BAʼYEL SKARTA PEDRO

1 Voʼon Pedroun, yajtakbolun+ Jesukristo, jaʼ aventaik voʼoxuk ti j-echʼelbeoxuke xchiʼuk ti pukemoxuk ta yosilal Ponto, Galasia, Kapadosia,+ Asia xchiʼuk ta Bitinia ti tʼujbiloxuk yuʼun Diose. 2 Jaʼ li Totil ta vinajel ti la stʼujoxuk ta skoj li kʼusi oy ta yoʼonton tspase+ xchiʼuk ti la xchʼultajesoxuk ta xchʼul espiritu+ ti jaʼ sventa xachʼunik mantal xchiʼuk xavichʼik vijbel li xchʼichʼel Jesukristoe:+

Akʼo epajuk slekil yutsil oʼontonal xchiʼuk jun oʼontonal ta atojolalik.

3 Kʼupil kʼoptabiluk li Dios ti jaʼ Stot li Kajvaltik Jesukristoe, yuʼun ta skoj ti xkʼuxubinojutik tajeke, laj yakʼ vokʼkutik ta achʼ+ sventa jtatik li kuxul spatobil koʼontontik+ ta skoj ti chaʼkuxi li Jesukristoe,+ 4 yoʼ jrextointik* li kʼusi mu snaʼ xkʼaʼe, ti mu x-ikʼube xchiʼuk ti mu snaʼ xtakije.+ Te kʼejbil* ta vinajel sventa xavuʼuninik+ 5 voʼoxuk ti lek chabibiloxuk ta sjuʼel Dios ta skoj ti oy xchʼunel avoʼontonik yoʼ xataik li kolebal ti lek xa chapal ti chichʼ akʼel ta ilel li ta slajebal xa yoraile. 6 Jaʼ yuʼun, xkuxet tajek avoʼontonik manchuk mi oy to van kʼuk sjalil chavil avokolik ta skoj ep ta tos preva.+ 7 Yuʼun mi laj xa ox yichʼ akʼel ta preva li xchʼunel avoʼontonik+ ti mas ep sbalil kʼuchaʼal li oro ti snaʼ xlaj manchuk mi laj yichʼ pasel ta preva* ta kʼokʼe, jaʼ sventa xavichʼik-o kʼupil kʼoptael, xavichʼik-o albel amukʼulalik xchiʼuk xavichʼik-o ichʼel ta mukʼ kʼalal tsta yorail chichʼ akʼel ta ilel li Jesukristoe.+ 8 Akʼanojik manchuk mi muʼyuk bu laj avilik. Avakʼoj xchʼunel avoʼontonik ta stojolal manchuk mi muʼyuk te akʼelojik, jech xtok, xkuxet tajek avoʼontonik ti mu xa xanaʼ kʼusi chavalik ta skoj ti xamuyubajik tajeke, 9 yuʼun lek achʼunojik ti chakolik ta skoj ti oy xchʼunel avoʼontonike.+

10 Ta sventa li kolebal taje, li j-alkʼopetik ti laj xa onoʼox yalbeik skʼoplal li slekil yutsil oʼontonal ti voʼoxuk onoʼox chavichʼik skʼoplale la sjakʼbeik tajek smelolal xchiʼuk la sabeik tajek lek skʼoplal.+ 11 Jech-o la sabeik skʼoplal bakʼin o kʼusi ora chkʼot ta pasel ta stojolal Kristo+ li kʼusi laj yal chʼul espiritu ti te oy ta stojolalike, yuʼun li chʼul espiritue laj xa onoʼox yalbe skʼoplal li vokoliletik tsnuptan Kristoe+ xchiʼuk ti chichʼ smukʼulal ta jelavele. 12 Li stukike akʼbat snaʼik ti maʼuk noʼox tunik ta sventa slekilal stukike, moʼoj, yuʼun jaʼ sventa alekilalik, li kʼusitik taje jaʼ li kʼusi laj xa yakʼboxuk anaʼik li buchʼutik laj yalboxuk li lekil aʼyejetik ti koltabilik yuʼun li chʼul espiritu ti takbil tal ta vinajele.+ Oy tajek ta yoʼontonik tskʼan tsnaʼik anjeletik skotol taje.

13 Jaʼ yuʼun, tsatsubtaso anopbenik sventa xapasik tsatsal abtelal;+ tojobanik-o lek snopel;+ pato lek avoʼontonik ta slekil yutsil oʼontonal ti jaʼ li kʼusi chavichʼik akʼbel kʼalal chichʼ akʼel ta ilel li Jesukristoe. 14 Ta skoj ti jchʼunej mantal alab nichʼnabiloxuke, mu xa me jechuk xapasik jech kʼuchaʼal tskʼan avoʼontonik kʼalal mu toʼox xavojtikinik Diose, 15 ti kʼusi mas leke jaʼ ti lekuk chʼul skotol atalelalik+ jech kʼuchaʼal ti chʼul li Buchʼu la stakoxuk ta ikʼele, 16 yuʼun xi tsʼibabile: «Skʼan me chʼulukoxuk, yuʼun chʼulun li voʼone».+

17 Mi chataik ta kʼoponel li Totil ti mu tʼujbiluk noʼox yajval chchapan+ ti kʼu yelan yabtel la spasik ta jujuntale, xiʼanik*+ me ta stojolal ti kʼu sjalil j-echʼelbeoxuke. 18 Yuʼun anaʼojik ti kʼalal laj avichʼik koltael lokʼel*+ ta stojolal li kʼusi muʼyuk sbalil ta akuxlejalik ti laj yiktaboxuk komel li amoltotakike,* maʼuk la skoltaoxuk lokʼel li kʼusitik snaʼ xkʼaʼe, li platae o li oroe. 19 Moʼoj, jaʼ la skoltaoxuk lokʼel li chʼichʼ ti toj ep sbalile,+ jech kʼuchaʼal xchʼichʼel chʼiom chij ti chʼabal spaltail xchiʼuk ti chʼabal xchopolale+ ti jaʼ xchʼichʼel li Kristoe.+ 20 Jaʼ melel ti laj xa onoʼox yichʼ tʼujel kʼalal muʼyuk toʼox likem tal stsʼunbal li krixchanoetike,+ pe laj yichʼ akʼel ta ilel ta aventaik li ta slajebal xa kʼakʼal liʼe.+ 21 Jaʼ ta stojolal ti jchʼunolajeloxuk ta stojolal Diose+ ti jaʼ li buchʼu la xchaʼkuxes+ xchiʼuk laj yakʼbe smukʼulale+ sventa teuk ta stojolal Dios li xchʼunel avoʼontonik xchiʼuk li spatobil avoʼontonike.

22 Avi ti laj xa asakubtas akuxlejalik* ta skoj ti la achʼunik li kʼusi melel ta sventa ti chakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼel ti muʼyuk tsloʼla sbaike,+ ta sjunuluk me avoʼonton xakʼan abaik tajek ta jujuntal.+ 23 Yuʼun laj yakʼ vokʼanik ta achʼ,+ pe maʼuk te lavokʼik tal li ta bekʼ tsʼunobil ti snaʼ xkʼaʼe,+ moʼoj, jaʼ te lavokʼik tal li ta bekʼ tsʼunobil ti mu snaʼ xkʼaʼe* ti jaʼ ta sventa li skʼop kuxul Dios ti te oy-oe.+ 24 Yuʼun «jechik kʼuchaʼal tsʼiʼlel skotol li krixchanoetike xchiʼuk xkoʼolaj kʼuchaʼal nichim ta osiltik li yutsil spat xokonike; mi takij li tsʼiʼlele, chlilij li xniche, 25 pe jaʼuk li kʼusi yaloj* Jeovae* te oy-o sbatel osil».+ Li «kʼusi yaloj»* taje jaʼ li lekil aʼyejetik ti laj avichʼik albele.+

2 Jech oxal, iktaik skotol li achoplejalike,+ ti chaloʼlavanike, ti chamakik satile, ti xpichʼet avoʼontonike xchiʼuk skotol li kʼusi chopol chavalik ta mukule. 2 Jech kʼuchaʼal li jun jvokʼel olole,+ jechuk me oy tajek ta avoʼontonik skʼanel li yaʼlel chuʼil sventa xachʼiik yoʼ xata akolebalike.+ Li skʼop Diose jaʼ jech kʼuchaʼal yaʼlel chuʼil ti muʼyuk kapbile, 3 yuʼun apasojik preva* ti toj lek yoʼonton li Kajvaltike.

4 Ti chanopajik batel ta stojolal li kuxul ton ti la spʼajik li krixchanoetike,+ pe ti tʼujbil xchiʼuk ti ep sbalil chil li Diose,+ 5 kʼotemoxuk xa ta kuxul ton, jaʼoxuk jpʼej na ti chichʼ vaʼanel ta chʼul espiritu+ sventa xakʼotik ta chʼul paleal yoʼ xavakʼik milbil matanaletik ta mantal+ ti chchʼam Dios ta stojolal Jesukristoe.+ 6 Yuʼun xi chal li Tsʼibetike: «¡Kʼelavilik!, ta xkakʼ ta Sion jpʼej tʼujbil ton, jpʼej ton ti ep sbalil ta chikin na sventa snaklebe, vaʼun muʼyuk me bu jecheʼ chakʼ sba ta loʼlael* li buchʼu chakʼ xchʼunel yoʼonton ta stojolale».+

7 Ta skoj ti jchʼunolajeloxuke, ep sbalil chavilik; yan li buchʼutik maʼuk jchʼunolajeletike mu jechuk chilik, yuʼun xi tsʼibabile: «Li ton ti la spʼajik li jvaʼanej naetike+ jaʼ li ton ta chikin na ti mas tsots skʼoplal kʼoteme»,+ 8 jech xtok, jaʼ «li ton ti tsmak* akanile xchiʼuk li ton ti chjipvan ta lume».+ Tsmak-o yakanik ta skoj ti mu xchʼunik li skʼop Diose. Jaʼ jech smalaoj chlajik. 9 Yan li voʼoxuke jaʼoxuk «jun tʼujbil nitilulal, paleoxuk ti chatunik kʼuchaʼal ajvaliletike, jaʼoxuk jun chʼul lum,+ chakʼotik ta jun jteklum ti jaʼ yuʼun Diose+ sventa xavalik batel ta buyuk noʼox li slekil talelaltak»*+ li buchʼu laj yikʼoxuk lokʼel ta ikʼal osil sventa xikʼoxuk batel li ta sakilal osil yuʼun ti toj labal sbae.+ 10 Yuʼun maʼukoxuk toʼox steklumal Dios li ta voʼnee, yan li avie steklumaloxuk xa Dios;+ muʼyuk toʼox xkʼuxul oʼontonal ta atojolalik li ta voʼnee, yan li avie laj xa ataik xkʼuxul oʼontonal.+

11 Voʼoxuk ti jkʼanojoxuke, ta jtijboxuk avoʼontonik kʼuchaʼal jyanlumoxuk xchiʼuk kʼuchaʼal j-echʼelbeoxuk+ ti akʼo jechuk-o xatsʼik abaik ta spasel li kʼusi tskʼan abekʼtalik+ ti tstsakoxuk ta kʼope.+ 12 Jechuk-o me lek tajek atalelalik ta stojolal jyanlumetik+ sventa xkʼotik ta testigo ti lek tajek avabtelik kʼalal chchopol kʼopojik ta atojolalike,+ vaʼun tstoybeik skʼoplal Dios kʼalal tsta yorail chtal kʼelvanuke.

13 Ta skoj Kajvaltik akʼo abaik ta ventainel ta stojolal li buchʼutik oy yabtelik ti vaʼanbilik yuʼun krixchanoetik+ jech kʼuchaʼal jun bankilal ajvalil+ ti tsots yabtele 14 o jaʼ li itsʼinal ajvaliletik ti takbilik yuʼun li bankilal ajvalil sventa xakʼbeik kastigo li jpaschoplejaletike xchiʼuk sventa skʼupil kʼoptaik li buchʼutik lek kʼusi tspasike.+ 15 Yuʼun jaʼ li kʼusi tskʼan yoʼonton Diose, kʼalal chichʼ pasel li kʼusi leke, jaʼ sventa stsʼiji yuʼunik* li buchʼutik mu snaʼik snopel ti bol kʼusi chalike.+ 16 Kolemuk me xavaʼi abaik,+ pe maʼuk me sventa xapak-o akʼoplalik yoʼ xapasik li kʼusi chopole,+ moʼoj, jaʼ lek tunanik ta smoso Dios.+ 17 Ichʼik me ta mukʼ buchʼuuk noʼox krixchanoal,+ kʼanik me skotol li avermanoik ta chʼunolajele,+ xiʼanik* me yuʼun li Diose+ xchiʼuk ichʼik me ta mukʼ li ajvalile.+

18 Ta xiʼeluk me lek akʼo yakʼ sbaik ta ventainel ta stojolal yajvalik li j-abteletike,+ maʼuk noʼox jech akʼo spasbeik li buchʼutik lek yoʼontonike xchiʼuk li buchʼutik snaʼik snopele, moʼoj, akʼo jech spasbeik xtok li buchʼutik chopol yoʼontonike. 19 Yuʼun lek ta kʼelel li buchʼu chkuch yuʼun vokolil xchiʼuk li buchʼu ta jech noʼox chil svokol ta skoj li sjol yoʼonton ta stojolal Diose.+ 20 ¿Mi oy van sbalil kʼalal chkuch avuʼunik majel ta skoj ti la asaʼ amulike?+ Pe mi kuch avuʼunik vokolil ta skoj ti chapasik li kʼusi leke, lek chil li Diose.+

21 Jaʼ yuʼun, latakatik ta ikʼel, yuʼun laj onoʼox yil svokol ta akojik ek li Kristoe,+ laj yakʼ avilik kʼusi skʼan pasel sventa xatsʼaklibeik batel lek li yav yoke.+ 22 Muʼyuk bu la saʼ smul li stuke+ mi jaʼuk bu loʼlavan ta skʼopojel.+ 23 Kʼalal yakal chchopol kʼopojik ta stojolale,+ muʼyuk bu lik chopol kʼoptavanuk ek.+ Muʼyuk bu sibtasvan ta spakel skʼoplal kʼalal yakal chil svokole,+ moʼoj, laj yakʼ sba ta ventainel ta stojolal li buchʼu tukʼ snaʼ xchapanvane.+ 24 Ta sbekʼtal stuk la xkuch batel jmultik+ ta jtel teʼ*+ sventa xlaj skʼoplal li jmultike xchiʼuk ti jaʼuk jpastik li kʼusi tukʼe. Jech xtok, «laj avichʼik poxtael ta skoj syayijemal».+ 25 Yuʼun chʼayemoxuk toʼox ta be kʼuchaʼal chijetik,+ pe li avie lasutik xa talel ta stojolal li jchabichij+ xchiʼuk ti jaʼ jkʼelvanej avuʼunike.

3 Jaʼ jechoxuk ek, ajnilaletik, ichʼik me ta mukʼ li amalalike+ sventa mi oy buchʼu mu xchʼunbeik smantal Diose, xuʼ spasatik ta kanal ta skoj li stalelal yajnilike akʼo mi muʼyuk kʼusi chichʼik albel jpʼeluk,+ 2 yuʼun chil ta satik ti sak atalelalik+ xchiʼuk ti lek cha-ichʼvanik ta mukʼe. 3 Mu me jaʼuk mas tsots skʼoplal xavaʼiik ti chameltsan abaike —ti kʼu yelan chapechʼ ajolike xchiʼuk ti chakʼupiltas abaik ta oro+ o ta lekil kʼuʼil pokʼile—, 4 moʼoj, jaʼuk me ta yut avoʼontonik ti chameltsan abaik ti mu snaʼ xkʼaʼe, ti chʼan xi xchiʼuk ti manxo atalelalike,+ yuʼun jaʼ toj ep sbalil ta sat li Diose. 5 Jaʼ jech la smeltsan sbaik li chʼul antsetik ta voʼne ti la spat yoʼontonik ta stojolal Diose, laj yichʼik ta mukʼ li smalalike, 6 jech kʼuchaʼal Sara ti la xchʼunbe smantal li Abraane, yuʼun «kajval» xi laj yalbe.+ Li voʼoxuke jaʼ stseboxuk li Sarae, jaʼ yuʼun jechuk-o xapasik li kʼusi leke xchiʼuk mu xavakʼ abaik ta sibtasel.+

7 Jaʼ jechoxuk ek, malaliletik, jechuk-o me junuk avoʼontonik xachiʼinik ta naklej li avajnilike, aʼibeik me lek smelolal ti kʼu yelan chaʼi sbaike. Ichʼik me ta mukʼ+ kʼuchaʼal jun vaso ti jaʼ mas kʼune, ti jaʼ li antse, yuʼun koʼol chavichʼik li matanal+ sventa kuxlejale sventa mu xmak ta be li a-orasionike.

8 Ta slajebe, koʼoluk me kʼusi chanop akotolik,+ koʼoluk me xavil avokolik, jechuk me xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele, kʼuxuk me ta avoʼonton xavaʼi abaik+ xchiʼuk bikʼit me xavakʼ abaik.+ 9 Mu me xapakbe abaik ta jujuntal li kʼusi chopole+ xchiʼuk mu me xachopol kʼopta abaik.+ Ti kʼusi mas leke akʼik noʼox bendision,+ yuʼun jaʼ sventa ti laj avichʼik-o takel ta ikʼele sventa xavuʼuninik li bendision eke.

10 Yuʼun «li buchʼu skʼanoj kuxlejal xchiʼuk ti xmuyubaj noʼox tskʼan chkuxie skʼan spajes yokʼ ta sventa li kʼusi chopole+ xchiʼuk skʼan spajes ye ta loʼlavanej. 11 Akʼo xchʼak sba lokʼel ta sventa li kʼusi chopole,+ jaʼuk spas li kʼusi leke;+ jaʼuk saʼ li jun oʼontonale xchiʼuk jaʼuk stsʼakli batel.+ 12 Yuʼun te yakʼoj sat Jeova* ta stojolal li buchʼutik tukʼike xchiʼuk chchikintabe kʼalal xvokoletike,+ pe kontra chil Jeova* li buchʼutik tspasik kʼusitik chopole».+

13 Ta melel, ¿buchʼu van chakʼ avokolik mi jaʼ oy ta avoʼontonik spasel li kʼusi leke?+ 14 Pe xamuyubajik noʼox akʼo mi chavil avokolik ta skoj li tukʼilale.+ Jaʼ noʼoxe mu me xaxiʼtaik li kʼusi chiʼtaike* mi jaʼuk xavul avoʼontonik.+ 15 Ti kʼusi noʼoxe chʼuluk xavaʼi ta avoʼontonik li Kristo ti jaʼ Kajvaltike, chapalukoxuk me skotol ora sventa xtakʼ avuʼunik kʼalal oy kʼusi tsjakʼboxuk ta sventa li spatobil avoʼontonike, pe manxoukoxuk+ me kʼalal jech chapasike xchiʼuk ichʼvananik me lek ta mukʼ.+

16 Lekuk-o me ajol avoʼontonik,+ yuʼun ti kʼusiuk noʼox chavichʼik-o chopol kʼoptaele, xuʼ xkʼexavik li buchʼutik tskontrainoxuk+ ta skoj ti toj lek atalelalik li yajtsʼaklomoxuk Kristoe.+ 17 Yuʼun mas lek mi chavil avokolik ta skoj ti jaʼ chapasik li kʼusi leke+ mi jech tskʼan yoʼonton Dios chkʼot ta pasele, jaʼ altik mi chavil avokolik ta skoj ti jaʼ chapasik li kʼusi chopole.+ 18 Yuʼun jun noʼox velta ta j-echʼel cham Kristo sventa xchʼay li muliletike,+ cham jun tukʼil vinik ta stojolal epal krixchanoetik ti muʼyuk tukʼike+ sventa sbeiltasoxuk batel ta stojolal Dios.+ Cham ta sbekʼtal,+ pe chaʼkuxesat yuʼun Dios ta vinajel.+ 19 Ti vaʼ yelane bat xcholbe mantal li kuxlejaletik ti mu xvinaj ta kʼelel ti tikʼilik ta chukele,+ 20 ti muʼyuk bu la xchʼunik mantal ta voʼne kʼalal jaʼo jun yoʼonton te stsʼikoj Dios tsmala li ta skʼakʼalil Noe+ kʼalal jaʼo yakal chichʼ meltsanel li arkae,+ li ta arkae jayvoʼ noʼox krixchanoetik kolik, jaʼ xkaltik, vaxakvoʼ noʼox kuxlejaletik* kolik li ta voʼe.+

21 Li kʼusi kʼot ta pasele jaʼ noʼox jun senyail li ichʼvoʼ ti jaʼ yakal chakolik-o avi (maʼuk tslokʼesbe yikʼobal li abekʼtalike, moʼoj, jaʼ ti chakʼanbeik Dios ti lekuk li ajol avoʼontonike)+ ta sventa ti chaʼkuxi li Jesukristoe. 22 Li stuke te oy ta sbatsʼikʼob Dios,+ yuʼun bat ta vinajel, jech xtok, laj yichʼ akʼbel ta yok skʼob li anjeletike, li buchʼutik oy yabtele xchiʼuk li buchʼutik oy sjuʼele.+

4 Ta skoj ti laj yil svokol ta sbekʼtal li Kristoe,+ li voʼoxuk eke chapano abaik sventa jechuk xanopik* jech kʼuchaʼal tsnop li Kristoe, yuʼun muʼyuk xa bu tspas mulil li buchʼu laj xa yil svokol ta sbekʼtale,+ 2 ti kʼu to sjalil chkuxi ta sventa li bekʼete maʼuk akʼo spas li kʼusi tskʼan yoʼonton krixchanoetike,+ jaʼuk akʼo spas li kʼusi tskʼan yoʼonton Diose.+ 3 Yuʼun lajuk xa yorail ti jaʼ chapasik li kʼusi tskʼan yoʼonton li jyanlumetike,+ ti jaʼ chapasik li talelal ti toj kʼexlal sbae,* li kʼusitik muʼyuk spajeb kʼusi tskʼan abekʼtalike, ti cha-uchʼbolajik ta mase, li kʼinetik ti solel muʼyuk xa smelolale, ti cha-uchʼbolajik sventa chatsal abaike xchiʼuk li yichʼel ta mukʼ santoetik ti mu stakʼ pasele.+ 4 Yuʼun li stukike mu xaʼibeik smelolal ti kʼu yuʼun muʼyuk xa chbat achiʼinik sventa xapasik li kʼusi tskʼan abekʼtalik ta sventa li chopol kuxlejale, jaʼ yuʼun chchopol kʼopojik ta atojolalik.+ 5 Pe li krixchanoetik taje chichʼik chapanel yuʼun li buchʼu chapal sventa chchapan li buchʼutik kuxulik xchiʼuk li buchʼutik chamemike.+ 6 Jaʼ ta skoj ti laj yichʼik cholbel lekil aʼyejetik ek li buchʼutik chamemike.*+ Vaʼun, akʼo mi laj xa ox yichʼik chapanel xchiʼuk sbekʼtalik jech kʼuchaʼal chchapanvan li krixchanoetike, xuʼ to xkuxiik jech kʼuchaʼal tskʼan li xchʼul espiritu Dios jech kʼuchaʼal lek chile.

7 Pe nopaj xa tal slajeb skotol li kʼusitike. Jaʼ yuʼun, oyuk me lek achʼulelik+ xchiʼuk vikʼiluk me lek asatik ta spasel orasion.+ 8 Li kʼusi mas tsots skʼoplale jaʼ ti xakʼan abaik tajek ta jujuntale,+ yuʼun chpix epal mulil li kʼanelale.+ 9 Chʼamo me abaik ta jujuntal, mu me ta bikʼtal vulajeteluk xapasik.+ 10 Ti kʼu yelan ataojik ta jujuntal li matanale, tunesik me sventa xakolta abaik ta jujuntal, yuʼun jaʼoxuk lekil jchabina ta sventa li slekil yutsil yoʼonton Dios ti jeltos kʼu yelan chvinaje.+ 11 Mi oy buchʼu chkʼopoje, akʼo yalbe skʼoplal lekil mantaletik yuʼun Dios; mi oy buchʼu ch-abtej ta stojolal yantike, akʼo spat yoʼonton ti jaʼ ch-akʼbat yipal yuʼun li Diose;+ sventa jaʼuk yichʼobil ta mukʼ Dios+ ta stojolal Jesukristo skotol li kʼusitik chichʼ pasele. Jaʼ yuʼun Dios li mukʼulal xchiʼuk juʼelal ta sbatel osile. Jechuk.

12 Kuni kʼanbil chiʼiltak, mu me labaluk to sba xavaʼiik ti yakal chanuptanik tsatsal prevaetike,+ ti solel mu xanaʼik yilel li kʼusi yakal chkʼot ta pasel ta atojolalike. 13 Jaʼ lek ti xamuyubajikuk+ ta skoj ti jech chavil avokolik kʼuchaʼal li Kristoe+ sventa xamuyubajik xchiʼuk sventa xkuxet tajek avoʼontonik ek kʼalal mi sta yorail chvinaj li smukʼulale.+ 14 Xamuyubajik mi jaʼ chavichʼik chopol kʼoptael ta skoj li sbi Kristoe,+ yuʼun te oy ta atojolalik li xchʼul espiritu Dios ti oy smukʼulale.

15 Akʼo mi jech, mu me buchʼu xil svokol avuʼunik ta skoj milvanej, elekʼ, pas choplejal o ti jecheʼ noʼox chatikʼ abaik ta yan kʼopetik ti maʼuk akʼopike.+ 16 Pe mu me xkʼexav li buchʼu chil svokol ta skoj ti jaʼ yajtsʼaklom Kristoe,+ jech-o me akʼo stoybe skʼoplal Dios ta sventa ti jaʼ yajtsʼaklom Kristoe. 17 Yuʼun jaʼ xa yorail sventa xlik li chapanel ta sna Dios ti albil onoʼox skʼoplale.+ Jaʼ yuʼun, mi baʼyel chlik ta jtojolaltik li chapanele,+ ¿kʼusi van chkʼot ta pasel ta stojolal li buchʼutik muʼyuk bu chchʼunik li lekil aʼyejetik yuʼun Diose?+ 18 «Mi vokol chkol li buchʼu tukʼe, ¿kʼusi van chkʼot ta stojolal li buchʼu toj chopole xchiʼuk li jpasmulile?».+ 19 Jaʼ yuʼun, li buchʼutik yakal chil svokolik ta skoj ti tspasik li kʼusi tskʼan yoʼonton Diose jechuk-o me akʼo skʼuban sbaik ta stojolal jun tukʼil Jpasvanej kʼalal jech-o tspasik li kʼusi leke.+

5 Jech oxal, ta skoj ti jchiʼil jbatik ta molale, ti laj kil laj yil svokol li Kristoe xchiʼuk ti te jkʼoplal ek kʼalal chichʼ smukʼulalik li buchʼutik tʼujbilike,+ xi chkalbeik mantal li moletik avuʼunike: 2 jechukoxuk me kʼuchaʼal jchabichij ti chachabibeik li xchijtak Dios+ ti oy ta abaike, tunanik me ta jkʼelvanejetik,* mu me sujbiluk xavaʼi abaik, ta slekiluk me avoʼonton xapasik ta stojolal Dios;+ jech xtok, mu me jaʼuk ta skoj ti chakʼanik takʼine, ti chaloʼlavanike,+ moʼoj, ta sjunuluk me avoʼonton xapasik; 3 mu me jpʼeluk xa xavalik ta stojolal li buchʼutik jaʼ yuʼuntak Diose,+ moʼoj, akʼo yilik ti lek ta chanel atalelalik li chijetike.+ 4 Vaʼun, kʼalal mi laj yichʼ akʼel ta ilel li bankilal jchabichije,+ chavichʼik li korona ti jun yutsil ti mu snaʼ xtakije.+

5 Jaʼ jechoxuk ek, kerem viniketik, akʼo me abaik ta ventainel ta stojolal li viniketik ti oy xa sjabilalike.+ Pe bikʼit me xavakʼ aba* akotolik ta jujuntal, yuʼun kontra chil Dios li buchʼu xtoyet xa chaʼi sbaike, pe chakʼbe slekil yutsil oʼontonal li buchʼutik bikʼit chakʼ sbaike.+

6 Bikʼtajeso abaik li ta sjuʼel skʼob Diose sventa stoy akʼoplalik mi sta yoraile,+ 7 jech xtok, akʼbeik me sbain skotol li kʼusi chavul-o avoʼontonike,*+ yuʼun oyoxuk ta yoʼonton.+ 8 ¡Oyuk-o me lek achʼulelik, vikʼiluk me lek asatik!+ Yuʼun li avajkontraik ti jaʼ li Diabloe te xjoyet kʼuchaʼal jkot leon ti x-avete, yuʼun tskʼan oy buchʼu tsbikʼ.*+ 9 Pe kontrainik me,+ lekuk me tsots li xchʼunel avoʼontonike, yuʼun anaʼojik ti jaʼ jech yakal chilik vokoliletik ek li avermanotakik ta spʼejel balumile.+ 10 Pe mi laj xa ox avil avokolik kʼuk sjalile, li Dios ti jaʼ chakʼ skotol li slekil yutsil oʼontonale, ti la stakoxuk ta ikʼel ta smukʼulal sbatel osil+ ta skoj ti jmoj oyoxuk xchiʼuk Kristoe, jaʼ tstsʼakubtas* li chanubtasel chavichʼike. Jaʼ tskoltaoxuk sventa tukʼuk-o oyoxuk,+ jaʼ tskoltaoxuk sventa tsotsukoxuk-o.+ 11 Oy-o sjuʼel sbatel osil. Jechuk.

12 Ta stojolal Silvano*+ ti jaʼ jun tukʼil ermano chkile, jutuk noʼox kʼusitik la jtsʼibaboxuk tal sventa jpat avoʼontonik xchiʼuk sventa jamal xkalboxuk ti jaʼ melel li slekil yutsil yoʼonton Diose. Tukʼuk-o me oyanik ta stojolal li slekil yutsil yoʼonton Diose. 13 Li ants* ta Babilonia ti jech tʼujbil kʼuchaʼal voʼoxuke chabanukoxuk la chal, jech chal ek li jnichʼon Markose.+ 14 Ta tsʼutsʼeluk* me xakʼopon abaik ta jujuntal sventa xavakʼik ta ilel ti akʼanoj abaike.

Junuk me avoʼonton akotolik li buchʼutik jmoj oyoxuk xchiʼuk Kristoe.