SVENTA TITO

1 Voʼon Pabloun, smosoun Dios xchiʼuk yajtakbolun Jesukristo. Li xchʼunel koʼontone jaʼ jech kʼuchaʼal li xchʼunel yoʼontonik li buchʼutik tʼujbil yuʼun Diose, li xchʼunel koʼontone jaʼ koliyal ti laj kojtikin li melel yojtikinobile ti jaʼ chal kʼu yelan skʼan ichʼel ta mukʼ li Diose. 2 Li spatobil oʼontonal ta sventa li kuxlejal sbatel osile+ jaʼ snakleb skotol li kʼusitik taje ti voʼne xa onoʼox yalojbe skʼoplal Dios ti mu snaʼ sjut kʼope,*+ 3 pe kʼalal kʼot yoraile, laj yakʼ ta ojtikinel skʼop ta skoj ti la jchol mantal ti jech laj kichʼ kʼubanbel+ jech kʼuchaʼal chal smantal li Jkoltavanej kuʼuntike, li Diose; 4 jaʼ sventa Tito ti jaʼ melel nichʼonil ti jech xchʼunel yoʼonton jech kʼuchaʼal xchʼunel koʼontontike:

Oyuk slekil yutsil oʼontonal xchiʼuk jun oʼontonal ta atojolal ti jaʼ chakʼ li Jtotik Diose xchiʼuk li Kristo Jesus ti jaʼ Jkoltavanej kuʼuntike.

5 Laj kiktaot ta Kreta sventa xatukʼibtas li kʼusitik muʼyuk leke* xchiʼuk sventa xavaʼan moletik ta jujun jteklum jech kʼuchaʼal la jchanubtasote: 6 xuʼ xichʼ vaʼanel ta mol mi muʼyuk tikʼbil smule, mi jun noʼox yajnile, mi jchʼunolajeletik xnichʼnab xchiʼuk mi muʼyuk pakʼtabilik ta skoj li kʼusi muʼyuk smelolale xchiʼuk mi maʼuk jtoybailetike.+ 7 Skʼan muʼyukuk tikʼbil smul jech kʼuchaʼal jun smoso Dios li jun jkʼelvaneje, ti maʼukuk jtoybae,+ ti mu aniluk xa ch-iline,+ ti maʼukuk jyakubele, ti maʼukuk jpaskʼope,* ti maʼukuk me ti tskʼan tajek tspas kanal takʼin ta loʼlavaneje, 8 moʼoj, skʼan lekuk xchʼamvan,+ skʼanojuk li kʼusi leke, oyuk lek xchʼulel,*+ oyuk stukʼil, tukʼuk xakʼ sba,+ snaʼuk spajesel sba,+ 9 skʼan lek snapʼan sba ta stojolal li tukʼil kʼop* ti kʼu yelan chchanubtasvane+ yoʼ spatbe yoʼonton* yantik ta sventa li lekil chanubtasele+ xchiʼuk sventa stukʼibtas+ li buchʼutik skontrainojik li lekil chanubtaseletike.

10 Yuʼun oy ep viniketik ti jtoybaetike, muʼyuk sbalil li kʼusi chalike xchiʼuk jloʼlavanejetik, pe jaʼ mas to jechik li buchʼutik tsots skʼoplal chaʼiik li sirkunsisione.*+ 11 Skʼan makbel yeik li viniketik taje, yuʼun yakal tslajesik sjunul utsʼ alaliletik ta skoj ti yakal-o chchanubtasvanik ta sventa li kʼusi mu jechuk ta pasele, yuʼun tskʼan tspasik kanal takʼin ta loʼlavanej. 12 Pe oy jun j-alkʼop yuʼunik ti xi laj yale: «Jutkʼopetik* onoʼox li jkretaetike, jtiʼvanej chonbolometik ti chakʼik vokolile, chʼajil krixchanoetik ti toj echʼ noʼox xveʼike».

13 Jaʼ melel li kʼusi laj yichʼ alele. Jaʼ yuʼun, tsots xatukʼibtasvan-o batel yoʼ lekuk-o tsots li xchʼunel yoʼontonike 14 sventa mu xchikintaik li jecheʼ loʼil yuʼun judaetike xchiʼuk li smantal viniketik ti tspʼajik li kʼusi melele. 15 Sak chil skotol kʼusitik li buchʼutik sakike.+ Pe mi jsetʼuk* oy kʼusi sak chil li buchʼutik chopol stalelike xchiʼuk li buchʼutik chʼabal xchʼunel yoʼontonike, yuʼun ikʼ snopbenik xchiʼuk ikʼ sjol yoʼontonik.+ 16 Chalik ta jamal ta stojolal krixchanoetik ti xojtikinik Diose, pe tspʼajik ta skoj li yabtelike,+ yuʼun ibal sbaik,* mu xchʼunik mantal xchiʼuk mu staik-o ti spasik jtosuk lekil abtelale.

2 Li voʼote jech-o me xaval batel jech kʼuchaʼal chal li lekil chanubtasele.+ 2 Oyuk noʼox me spʼisol li kʼusi nopem xaʼiik spasel li moletike, yijuk snopbenik, oyuk lek xchʼulelik, lekuk xchʼunel yoʼontonik, lekuk xkʼanvanik xchiʼuk kuchuk yuʼunik. 3 Jech xtok, chʼuluk me stalelal li antsetik ti oy xa sjabilalike, skʼan mu saʼik mulil, mu me mosoinbilikuk yuʼun epal vino, jchanubtasvanejikuk ta sventa li kʼusi leke 4 sventa xuʼ stojobtasik* li tsebal antsetik ti skʼan li smalalike, li yalabike, 5 ti oyuk lek xchʼulelike, ti lekuk stalelalike, ti j-abtel antsetikuk ta snaike,* ti lekikuke, ti xakʼ sbaik ta ventainel yuʼun smalalik+ sventa mu xichʼ chopol kʼoptael li skʼop Diose.

6 Jech xtok, jech-o me xavalbe mantal li kerem viniketik ti oyuk lek xchʼulelike.+ 7 Lekuk me ta chanel atalelal, jechuk me xapas ta kʼusiuk noʼox abtelal ti toj leke. Yijuk me anopben xavakʼ ta chanel li kʼusi sake,*+ 8 lekuk me akʼopojel sventa mu xichʼ chopol kʼoptael+ sventa staik kʼexlal li buchʼutik chkontrainvanik kʼalal muʼyuk kʼusi chopol tstaik ta jtojolaltike.+ 9 Skʼan me xchʼunbeik skotol smantal yajvalik li mosoiletike,+ akʼo yakʼik persa spasel kʼusi lek chil li yajvalike, mu me takʼbiluk noʼox xutik li kʼusi ch-albatike, 10 mu me kʼusi xelkʼanbeik li yajvalike,+ akʼo yakʼik ta ilel ti stakʼ spat yoʼonton yuʼunike sventa masuk to kʼupil sba xkʼot yuʼunik* li chanubtasel yuʼun li Jkoltavanej kuʼuntike, li Diose.+

11 Yuʼun laj xa yichʼ akʼel ta ilel li slekil yutsil yoʼonton Dios kʼalal laj yakʼbe skolebal skotol li krixchanoetike.+ 12 Chchanubtasutik ta spʼajel li kʼusi chopole xchiʼuk li kʼusitik tskʼan koʼontontik ta balumile,+ ti oyuk lek jchʼuleltik xijkuxie, ti tukʼutikuke xchiʼuk ti lekuk xkichʼtik ta mukʼ Dios yoʼ to liʼ kuxulutik li avi kʼakʼale,+ 13 yoʼ to ta jmalatik li jun yutsil spatobil koʼontontike+ xchiʼuk ti jmalatik ti jun yutsil chlik vinajuk li mukʼul Diose xchiʼuk li Jkoltavanej kuʼuntik ti jaʼ li Jesukristo 14 ti laj yakʼ sba stuk ta jtojolaltik+ sventa skoltautik lokʼel*+ ta skotol li pas choplejale xchiʼuk la sakubtas stuk jun jteklum sventa xuʼunin ti stuk noʼox jeche, ti oy tajek ta yoʼonton li kʼusi toj leke.+

15 Jech-o me xaval batel li kʼusitik taje, alo mantal,* tukʼibtasvanan ta skoj ti la-akʼbat avabtel sventa chapas mantale.+ Mu me buchʼu spʼajot.

3 Jech-o me xavulesbe ta sjolik ti akʼo yakʼ sbaik ta ventainel xchiʼuk ti akʼo xchʼunbeik smantal ajvaliletik xchiʼuk li buchʼutik oy yabtelike,+ chapalikuk me ta spasel skotol lekil abtelal, 2 mu me chopoluk xkʼopojik ta stojolal yantik, mu me ta aniluk x-ilinik, xtojobikuk lek snopel+ xchiʼuk akʼo me yakʼik ta ilel lek ti manxo chakʼ sbaik ta stojolal skotol li krixchanoetike.+ 3 Yuʼun oy toʼox kʼuk sjalil ti bol krixchanoutik toʼox eke, mu toʼox jchʼuntik mantal, loʼlabilutik toʼox, mosoinbilutik toʼox yuʼun li kʼusi tskʼan koʼontontik xchiʼuk li kʼusi kʼupil chkaʼitike, jaʼ toʼox kuxulutik ta spasel li choplejale xchiʼuk li pichʼ oʼontonale, jtatik-o ti pʼajbilutik toʼoxe xchiʼuk ta jpʼaj toʼox jbatik ta jujuntal.

4 Akʼo mi jech, kʼalal laj yichʼ akʼel ta ojtikinel li slekil yoʼonton xchiʼuk li kʼanelal yuʼun ta stojolal krixchanoetik li Jkoltavanej Dios kuʼuntike,+ 5 la skoltautik (pe maʼuk ta skoj ti la jpastik jtosuk tukʼil abtelale,+ moʼoj, jaʼ ta skoj li kʼuxubinel yuʼune)+ ta skoj li atintasel ti jaʼ lijkuxi yuʼune+ xchiʼuk kʼalal la spasutik ta achʼ kʼalal la stunes li chʼul espiritue.+ 6 Ep tajek* la smal chʼul espiritu ta jtojolaltik li Dios ti jaʼ la stunes Jesukristo ti jaʼ Jkoltavanej kuʼuntike,+ 7 vaʼun mi laj xa ox kichʼtik albel ti tukʼ jkʼoplaltik ta sventa li slekil yutsil yoʼonton Diose,+ ta jrextointik*+ ek li kuxlejal sbatel osil jmalaojtike.+

8 Tukʼ li kʼusitik laj yichʼ alele xchiʼuk oy ta koʼonton ti jechuk-o me tsots xaval batele sventa jech-o xakʼ ta yoʼontonik spasel li abtelal ti toj leke ti jaʼ tspasik li buchʼutik xchʼunojik xa Diose. Lek tajek li kʼusitik taje xchiʼuk toj jtunel yuʼun li krixchanoetike.

9 Pe mu me xatikʼ aba ta jecheʼ loʼiletik, li yalbel skʼoplal nitilulale, li vulajetele xchiʼuk li saʼkʼop sventa Mantale, yuʼun muʼyuk kʼusi xtun-o xchiʼuk chʼabal sbalil.+ 10 Pʼajo+ me li vinik ti tspuk batel jecheʼ chanubtasel+ mi laj xa ox yichʼ albel chaʼkojuk mantale;*+ 11 yuʼun anaʼoj ti kʼejpʼujem* xa ta be li vinik taje, yakal tsaʼ smul xchiʼuk chakʼbe sba stoj smul stuk.

12 Mi laj xa ox jtakbot talel li Artemas o mi jaʼ li Tikikoe,+ akʼo me persa sventa xtal akʼelun ta Nikopolis, yuʼun jaʼ te jnopoj ch-echʼ kuʼun li inviernoe.* 13 Akʼo me persa ti xavakʼbe skotol li kʼusitik chtun yuʼunik sventa sbeik li Senas ti lek chanem ta Mantale xchiʼuk li Apolose.+ 14 Li jchiʼiltaktik ta chʼunolajele akʼo me xchanik spasel li abtelal ti toj leke sventa sta li kʼusi tsots skʼoplal chtun yuʼunike,+ sventa lekuk xakʼ sat li yabtelike.+

15 Chabanukoxuk la chal skotolik li buchʼutik liʼ jchiʼuke. Chabanuk xavalbe li buchʼutik skʼanojunkutik ti jaʼik jchʼunolajeletike.

Teuk oy li slekil yutsil oʼontonal ta atojolalike.