XCHIBAL SVENTA TESALONISENSES

1 Voʼon Pablo xchiʼuk Silvano* xchiʼuk Timoteo,+ jaʼ sventa li tsobobbail ta Tesalonika ti jmoj oyik xchiʼuk li Jtotik Diose xchiʼuk li Kajvaltik Jesukristoe:

2 Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Diose xchiʼuk li Kajvaltik Jesukristoe.

3 Skotol ora oy ta jba chkaʼikutik stojbel ta vokol Dios ta atojolalik, ermanoetik. Sta-o ti jech ta jpaskutike, yuʼun yakal tajek chchʼi batel li xchʼunel avoʼontonike xchiʼuk akotolik mas xa chakʼan abaik ta jujuntal.+ 4 Jaʼ yuʼun, lek chkal akʼoplalik+ ta stojolal skotol li stsobobbailtak Dios ta skoj ti stsʼik avuʼunike, ti oy xchʼunel avoʼontonik kʼalal chalajik ta kontrainele xchiʼuk ti yakal chkuch avuʼunik li vokoliletike.+ 5 Liʼe jaʼ sprevail ti lek tukʼ chchapanvan li Diose, ti tsbeiltasoxuk batel sventa xataik-o li takel ta ikʼel ta sventa li Ajvalilal* yuʼun Dios ti jaʼ ta skoj ti yakal chavil-o avokolik ta melele.+

6 Lek me tukʼ ti vaʼ yelan chchapanvan li Diose, yuʼun chakʼbe tsots svokol li buchʼutik chakʼ tsots vokolile.+ 7 Pe li voʼoxuk ti chavil tsots avokolike jmoj chakʼbutik siketel koʼontontik kʼalal mi vinaj ta vinajel ta jun kʼokʼ li Kajvaltik Jesus+ xchiʼuk li yaj-anjeltak ti oy sjuʼelike.+ 8 Vaʼun, jaʼo chakʼbe kastigo li buchʼutik mu xojtikinik Diose xchiʼuk li buchʼutik mu xchʼunik li lekil aʼyejetik ti chalbe skʼoplal li Kajvaltik Jesuse.+ 9 Taje chchapanatik yuʼun Kajvaltik. Li kastigo chichʼike jaʼ li lajelal sbatel osile,+ jaʼ yuʼun muʼyuk xa chkʼelatik mi jaʼuk bu chkoltaatik ta stsatsal juʼel. 10 Li vaʼ kʼakʼale, chtal sventa jmoj chichʼ toybel skʼoplal xchiʼuk li buchʼutik chʼul yuʼune xchiʼuk sventa labal sba ch-ilat yuʼun li buchʼutik laj yakʼ xchʼunel yoʼontonike. Yuʼun laj avakʼ xchʼunel avoʼontonik ta sventa li kʼusi laj kalbekutik skʼoplale.

11 Jaʼ yuʼun, ta jpaskutik orasion ta atojolalik sventa xataik-o li takel ta ikʼel+ yuʼun Jdiostike xchiʼuk tsʼakaluk akʼo spas ta sjuʼel li kʼusi lek chile xchiʼuk ti lek batuk yuʼun li kʼusi chapasik ta skoj li xchʼunel avoʼontonike. 12 Ti jech taje jaʼ sventa chichʼ toybel sbi ta atojolalik li Kajvaltik Jesuse, jech xtok, jmoj chavichʼik toybel akʼoplalik xchiʼuk ek, taje jaʼ koliyal li slekil yutsil yoʼonton Jdiostik xchiʼuk li Kajvaltik Jesukristoe.

2 Jaʼ yuʼun, ermanoetik, ta sventa ti kʼalal liʼ xa oy li Kajvaltik Jesukristoe+ xchiʼuk ta sventa ti chkichʼtik tsobel+ xchiʼuke, ta jkʼanbotkutik vokol 2 ti mu me ta aniluk noʼox xavakʼ abaik ta lilinel ta skoj ti kʼu yelan xanaʼ xanopike, ti mu me xavat tajek avoʼontonik ta skoj li kʼusi akʼbil ta naʼele,+ mi jaʼuk ta skoj junuk loʼil, mi jaʼuk ta sventa jlikuk karta ti jaʼ xa kuʼunkutik yilel ti chalbe skʼoplal ti vulem xa li skʼakʼalil Jeovae.*+

3 Mu me buchʼu sloʼla avoʼontonik jsetʼuk,* yuʼun jaʼ to chtal mi talem xa ox baʼyel li jvalopatinvanej+ xchiʼuk mi laj xa ox yichʼ akʼel ta ilel li jpaschoplejal vinike,+ li xnichʼon lajelale.+ 4 Li vinike chkontrainvan xchiʼuk xtoyet chaʼi sba ta stojolal skotol li kʼusitik ti dios chalbeike o skotol li kʼusitik chichʼ ichʼel ta mukʼe, jaʼ yuʼun chchoti ta stemplo Dios xchiʼuk chalbe sba skʼoplal stuk ti jaʼ jun diose. 5 ¿Mi mu xvul ta ajolik ti jaʼ onoʼox jech chkalilanbe skʼoplal kʼalal te toʼox oyun ta atojolalike?

6 Li avie, anaʼojik xa li kʼusi chmakvane sventa chichʼ akʼel ta ojtikinel mi sta yoraile. 7 Ta melel, li xchopolal ti mukul to skʼoplale yakal xa ch-abtej,+ pe jech-o tspas jaʼ to mi lokʼ xa ox batel ta be li buchʼu yakal to chmakvane. 8 Vaʼun, chichʼ akʼel ta ojtikinel ta melel li jpaschoplejale, chichʼ lajesel ta yikʼal ye+ Kajvaltik xchiʼuk chichʼ akʼbel slajeb mi vinaj+ ti liʼ xa oy li Kajvaltike. 9 Ta skoj yabteltak Satanas+ chvinaj ti liʼ xa oy li jpaschoplejale, ta skʼelobiltak juʼelal, ta senyailtak xchiʼuk ta kʼusitik labalik sba ti naka jutbil kʼope*+ 10 xchiʼuk ta skotol jecheʼ loʼlael ti muʼyuk stukʼile.+ Ta skoj taje, chlajik ta loʼlael li krixchanoetik ti jaʼ stojolik chkʼot ti chchamike, yuʼun muʼyuk laj yakʼik ta ilel ti oy ta yoʼontonik li kʼusi melel ti jaʼ sventa chkolik-oe. 11 Jaʼ yuʼun, akʼatik ta loʼlael yuʼun Dios sventa xchʼunik li jutbil kʼope,*+ 12 sventa xichʼik chapanel skotolik ta skoj ti muʼyuk bu la xchʼunik li kʼusi melele, yuʼun jaʼ lek laj yaʼiik li kʼusi muʼyuk tukʼe.

13 Akʼo mi jech, skotol ora oy ta jba chkaʼikutik stojbel ta vokol Dios ta atojolalik, ermanoetik, voʼoxuk ti kʼanbiloxuk yuʼun Jeovae,* yuʼun ta slikebal onoʼox la stʼujoxuk Dios+ ta sventa kolebal kʼalal la xchʼultajesoxuk+ ta xchʼul espiritu ta skoj ti oy xchʼunel avoʼontonik ta sventa li kʼusi melele. 14 La stakoxuk ta ikʼel sventa kolebal ta stojolal li lekil aʼyejetik laj kalkutike yoʼ xuʼ xataik li smukʼulal Kajvaltik Jesukristoe.+ 15 Jaʼ yuʼun, ermanoetik, tukʼ me xavakʼ abaik+ xchiʼuk mu me xavikta abaik ta spasel li kʼusitik nopem onoʼox xavaʼiik spasel ti jech laj avichʼik chanubtasele+ manchuk mi laj yichʼ alel o mi ta jkartakutik noʼox. 16 Jech xtok, li Kajvaltik Jesukristo xchiʼuk li Dios ti jaʼ Jtotik ti la skʼanutike,+ ti la spat koʼontontik sbatel osile xchiʼuk ti laj yakʼ spatobil koʼontontik+ ta sventa li slekil yutsil oʼontonale 17 akʼo spat avoʼontonik xchiʼuk akʼo stsatsubtas avoʼontonik ta skoj ti lek skotol li kʼusi chapasike xchiʼuk ti lek kʼusi chavalike.

3 Ta slajebe, kermanotak, pasik-o me orasion ta jtojolalkutik+ sventa jech-o xvinaj batel ta anil+ li skʼop Jeovae* xchiʼuk akʼo yichʼ toybel skʼoplal jech kʼuchaʼal yakal chapasike; 2 jech xtok, jaʼ sventa xikolkutik ta stojolal li chopol viniketik ti chakʼik vokolile,+ yuʼun maʼuk kuʼuntik jkotoltik li xchʼunel oʼontonale.+ 3 Pe tukʼ li Kajvaltike, jaʼ tstsatsubtas avoʼontonik xchiʼuk chchabioxuk ta stojolal li Satanase.* 4 Jech xtok, jpatoj koʼontonkutik ta stojolal Kajvaltik ti yakal chapasik xchiʼuk ti chapasik-o batel li kʼusi laj kalkutike. 5 Jechuk-o lek sbeiltas batel avoʼontonik Kajvaltik sventa xakʼanik li Diose+ xchiʼuk ti stsʼik avuʼunik+ ta skoj li Kristoe.

6 Tana un, chkalbotkutik avaʼiik ta sbi Kajvaltik Jesukristo, ermanoetik, ti xachʼak abaik ta stojolal buchʼuuk ermanoal ti mu xichʼ smelole,+ ti maʼuk jech yakal tspas jech kʼuchaʼal nopem xavaʼiik spasel ti la achanik* ta jtojolalkutike.+ 7 Yuʼun li voʼoxuke anaʼojik kʼuxi xuʼ xachanik jtalelalkutik,+ yuʼun lek kichʼoj jmelolkutik la jpas jbakutik ta atojolalik, 8 mu ta motonuk la jkʼankutik li kʼusi la jlajeskutike.+ Tsots li-abtejkutik xchiʼuk tsots laj kakʼ jvokolkutik, kʼakʼal akʼobal li-abtejkutik sventa mu xikʼotkutik kʼuchaʼal alal ikatsil ta atojolalik.+ 9 Maʼuk ti muʼyuk kichʼoj kabtelkutike,+ moʼoj, yuʼun oy ta koʼontonkutik ti xachanik li kʼusi ta jpaskutike.+ 10 Jech xtok, kʼalal te toʼox jchiʼukotkutike, laj kalbotkutik li mantal liʼe: «Mi oy buchʼu mu skʼan x-abteje, akʼo mu xveʼ xtok».+ 11 Yuʼun chkaʼikutik ti oy junantik avuʼunik ti mu xichʼ smelolike,+ muʼyuk tspasik jtosuk abtelal, tstikʼ sbaik ta sventa li kʼusi mu sventaik-oe.+ 12 Li buchʼutik jechik taje ta xkalbekutik mantal xchiʼuk ta jtojobtaskutik ta stojolal Kajvaltik Jesukristo ti ta sjunuluk yoʼonton abtejikuke xchiʼuk ti veʼikuk ta skoj ti tspasik kanale.+

13 Yan li voʼoxuke, ermanoetik, mu me xavikta abaik ta spasel li kʼusi leke. 14 Pe mi oy buchʼu mu xchʼun li kʼusi chkalkutik ta karta liʼe, akʼbeik me senyail xchiʼuk mu xa xachiʼinik+ yoʼ xichʼ kʼexlaltasel. 15 Pe mu me avajkontraikuk xavilik, jaʼ lek pʼijubtasik-o+ kʼuchaʼal jun ermano.

16 Ta kʼusiuk noʼox akʼo yakʼboxuk-o jun oʼontonal li Kajvaltik ti chakʼ jun oʼontonale.+ Teuk oy ta atojolal akotolik li Kajvaltike.

17 Voʼon Pabloun, chabanukoxuk, voʼon la jtsʼiba ta jkʼob jtuk ti jech chkalboxuke+ ti jaʼ jech senyail skotol li jkartae; jaʼ jech chitsʼibaj.

18 Oyuk slekil yutsil yoʼonton Kajvaltik Jesukristo ta atojolalik.