Baʼyel ajvalil ta Israel kʼalal to ti kʼalal la jyichʼik chukel batel ta Babilonia li j-israeletike

Baʼyel echʼ ta ajvalil ta Israel li Saule. Pe muʼyuk bu lek ilat yuʼun Jeova, jech oxal la jyichʼ tʼujel David sventa ch-och ta xkʼexol li Saule. Ta jchantik ep kʼusitik ta stojolal li Davide. Ta skeremale, la spas leto ta skontra li mukʼta natil tsatsal Goliate. Ta mas tsʼakale jatav ta skoj yitʼixal yoʼonton li ajvalil Saule. Vaʼun li alakʼ sba Abigaile la spajtsan David sventa mu smil li Nabale.

Ta mas tsʼakal ep kʼusitik ta jchantik ta stojolal Salomón, li xnichʼon David ti och ta xkʼexol kʼuchaʼal ajvalil ta Israele. Li baʼyel oxvoʼ ajvalil ta Israele, 40 jabil ajvalilajik ta jujuntal. Kʼalal chamem xaʼox li Salomone, pas ta chaʼvokʼ li Israele, och chaʼvoʼ ajvalil ta stojolal, jun ta norte jun ta sur.

Li ajvalilal sventainoj li lajunvokʼ nitilulal ta Israel ta nortee jalij 257 jabil vaʼun lajik ta j-asirioetik. Kʼalal echʼ 133 jabile, li ajvalilal ti sventainoj li chaʼvokʼ nitilulal ta Israel ta sure la jyil lajel ek. Tana liʼ ne li j-israeletike chukbil batik ta Babilonia. Skotol li loʼiletik ta jchantik ta XCHANVOKʼALE jalij 510 jabil, ti vaʼ sjalil taje ep kʼusitik labalik sba kʼot ta pasel.