BAʼYEL SVENTA TIMOTEO

1 Voʼon Pabloun, yajtakbolun Kristo Jesus ti jaʼ ta smantal li Jkoltavanej Dios kuʼuntike xchiʼuk li Kristo Jesus ti jaʼ spatobil koʼontontike,+ 2 jaʼ sventa Timoteo*+ ti jaʼ melel nichʼonil+ ta sventa li xchʼunel oʼontonale:

Oyuk slekil yutsil oʼontonal, kʼuxubinel xchiʼuk jun oʼontonal ta atojolal ti jaʼ chakʼ li Jtotik Diose xchiʼuk li Kajvaltik Kristo Jesuse.

3 Jech kʼuchaʼal la jtijbot avoʼonton ti akʼo te xakom ta Efeso kʼalal poʼot xa ox xibat ta Masedoniae, jaʼ jech ta jpas li avi xtoke sventa xapas ta mantal junantik ti mu me yanuk kʼusi xakʼik ta chanele, 4 ti mu me xchikintaik li jecheʼ loʼiletike+ xchiʼuk li loʼiletik ta sventa li nitilulale. Taje muʼyuk stu,+ yuʼun muʼyuk chkoltavan ta sventa li kʼusitik chakʼ Dios ta sventa li xchʼunel oʼontonale, jaʼ noʼox oy kʼusi chlik snopbeik-o skʼoplal li loʼiletik taje. 5 Ta melel, ti kʼu yuʼun jech li mantal taje jaʼ sventa oyuk kʼanelal+ ti te chlik talel ta oʼontonal ti muʼyuk xchopolile, ta lekil jol oʼontonal xchiʼuk ta xchʼunel oʼontonal+ ti bu muʼyuk loʼlaele. 6 Oy junantik ti muʼyuk xa smelolal chkʼopojik ta skoj ti laj xa yiktaik li kʼusitik taje.+ 7 Tskʼan chkʼotik ta jchanubtasvanej+ ta sventa li mantale, pe mu xaʼibeik smelolal li kʼusi chalike xchiʼuk mu xaʼibeik smelolal li kʼusi jpʼel xa chakʼik ta chanele.

8 Pe li voʼotike jnaʼojtik ti toj lek li Mantale, jaʼ noʼox venta mi lek chichʼ tunesele, 9 jnaʼojtik ti maʼuk sventa buchʼutik tukʼ ti laj yichʼ pasel li mantale, jaʼ sventa li chopol krixchanoetike, li buchʼutik mu stakʼ pasel ta mantale,+ li buchʼutik toj chopolike, li jpasmuliletike, li buchʼutik muʼyuk stukʼil yoʼontonike,* li buchʼutik mu xichʼik ta mukʼ li kʼusitik chʼule, li buchʼutik tsmil stotike, li buchʼutik tsmil smeʼike, li jmilvanejetike, 10 li jmulivajeletike,* li viniketik ti chchiʼinik ta vayel viniketike, li j-elkʼanej krixchanoetike,* li jutkʼopetike,* li buchʼutik jecheʼ chakʼ yeike xchiʼuk jaʼ sventa skotol li kʼusitik tskontrain li lekil chanubtasele+ 11 ti jaʼ jech chal li yutsil lekil aʼyejetik ti laj kichʼ kʼubanbel+ ti jaʼ yuʼun li Dios ti xmuyubaje.

12 Ta jtojbe ta vokol Kajvaltik Kristo Jesus ti laj yakʼbun juʼele, yuʼun tukʼ laj yilun kʼalal laj yakʼbun kabtele+ 13 manchuk mi jchopolkʼoptavanejun toʼox, jkontrainvanejun xchiʼuk muʼyuk toʼox kʼexlal chkaʼi.+ Akʼo mi jech, laj kichʼ kʼuxubinel, yuʼun mu toʼox jnaʼ li kʼusi la jpase xchiʼuk chʼabal toʼox xchʼunel koʼonton. 14 Pe epaj tajek slekil yutsil yoʼonton Kajvaltik ta jtojolal, oy xchʼunel koʼonton xchiʼuk chikʼanvan ta skoj ti jaʼ yajtsʼaklomun li Kristo Jesuse. 15 Xuʼ jpat koʼontontik yuʼun li kʼusi chichʼ alel liʼe xchiʼuk sta-o ti xichʼ chʼamel leke: li Kristo Jesuse ay ta balumil sventa skolta li jpasmuliletike.+ Pe voʼon ti mas to jpasmulilun ta skotolike.+ 16 Akʼo mi jech, laj kichʼ kʼuxubinel manchuk mi voʼon mas to jpasmulilun sventa xakʼ ta ilel Kristo Jesus ti oy smalael yuʼune, ti jaʼ skʼelobil sventa li buchʼutik chakʼ xchʼunel yoʼontonik ta stojolal sventa staik li kuxlejal sbatel osile.+

17 Vaʼun, li Ajvalil sbatel osil+ ti mu snaʼ xlaje,+ ti mu xvinaj ta kʼelel+ xchiʼuk ti stuk noʼox jaʼ Diose+ akʼo yichʼ ichʼel-o ta mukʼ xchiʼuk akʼo yichʼ albel smukʼulal sbatel osil. Jechuk.

18 Kuni kerem Timoteo, ta jkʼubanbot li mantal liʼe, ti jech onoʼox albil skʼoplal ta albil kʼopetik ta aventae. Ta skoj taje, jechuk-o me xapas batel li lekil paskʼope;+ 19 jechuk-o me li xchʼunel avoʼontone xchiʼuk lekuk-o me li ajol avoʼontone,+ yuʼun li yantike laj xa yiktaik, jaʼ yuʼun chʼay xchʼunel yoʼontonik jech kʼuchaʼal jkot varko ti chmuk ta nabe. 20 Te kapal skʼoplalik li Imeneo+ xchiʼuk Alejandroe, jaʼ yuʼun kakʼojik xa ta yok skʼob Satanas+ sventa xichʼik tukʼibtasel yoʼ mu chopoluk xkʼopojik.

2 Jaʼ yuʼun, ta jtij avoʼontonik ti xakʼanbeik vokol Dios sventa alekilalik ta jujuntale, ti xapasbe abaik orasione, ti xapasik orasion ta stojolal yantike xchiʼuk ti xatojbeik ta vokol Dios ta stojolal skotol krixchanoetike, 2 ta stojolal ajvaliletik xchiʼuk ta stojolal skotol li buchʼutik tsots yabtelike+ sventa jech-o muʼyuk kʼusi jnaʼtik xchiʼuk junuk koʼontontik xijkuxi yoʼ jech lek xichʼ ichʼel ta mukʼ ta sjunul oʼontonal li Diose xchiʼuk sventa yijuk jnopbentik ta skotol.+ 3 Taje toj lek xchiʼuk chʼambil ta sat li Jkoltavanej kuʼuntike, li Diose.+ 4 Li kʼusi tskʼan yoʼonton li Diose jaʼ ti akʼo koluk skotol li krixchanoetike+ xchiʼuk ti akʼo yojtikinik lek li kʼusi melele. 5 Yuʼun jun noʼox Dios oy+ xchiʼuk jun noʼox jkʼopojel oy+ ta stojolal Dios xchiʼuk li krixchanoetike,+ jun noʼox vinik, Kristo Jesus+ 6 ti laj yakʼ sba stuk jech kʼuchaʼal pojelal sventa xtoj-o skotol li krixchanoetike.+ Ta skoj taje, skʼan xichʼ albel skʼoplal mi la sta yoraile. 7 Ta skoj li aʼyej taje,+ laj kichʼ vaʼanel ta jcholmantal xchiʼuk ta jtakbol+ —melel li kʼusi chkale, muʼyuk ta jut kʼop—,* ta jchanubtasvanej yuʼun jyanlumetik+ ta sventa li xchʼunel oʼontonal xchiʼuk li kʼusi melele.

8 Jaʼ yuʼun, oy ta koʼonton ti ta buyuk noʼox akʼo spasik orasion li viniketike, tukʼuk yoʼontonik akʼo stoy skʼobik,+ muʼyukuk skʼakʼal yoʼontonik+ xchiʼuk mu me xut sbaik.+ 9 Jech xtok, lekuk noʼox me smeltsan sba ta skʼuʼ spokʼik li antsetike, oyuk me smelolik xchiʼuk akʼo me yichʼ spʼijilik, maʼuk me ti yan xa sba kʼu yelan chpechʼ sjolik ti ta oro o ta perla tonetik o ta kʼuʼil pokʼil ti toj toyolik stojole,+ 10 ti kʼusi mas leke jaʼ ti jaʼuk me jech spasik jech kʼuchaʼal tspasik li antsetik ti yichʼojik ta mukʼ Diose,+ jaʼ xkaltik, ta lekil abtelaletik.

11 Chʼan xiuk me ti kʼalal chaʼi chanubtasel li antse, ichʼvanuk me lek ta mukʼ.+ 12 Mu xkakʼ chanubtasvanuk li antse mi jaʼuk ti tspas ta mantal li vinike, chʼan xiuk noʼox me.+ 13 Yuʼun jaʼ baʼyel laj yichʼ pasel li Adane, jaʼ tsʼakal to li Evae.+ 14 Jech xtok, maʼuk laj yichʼ loʼlael li Adane, jaʼ lek laj ta loʼlael li antse,+ jaʼ yuʼun kʼot ta jpasmulil. 15 Akʼo mi jech, ta xichʼik chabiel mi laj yil yalabike,+ jaʼ noʼox venta mi oy-o xchʼunel yoʼontonike, mi jech-o chkʼanvanike, mi chʼulik-oe xchiʼuk mi lek-o li snopbenike.+

3 Tukʼ li kʼusi chichʼ alel liʼe: mi oy junuk vinik chakʼ persa sventa xkʼot ta jkʼelvaneje,+ jaʼ jun lekil abtelal li kʼusi oy ta yoʼonton tstae. 2 Jaʼ yuʼun, skʼan lekuk skʼoplal li jkʼelvaneje, junuk noʼox yajnil, oyuk spʼisol li kʼusi nopem xaʼi spasele, oyuk lek xchʼulel,+ xchapetuk lek li kʼusi tspase, lekuk xchʼamvan,+ tojobuk ta chanubtasvanej,+ 3 maʼukuk jyakubel,+ maʼukuk jmajvanej, xtojobuk lek ta snopel,+ maʼukuk jsaʼkʼop+ xchiʼuk maʼukuk batem yoʼonton ta takʼin,+ 4 tojobuk lek ta skʼelel li yutsʼ yalale, jchʼunej mantaluk li xnichʼnabe xchiʼuk lekuk stalelalik+ 5 (mi oy jun vinik ti mu xtojob ta skʼelel stuk li yutsʼ yalale, ¿kʼuxi xa noʼox tskʼelbe li stsobobbail Diose?), 6 maʼukuk me jun vinik ti achʼ to sjeloj xkuxlejale,+ yuʼun yikʼal xtoyet xa chaʼi sba xchiʼuk ti xichʼ chapanel jech kʼuchaʼal laj yichʼ chapanel li Diabloe. 7 Jech xtok, skʼan lekuk skʼoplal ta stojolal li buchʼutik muʼyuk oyik ta tsobobbaile+ sventa mu xichʼ sokesbel skʼoplal* xchiʼuk ti xpʼaj* ta spetsʼ li Diabloe.

8 Skʼan yijuk snopbenik li siervo ministerialetik* eke, mu me xloʼlavan ta skʼopojelik, mu me epuk xbat ta uchʼel yuʼunik li vinoe, maʼukuk me ti tskʼan tajek tspasik kanal takʼin ta loʼlavaneje,+ 9 jechuk-o me xakʼ sba ta stojolal li kʼusi chʼul ti mukul skʼoplal ta sventa li xchʼunel oʼontonale xchiʼuk sakuk sjol yoʼonton.+

10 Jech xtok, akʼo yichʼik kʼelel baʼyel mi xtojobik lek ta sventa li abtelale; vaʼun akʼo kʼotikuk ta j-abteletik ti muʼyuk tikʼbil smulike.+

11 Skʼan yijuk snopbenik li antsetik eke, skʼan mu sabeik smul yantik,+ oyuk spʼisol li kʼusi nopem xaʼiik spasele xchiʼuk tukʼikuk me ta skotol.+

12 Junuk noʼox me yajnil li siervo ministerialetike,* kʼeluk me lek yuʼun li xnichʼnabe xchiʼuk li yutsʼ yalale. 13 Yuʼun li viniketik ti lek tajek chtunike yakal tstaik batel ti lek skʼoplalike xchiʼuk ti lek tajek jamal chkʼopojik ta sventa li xchʼunel yoʼontonik ta stojolal li Kristo Jesuse.

14 Taje jech ta jtsʼibabot talel manchuk mi jutuk xa skʼan xtal jkʼelot, 15 pe mi lijalij toe, jaʼ sventa xanaʼ kʼu yelan skʼan xapas aba li ta sna Dios+ ti jaʼ li stsobobbail kuxul Dios ti kʼotem ta yoyal xchiʼuk ti jaʼ yikoj li kʼusi melele. 16 Ta melel, li kʼusi chʼul ti mukul skʼoplal ta sventa li yichʼel ta mukʼ Diose nabil ti mukʼ skʼoplale: ‹Laj yichʼ akʼel ta ojtikinel ta bekʼet,+ tukʼ laj yichʼ albel skʼoplal ta vinajel kʼuchaʼal jun kuxlejal,+ vinaj ta stojolal anjeletik,+ laj yichʼ cholbel skʼoplal ta stojolal jyanlumetik,+ laj yichʼ chʼunel ta balumil+ xchiʼuk laj yichʼ chʼamel ta akʼol ta mukʼulal›.

4 Akʼo mi jech, li skʼop yakʼoj ta naʼel Diose* jamal chal ti oy junantik ti chiktaik komel li xchʼunel oʼontonale, jaʼ chchikintaik li kʼusi akʼbil ta naʼel ti jaʼ noʼox chchʼayvane+ xchiʼuk li chanubtaseletik ti jaʼ yuʼun pukujetike, 2 jaʼ chloʼlaatik-o li jutbil kʼop*+ chal krixchanoetik ti alubem sjol yoʼontonik ti xkoʼolaj kʼuchaʼal chikʼbil ta kʼakʼal takʼine. 3 Chalik ti mu xuʼ xijnupune+ xchiʼuk chlik spasik ta mantal li krixchanoetike, chalbeik ti mu xuʼ slajesik li veʼlil+ ti jaʼ spasoj Dios sventa slajesik+ li buchʼutik tstojik ta vokol xchiʼuk ti oy xchʼunel yoʼontonike+ xchiʼuk ti xojtikinik lek li kʼusi melele. 4 Yuʼun lek tajek skotol li spasben Diose,+ jaʼ yuʼun muʼyuk kʼusi chichʼ pʼajel+ mi chichʼ tojel ta vokol kʼalal chichʼ chʼamele, 5 yuʼun chichʼ chʼultajesel ta skʼop Dios xchiʼuk kʼalal chichʼ pasel orasione.

6 Mi la atojobtas li ermanoetik ta sventa li mantal taje, lekil j-abtel chakʼot ta stojolal Kristo Jesus, ti lek chamakʼlin-o aba li aʼyej ta sventa xchʼunel koʼontontike xchiʼuk li ta lekil chanubtaseletik ti avakʼoj onoʼox ta avoʼonton spasel leke.+ 7 Pe pʼajo me li jecheʼ loʼiletik+ ti maʼuk chakʼ ta ichʼel ta mukʼ Diose, jech kʼuchaʼal li jecheʼ loʼiletik chalik li antsetik ti meʼelik xae. Li kʼusi xuʼ xapase chapano aba xchiʼuk akʼo ta avoʼonton stael ti chakʼan chavakʼ ta ilel ti chavichʼ ta mukʼ Diose. 8 Yuʼun oy onoʼox sbalil kʼalal ta jpastik ejersisioe, pe li yichʼel ta mukʼ Diose jaʼ oy sbalil ta skotol li kʼusitike, yuʼun te tsakal li kʼusi albil skʼoplal ta sventa li kuxlejal avie xchiʼuk ta sventa li kuxlejal chtal ta tsʼakale.+ 9 Xuʼ jpat koʼontontik yuʼun li kʼusi albil skʼoplale xchiʼuk sta-o ti jchʼamtik skotole. 10 Jaʼ ta skoj ti tsots yakal chij-abteje, ti kakʼojbetik-o yipale,+ yuʼun jpatoj koʼontontik ta stojolal jun kuxul Dios ti jaʼ Jkoltavanej+ yuʼun skotol krixchanoetike,+ pe jaʼ mas to tskolta li buchʼutik tukʼike.

11 Jech alo-o batel li mantaletik taje xchiʼuk jech xavakʼ-o batel ta chanel. 12 Mu me buchʼu xavakʼ spʼaj jsetʼuk* li akeremale. Moʼoj, lekuk ta chanel atalelal chilik li buchʼutik tukʼike, akʼo ta ilel ta akʼopojel, ta sventa ti kʼu yelan chapas abae, ti chakʼanvane, ti oy xchʼunel avoʼontone xchiʼuk ti sak atalelale. 13 Yoʼ to mu xikʼote, akʼo-o me ta avoʼonton li skʼelel chʼul Tsʼibetik ta stojolal krixchanoetike,+ akʼo-o me ta avoʼonton li tojobtasvaneje* xchiʼuk li chanubtasvaneje. 14 Kʼelo me lek li matanal akʼbilote, ti laj avichʼ akʼbel ta jun albil kʼop kʼalal laj yakʼ skʼobik ta atojolal li jtsop moletike.+ 15 Nopbo skʼoplal li kʼusitik taje; akʼo me lek ta avoʼonton sventa lek jamal xil skotol krixchanoetik ti lek chbat avuʼune. 16 Jechuk-o me xakʼel aba atuk xchiʼuk kʼelo me lek li kʼusi chavakʼ ta chanele.+ Jechuk-o me xapas batel li kʼusitik taje, yuʼun mi jech chapase, ta me xakol xchiʼuk ta me xkolik ek li buchʼutik chchikintabote.+

5 Mu me xatsatsal ut li jun vinik ti mol xae.+ Moʼoj, jaʼ lek jechuk xakʼanbe vokol jech kʼuchaʼal atot, li kerem viniketike jechuk xakʼanbe vokol jech kʼuchaʼal abankil avitsʼin, 2 li antsetik ti mas xa oy sjabilalike jechuk xakʼanbe vokol jech kʼuchaʼal ameʼ, li tsebal antsetike jechuk xakʼanbe vokol jech kʼuchaʼal avix avixlel, sakuk atalelal.

3 Ichʼo me ta mukʼ li antsetik ti chamem smalalik+ ti muʼyuk buchʼu xkoltaatik ta melele.* 4 Pe mi oy jun ants chamem smalal ti oy yalab xchiʼuk smamobtake, jaʼ skʼan xchanik baʼyel lek yichʼel ta mukʼ Dios ta sna stukik+ xchiʼuk akʼo stojbe stot smeʼik xchiʼuk smukʼtot* syayaik li kʼusi sta-oe,+ yuʼun lek chil li Diose.+ 5 Jaʼ yuʼun, li ants ti chamem smalal ti muʼyuk buchʼu xkoltaate xchiʼuk ti muʼyuk kʼusi oy yuʼune spatoj yoʼonton ta stojolal Dios+ xchiʼuk tskʼanilanbe vokol xchiʼuk tspas orasion ta kʼakʼal akʼobal.+ 6 Pe li buchʼu jaʼ noʼox tspas li kʼusi kʼupil chaʼi sbekʼtale chamem xa manchuk mi kuxul to. 7 Jaʼ yuʼun, jech-o me xaval batel li mantal taje sventa mu chopoluk skʼoplalik. 8 Ta melel, mi oy buchʼu mu xakʼbe kʼusi chtun yuʼun li buchʼutik oy ta sba skʼelele, mas to li buchʼutik te oyik ta snae, laj xa spʼaj li xchʼunel oʼontonale, mas to me chopol chkʼot kʼuchaʼal li buchʼu chʼabal xchʼunel yoʼontone.+

9 Xuʼ xichʼ tsakbel sbi ta lista li ants ti chamem smalal mi mas xa ta 60 sjabilal xchiʼuk mi jun noʼox smalal echʼe, 10 mi lek ojtikinbil ta sventa li kʼusitik lek tspase,+ mi la stsʼites yalab,+ mi lek chʼamvan,+ mi la spokbe yakan li buchʼutik chʼule,+ mi la skolta li buchʼutik chil svokolike+ xchiʼuk mi laj yakʼ ta yoʼonton spasel li lekil abtelale.

11 Jech xtok, mu me xatsakbeik sbi ta lista li antsetik ti chamem smalalik ti tsebik toe, yuʼun jaʼ chmakatik ta be sventa Kristo kʼalal oy ta yoʼontonik li chiʼinejbail ta vayele, yuʼun tskʼan to chnupunik. 12 Tstaik chapanel, yuʼun laj xa yiktaik li kʼusi baʼyel lokʼ ta yeike.* 13 Jech xtok, muʼyuk noʼox kʼusi stakʼ pasel chaʼiik, jaʼ noʼox xtal xbatik ta jujupʼej na; jech, maʼuk noʼox ti muʼyuk kʼusi stakʼ pasel chaʼiike, yuʼun chloʼiltavanik, te tstikʼ sbaik ti bu mu jaʼuk ta sventaike+ xchiʼuk jaʼ noʼox chalbeik skʼoplal li kʼusi mu sventaikuk-oe. 14 Jaʼ yuʼun, oy ta koʼonton ti akʼo nupunikuk li antsetik ti chamem smalalik+ ti tsebik toe, akʼo yil yalabik,+ akʼo tojobikuk ta skʼelel snaik sventa mu xlabanvanik jsetʼuk* li jkontrainvanejetike. 15 Yuʼun li yantike laj xa yichʼik chʼakel lokʼel sventa stsʼakliik li Satanase. 16 Mi oy jun jchʼunolajel ants ti chamem smalalik li yutsʼ yalale, akʼo skolta sventa mu jaʼuk sbain li tsobobbaile. Vaʼun, li tsobobbaile jaʼ xuʼ skolta li antsetik ti chamem smalalik ti muʼyuk buchʼu xkoltaatik ta melele.*+

17 Ichʼbilikuk me lek ta mukʼ+ li moletik ti jaʼ oy ta sbaik chkʼelvanik leke,+ pe jaʼ mas skʼan ichʼel ta mukʼ li buchʼutik tsots ch-abtejik ta skʼopojelik xchiʼuk ti chchanubtasvanike.+ 18 Yuʼun xi chal li Tsʼibetike: «Mu xavakʼbe svosal li tot vakax kʼalal yakal chpechʼilan ta tekʼel li trigoe»;+ xi chal xtoke: «Sta-o xichʼ stojol li j-abtel vinike».+ 19 Mu me xachʼun kʼalal chichʼ tikʼbel smul li jun mole, jaʼ to me xachʼun mi oy chaʼvoʼ o oxvoʼuk testigoe.+ 20 Sventa xpʼijubik li yantike,* albo mantal+ ta sat krixchanoetik li buchʼutik tspasilanik mulile.+ 21 Tsots chkalbot ta stojolal Dios xchiʼuk ta stojolal Kristo Jesus xchiʼuk ta stojolal tʼujbil anjeletik ti xachʼun li mantaletike, pe mu me baʼyeluk kʼusi chopol xanop ta stojolal xchiʼuk mu me tʼujbiluk xavut.+

22 Mu me xavakʼ akʼob ta anil ta stojolal jun vinik,*+ mu me teuk kapal akʼoplal li ta smul yantike; sakuk me li atalelale.

23 Mu xa stukuk voʼ xavuchʼ, jaʼ lek uchʼan jutebuk vino ta skoj li achʼute xchiʼuk ta skoj ti nopajtik noʼox cha-ipaje.

24 Lek jamal xvinaj li smul junantik viniketike xchiʼuk tukʼ ch-ikʼvan batel ta chapanel, pe li smul yan viniketike ta mas to tsʼakal chvinaj.+ 25 Jech xtok, jaʼ jech lek xvinaj li lekil abtelal eke,+ mu teuk noʼox nakʼal* chkom-o li kʼusi mu lekuke.+

6 Akʼo yichʼ lek ta mukʼ+ yajvalik li mosoiletike sventa mu chopoluk xichʼ albel skʼoplal li sbi Diose xchiʼuk li chanubtasele.+ 2 Jech xtok, li buchʼutik jchʼunolajel yajvalike akʼo yichʼik lek ta mukʼ, yuʼun jaʼik ermanoetik. Mas me baxbolikuk xtunik ta stojolalik, yuʼun li buchʼutik tstabe sbalil li slekil abtelik li mosoiletike jaʼik jchʼunolajeletik xchiʼuk jaʼik li buchʼutik kʼanbilike.

Jech-o me xavakʼ ta chanel li kʼusitik taje xchiʼuk jech-o me xaval li mantaletike. 3 Mi oy junuk vinik ti yan-o kʼusi chchanubtasvane, ti maʼuk jech kʼuchaʼal li lekil chanubtasel+ ti jaʼ yuʼun li Kajvaltik Jesukristoe xchiʼuk ti mu jechuk kʼuchaʼal li chanubtasel ta sventa li yichʼel ta mukʼ Diose,+ 4 jtoyba li vinik taje xchiʼuk mu xaʼibe smelolal jsetʼuk.*+ Jaʼ oy tajek ta yoʼonton ti tsvul sbaike xchiʼuk ti chut sbaik ta sventa li kʼusi chalike.+ Skotol li kʼusitik taje jaʼ tslikes pichʼetel oʼontonal, tsakbail ta kʼop, chopol loʼiltavanej, muʼyuk xa spatoj yoʼontonik ta jujuntal, 5 jech-o tsvulilan sbaik ta sventa li kʼusitik jutuk noʼox tsots skʼoplal xchiʼuk li viniketik ti sokem snopbenike+ xchiʼuk ti mu xaʼibeik smelolal li kʼusi melele, ti tsnopik ti jaʼ sventa pasob kanal li yichʼel ta mukʼ Diose.+ 6 Ta melel, ep ta jpastik kanal mi chkichʼtik ta mukʼ Dios+ xchiʼuk mi jun noʼox koʼontontik yuʼun ti kʼu yepal oy kuʼuntike. 7 Yuʼun muʼyuk kʼusi chkichʼtik tal jsetʼuk* kʼalal chijvokʼ liʼ ta balumile xchiʼuk muʼyuk kʼusi chkichʼtik batel jsetʼuk kʼalal chijchame.+ 8 Jaʼ yuʼun, mi oy noʼox jveʼeltik xchiʼuk jkʼuʼ jpokʼtike, junuk noʼox koʼontontik yuʼun.+

9 Pe chyal ta preva li buchʼutik oy ta yoʼonton tskʼan tspasik ta jkʼuleje, chyakatik ta petsʼ+ xchiʼuk chlik skʼan ta yoʼontonik li kʼusitik chopole xchiʼuk ti chakʼ vokolile, ti jaʼ chlajesatik-o xchiʼuk ti tsokesatik-o li viniketike.+ 10 Yuʼun li skʼanel takʼine jaʼ yibel skotol li kʼusitik tsokesvane, yuʼun li buchʼutik batem ta yoʼontonik skʼanel li kʼusitik taje yiktaojik xa li xchʼunel oʼontonale xchiʼuk ep tajek staoj svokolik ti toj kʼuxe.*+

11 Akʼo mi jech, li voʼot yajtunelot Diose jatavan me lokʼel ta stojolal li kʼusitik taje. Jaʼ akʼbo batel yipal saʼel li kʼusitik tukʼe, li yichʼel ta mukʼ Diose, li xchʼunel oʼontonale, li kʼanelale, ti stsʼik avuʼune xchiʼuk ti manxoukote.+ 12 Paso-o me batel li lekil paskʼope sventa xapakbe skʼoplal li chanubtaseletik yuʼun Diose;* tsako me lek li kuxlejal sbatel osil ti jaʼ sventa laj avichʼ takel ta ikʼele xchiʼuk ti lek jamal laj avakʼ ta aʼiel ta skotol krixchanoetik ta yeloval epal testigoetike.

13 Ta sat li Dios ti jaʼ li buchʼu kuxul chikta skotol li kʼusitike xchiʼuk ta sat Kristo Jesus ti kʼot kʼuchaʼal testigo ti lek jamal laj yakʼ ta aʼiel ta stojolal li Ponsio Pilatoe+ chkalbot mantal 14 ti muʼyukuk xchopolil xchiʼuk ti lekuk skʼoplal ti kʼu yelan chachʼun li mantaletike, jech-o me xapas jaʼ to mi vinaj li Kajvaltik Jesukristoe,+ 15 jaʼ li buchʼu xmuyubaj xchiʼuk li Buchʼu stuk noʼox oy sjuʼel ti chakʼ sba ta ilel mi tsʼaki li yorail akʼbile, li stuke jaʼ Ajvalil yuʼunik li buchʼutik ch-ajvalilajike xchiʼuk jaʼ Bankilal Jpasmantal yuʼunik li jpasmantaletike,+ 16 ti jaʼ noʼox stuk ti mu snaʼ xchame,+ ti te nakal ta lus ti muʼyuk buchʼu xuʼ x-oche,+ mi junuk krixchano yiloj xchiʼuk muʼyuk buchʼu xuʼ xil.+ Akʼo yichʼ ichʼel ta mukʼ xchiʼuk jaʼ oy sjuʼel sbatel osil. Jechuk.

17 Albo mantal li buchʼutik jkʼulejetik ta skotol li kʼusitik oy ta balumil avie* ti mu me xtoyetuk xa chaʼi sbaike,* ti maʼukuk me te spat yoʼontonik ta kʼulejal ti muʼyuk sbalile,+ jaʼ akʼo spat yoʼontonik ta stojolal li Dios ti ep tajek chakʼbutik li kʼusitik ta jkʼupintike.+ 18 Albo yaʼiik ti akʼo yabtelanik li kʼusi leke, ti jkʼulejikuk ta spasel li lekil abtelale, ti lekuk yoʼontonike,* ti mu sjalanbeik li yantike.+ 19 Mi jech tspasike, chakʼbeik lek snakleb ta sventa li kʼusi tstaik ta jelavel+ ti xkoʼolaj kʼuchaʼal kʼulejale sventa xuʼ stsak lek yuʼunik li batsʼi mero kuxlejale.+

20 Jkʼanbil Timoteo, chabio me lek li kʼusi la-akʼbat abaine,+ chʼako me aba ta stojolal li loʼiletik ti muʼyuk sbalil ti jaʼ noʼox tsokesbe skʼoplal li kʼusi chʼule xchiʼuk chʼako aba ta stojolal li kʼusitik tskontrain li melele, ti yojtikinobil chalike.+ 21 Ta skoj ti xtoyetik xa chakʼik ta ilel li yojtikinobil taje, oy junantik ti laj xa yiktaik li xchʼunel oʼontonale.

Teuk me oy ta atojolalik li slekil yutsil oʼontonale.