SVENTA KOLOSENSES

1 Voʼon Pabloun, yajtakbolun Kristo Jesus ti jech tskʼan yoʼonton Diose. Voʼon xchiʼuk li kermanotik Timoteoe,+ 2 jaʼ sventa li chʼul tukʼil ermanoetik ti te oyik ta Kolosas ti jmoj oyik xchiʼuk Kristoe:

Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Diose.

3 Skotol ora ta jtojbekutik ta vokol Dios li Stot Kajvaltik Jesukristo kʼalal ta jpaskutik orasion ta atojolalike, 4 yuʼun laj kaʼikutik ti oy xchʼunel avoʼontonik ta stojolal li Kristo Jesuse xchiʼuk ti akʼanojik skotol li buchʼutik chʼul 5 ta skoj li spatobil avoʼontonik ti te kʼejbil* ta vinajele.+ Li spatobil oʼontonal taje laj xa onoʼox avaʼibeik skʼoplal ta sventa li lekil aʼyejetik ti jaʼ melel 6 ti kʼot ta atojolalike. Jech kʼuchaʼal chchʼi batel li lekil aʼyejetike xchiʼuk ti chpuk batel ta spʼejel balumile,+ jaʼ jech yakal chkʼot ta atojolalik ek kʼalal laj avaʼibeik skʼoplale xchiʼuk ti lek laj avojtikinik li slekil yutsil yoʼonton Dios ti jaʼ melele. 7 Taje jaʼ li kʼusi la achanik yuʼun Epafras+ ti jkʼanojkutik xchiʼuk ti jaʼ jchiʼilkutik ta mosoile, ti jaʼ jun tukʼil jtunel yuʼun Kristo ti jaʼ sventa jlekilalkutike. 8 Jaʼ laj yalbunkutik xtok ti chakʼanvanik ta skoj ti jaʼ tskoltaoxuk li s-espiritu Diose.

9 Jaʼ yuʼun, kʼalal laj kaʼibekutik skʼoplale, mi jutebuk kiktaoj jbakutik ta spasel orasion ta atojolalik+ xchiʼuk ta skʼanel ti akʼo xavojtikinik lek+ li kʼusi tskʼan yoʼonton Dios sventa oyuk lek apʼijilik xchiʼuk ti xavaʼibeik lek smelolal li yojtikinel chakʼ li chʼul espiritue,+ 10 jaʼ sventa oyuk lek amelolik ta stojolal Jeova* yoʼ lekuk tajek xiloxuk kʼalal jech-o tsatin batel lek avuʼunik li lekil abtelale xchiʼuk ti xavojtikin batel mas li Diose;+ 11 jech xtok, akʼo stsatsubtasoxuk li sjuʼel ti yan sba yutsile+ sventa stsʼik avuʼunik skotol li kʼusitike xchiʼuk kuchuk avuʼunik ta muyubajel 12 kʼalal chatojbeik ta vokol Totil ti jaʼ la stʼujoxuk sventa xata arextoik* jech kʼuchaʼal chichʼik li buchʼutik chʼul+ ti oyik ta luse.

13 Jaʼ la skoltautik lokʼel li ta sjuʼel ikʼ osile,+ vaʼun jaʼ te laj yakʼutik li ta ajvalilal* yuʼun li skʼanbil Nichʼone, 14 jaʼ ta stojolal ti kolemutik ta skoj pojelale, laj kichʼtik pasbel perton li jmultike.+ 15 Li stuke jaʼ slokʼol li Dios ti mu xvinaj ta kʼelele,+ jaʼ baʼyel laj yichʼ pasel ta skotol li kʼusitike;+ 16 jech oxal jaʼ ta stojolal ti laj yichʼ pasel skotol li kʼusitik yantik ta vinajele, li kʼusitik ta sba balumile, li kʼusitik xvinaje, li kʼusitik mu xvinaje,+ li chotlebaletik sventa ajvalile, li buchʼutik tspasvanik ta mantale, li ajvaliletike xchiʼuk li buchʼutik oy yabtelike. Jaʼ ta stojolal xchiʼuk jaʼ sventa ti laj yichʼ pasel skotol+ li yan kʼusitike. 17 Jech xtok, te xa onoʼox oy kʼalal chʼabal toʼox skotol li yan kʼusitike+ xchiʼuk jaʼ ta stojolal ti vul ta lokʼel skotol li yan kʼusitike 18 xchiʼuk jaʼ kʼotem ta jolil yuʼun li bekʼtalil ti jaʼ li tsobobbaile.+ Li stuke jaʼ slikebal, jaʼ baʼyel chaʼkuxi ta stojolal animaetik+ sventa jaʼ xkʼot ta baʼyel ta skotol li kʼusitike; 19 yuʼun li Diose lek laj yil ti tsʼakaluk skotol ta stojolal li Jesuse,+ 20 jech xtok, jaʼ ta stojolal ti chchaʼta yav ti kʼu yelan xil sbaik xchiʼuk Dios skotol li yan kʼusitike,+ jaʼ laj yakʼ jun oʼontonal ta skoj ti la smal xchʼichʼel+ ta jtel teʼ sventa vokolile,* chchaʼta yav yuʼun manchuk mi jaʼ li kʼusitik oy ta sba balumile o mi jaʼ li kʼusitik oy ta vinajele.

21 Ta melel, nom toʼox oyoxuk xchiʼuk jkontrainvanejoxuk toʼox, yuʼun jaʼ toʼox te avakʼoj anopbenik li ta abtelal ti toj chopole, 22 pe la xchaʼta yav yuʼun Dios ti kʼu yelan xavil abaik xchiʼuke, taje jaʼ ta skoj li sbekʼtal Jesus ti chame sventa chʼul xakʼotik, sventa chʼabaluk apaltailik* xchiʼuk muʼyukuk chavichʼ tabel amulik ta stojolal,+ 23 taje jaʼ noʼox mi jech-o li xchʼunel avoʼontonike,+ mi lek-o tsots vaʼaloxuk li ta snakleb nae,+ mi jech-o chapasike, mi mu xavakʼ abaik ta nikesel+ ta sventa li spatobil oʼontonal ta sventa li lekil aʼyejetik laj avaʼiike xchiʼuk mi laj xa yichʼ cholbel skotol li kʼusitik pasbil ti oy ta yolon vinajele.+ Li lekil aʼyejetik taje jaʼ kʼot ta kabtel ti voʼon Pabloune.+

24 Xkuxet koʼonton avi ti chkil jvokol ta akojike,+ jech xtok, yakal chkil jvokol jech kʼuchaʼal li Kristoe, pe skʼan to xkil batel jvokol ta jbekʼtal sventa slekilal li sbekʼtale+ ti jaʼ li tsobobbaile.+ 25 Likʼot ta jtunel yuʼun li tsobobbail taje, ti laj yakʼbun kabtel Dios jech kʼuchaʼal jun jchabina+ ti jaʼ sventa alekilalike, ti lek tsʼakal ta jcholbe li skʼop Dios 26 ti jaʼ li kʼusi chʼul ti mukul toʼox skʼoplal+ ta stojolal li kʼusitik oy ta balumil ta voʼnee*+ xchiʼuk ta stojolal li jaykʼol kuxlejal ta voʼnee. Pe li avie, akʼbat xa yilik li buchʼutik chʼul yuʼune,+ 27 yuʼun lek laj yil li Dios ti laj yakʼbe yojtikin jyanlumetik li skʼulejal smukʼulal li kʼusi chʼul ti mukul skʼoplale,+ taje jaʼ Kristo ti jmoj oy achiʼukike. Jech xtok, li spatobil avoʼontonike jaʼ ti jmoj chavichʼ amukʼulalike.+ 28 Taje jaʼ li buchʼu yakal ta jpukbekutik skʼoplale, skotolik ta jtojobtaskutik xchiʼuk ta jchanubtaskutik ta sventa skotol li pʼijilale sventa lekuk yijik ta mantal jvaʼankutik ta stojolal Dios skotol krixchanoetik ti jmoj oyik xchiʼuk Kristoe.+ 29 Jech oxal, tsots chi-abtej ta melel, kakʼojbe-o yipal ta skoj li koltael chakʼ ti tsots ch-abtej ta jtojolale.+

2 Yuʼun oy ta koʼonton ti akʼo xavakʼik venta ti tsots tajek chkakʼ persa sventa alekilalike, sventa slekilal li buchʼutik te oy ta Laodiseae+ xchiʼuk sventa slekilal skotol li buchʼutik muʼyuk bu yilojbeikun jsate. 2 Taje jaʼ sventa xpatbat yoʼontonik+ xchiʼuk ti jmojuk tajek oyik ta skoj ti skʼanoj sbaike+ xchiʼuk ti oyuk yuʼunik skotol li kʼulejal ti jaʼ li batsʼi melel yaʼiobil smelolale sventa xojtikinik lek li kʼusi chʼul ti mukul skʼoplal yuʼun Diose, jaʼ xkaltik, li Kristoe.+ 3 Oy lek spʼijil xchiʼuk xojtikin lek ti xkoʼolaj kʼuchaʼal kʼulejal ti nakʼbile.*+ 4 Ti jech chkalboxuke jaʼ sventa muʼyukuk buchʼu sloʼlaoxuk ta skoj ti chakʼik ta chʼunel li kʼusi chalike. 5 Akʼo mi chʼabal te oyun, te oyoxuk ta koʼonton, xkuxet koʼonton chkil ti lek xcholet kʼusi chapasike+ xchiʼuk ti staoj-o yav li xchʼunel avoʼontonik ta stojolal Kristoe.+

6 Jech oxal, jech kʼuchaʼal achʼamojik li Kristo Jesus ti jaʼ Kajvaltike, jechuk-o me jmoj oyoxuk xchiʼuk, 7 akʼo lek avibelik ta stojolal xchiʼuk akʼo lek anaklebik ta stojolal+ jech kʼuchaʼal pakʼbal na* xchiʼuk lekuk-o tsots li xchʼunel avoʼontonik+ jech kʼuchaʼal laj avichʼik chanubtasele. Akʼo vinajuk lek ti chatojik ta vokole.+

8 Kʼelo me abaik lek ti mu me buchʼu xchukoxuk batel* ta skoj li spʼijil krixchanoetike xchiʼuk ta skoj li loʼlael ti mu kʼusi xtun-o+ ti jaʼ li kʼusitik nopem xaʼi tspasik krixchanoetik ti jaʼ li snopben balumile, maʼuk li chanubtasel yuʼun Kristoe; 9 yuʼun lek tsʼakal skotol stalelal Dios ta stojolal li Kristoe.+ 10 Jech oxal, ataojik xa skotol ta stojolal ti jaʼ jolil yuʼun skotol ajvalil xchiʼuk li buchʼutik oy yabtele.+ 11 Jaʼ yuʼun, laj avichʼik sirkunsision* sventa lek xavil abaik xchiʼuk, pe maʼuk li sirkunsision ti ta skʼob noʼox krixchano chichʼ akʼele, moʼoj, jaʼo kʼalal la ajip la atenik komel li abekʼtalike.+ Taje jaʼ li sirkunsision chichʼik li yajtuneltak Kristoe.+ 12 Yuʼun li voʼoxuke jmoj laj avichʼik mukel xchiʼuk Kristo, taje jaʼ ta sventa li ichʼvoʼ yuʼune.+ Ta skoj ti jmoj oyoxuk xchiʼuke xchiʼuk ta skoj ti oy xchʼunel avoʼontonik ta stojolal li kʼusitik la smeltsan ta sjuʼel li Diose, jmoj laj avichʼik totsel likel.+ Jech, li Diose la xchaʼkuxes li Kristoe.+

13 Jech xtok, akʼo mi chamemoxuk toʼox ta sventa li amulike xchiʼuk manchuk mi muʼyuk avichʼojik sirkunsision ta abekʼtalik, li Diose jmoj laj yakʼ kuxianik xchiʼuk li Kristoe.+ Ta slekil yoʼonton la spas perton skotol li jmultike+ 14 xchiʼuk la stupʼ li vun tsʼibabil ta skʼob krixchanoetik+ ti jaʼ te tsʼibabil li mantaletike+ xchiʼuk ti skontrainojutik toʼoxe.+ La slokʼes ta be kʼalal la sbaj ta laux ta jtel teʼ sventa vokolile.*+ 15 La stsal ta j-echʼel li ajvaliletik xchiʼuk li buchʼutik oy yabtele, laj yakʼ ta ilel ta stojolal skotol krixchanoetik sventa chakʼ ta ilel ti tsalbilik xae+ xchiʼuk laj yikʼ batel kʼuchaʼal jchukeletik ta skoj taje.*

16 Jech oxal, mu me buchʼu xchapanoxuk ta sventa li kʼusi chalajesike xchiʼuk ta sventa li kʼusi chavuchʼike+ o ta sventa li xchabiel kʼine o mi jaʼ ta sventa li xchabiel achʼ lunae*+ o mi jaʼ ta sventa li xchabiel savadoe.+ 17 Taje jaʼ snakʼobal li kʼusi chtale,+ pe jaʼ yuʼun Kristo li kʼusi melele.+ 18 Mu me smak amotonik+ li buchʼu lek chil ti bikʼit chakʼ sba ta alele xchiʼuk ti jech ch-ichʼvan ta mukʼ kʼuchaʼal ch-ichʼvanik ta mukʼ li anjeletike. Li krixchanoetik taje «tstsak lek yavilik»* ta skoj li kʼusi yiloje xchiʼuk muʼyuk srasonal ti xtoyet tajek ta skoj ti jpasmulil krixchanoe, 19 li stuke muʼyuk bu lek te napʼal ta stojolal li jolile,+ li jolil taje jaʼ chakʼbe li kʼusi chtun yuʼun sjunul li bekʼtalile xchiʼuk ti lek snitanoj sba ta sventa li stsʼakaliltake xchiʼuk ta sventa li xchʼuxuviltake xchiʼuk ti jech chchʼi-o batel ta sventa li Diose.+

20 Mi yuʼun jmoj lachamik xchiʼuk Kristo ta sventa li snopben balumile,+ ¿kʼu yuʼun jech to kuxuloxuk kʼuchaʼal balumil kʼalal jech-o chachʼunik li mantaletik liʼe:+ 21 «Mu xapikik, mu xapasik preva mi jaʼuk xajaxilanik» ti xie? 22 Yuʼun skotol li kʼusitik taje chlaj skʼoplal kʼalal chichʼ tunesele, smantal noʼox krixchanoetik xchiʼuk yakʼoj noʼox ta chanel stukik.+ 23 Skotol li kʼusitik taje jaʼ jech ti kʼu yelan tskʼan chichʼ ta mukʼ Dios stuk li jun krixchanoe, bikʼit chakʼ sba yilel xchiʼuk tsots chakʼbe svokol li sbekʼtale,+ pʼijilal yilel skotol li kʼusitik taje, pe muʼyuk sbalil sventa spajes li kʼusi tskʼan sbekʼtale.

3 Jaʼ yuʼun, mi laj avichʼik chaʼkuxesel xchiʼuk li Kristoe,+ jaʼuk me xasaʼik-o li kʼusitik te oy ta akʼol ti bu chotol ta sbatsʼikʼob Dios li Kristoe.+ 2 Teuk me oy-o anopbenik ta sventa li kʼusitik ta akʼole,+ maʼuk ta sventa li kʼusitik oy ta sba balumile.+ 3 Yuʼun lachamik li voʼoxuke xchiʼuk laj xa yichʼ kʼejel* akuxlejalik ta stojolal Kristo ti jech la skʼan yoʼonton Diose. 4 Kʼalal mi laj yichʼ akʼel ta ilel li Kristo ti jaʼ jkuxlejaltike,+ jaʼ jech jmoj chavichʼik akʼel ta ilel xchiʼuk ek ti jmoj amukʼulal chakʼotike.+

5 Jech oxal, milik li stsʼakbenaltak abekʼtalik+ ti jaʼ noʼox sventa sba balumile: ta sventa li mulivajele,* li kʼusitik ibal sbae,* ti oy tajek ta avoʼontonik chachiʼinvanik ta vayele,+ ti chopol kʼusi tskʼan avoʼontonike xchiʼuk li pichʼ oʼontonal ti jaʼ yichʼel ta mukʼ santoe. 6 Chtal skʼakʼal yoʼonton Dios ta skoj li kʼusitik taje. 7 Taje jaʼ toʼox jech nopem xavaʼiik spasel* li ta akuxlejalik eke.+ 8 Pe li avie, skʼan xajipik lokʼel skotol liʼe: ti chavilta abaike, li skʼakʼal avoʼontonike, li achoplejalike,+ ti chachopol kʼopta abaike+ xchiʼuk li bol kʼop+ chlokʼ ta aveike. 9 Mu me xajutbe abaik kʼop* ta jujuntal.+ Lokʼik li amol talelalik+ ta skoj li kʼusi nopem xavaʼiik spasele, 10 jaʼ lapik li achʼ talelale,+ yuʼun yakal ch-achʼub batel ta skoj li lekil yojtikinobile sventa jech chkʼot kʼuchaʼal slokʼol li buchʼu la spase,+ 11 ti bu chʼabal jgresia mi jaʼuk judae, ti muʼyuk skʼoplal mi ichʼbil sirkunsision* o mi muʼyuk, chʼabal jyanlum, chʼabal j-esita,* chʼabal mosoil xchiʼuk chʼabal buchʼu kolem; yuʼun te tsakal skʼoplal skotol ta stojolal Kristo xchiʼuk sventainojutik.+

12 Jaʼ yuʼun, ti tʼujbiloxuk+ yuʼun Dios, ti chʼuloxuk xchiʼuk ti kʼanbiloxuke lapik me li smukʼul xkʼuxul avoʼontonike,+ li slekil avoʼontonike, ti bikʼit chavakʼ abaike,*+ ti manxoukoxuke+ xchiʼuk oyuk me smalael avuʼunik.+ 13 Jechuk-o me tsʼikbo abaik ta jujuntal xchiʼuk mu me xajalanbe abaik ta jujuntal ti chapasbe abaik pertone+ akʼo mi oy buchʼu tsaʼ smul ta atojolalik.+ Jech kʼuchaʼal muʼyuk la sjalanboxuk perton li Jeovae,* jech me skʼan xapasik ek.+ 14 Pe maʼuk noʼox skotol taje, lapik me li kʼanelal xtoke,+ yuʼun jaʼ batsʼi jpasvanej ta jun.+

15 Jech xtok, jaʼuk akʼo sventain avoʼontonik li jun oʼontonal yuʼun Kristoe,+ yuʼun jun noʼox abekʼtalik laj avichʼik takel ta ikʼel ta sventa li jun oʼontonal taje xchiʼuk tojik ta vokol. 16 Oyuk ta atojolalik skotol li skʼulejal spʼijilal skʼop Kristoe. Jechuk-o xachanubtas abaik xchiʼuk jechuk-o xapatbe aba avoʼontonik* ta jujuntal ta salmoetik,+ ta skʼupil kʼoptael Dios, ta kʼejimoletik sventa yichʼobil ta mukʼ Dios, ta kʼejimoletik sventa xichʼ tojel ta vokol xchiʼuk kʼejintaik ta avoʼontonik li Jeovae.*+ 17 Skotol li kʼusitik chavalik o chapasike pasik skotol ta sbi li Kajvaltik Jesuse xchiʼuk jaʼ ta stojolal albeik koliyal li Jtotik Diose.+

18 Ajnilaletik, ichʼo me ta mukʼ amalalik,+ yuʼun kʼupil sba chil li Kajvaltike. 19 Malaliletik, jechuk-o me xakʼan avajnilik+ xchiʼuk mu me xkʼakʼetuk tajek avoʼontonik* ta stojolalik.+ 20 Alab nichʼnabiletik, chʼunbo me smantal atot ameʼik ta kʼusiuk noʼox,+ yuʼun kʼupil sba ta stojolal li Kajvaltike. 21 Totiletik, mu me xasabeik skʼakʼal yoʼonton* anichʼnabik+ sventa mu xchibaj yoʼontonik. 22 Mosoiletik, chʼunbeik skotol smantal li krixchanoetik ti jaʼ avajvalike,+ pe maʼuk noʼox kʼalal skʼelojoxuk sventa lek xa xiloxuk li krixchanoetike, moʼoj, jaʼ lek paso ta sjunul avoʼontonik xchiʼuk xiʼtaik* me Jeova* ti jech chapasike. 23 Kʼusiuk noʼox ti yakal chapasike pasik ta sjunul avoʼontonik* ta sventa Jeova,*+ maʼuk ta sventa krixchanoetik, 24 yuʼun anaʼojik ti jaʼ ta stojolal Jeova* ti chavichʼ arextoik* jech kʼuchaʼal matanale.+ Tunanik ta mosoil ta stojolal li Ajvalil ti jaʼ li Kristoe. 25 Ta melel, li buchʼu tspas kʼusi muʼyuk tukʼe chichʼ akʼbel stojol ta skoj li kʼusi muʼyuk tukʼ la spase,+ yuʼun mu snaʼ xtʼujvan li Diose.+

4 Voʼoxuk ti yajvaloxuk mosoiletike, tukʼuk me xchiʼuk jech me xapasbeik ti kʼu yelan sta-o li amosoike, yuʼun anaʼojik ti oy Avajvalik ta vinajel eke.+

2 Pasilanik-o me orasion+ xchiʼuk jechuk-o me vikʼil asatik ta spasel sventa xatojik ta vokol.+ 3 Pasik me orasion ta jtojolalkutik ek+ sventa sjambunkutik tiʼ na Dios yoʼ jcholkutik batel li skʼope xchiʼuk xkalkutik batel li kʼusi chʼul ti mukul skʼoplal ta sventa li Kristo ti jaʼ ta skoj ti tikʼilun ta chukele+ 4 sventa lek jamal xkal batel jech kʼuchaʼal skʼan xkale.

5 Jechuk-o me pʼijanik ta stojolal li buchʼutik muʼyuk oyik ta tsobobbaile, lek me xatunesik li jujun kʼakʼal chjelav avuʼunike.*+ 6 Skotoluk me ora oyuk lek smuil li akʼopojelike, oyuk me lek yatsʼamil+ sventa xanaʼik kʼu yelan chatakʼbeik li jujun krixchanoe.+

7 Li Tikiko+ ti jaʼ jkʼanbil ermano ti tukʼ chtun xchiʼuk ti jaʼ jchiʼil ta mosoil ta sventa li Kajvaltike jaʼ chakʼ anaʼik skotol li kʼusitik ta jnuptane. 8 Ta jtakboxuk talel sventa xanaʼik kʼu kelankutik sventa spatboxuk avoʼontonik. 9 Jmoj ta jtak talel xchiʼuk Onesimo+ ti tukʼ yakʼoj sba xchiʼuk ti jaʼ jkʼanbil ermanoe, ti jaʼ onoʼox achiʼilike, jaʼ chalboxuk skotol li kʼusitik yakal chkʼot ta pasel liʼe.

10 Li Aristarko+ ti jaʼ jchiʼil ta chukele chabanukoxuk la chal, jech chal ek li Markos+ ti jaʼ sprimo Bernabee (ti laj avichʼik albel mantal ti akʼo lekuk xachʼamik+ mi oy bat skʼeloxuke) 11 xchiʼuk Jesus ti Justo sbi ti yichʼoj sirkunsision* eke. Jaʼik noʼox jchiʼiltak ta abtel ta sventa li Ajvalilal* yuʼun Diose xchiʼuk jaʼ tspatbeikun tajek koʼonton.* 12 Li Epafras+ ti jaʼ smoso Kristo Jesus ti jaʼ onoʼox achiʼilike chabanukoxuk la chal. Yakʼojbe tajek yipal ta spasel orasion ta atojolalik sventa lekuk vaʼaloxuk xchiʼuk sventa lekuk achʼunojik skotol li kʼusi tskʼan yoʼonton Diose. 13 Yuʼun voʼon chkalbe skʼoplal ti yakʼoj tajek persa ta atojolalike, ta stojolal li buchʼutik oyik ta Laodiseae xchiʼuk li buchʼutik oyik ta Ierapolise.

14 Chabanukoxuk la chal li Lukas+ ti jaʼ kʼanbil doktore xchiʼuk jech chal ek li Demase.+ 15 Chabanuk xavalbeik li ermanoetik ti te oyik ta Laodiseae xchiʼuk li ermana Ninfa xchiʼuk li tsobobbail ti te tstsob sbaik ta snae.+ 16 Mi laj xa ox akʼelik li karta liʼe, chapo akʼopik sventa xichʼ kʼelel ek+ li ta tsobobbail te ta Laodiseae xchiʼuk sventa xakʼelbeik li skartaik la jtakbeik batel eke. 17 Jech xtok, xi xavalbeik li Arkipoe:+ «Jechuk-o me xatukʼulan lek li abtelal la achʼam ta stojolal Kajvaltik sventa jechuk xapas batele».

18 Voʼon Pabloun, chabanukoxuk, voʼon la jtsʼiba ta jkʼob jtuk ti jech chkalboxuke.+ Teuk me ta ajolik ti tikʼilun ta chukele.+ Teuk me oyuk ta atojolalik li slekil yutsil oʼontonale.