk-o me ta avoʼontonik* skotol li kʼusitik melele, skotol li kʼusitik tsots skʼoplale, skotol li kʼusitik tukʼe, skotol li kʼusitik sakik skʼoplale, skotol li kʼusitik tstij oʼontonal sventa xijkʼanvane, skotol li kʼusitik lek skʼoplale, skotol li lekil talelale xchiʼuk skotol li kʼusitik sta-o kʼupil kʼoptaele.+ 9 Li kʼusitik la achanik, la achʼamik, laj avaʼiik xchiʼuk laj avilik ta jtojolale jechuk-o me xapasik;+ vaʼun te me oy ta atojolalik li Dios ti chakʼ jun oʼontonale.

10 Xkuxet tajek koʼonton ta stojolal Kajvaltik ta skoj ti oyun xa yan velta ta avoʼontonike.+ Akʼo mi yakal onoʼox chavat avoʼontonik ta jtojolal, muʼyuk toʼox ataojbeik yorail sventa xavakʼik ta ilel. 11 Ti jech chkale, maʼuk ta skoj ti oy kʼusi chtun kuʼune, yuʼun kiloj xa ti xuʼ jun noʼox koʼonton-o ti kʼu yepal oy kuʼune.+ 12 Jnaʼoj kʼuxi chikuxi kʼalal jutuk kʼusi oy kuʼune+ xchiʼuk kʼalal oy ep kʼusi kuʼune. Jnaʼoj xa kʼusi ta jpas kʼalal oy kʼusi ta jnuptane xchiʼuk ta sventa kʼusiuk noʼox, kʼalal noj jchʼute xchiʼuk kʼalal chiviʼnaje, jech xtok, jnaʼoj kʼusi ta jpas kʼalal oy ep kʼusi kuʼune xchiʼuk kʼalal chʼabal kʼusi oy kuʼune. 13 Oy jtsatsal sventa jpas skotol ta skoj li buchʼu chakʼbun juʼele.+

14 Akʼo mi jech, lek ti la akoltaikun kʼalal laj kil tsots jvokole. 15 Ta melel, jfilipoetik, anaʼojik ti kʼalal laj xa ox achanik baʼyel li lekil aʼyejetike, kʼalal libat xa ox ta Masedoniae, muʼyuk yan tsobobbail la skoltaun o ti la xchʼam li koltael chkakʼe, jaʼ noʼox li voʼoxuke;+ 16 yuʼun kʼalal to ta Tesalonika la atakbeikun talel kʼusi chtun kuʼun li ta sba veltae xchiʼuk li ta xchibal veltae. 17 Maʼuk yuʼun jaʼ ta jsaʼ li matanale, jaʼ ta jkʼan ti akʼo epajuk mas li akʼulejalik* ti bu kʼejele.* 18 Akʼo mi jech, oy kuʼun skotol li kʼusitik chtun kuʼune, jech, sovra xa kuʼun. Muʼyuk xa kʼusitik chtun kuʼun, yuʼun avie laj xa jchʼam li kʼusi la atakbeik tal Epafroditoe,+ ti lek xmuete,+ milbil matanal ti lek chʼambile xchiʼuk ti lek tajek chaʼi li Diose. 19 Ta skoj taje, li Jdios ti oy ep kʼusitik yuʼune tstunes Kristo Jesus sventa xakʼboxuk skotol li kʼusitik chtun avuʼunike.+ 20 Jaʼuk noʼox stuk akʼo yichʼ ichʼel-o ta mukʼ sbatel osil li Jtotik xchiʼuk Jdiostike. Jechuk.

21 Chabanuk xavalbeik skotol li buchʼutik chʼul ti jmoj oyik xchiʼuk li Kristo Jesuse. Chabanukoxuk la chalik ek li ermanoetik ti liʼ jchiʼukike. 22 Chabanuk chalik skotol li buchʼutik chʼule, pe mas to li buchʼutik te oyik ta sna Sesare.+

23 Oyuk slekil yutsil yoʼonton Kajvaltik Jesukristo ta atojolalik ta skoj ti tukʼ anopbenike.