XCHIBAL SVENTA TIMOTEO

1 Voʼon Pabloun, yajtakbolun Kristo Jesus ti jech tskʼan yoʼonton Diose sventa xkalbe batel skʼoplal li kuxlejal albil onoʼox skʼoplal ta sventa li Kristo Jesuse,+ 2 jaʼ sventa Timoteo ti jaʼ jun kʼanbil nichʼonile:+

Oyuk slekil yutsil oʼontonal, kʼuxubinel xchiʼuk jun oʼontonal ta atojolal ti jaʼ chakʼ li Jtotik Diose xchiʼuk li Kajvaltik Kristo Jesuse.

3 Ta jtojbe ta vokol Dios —ti sak jol koʼonton ta jpas chʼul abtelal ta stojolal jech kʼuchaʼal la spasik li jmoltotake— sventa jvulesot-o ta jol ta kʼakʼal akʼobal kʼalal ta jkʼan vokole. 4 Oy tajek ta koʼonton ta jkʼelot kaʼi —yuʼun xvul ta jol li yaʼlel asate— sventa xkuxetuk tajek koʼonton. 5 Yuʼun xvul ta jol ti melel oy xchʼunel avoʼontone,+ ti jaʼ baʼyel kʼot ta stojolal li ayaya Loida xchiʼuk li ameʼ Eunisee, pe jnaʼoj lek ta melel ti oy xchʼunel avoʼonton eke.

6 Jech oxal, ta jvules ta ajol ti ta sjunuluk avoʼonton xatunes li matanal yakʼoj Dios ti la ata kʼalal laj kakʼ jkʼob ta atojolale.+ 7 Yuʼun li Diose maʼuk chakʼbutik chʼul espiritu sventa xiʼel,+ moʼoj, yuʼun chakʼ juʼelal,+ kʼanelal xchiʼuk lekil nopbenal. 8 Jech oxal, mu me xakʼexav ta xcholbel skʼoplal li Kajvaltike+ mi jaʼuk xakʼexav ta jtojolal ek ti jchukelun ta skoje; jaʼ lek tsʼiko avokol ta skoj ti chakontrainat+ ta sventa li lekil aʼyejetike, pe pato avoʼonton ta sjuʼel Dios kʼalal jech chkʼot ta atojolale.+ 9 Jaʼ la skoltautik xchiʼuk la stakutik ta ikʼel sventa chʼul xijkʼot,+ pe maʼuk ta skoj kabteltik, jaʼ ta skoj li kʼusi tskʼan tspas stuke xchiʼuk jaʼ ta skoj li slekil yutsil yoʼontone.+ Voʼne xa onoʼox tajek akʼbilutik ta stojolal li Kristo Jesuse, 10 pe li avie jamal xa lek xvinaj ta skoj ti chakʼ sba ta ilel li Jkoltavanej kuʼuntike, li Kristo Jesuse,+ ti la slajesbe skʼoplal li lajelale+ xchiʼuk laj yakʼ jnaʼtik ta skoj lekil aʼyejetik+ kʼuxi xuʼ jtatik li kuxlejal+ xchiʼuk li bekʼtalil ti mu snaʼ xkʼaʼe.+ 11 Li kʼusitik taje jaʼ ta sventa ti laj kichʼ vaʼanel ta jcholmantal, ta jtakbol xchiʼuk ta jchanubtasvaneje.+

12 Jaʼ ta skoj xtok ti yakal chkil li vokoliletike,+ pe muʼyuk bu chikʼexav.+ Yuʼun xkojtikin li buchʼu kakʼoj xchʼunel koʼonton ta stojolale xchiʼuk jpatoj koʼonton ti chchabi li kʼusi kakʼojbe ta skʼob jaʼ to mi sta li skʼakʼalil taje.+ 13 Mu me xchʼay xavaʼi ti kʼu yelan* li lekil chanubtasel laj kalbot+ ta sventa li kʼanelal xchiʼuk li xchʼunel oʼontonal ta jtatik ta stojolal Kristo Jesuse. 14 Chabio me lek li lekil kʼulejal akʼbil abain ti jaʼ tskoltaot li chʼul espiritu ti oy ta jtojolaltike.+

15 Yuʼun anaʼoj liʼe, ti xchʼakoj sbaik lokʼel ta jtojolal skotol li krixchanoetik ta yosilal Asiae.+ Jech spasoj ek li Fijelo xchiʼuk Ermojenese. 16 Oyuk xkʼuxul yoʼonton Kajvaltik ta stojolal li buchʼutik te oy ta sna Onesiforoe,+ yuʼun nopajtik noʼox laj yakʼbun siketel koʼonton xchiʼuk muʼyuk bu xkʼexav ta skoj ti chukulune. 17 Moʼoj, kʼajomal laj yakʼ ta yoʼonton tsaʼun kʼalal ay ta Romae, vaʼun la staun. 18 Akʼo kʼuxubinatuk yuʼun Kajvaltik Jeova* mi sta skʼakʼalile. Yuʼun anaʼoj lek skotol li kʼusitik la spas ta Efesoe.

2 Jaʼ yuʼun, kuni nichʼon,+ saʼilano batel atsatsal ta stojolal slekil yutsil oʼontonal ti te oy ta stojolal Kristo Jesuse, 2 jech xtok, li kʼusitik laj avaʼi ta jtojolal ti jech chalik ek li epal testigoetike+ kʼubanbo tukʼil viniketik, vaʼun jaʼ jech lek chapalik sventa xchanubtasik batel li yantike. 3 Ta skoj ti lekil yajsoltaroot+ Kristo Jesuse, kuchuk me avuʼun li vokolile.+ 4 Skotol li buchʼu chtun ta soltaroe muʼyuk tstikʼ sba* ta pʼolmajel* sventa kuxlejal yoʼ lek x-ilat yuʼun li buchʼu chapanat ta soltaroale. 5 Jech xtok, manchuk mi ta tajimol, muʼyuk chichʼ skorona li buchʼu tstikʼ sba ta tsalbail ta tajimol mi muʼyuk bu tstsak ta mukʼ li smantalil tajimole.+ 6 Kʼalal tsots ch-abtej li jlok-osile, jaʼ baʼyel tslajes li kʼusi tsatine. 7 Nopilano li kʼusi yakal chkale, vaʼun chakʼbot avaʼibe smelolal skotol li Kajvaltike.

8 Vuleso me ta ajol ti laj yichʼ chaʼkuxesel li Jesukristoe+ xchiʼuk ti jaʼ snitilulal David+ echʼ jech kʼuchaʼal chal li lekil aʼyejetik yakal ta jchole,+ 9 ti jaʼ yakal chkil-o jvokol xchiʼuk ti tikʼilun ta chukel jech kʼuchaʼal jun jpaschoplejale.+ Akʼo mi jech, muʼyuk bu chukul ta kadena li skʼop Diose.+ 10 Jaʼ ta skoj ti ta jtsʼik skotol li kʼusitike sventa staik pojelal ta stojolal Kristo Jesus ek li buchʼutik tʼujbile+ xchiʼuk ti staik mukʼulal sbatel osile. 11 Xuʼ jpat koʼontontik ta sventa li kʼop liʼe: ta melel, mi jmoj chijchame, jmoj chijkuxi xtok;+ 12 mi jech-o chkuch kuʼuntike, jmoj chij-ajvalilaj;+ mi ta jmukbetik skʼoplale, tsmuk jkʼoplaltik ek;+ 13 mi muʼyuk tukʼutik li voʼotike, jech-o tukʼ li stuke, yuʼun mu stakʼ smuk li skʼoplal stuke.

14 Jech-o xavulesbe ta sjolik li kʼusitik taje, chanubtasano ta sat Dios sventa mu xut sbaik ta skoj li kʼusitik chalik ti chʼabal jutebuk sbalile, yuʼun jaʼ noʼox chakʼbe svokol* li buchʼutik chaʼie. 15 Paso skotol ti kʼu yepal xuʼ avuʼun sventa lek chilot li Diose, j-abtelukot ti muʼyuk kʼusi chakʼexav-oe, ti lek tajek xanaʼ stunesel li kʼop ti jaʼ melele.+ 16 Pʼajo me li kʼusitik chalik ti muʼyuk sbalil ti jaʼ noʼox tsokes li kʼusitik chʼule;+ yuʼun li kʼopetik taje tsujvan tajek ta spasel mas li kʼusitik muʼyuk leke. 17 Li kʼusitik chalike ch-epaj batel kʼuchaʼal yayijemal ti chkʼaʼ batel yuʼun jbekʼtaltike. Te tsakal skʼoplal Imeneo xchiʼuk Fileto+ 18 ti namajemik ta stojolal li kʼusi melele, chalik ti kʼotem xa ta pasel li chaʼkuxesele;+ jech xtok, yakal tslajesbeik xchʼunel yoʼonton li yantike. 19 Akʼo mi jech, lek vaʼal chkom li snakleb Dios ti lek tsotse xchiʼuk xi chal li seyoale: «Li Jeovae* xojtikin li buchʼutik jaʼ yuʼune»,+ xi chal xtoke: «Skʼan xiktaik kʼusitik muʼyuk tukʼ skotol li buchʼutik spatoj yoʼontonik ta sbi Jeovae».*+

20 Jech xtok, maʼuk noʼox oy kʼusitik* pasbil ta oro xchiʼuk ta plata li ta jpʼej mukʼta nae, oy pasbil ta teʼ xtok xchiʼuk ta achʼel, jlome lek stu, pe li junantike muʼyuk stu. 21 Jech oxal, mi oy buchʼu chchʼak sba lokʼel ta stojolal li kʼusitik muʼyuk stue, jaʼ jech chkʼot kʼuchaʼal li kʼusi* lek stue, chʼultajesbil, jtunel ta stojolal yajval, chapal sventa skotol lekil abtelal. 22 Jaʼ yuʼun, jatavan lokʼel ta stojolal li kʼusi stalel tskʼan yoʼonton kerem tsebetike, jaʼ saʼo batel li tukʼilale, li xchʼunel oʼontonale, li kʼanelale, li jun oʼontonale, jmoj xasaʼ xchiʼuk li buchʼutik sak yoʼontonik tskʼoponik Kajvaltike.

23 Jech xtok, pʼajo me li kʼusitik chut-o sbaik ti muʼyuk stu+ xchiʼuk ti muʼyuk smelolale, yuʼun anaʼoj ti jaʼ noʼox tslikes kʼope. 24 Yuʼun mu persauk skʼan slikes kʼop li smoso Kajvaltike, skʼan lek noʼox yoʼonton ta stojolal skotol krixchanoetik,+ xtojobuk lek ta chanubtasvanej, skʼan spajes sba kʼalal oy kʼusi chopol tspasbate,+ 25 oyuk smalael yuʼun kʼalal chchanubtas li buchʼutik mu skʼan xchʼamik li chanubtasele;+ yuʼun xuʼ van xjelbat snopbenik* yuʼun Dios sventa xojtikinik lek li kʼusi melele+ 26 xchiʼuk akʼo svules xchʼulelik xchiʼuk jatavikuk lokʼel li ta spetsʼ Diabloe, yuʼun kuxul tsakatik lokʼel sventa spasbeik li kʼusi tskʼan yoʼontone.+

3 Naʼo me ti chtal tsots vokolil li ta slajebal xa kʼakʼale,+ toj echʼ noʼox xibal sba. 2 Yuʼun tskʼan sba stuk li krixchanoetike, batem ta yoʼontonik takʼin, stuk noʼox lek chaʼi sbaik, jpʼel xalik, chchopol kʼoptavanik, mu xchʼunbe smantal stot smeʼik, mu kʼusi snaʼ stojik ta vokol, muʼyuk stukʼil yoʼontonik, 3 muʼyuk xa kʼanbail kʼuchaʼal stalel onoʼox jeche, mi jutebuk oy ta yoʼontonik tspas ta jmoj skʼopik, chchopol loʼiltavanik, mu snaʼ spajes sbaik, simaronik, muʼyuk skʼanojik li kʼusi leke, 4 j-akʼvanejetik ta kʼabal, pimik ta mantal, xtoyet xa tajek chaʼi sbaik, jaʼ skʼanojik li kʼusi kʼupil sba chaʼi stukike, jaʼ muʼyuk skʼanojik li Diose, 5 yichʼojik ta mukʼ Dios yilel, pe muʼyuk jech yakal tspasik;+ chʼako me aba ta stojolalik. 6 Yuʼun junantik li viniketik taje manya kʼu yelan ch-ochik ta na sventa chchukik antsetik ti kʼunik xchiʼuk ti ep smulik ti ch-ikʼatik batel ta skoj li jeltos kʼusi tskʼan yoʼontonike. 7 Jech-o yakal chchanik li antsetik taje, pe mi jaʼuk bu chojtikinik lek li kʼusi melele.

8 Vaʼun chaʼa, ti kʼu yelan la skontrainik Moises li Janes xchiʼuk Jambrese jaʼ jech yakal tskontrainik li kʼusi melel eke. Sokesbil ta bu noʼox kʼalal snopbenik li viniketik taje, muʼyuk lek ch-ilatik yuʼun Dios, yuʼun skontrainojik li xchʼunel oʼontonale. 9 Akʼo mi jech, muʼyuk xa ch-epaj batel li yabtelike, yuʼun lek xvinaj ta skotol krixchanoetik li xchuvajilik* jech kʼuchaʼal li xchuvajilik li chaʼvoʼ viniketik taje.+ 10 Pe li voʼote lek onoʼox atsʼaklioj talel li chanubtaseletik kuʼune, ti kʼu yelan likuxi tale,+ li kʼusi oy ta koʼonton staele, li xchʼunel koʼontone, li smalael kuʼune, li kʼanelal kuʼune, ti kuchem kuʼune, 11 ti laj kichʼ kontrainele xchiʼuk ti laj kil jvokol ta Antiokia,+ ta Ikonio+ xchiʼuk ta Listrae.+ Kuch kuʼun li kontrainele xchiʼuk la skoltaun Kajvaltik ta skotol li kʼusitik taje.+ 12 Skotol li buchʼutik tskʼan chichʼik ta mukʼ Dios ta sjunul yoʼontonik ta xkuxlejalike xchiʼuk ti tskʼan jmoj oyik xchiʼuk li Kristo Jesuse ta onoʼox xichʼik kontrainel ek.+ 13 Pe yantik sok batel li viniketik ti toj chopolike xchiʼuk li jloʼlavanej viniketike, yakal chloʼlavanik xchiʼuk yakal chichʼik loʼlael ek.+

14 Pe li voʼote jech-o me xapas batel li kʼusi la achane xchiʼuk ti kʼot ta avoʼonton ta xchʼunele,+ yuʼun anaʼoj li buchʼutik la achanbee, 15 ti ta abikʼtal+ onoʼox la achan talel li chʼul Tsʼibetik+ ti jaʼ tspʼijubtasot sventa xata akolebal ta skoj ti oy xchʼunel avoʼonton ta stojolal li Kristo Jesuse.+ 16 Laj yakʼ ta naʼel Dios skotol li Tsʼibetike+ xchiʼuk toj jtunel sventa chanubtasel,+ tukʼibtasel, beiltasel xchiʼuk tojobtasel jech kʼuchaʼal chal li stukʼil mantal Diose*+ 17 sventa lekuk chapal li yajtunel Diose xchiʼuk sventa xtojobuk spasel skotol li lekil abtelale.

4 Tsots mantal chkalbot ta stojolal Dios xchiʼuk ta stojolal Kristo Jesus ti jaʼ li buchʼu chchapan+ li buchʼutik kuxul xchiʼuk li buchʼutik chamem+ mi laj yakʼ sba ta ilel+ kʼuchaʼal Ajvalil li ta Ajvalilal* yuʼune:+ 2 cholo li skʼop Diose,+ akʼo me ta avoʼonton spasel ta anil kʼalal muʼyuk vokolile xchiʼuk kʼalal oy vokolile, tukʼibtasvanan,+ beiltasvanan xchiʼuk alo mantal. Kʼalal jech chapase, oyuk me smalael avuʼun xchiʼuk tojoban me lek ta chanubtasvanej.+ 3 Yuʼun chkʼot skʼakʼalil ti mu skʼan xchikintaik li lekil chanubtasele,+ yuʼun ta skoj li kʼusi tskʼan yoʼonton stukike, kʼajomal noʼox chbat xchiʼinik li jchanubtasvanejetik ti lek chaʼi chchikintabeik li kʼusi lek chaʼi stukike.+ 4 Jech xtok, chchʼak sbaik lokʼel ta xchikintael li kʼusi melele xchiʼuk jaʼ chchikintaik li jecheʼ loʼiletike. 5 Pe li voʼote teuk me achʼulel ta skotol kʼusitik, kuchuk me avuʼun vokolil,+ abtejan batel li ta xcholel lekil aʼyeje, lek me tsʼakal xapas batel li avabtele.+

6 Yuʼun ta melel yakal chkichʼ malel jech kʼuchaʼal matanal vino+ xchiʼuk poʼot xa tajek sta yorail li jkolebale.+ 7 Jpasoj lekil paskʼop,+ tsutsem xa kuʼun li anilajele,+ tsots-o li xchʼunel koʼontone. 8 Liʼ ta ora xchiʼuk ta jelavele, te xa kʼejbil* li jkorona ti jaʼ sventa li buchʼutik tukʼike,+ ti jaʼ chakʼbun li Kajvaltik ti jaʼ li tukʼil jchapanvaneje,+ chakʼbun ta jmoton li vaʼ kʼakʼale;+ pe maʼuk noʼox voʼon, chakʼbe ek li buchʼutik oy onoʼox ta yoʼontonik ti akʼo yakʼ sba ta ilel li Kajvaltike.

9 Akʼo me persa ti xtal noʼox akʼelune. 10 Yuʼun laj yiktaun komel li Demas+ ta skoj ti jaʼ la skʼan skotol li kʼusitik oy ta balumil avie,* bat ta Tesalonika; li Kresentee bat ta Galasia; li Titoe bat ta Dalmasia. 11 Jaʼ xa noʼox Lukas liʼ xchiʼinojune. Ikʼo talel li Markose, yuʼun jtunel kuʼun ta sventa li abtelale. 12 Yan li Tikikoe+ la jtak batel ta Efeso. 13 Mi latale, ichʼo me talel li natil kʼuʼil laj kiktabe Karpo te ta Troase xchiʼuk ichʼo talel li balbalvunetike, pe jaʼ mas tsots skʼoplal li tsʼibabil nukuletike.

14 Ep tajek kʼusi chopol la spasbun li Alejandro ti chabtelan kovree. Jaʼ chtojbat yuʼun Jeova* ta skoj li kʼusitik la spase.+ 15 Skʼan me xakʼel aba ta stojolal ek, yuʼun tsots tajek la skontrain li kʼusi laj kalkutike.

16 Muʼyuk buchʼu tal skoltaun kʼalal la jpak jkʼoplal ta sba veltae, yuʼun laj yiktaikun komel skotolik. Jaʼ noʼox mu me xkʼelbat smulik yuʼun li Diose. 17 Pe te onoʼox oy ta jtsʼel li Kajvaltike xchiʼuk laj yakʼbun kipal, la stunesun sventa lek tsʼakal xichʼ cholel mantal xchiʼuk ti akʼo yaʼiik skotol li jyanlumetike;+ jech xtok, laj kichʼ koltael lokʼel ta ye leon.+ 18 Jaʼ tskoltaun Kajvaltik ta skotol li kʼusitik toj chopole xchiʼuk jaʼ tspojun sventa xikʼun batel li ta Ajvalilal yuʼun ta vinajele.+ Jaʼuk noʼox stuk akʼo yichʼ ichʼel-o ta mukʼ sbatel osil. Jechuk.

19 Chabanuk xavalbe li Priska,* Akila+ xchiʼuk li buchʼutik te oy ta sna Onesiforoe.+

20 Te kom ta Korinto li Erastoe,+ yan li Trofimoe+ ip kom kuʼun ta Mileto. 21 Akʼo me persa sventa xavul noʼox kʼalal skʼan to inviernoe.*

Chabanukot la chal li Eubuloe, jaʼ jech chalik ek li Pudente, Lino, Klaudia xchiʼuk skotol li ermanoetike.

22 Teuk me oy Kajvaltik ta atojolal ta skoj ti baxbolote. Teuk me oy ta atojolalik li slekil yutsil yoʼontone.