XCHIBAL SKARTA PEDRO

1 Voʼon Simon Pedroun, smosoun xchiʼuk yajtakbolun Jesukristo, jaʼ sventa li buchʼutik oy xchʼunel yoʼontonik ti ep sbalil kʼuchaʼal li xchʼunel koʼontonkutik* ti jaʼ koliyal li tukʼilal yuʼun Jdiostik xchiʼuk li Jkoltavanej Jesukristoe:

2 Akʼo epajuk slekil yutsil oʼontonal xchiʼuk jun oʼontonal ta atojolalik ta skoj ti xavojtikinik lek+ Dios xchiʼuk li Kajvaltik Jesuse, 3 yuʼun ta sventa li sjuʼel Diose, muʼyuk jalanbil laj kichʼtik skotol li kʼusi chtun kuʼuntik sventa jaʼuk xa noʼox xkichʼtik lek ta mukʼ Dios li ta jkuxlejaltike, yuʼun laj xa kojtikintik lek li Diose. La stakutik ta ikʼel+ ta skoj ti jaʼ mukʼul Diose xchiʼuk ti lek yoʼontone. 4 Jaʼ yuʼun, ta skoj taje, laj yakʼbutik li kʼusi albil ti tsots skʼoplal xchiʼuk ti ep tajek sbalil+ sventa xavichʼbeik stalelaltak li Diose,+ yuʼun lajatavik xa lokʼel ta stojolal li chopol talelal liʼ ta balumil ta skoj ti muʼyuk xa noʼox spajeb li kʼusi chopol chichʼ pasele.

5 Jaʼ yuʼun, akʼbeik yipal bu kʼalal xuʼ avuʼunik+ sventa lekuk li xchʼunel avoʼontonike; mi oy xchʼunel avoʼontonike, skʼan lekuk atalelalik xtok;+ mi lek atalelalike, skʼan oyuk yojtikinobil avuʼunik;+ 6 mi oy yojtikinobil avuʼunike, skʼan xanaʼ spajesel abaik; mi xanaʼ spajesel abaike,+ skʼan xkuch lek avuʼunik; mi xkuch lek avuʼunike, skʼan ta sjunul avoʼontonik xavichʼik ta mukʼ Dios xtok;+ 7 mi sjunul avoʼontonik chavichʼik ta mukʼ Diose, skʼan xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele; mi akʼanoj achiʼilik ta chʼunolajele, skʼan me xakʼanik skotol xtok.+ 8 Yuʼun mi oy avuʼunik skotol taje xchiʼuk mi yantik x-epaj batel avuʼunike, jaʼ tskoltaoxuk sventa mu xachʼajubik o sventa lekuk kʼusi chapasik*+ ta skoj ti xavojtikinik lek li Kajvaltik Jesukristoe.

9 Yan mi oy buchʼu muʼyuk yuʼun skotol taje, maʼsat kʼotem, yuʼun mu skʼan skʼel li sakil osile*+ xchiʼuk chʼayem xaʼi ti voʼne xa onoʼox pokbil lokʼel li smule.+ 10 Jaʼ yuʼun, ermanoetik, akʼik me persa sventa tukʼ xavakʼ abaik ti jech takbiloxuk ta ikʼel+ xchiʼuk ti tʼujbiloxuke, yuʼun mu me jutebuk chayalik ta lum mi jech chapasik-o li kʼusitik taje.+ 11 Ta melel, chataik epal bendision mi jech chapasike, jaʼ xkaltik, cha-akʼbatik permiso sventa xa-ochik li ta Ajvalilal*+ sbatel osil yuʼun Kajvaltike, li Jkoltavanej Jesukristoe.+

12 Jaʼ yuʼun, skotol ora jpʼel ta koʼonton ta jvulesboxuk ta ajolik skotol taje manchuk mi xavojtikinik xa xchiʼuk manchuk mi lek xa avakʼoj ta avoʼontonik li kʼusi melel ti laj xa achanike. 13 Pe lek chkaʼi ti ta jvulesboxuk ta ajolik+ sventa jtij avoʼontonik yoʼ to liʼ oyun ta axibalnae,*+ 14 yuʼun jnaʼoj ti poʼot xa ta xichʼ lokʼesel li axibalna jech kʼuchaʼal jamal onoʼox laj yalbun komel li Kajvaltik Jesukristo eke.+ 15 Chkakʼ persa skotol ora bu kʼalal xuʼ kuʼun spasel jech sventa xavules ta ajol* atukik mi libat xa oxe.

16 Kʼalal laj kakʼkutik anaʼik ti oy sjuʼel xchiʼuk ti liʼ xa oy li Kajvaltik Jesukristoe, maʼuk te la jlokʼeskutik ta jecheʼ loʼiletik ti spʼijil noʼox krixchanoetike, moʼoj, yuʼun laj kilbekutik li yutsil slekilale.+ 17 Yuʼun ichʼat ta mukʼ xchiʼuk toybat skʼoplal yuʼun li Jtotik Diose. Taje jaʼo kʼot ta pasel kʼalal xi laj yal li Dios ti oy tajek smukʼulale: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj yuʼune».+ 18 Melel, li kʼusi laj yichʼ alele laj kaʼikutik ti te lik talel ta vinajel kʼalal jaʼo te jchiʼukutik ta chʼul vitse.

19 Jaʼ yuʼun, mas to xuʼ jpat koʼontontik yuʼun li albil kʼope. Lek ti jech chapasik ti chatsʼetanbeik xchikinal li albil kʼop ti xkoʼolaj kʼuchaʼal jun kantil+ ti chojobaj ta ikʼal osil li ta yut avoʼontonike (jaʼ to mi sakub osile xchiʼuk mi lokʼ xa ox talel li mukʼta kʼanale).+ 20 Li kʼusi baʼyel skʼan xanaʼike jaʼ liʼe: ti muʼyuk bu likem tal ta snopben krixchanoetik mi junuk li albil kʼop te oy ta Tsʼibetike. 21 Yuʼun mu ta yoʼontonuk krixchanoetik ti jech laj yichʼ alel li albil kʼopetike,+ moʼoj, yuʼun likem talel ta stojolal Dios li kʼusi laj yal li viniketik kʼalal tijbat yoʼontonik* yuʼun li chʼul espiritue.+

2 Pe te lokʼ jloʼlavanej j-alkʼopetik ta jteklum jech kʼuchaʼal te chlokʼ talel jecheʼ jchanubtasvanejetik ta atojolalik eke.+ Ta mukul chlik chʼakvanikuk ti tslajesik li xchʼunel avoʼontonike, jech xtok, chlik spʼajik li yajvalik ti jaʼ manatike,+ jaʼ yuʼun ta anil xa noʼox chichʼ talel li slajelal stukike. 2 Pe maʼuk noʼox taje, yuʼun ep buchʼutik chlik xchanbeik ek li stalelalik ti toj kʼexlal sbae,*+ jaʼ yuʼun chopol xa chichʼ albel skʼoplal li sbelel kʼusi melele.+ 3 Jech xtok, ta xpichʼetel yoʼontonik chlik yilbajinoxuk ta skoj ti jecheʼ li kʼusi chalike. Pe ta anil noʼox chichʼik chapanel jech kʼuchaʼal albil xa onoʼox skʼoplal ta voʼnee,+ jech xtok, jpʼel onoʼox skʼoplal chtal li slajelalike.+

4 Ta melel, li Diose muʼyuk la sjalanbe kastigo li anjeletik ti la saʼ smulike,+ yuʼun kʼalal la stenan ochel ta Tartaroe,*+ la xchuk ta kadena* ta ikʼpulan osil sventa xichʼik chapanel mi sta yoraile.+ 5 Muʼyuk la sjalanbe kastigo li balumil ta voʼnee,+ pe la xchabi li Noe ti la xcholbe skʼoplal li tukʼilale,+ jech xtok, la xchabi yan vukvoʼ krixchanoetik+ kʼalal laj yakʼ talel Nojelal ta voʼ ta stojolal li krixchanoetik ti toj chopolike.+ 6 Jech xtok, pas ta tan yuʼun li jteklum Sodoma xchiʼuk Gomorra kʼalal laj yakʼbe stoj smule.+ Li kʼusi kʼot ta pasele jaʼ jun senyail li kʼusi chkʼot ta stojolal ta jelavel li krixchanoetik ti toj chopolike.+ 7 Koltaat yuʼun Dios li tukʼil Lote,+ ti toj vokol tajek laj yaʼi ti toj kʼexlal sba stalelal* li chopol krixchanoetike, 8 yuʼun li tukʼil vinik taje jujun kʼakʼal te skʼeloj xchiʼuk te chaʼi li kʼusi chopol tspasik li krixchanoetik ti te xchiʼukan ta nakleje, jaʼ yuʼun tsots tajek laj yil svokol. 9 Jaʼ yuʼun, snaʼoj Jeova* kʼu yelan tskolta lokʼel ta preva li buchʼutik lek ch-ichʼat ta mukʼ ta sjunul yoʼontonike,+ pe parte chakʼ li krixchanoetik ti muʼyuk tukʼike sventa xichʼik lajesel* li ta skʼakʼalil chapanele,+ 10 pe jaʼ mas to jech chkʼot ta stojolalik li buchʼutik jaʼ noʼox tsokesbeik sbekʼtal yantike+ xchiʼuk ti spʼajojik li buchʼutik oy yabtelike.+

Jpʼel tajek xalik xchiʼuk jtoybaetik tajek, jech xtok, muʼyuk chiʼik ta xchopol kʼoptael li buchʼutik ichʼbilik ta mukʼ yuʼun Diose. 11 Li anjeletike yichʼojik ta mukʼ Jeova,*+ jaʼ yuʼun, manchuk mi mas oy stsatsalik xchiʼuk manchuk mi mas oy sjuʼelik, muʼyuk tsabeik smul li jecheʼ jchanubtasvanejetike, yuʼun muʼyuk chchopol kʼoptaik. 12 Pe li viniketik taje ti xkoʼolajik kʼuchaʼal chonbolometik ti mu snaʼik snopel ti stalel onoʼox jech pasbilike, ti vokʼemik sventa xichʼik tsakel batel xchiʼuk sventa xichʼik lajesele, chchopol kʼoptaik li kʼusi mu xojtikinike.+ Jaʼ ch-ikʼatik-o batel ta lajelal li kʼusi chopol tspasike, 13 jaʼ stojolik kʼotem li svokolik ta skoj li kʼusi chopol tspasike.

Lek tajek chaʼiik ti jaʼ batem ta yoʼontonik spasel li kʼusi lek chaʼi sbekʼtalike+ manchuk mi ta kʼakʼaltik tspasik. Jaʼik ikʼobal xchiʼuk paltail* kʼotem ta atojolalik ti xmuyubajik noʼox ta sventa* li jecheʼ chanubtasel yuʼunik kʼalal jaʼo te xchiʼinojoxuk ta veʼele.+ 14 Li sbekʼ satike noj ta sloʼlael snup xchiʼilik,+ mu xkom yuʼunik spasel li mulile xchiʼuk tsloʼlaik li buchʼutik kʼunike. Chanem lek yoʼontonik ta pichʼ oʼontonal. Jaʼik alab nichʼnabiletik ti chopol kʼoptabilike. 15 Lajemik ta loʼlael ta skoj ti laj yiktaik li tukʼil bee. Jaʼ stamojbeik li sbe Balaam+ xnichʼon Beor ti jaʼ bat ta yoʼonton li stojol choplejale,+ 16 pe ti laj yichʼ tukʼibtasel ta skoj ti la sokes li kʼusi tukʼe.+ Yuʼun li jkot vuro ti mu snaʼ xkʼopoje kʼopoj kʼuchaʼal jun krixchano ti la smakbe ta be li xchuvajil j-alkʼope.+

17 Kʼotemik ta nioʼ ti ulem yaʼlele xchiʼuk jaʼik lumaltok ti chkuchatik batel ta tsatsal ikʼe, jech xtok, te xa malabilik yuʼun li ikʼal osil ti ikʼ tajeke.+ 18 Jun to slekil yaʼel li kʼusitik chalik ti muʼyuk sbalile. Toj kʼexlal sba stalelalik* xchiʼuk tsloʼlaik yantik sventa xchaʼpasik li kʼusi chopole,+ tstijbeik yoʼonton ta spasel li kʼusi jaʼ to laj yiktaik pasele.+ 19 Chalbeik yantik ti chkolike, pe li stukike mosoinbilik yuʼun li kʼusi snaʼ xkʼaʼe;+ yuʼun mi oy buchʼu laj yichʼ tsalele, jaʼ chmosoinat yuʼun li buchʼu tstsalvane.+ 20 Ta melel, mi jatavik xa ox lokʼel ta stojolal li kʼusi tsokesvan ta balumil+ ta skoj ti laj yojtikinik lek li Kajvaltik xchiʼuk li Jkoltavanej Jesukristoe, pe mi tsutik to batel yan velta ta spasel li kʼusitik taje xchiʼuk mi chakʼ sbaik ta tsalele, mas to chopol chkʼotik kʼuchaʼal ta baʼyele.+ 21 Yuʼun mas lek jechuk ti muʼyukuk laj yojtikinik lek li sbelel tukʼilale, jaʼ altik ti chchʼak sbaik lokʼel ta stojolal li chʼul mantal ti laj yichʼik akʼbele.+ 22 Jaʼ jech kʼotem ta stojolalik li melel pʼijil loʼil liʼe: «Tsloʼ sutel xet* li tsʼiʼe xchiʼuk chbat sbalalin sba yan velta ta achʼel li meʼ chitom ti pokbil xae».+

3 Voʼoxuk ti jkʼanojoxuke, jaʼ xa xchaʼlikal jkarta ta jtsʼibaboxuk talel liʼe, jech kʼuchaʼal li ta baʼyel jkartae jaʼ sventa jtij avoʼontonik yoʼ xatojobikuk snopel, jaʼ noʼox sventa jvules ta ajolik+ 2 yoʼ xavules ta ajolik li kʼusi yalojik xa onoʼox li chʼul j-alkʼopetike xchiʼuk ti xavules ta ajolik li smantal Kajvaltik ti jaʼ Jkoltavanej ti laj yal ta stojolal li jtakboletik avuʼunike. 3 Li kʼusi baʼyel ta jkʼan chkale jaʼ ti xanaʼik ti chtal jlabanvanejetik ti chlabanvanik li ta slajebal xa kʼakʼale, jaʼ jech tspasik ti kʼu yelan tskʼan yoʼonton stukike+ 4 xchiʼuk xi chalike: «Yaloj onoʼox ti chtale, pe ¿bu oy un?+ Yuʼun ti kʼuxi vayik ta lajelal li jmoltotakutike, muʼyuk jelem-o jsetʼuk* li kʼusitik laj yichʼ pasel ta slikebale».+

5 Yuʼun li stukike yalel xa muʼyuk la skʼan la snaʼik ti oy toʼox vinajel ta voʼnee xchiʼuk jun balumil ti ta skʼop Dios lek nakal kome, chʼakal ta voʼ xchiʼuk kakal kom ta voʼ;+ 6 li kʼusitik taje jaʼ laj yichʼik-o lajesel li krixchanoetik li vaʼ kʼakʼal kʼalal laj yichʼik mukel ta voʼe.+ 7 Pe ta skʼop onoʼox Dios kʼejbil* sventa kʼokʼ li vinajel xchiʼuk balumil ti oy avie, te kʼejbilik jaʼ to mi sta yorail chichʼik chapanel xchiʼuk kʼalal chichʼik lajesel li krixchanoetik ti toj chopolike.+

8 Akʼo mi jech, li voʼoxuk ti jkʼanojoxuke mu me xchʼay ta ajolik ti jun kʼakʼale jmil jabil chil li Jeovae,* li jmil jabile jun kʼakʼal chil.+ 9 Li kʼusi yaloj Jeova* chkʼot ta pasele mu yuʼunuk chjalij+ jech kʼuchaʼal tsnopik junantike, yuʼun stsʼikojboxuk to, mu skʼan ti oy buchʼu xbat ta lajelal junuke; moʼoj, li kʼusi tskʼane jaʼ ti xasutes avoʼonton akotolike.+ 10 Pe li skʼakʼalil Jeovae*+ jaʼ jech chtal kʼuchaʼal jun j-elekʼ.+ Vaʼun, li vaʼ kʼakʼale, li vinajele xvoʼoʼet jelavel,*+ chichʼ lilinel li kʼusitik oy ta vinajel balumil ti toj echʼ xa noʼox kʼokʼe, vaʼun chichʼ akʼel ta ilel ta jamal li balumil xchiʼuk li yabtele.+

11 Ta skoj ti jech chichʼ lilinel li kʼusitik taje, nopik me lek ti kʼu yelan skʼan xapas abaike. Skʼan me chʼuluk atalelalik xchiʼuk avichʼojikuk lek ta mukʼ Dios 12 yoʼ to chamalaik xchiʼuk ti teuk ta ajolik* li skʼakʼalil Jeovae,*+ ti jaʼo chichʼ lajesel ta leb kʼokʼ li vinajele,+ pe li kʼusitik oy ta vinajel balumile ch-unij ta xkʼixnal li kʼokʼ ti toj echʼ xa noʼox kʼokʼe. 13 Pe oy achʼ vinajel xchiʼuk jun achʼ balumil ti jmalaojtik ti jech onoʼox yaloje,+ oy xa-o tukʼilal te.+

14 Jaʼ yuʼun, li voʼoxuk ti jkʼanojoxuk ti yakal xa onoʼox chamalaik li kʼusitik taje pasik me ti bu kʼalal xuʼ avuʼunik ti chʼabaluk achopolalike, ti chʼabaluk apaltailik xchiʼuk ti junuk avoʼontonik staoxuke.+ 15 Jech xtok, jaʼuk akolebalik xavilik li smalael yuʼun Kajvaltik jech kʼuchaʼal la stsʼiba ek li kermanotik Pablo ti jkʼanojtik ti jech akʼbat spʼijil yuʼun Diose,+ 16 ti jech laj yal ta skotol li skartatake. Pe toj vokolik ta aʼibel smelolal junantik li kʼusi la stsʼibae xchiʼuk yakal tsokesik li buchʼutik mu snaʼik* xchiʼuk ti kʼunike, jech kʼuchaʼal tsokesik xtok li yan Tsʼibetik ti jaʼ sventa slajelal stukike.

17 Jaʼ yuʼun, ti voʼoxuk jkʼanojoxuk ti xavojtikinik xa li kʼusitik taje kʼelo me abaik sventa mu xalajik ta loʼlael ta skoj smulik li jpaschoplejaletik taje yoʼ mu xaviktaik komel ti bu lek oyoxuke.+ 18 Ti kʼusi skʼan xapasike jaʼ ti jechuk-o x-epaj ta atojolalik li slekil yutsil yoʼonton xchiʼuk li yojtikinobil yuʼun Kajvaltike, li Jkoltavanej Jesukristoe. Akʼo yichʼ albel smukʼulal avi xchiʼuk sbatel osil. Jechuk.