BAʼYEL SVENTA TESALONISENSES

1 Voʼon Pablo xchiʼuk Silvano*+ xchiʼuk Timoteo,+ jaʼ sventa li tsobobbail ta Tesalonika ti jmoj oyik xchiʼuk li Jtotik Diose xchiʼuk li Kajvaltik Jesukristoe:

Oyuk slekil yutsil oʼontonal xchiʼuk jun oʼontonal ta atojolalik.

2 Skotol ora ta jtojbekutik ta vokol Dios kʼalal ta jpaskutik tal orasion ta atojolalike,+ 3 yuʼun mu xchʼay jutebuk ta jolkutik ti tukʼ li avabtelike, li kʼusitik chapasik ta skoj ti chakʼanvanike xchiʼuk ti kuchem avuʼunik ta skoj ti apatoj avoʼontonik+ ta stojolal Kajvaltik Jesukristo ta yeloval li Jdiostik ti jaʼ Jtotike. 4 Ermanoetik, jnaʼojkutik ti jaʼ la stʼujoxuk li Dios ti skʼanojoxuke, 5 yuʼun maʼuk noʼox jecheʼ loʼil kʼot li lekil aʼyejetik ta jcholkutike, yuʼun ta juʼelal kʼot, ta chʼul espiritu xchiʼuk ta sjunul oʼontonal. Anaʼojik lek kʼu yelan la jpas jbakutik sventa alekilalik. 6 Jech xtok, la achanik li kʼusi la jpaskutike+ xchiʼuk la achanbeik li Kajvaltike,+ yuʼun tsots tajek avokolik+ kʼalal la achʼamik li skʼop Diose, pe xkuxet noʼox avoʼontonik xtok ti jaʼ chakʼ li chʼul espiritue, 7 jaʼ yuʼun lek ta chanel atalelalik laj yilik skotol li jchʼunolajeletik ta Masedonia xchiʼuk ta Akayae.

8 Ta melel, yuʼun maʼuk noʼox ti vinajem batel tajek skʼoplal avuʼunik ta Masedonia xchiʼuk ta Akaya li skʼop Jeovae,* yuʼun ta buyuk noʼox pukem batel skʼoplal+ li xchʼunel avoʼontonik ta stojolal Diose, jech oxal mu kʼusi stakʼ xkalkutik. 9 Yuʼun yakal chalik-o batel ti kʼu yelan baʼyel la jtaotkutik ta kʼoponel akotolik xchiʼuk ti kʼu yelan lik apʼajik li asantoike+ sventa xlik avichʼik ta mukʼ li Dios yoʼ xatunik ta smoso li jun noʼox kuxul melel Diose. 10 Chalik xtok ti chamalabeik li Xnichʼon chlik tal ta vinajele,+ jaʼ li buchʼu la xchaʼkuxese, jaʼ xkaltik, li Jesus ti jaʼ tskoltautik li ta skʼakʼal oʼontonal chtale.+

2 Kermanotak, anaʼojik ta melel ti mu jecheʼuk noʼox ti ay jvulaʼanotkutike.+ 2 Yuʼun anaʼojik ti kʼalal laj kil jvokolkutik ta sba veltae xchiʼuk kʼalal kʼexlal sba kʼu yelan laj kichʼkutik ilbajinel ta Filipose,+ la jta stsatsal koʼontonkutik* ta stojolal Jdioskutik sventa xkalbotkutik avaʼiik li lekil aʼyejetik sventa Diose+ akʼo mi oy ep buchʼu chkontrainvan.* 3 Yuʼun li tojobtasel chkakʼkutike maʼuk likem tal ta paltail,* ta kʼusi ibal sba* mi jaʼuk ta loʼlael, 4 moʼoj, ti kʼu yelan lek laj yilunkutik Dios sventa la skʼubanbunkutik li lekil aʼyejetike jaʼ jech chikʼopojkutik, pe maʼuk sventa lekuk xil krixchanoetik, jaʼ sventa lekuk xil Dios ti jaʼ li buchʼu tskʼel koʼontonkutike.+

5 Xanaʼik ti mu yuʼunuk lek xa smuil jkʼopojelkutik la jpas jbakutik mi jaʼuk bu liloʼlavankutik ta sventa li pichʼ oʼontonale,+ ¡jaʼ testigo li Diose! 6 Jech xtok, maʼuk yakal ta jsaʼkutik ti akʼo yichʼunkutik ta mukʼ li krixchanoetike mi jaʼuk ti akʼo xavichʼunkutik ta mukʼ eke xchiʼuk ti akʼo yichʼunkutik ta mukʼ li yantike akʼo mi xuʼ van xkakʼkutik avikatsik jechuk ta skoj ti yajtakbolunkutik Kristoe.+ 7 Pe mu jechuk, yuʼun li kʼusi la jpaskutike jaʼ ti lek noʼox koʼontonkutik ta atojolalik jech kʼuchaʼal lek chkʼuxubin kʼalal tstsʼites yalab li jun meʼile. 8 Jaʼ yuʼun, ta skoj ti kʼuxoxuk ta koʼontonkutike, ximuyubajkutik la jcholbotkutik avaʼiik li lekil aʼyejetike, pe maʼuk noʼox taje, yuʼun laj kakʼ jkuxlejalkutik*+ xtok ta skoj ti kʼanbiloxuk kuʼunkutike.+

9 Kermanotak, anaʼojik ta melel li kabtelkutike xchiʼuk ti tsots laj kil jvokolkutike. Ta kʼakʼal akʼobal li-abtejkutik sventa mu xikʼotkutik kʼuchaʼal alal ikatsil ta atojolalik+ kʼalal la jcholbotkutik li lekil aʼyejetik ta sventa Diose. 10 Voʼoxuk testigooxuk, jaʼ testigo ek li Dios ti tukʼ tajek koʼontonkutike, ti tukʼunkutik xchiʼuk ti muʼyuk la jsaʼ jmulkutik ta atojolalik ti jchʼunolajeloxuke. 11 Anaʼojik lek ti jech-o laj kalbotkutik mantale, ti la jtsatsubtasotkutik xchiʼuk ti la jtojobtasotkutik ta jujuntal+ jech kʼuchaʼal tspasbe xnichʼnab li jun totile+ 12 sventa jechuk-o lek xapas abaik ta stojolal Dios+ ti jaʼ tstakoxuk ta ikʼel ta sventa Ajvalilal*+ yuʼun xchiʼuk ta sventa li smukʼulale.+

13 Jaʼ yuʼun, ta melel mu xkikta jbakutik ta stojbel ta vokol Dios+ ek, yuʼun la achʼamik kʼalal la jcholbotkutik li skʼop Diose, pe mu jechuk la achʼamik kʼuchaʼal skʼop krixchanoetik, yuʼun jech la achʼamik ti kʼu onoʼox yelan ta melele, ti jaʼ skʼop Diose xchiʼuk ti jaʼ yakal ch-abtej ta atojolalik ti jchʼunolajeloxuke. 14 Yuʼun li voʼoxuke, kermanotak, la achanbeik kʼusi tspasik li stsobobbailtak Dios ti jmoj oyik xchiʼuk Kristo Jesus ti te oyik ta Judeae, yuʼun laj avil avokolik ek ta stojolal li achiʼilik ta alumalik+ jech kʼuchaʼal yakal chil svokolik ta stojolal li judaetike, 15 yuʼun kʼalal to ta Kajvaltik Jesus la smilik+ xchiʼuk la smilik li j-alkʼopetike xchiʼuk la skontrainunkutik ek.+ Jech xtok, muʼyuk tslekubtasbeik yoʼonton li Diose, jaʼ noʼox tskontrainik li kʼusi jaʼ sventa slekilal krixchanoetike, 16 yuʼun tskʼan tajek tspajesunkutik ti akʼo mu jchiʼinkutik ta loʼil li jyanlumetik sventa xkolike.+ Skotol ora toj ep tspas smulik kʼalal jech tspasike. Pe te xa kʼotem ta stojolalik li skʼakʼal yoʼonton Diose.+

17 Kʼalal chʼakalunkutik jayibuk noʼox kʼakʼal* ta atojolalike, kermanotak, manchuk mi chʼabal te oyunkutik, liʼ oyoxuk ta koʼontonkutike. Ta skoj ti oyoxuk tajek ta koʼontonkutike, laj kakʼkutik tajek persa sventa xbat jkʼelotkutik.* 18 Jaʼ yuʼun, oy ox ta koʼontonkutik chbat jkʼelotkutik; jech, voʼon Pablo ti laj kakʼ persa li ta sba veltae xchiʼuk li ta xchibal veltae, pe la smakunkutik ta be li Satanase. 19 ¿Kʼusi jaʼ li spatobil koʼontonkutike, li xkuxetel koʼontonkutike xchiʼuk li jkoronakutik ta muyubajel ta yeloval li Kajvaltik Jesus kʼalal liʼ xa oye? ¿Mi mu jaʼuk li voʼoxuk ta melele?+ 20 Ta melel, jaʼ kʼotemoxuk ta jmukʼulalkutik xchiʼuk ta xkuxetel koʼontonkutik.

3 Jaʼ yuʼun, kʼalal mu xa stsʼik laj kaʼikutike, la jnopkutik ti jaʼ mas lek ti te xikom jtukutik ta Atenase;+ 2 vaʼun la jtakkutik talel li ermano Timoteo+ ti chtun ta stojolal Dios* ta sventa li lekil aʼyejetik ti chalbe skʼoplal Kristoe yoʼ stsatsubtas avoʼontonik xchiʼuk spatboxuk avoʼontonik sventa li xchʼunel avoʼontonike 3 yoʼ muʼyukuk buchʼu xlaj ta lilinbel* xchʼunel yoʼonton avuʼunik ta skoj li tsatsal vokoliletike. Yuʼun anaʼojik lek ti persa onoʼox chkiltik li vokoliletik taje.+ 4 Yuʼun kʼalal te toʼox jchiʼukotkutike, chkalkutik onoʼox ti chkil jvokoltike, taje jaʼ jech kʼotem ta pasel jech kʼuchaʼal anaʼojik leke.+ 5 Jaʼ yuʼun, kʼalal mu xa stsʼik kuʼun laj kaʼie, la jtakboxuk talel sventa jnaʼ mi tukʼ oyoxuk,+ yuʼun naka me sloʼlaoxuk li J-akʼvanej ta prevae,+ vaʼun jaʼ jech muʼyuk sbalil chkʼot li kabtelkutike.

6 Pe li Timoteoe jaʼ to vul ti bu oyunkutik ti te lik talel ti bu oyoxuke,+ laj yalbunkutik ti tukʼ oyoxuke xchiʼuk ti lek kʼanvanemoxuke. Jech xtok, laj yalbunkutik ti skotol ora chavulesunkutik ta ajolike xchiʼuk ti oy ta avoʼonton chakʼelunkutik jech kʼuchaʼal oy ta koʼontonkutik ta jkʼelotkutik eke. 7 Jaʼ yuʼun, kermanotak, ta skotol li kʼusi chakʼ yatel koʼontonkutike* xchiʼuk ta skotol li kʼusi chakʼ tsots jvokolkutike, te jtaoj spatobil koʼontonkutik ta atojolalik xchiʼuk tspat koʼontonkutik ta skoj ti tukʼ avakʼoj abaike.+ 8 Jaʼ yuʼun, xkuxet to balumil chkaʼikutik* ta skoj ti tukʼ-o avakʼoj abaik ta stojolal li Kajvaltike. 9 Ta melel, ta jtojbekutik ta vokol Dios ta atojolalik, yuʼun xkuxet tajek koʼontonkutik avuʼunik. 10 Ta kʼakʼal akʼobal ta jpaskutik orasion ta sjunul koʼontonkutik sventa xuʼ jkʼelkutik asatik xchiʼuk ti jkoltaotkutik ta sventa li kʼusi chtun avuʼunik yoʼ stsatsub li xchʼunel avoʼontonike.+

11 Li avi une, akʼo sjam jbekutik li Jdiostik ti jaʼ Jtotik xtoke xchiʼuk li Kajvaltik Jesus sventa xbat jkʼelotkutike. 12 Jech xtok, akʼo yepajesboxuk kʼanelal li Kajvaltike, jech, akʼo epajuk ta jujuntal avuʼunik li kʼanelale+ xchiʼuk akʼo epajuk ek ta stojolal skotol yantik jech kʼuchaʼal ta jpaskutik ta atojolalik eke 13 sventa staojuk yav avoʼontonik yuʼun, sventa chʼabaluk amulik xchiʼuk sventa chʼulukoxuk ta yeloval li Jdiostik+ xchiʼuk li Jtotik kʼalal liʼ xa oy li Kajvaltik Jesus xchiʼuk skotol li buchʼutik chʼul yuʼune.+

4 Ta slajebe, kermanotak, jech kʼuchaʼal laj kalbotkutik mantal ta sventa ti kʼu yelan skʼan oyoxuk yoʼ lek chiloxuk li Diose,+ jech kʼuchaʼal yakal chapasike, ta jkʼubanbotkutik xchiʼuk ta jkʼanbotkutik vokol ta stojolal Kajvaltik Jesus ti mas to me lek xapasik-o batele. 2 Yuʼun anaʼojik li mantaletik laj kakʼbotkutik ta sventa li Kajvaltik Jesuse.

3 Liʼe jaʼ li kʼusi tskʼan yoʼonton Diose: ti chʼulukoxuke+ xchiʼuk ti xapajes abaik ta sventa li mulivajele.*+ 4 Ta jujuntal chanik kʼuxi chapajes abekʼtalik+ sventa lekuk chʼul+ xchiʼuk sventa ichʼbiluk ta mukʼ xkʼot. 5 Mu me xpichʼetuk tajek avoʼontonik yuʼun li chiʼinejbail ta vayel ti solel muʼyuk spajeb+ jech kʼuchaʼal tspasik li jyanlumetik ti mu xojtikinik Diose.+ 6 Mu me buchʼu junukal chakʼbe svokol xchiʼuk chilbajin junuk yermano ta skoj taje, yuʼun chakʼ kastigo Jeova* ta skoj skotol li kʼusitik taje jech kʼuchaʼal laj xa onoʼox kalbotkutik xchiʼuk ti tsots xa onoʼox la jpʼijubtasotkutike. 7 Yuʼun maʼuk ta sventa kʼusi ibal sba* la stakutik ta ikʼel li Diose, jaʼ ta sventa li kʼusi chʼule.+ 8 Jaʼ yuʼun, li vinik ti mu x-ichʼvan ta mukʼe, maʼuk mu xichʼ ta mukʼ li jun krixchanoe, jaʼ muʼyuk chichʼ ta mukʼ li Dios+ ti jaʼ chakʼboxuk li chʼul espiritue.+

9 Pe ta sventa ti chakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele,+ mu xa persauk ti ta jtsʼibaboxuk tale, yuʼun xchanubtasojoxuk Dios ti akʼo xakʼan abaik ta jujuntale;+ 10 ta melel, jech onoʼox yakal chapasik ta stojolal skotol li ermanoetik ta sjunul Masedoniae. Pe ta jkʼanbotkutik vokol, ermanoetik, ti mas to me lek tsʼakal xapasik-o batele. 11 Akʼik me persa sventa jun avoʼonton+ xakuxiik, jaʼ noʼox akʼo ta avoʼontonik li kʼusi skʼan pasel avuʼunike,+ jech xtok, abtejanik me ta akʼobik+ jech kʼuchaʼal laj kalbotkutik mantale 12 sventa oyuk amelolik ta sat li buchʼutik muʼyuk oyik ta tsobobbaile+ xchiʼuk sventa mu jaʼuk xakʼanbeik li kʼusitik chtun avuʼunike.

13 Jech xtok, kermanotak, ta jkʼankutik ti akʼo xanaʼik ta sventa li buchʼutik vayemik ta lajelale;+ sventa mu xavat tajek avoʼontonik jech kʼuchaʼal tspasik li buchʼutik chʼabal spatobil yoʼontonike.+ 14 Yuʼun mi oy xchʼunel koʼontontik ti cham xchiʼuk ti chaʼkuxi li Jesuse,+ jchʼunojtik xtok ti ch-ikʼatik talel yuʼun Dios li buchʼutik vayemik ta lajelal ti tukʼ laj yakʼ sbaik ta stojolal Jesuse sventa jmoj oyikuk xchiʼuk li Jesuse.+ 15 Li kʼusi chkalkutik liʼe jaʼ skʼop Jeova:* mi kuxulutik to kʼalal liʼ xa oy Kajvaltik voʼotik ti kuxulutike, maʼuk me baʼyel chijchaʼkuxi ti jaʼ tsʼakal to li buchʼutik vayemik xa ta lajelale; 16 yuʼun chyal talel ta vinajel li Kajvaltike, tsots ch-avan sventa xtakvan ta ikʼel kʼuchaʼal yechʼomal ye bankilal anjel+ xchiʼuk stsakoj talel li yokʼes Diose, vaʼun baʼyel chichʼik chaʼkuxesel li buchʼutik chamemik ti jaʼik yajtsʼaklomtak Kristoe.+ 17 Ta jelavele, chkichʼtik ikʼel batel voʼotik ti kuxulutik toe, jmoj chkichʼtik ikʼel batel xchiʼukik, jech chijmuy batel ta vinajel sventa xbat jnup jbatik ta tok+ xchiʼuk li Kajvaltike;+ vaʼun jmoj xa oyutik-o xchiʼuk li Kajvaltike.+ 18 Jaʼ yuʼun, jech-o me xapatbe aba avoʼontonik ta jujuntal ta sventa li kʼusi laj yichʼ alele.

5 Jech oxal, ermanoetik, ta sventa li yorail albil xa onoʼoxe, mu xa persauk ti ta jtsʼibaboxuk tal jutebuke. 2 Yuʼun anaʼojik lek ti skʼakʼalil Jeovae*+ jech chtal kʼuchaʼal chtal j-elekʼ ta akʼobaltik.+ 3 Kʼalal xi yakal chalik li krixchanoetike: «¡Jun koʼontontik xchiʼuk muʼyuk kʼusi chijxiʼo!», vaʼun jaʼo chtal ta anil ta stojolalik li lajelal ti chʼayal yoʼonton chtaatike,+ jaʼ jech kʼuchaʼal chlik xkʼuxul xchʼut jun ants kʼalal xchiʼuk yole; mi junuk buchʼu xuʼ xjatav. 4 Li voʼoxuke, ermanoetik, muʼyuk oyoxuk ta ikʼ osil, jaʼ yuʼun mu xataatik yuʼun li vaʼ kʼakʼal jech kʼuchaʼal chtaatik li j-elekʼetike, 5 yuʼun jaʼ xnichʼnaboxuk sak osil akotolik xchiʼuk jaʼ xnichʼnaboxuk li kʼakʼaltike.+ Muʼyuk oyutik ta akʼobaltik mi jaʼuk ta ikʼ osil.+

6 Jaʼ yuʼun, mu me teuk vayemukutik-o jech kʼuchaʼal li yantike,+ jaʼ lek julavemukutik-o+ xchiʼuk jkʼel me jbatik lek.+ 7 Yuʼun ta akʼobaltik chvayik li buchʼutik chvayike xchiʼuk ta akʼobaltik yakubemik li buchʼutik chyakubike.+ 8 Pe li voʼotik ti yuʼunutik kʼakʼaltike jkʼel me jbatik lek, jlaptik me li xchʼunel oʼontonal xchiʼuk kʼanelal ti xkoʼolaj kʼuchaʼal smak oʼontonale xchiʼuk jlaptik me spatobil oʼontonal sventa kolebal ti xkoʼolaj kʼuchaʼal smak jolile;+ 9 yuʼun muʼyuk la stʼujutik Dios sventa xkilbetik li skʼakʼal yoʼontone, la stʼujutik sventa jtatik kolebal+ ta stojolal Kajvaltik Jesukristo. 10 Yuʼun cham ta jtojolaltik+ sventa jmoj xijkuxi xchiʼuk akʼo mi julavemutik o mi vayemutik.*+ 11 Jaʼ yuʼun, jech-o xapatbe aba avoʼontonik xchiʼuk xatsatsubtasbe aba avoʼontonik ta jujuntal+ jech kʼuchaʼal yakal onoʼox chapasike.

12 Jaʼ yuʼun, ermanoetik, ta jkʼanbotkutik vokol ti xavichʼik ta mukʼ li buchʼutik tsots ch-abtej ta atojolalike, ti oy ta sba tskʼeloxuk ta sventa Kajvaltike xchiʼuk ti tspʼijubtasoxuke; 13 jech xtok, ta kʼanelaluk me xatsakik lek ta mukʼ ta skoj ti tsots ch-abtejike.+ Junuk me avoʼontonik ta jujuntal.+ 14 Xi to chkalbotkutik mantale, ermanoetik: pʼijubtasik me li buchʼutik mu xichʼ smelolike,+ patbeik me yoʼonton li buchʼutik chat yoʼontonike,* koltaik me li buchʼutik kʼunike, tsʼikbeik me skotolik.+ 15 Kʼelik me lek ti mu me buchʼu spak sutel avuʼunik li kʼusi chopol tspasbate;+ jaʼ lek jechuk-o xapasbe abaik batel ta jujuntal li kʼusi leke xchiʼuk jech xapasbeik li yantik eke.+

16 Skotoluk me ora kuxetuk avoʼontonik.+ 17 Skotoluk me ora xapasik orasion.+ 18 Tojik me ta vokol skotol,+ yuʼun jaʼ jech tskʼan yoʼonton Dios ta atojolalik ta sventa li Kristo Jesuse. 19 Mu me xatupʼbeik skʼakʼal li chʼul espiritue.+ 20 Mu me xapʼajik li albil kʼopetike.+ 21 Kʼelik me skotol li kʼusi chapasike;+ tukʼ me xanapʼan abaik ta stojolal li kʼusi lek tajeke. 22 Pajeso me abaik ta skotol li kʼusitik toj chopole.+

23 Ta skotoluk akʼo xchʼultajesoxuk stuk li Dios ti chakʼ jun oʼontonale. Voʼoxuk ermanoetik ti lek atalelalike, ti lek sjunul akuxlejalik* xchiʼuk ti lek sjunul abekʼtalike, sakukoxuk me xchiʼuk muʼyukuk me amulik kʼalal liʼ xa oy li Kajvaltik Jesukristoe.+ 24 Tukʼ li buchʼu tstakoxuk ta ikʼele xchiʼuk chkʼot onoʼox ta pasel yuʼun.

25 Ermanoetik, pasilanik-o me orasion ta jtojolalkutik.+

26 Ta chʼul tsʼutsʼeluk* me xakʼoponik li ermanoetike.

27 Ta jkʼanboxuk tsots vokol ta stojolal Kajvaltik ti akʼo xichʼik kʼelbel skotol ermanoetik li karta liʼe.+

28 Oyuk slekil yutsil yoʼonton Kajvaltik Jesukristo ta atojolalik.