Tojoban ta stijel oʼontonal kʼalal chaval mantale

LI MOLETIK ta tsobobbaile skʼan me xtojobikuk «sventa xuʼ lek [spatik] oʼontonal li ta lekil chanubtasele», akʼo mi toj tsots li kʼusi yakal chkʼot ta pasele (Tito 1:9). Ta skoj ti tsots skʼoplal ti teuk slokʼesik ta Vivlia li kʼusi chalik li moletik ta tsobobbaile, skʼan me stsakik ta venta li mantal liʼe: «Akʼo-o me ta avoʼonton li [...] tojobtasvaneje» (1 Tim. 4:13). Akʼo mi jaʼ sventa moletik ta tsobobbail li xchanobil liʼe xchiʼuk li buchʼutik oy ta yoʼonton chkʼotik ta mole, li beiltaseletik xtoke xuʼ stunesik li totil meʼiletik kʼalal tstojobtas yalab xnichʼnabike o li buchʼutik chakʼik estudioe.

Ti butik persa skʼan xijtojobtasvane. Skʼan jkʼelbetik skʼoplal li junantik tojobtasel ta Vivliae, yuʼun jaʼ tskoltautik sventa jnaʼtik ti butik persa skʼan xijtojobtasvane. Li jtakbol Pedroe laj yalbe mantal moletik ti akʼo xchabiik li xchij Dios ti oy ta sbaike (1 Ped. 5:1, 2). Li Pablo eke laj yalbe Tito ti akʼo yalbe mantal li keremetik ti «oyuk lek xchʼulelike» (Tito 2:6). Jech xtok, laj yalbe mantal jchʼunolajeletik ti «jmojuk» kʼusi xalbe sbaike xchiʼuk ti akʼo skʼel sbaik ta stojolal li buchʼutik chchʼakvanike (1 Kor. 1:10; Rom. 16:17; Filip. 4:2). Li Pablo xtoke laj yalbe jchʼunolajeletik ta Tesalonika ti lek li kʼusi yakal tspasike, pe laj yalbe xtok ti mas to me lek ti akʼo spasik-o batel li kʼusi albatike (1 Tes. 4:1, 10). Li Pedroe la skʼanbe vokol xchiʼiltak ‹ti akʼo jechuk-o stsʼik sbaik ta spasel li kʼusi tskʼan sbekʼtalike› (1 Ped. 2:11). Li Judase laj yalbe yermanotak ‹ti tsots skʼan xakʼbeik yipal ta sventa xchʼunel yoʼontonik› ta skoj li chopol viniketik ti toj kʼexlal sba li stalelalike (Jud. 3, 4). Skotol li jchʼunolajeletike laj yichʼik albel ti akʼo spatbe sba yoʼontonik ta jujuntal sventa mu stsatsub yoʼontonik yuʼun li sjuʼel mulil ti chloʼlavane (Evr. 3:13). Li Pedroe xi laj yalbe li judaetik ti muʼyuk to xchʼunel yoʼontonik ta stojolal li Kristoe: «Chʼako abaik ta stojolal li jkʼol kuxlejal ti toj chopol liʼe» (Ech. 2:40).

Jech kʼuchaʼal laj xa kiltike, ¿kʼu van yelan jtalelaltik skʼan kʼalal chkaltik mantal ti ta anil xa noʼox skʼan pasele? ¿Kʼusi van xuʼ jpastik sventa mu jpʼeluk xa xkaltik o ti tsotsik xa chijkʼopoj kʼalal chkaltik mantale?

«Li kʼanelale.» Muʼyuk me lek chaʼiik mi mu ta ‹kʼanelaluk› chkaltik mantale (Filem. 9). Mi ta anil xa noʼox skʼan pasel li mantal chichʼ alele, skʼan me xakʼ ta ilel ta skʼopojel li buchʼu tsjelubtas mantale, yuʼun mi xlamet noʼox li yechʼomal yee, xuʼ van chakʼ ta aʼiel ti yuʼun tskʼan pertone. Akʼo mi jech, skʼan me ta sjunul yoʼonton xchiʼuk ta slekil yoʼonton xkʼopoj, yuʼun mas chkʼot ta yoʼonton li buchʼutik te oyik mi ta slekil yoʼonton chal mantale. Li Pablo xchiʼuk xchiʼiltake xi laj yalbe batel li buchʼutik te oyik ta Tesalonikae: «La jtojobtasotkutik ta jujuntal jech kʼuchaʼal tspasbe xnichʼnab li jun totile» (1 Tes. 2:11). Jech kʼuchaʼal ta slekil yoʼonton laj yalbeik mantal yermanotakik li moletik ta voʼnee, jaʼ me jech ta slekiluk avoʼonton xakʼopoj kʼalal chatojobtasvan eke.

Oyuk me apʼijil xakʼopoj sventa mu chopoluk xiloxuk li buchʼu chavalbe mantale. Pe skʼan onoʼox xavalbe yaʼiik «skotol li tojobtasel yuʼun Diose» (Ech. 20:27). Li buchʼutik snaʼ stojik ta vokole muʼyuk me chopol chaʼiik mi ta slekil avoʼonton chavalbe mantale, jech xtok jech-o skʼanojikot (Sal. 141:5).

Kʼalal skʼan to xlik avalbe mantal li buchʼutik te oyik ta tsobobbaile, xuʼ xaval jtosuk li kʼusi lek yakalik ta spasele, vaʼun kʼupil kʼoptao ta sjunul avoʼonton. Nopo kʼusi yakalik ta spasel ti lek chil li Jeovae, jech kʼuchaʼal ti yakʼoj ta ilel ti oy xchʼunel yoʼontonike, ti yakʼojbeik yipal ta skoj ti chkʼanvanike xchiʼuk ti kuchem yuʼunik kʼusuk vokolile (1 Tes. 1:2-8; 2 Tes. 1:3-5). Jech chakʼik venta ti xavaʼibe smelolal li kʼusi yakal tsnuptanike xchiʼuk ti akʼanojane, vaʼun mas me lek chaʼiik kʼalal chlik avalbe mantale.

«Tsʼikuk me avuʼun.» «Tsʼikuk me avuʼun» kʼalal chatojobtasvane (2 Tim. 4:2). ¿Kʼusi smakojbe skʼoplal li talelal taje? Jaʼ ti tsʼikuk kuʼuntik kʼalal oy kʼusi chopol chkichʼtik pasbele o kʼalal chijsabat joltike. Li buchʼu oy stsʼikemal yuʼune xmalaj yuʼun bakʼin chlik yakʼ ta xkuxlejal li buchʼu tstojobtase. Mi jech oy stsʼikemal kuʼuntik chkalbetik mantal li ermanoetike, muʼyuk tsnopik ti solel mu spas yuʼunik li kʼusi chichʼik kʼanbele. Mi spatoj yoʼonton li buchʼu tsjelubtas mantal ti ta sjunul yoʼontonik chtunik ta stojolal Jeova li yermanotake, vaʼun li ermanoetike mas me chtijbat yoʼontonik ta spasel li kʼusi leke (Evr. 6:9).

«Li ta lekil chanubtasele.» ¿Kʼuxi xuʼ spas yuʼun jun mol ta tsobobbail yoʼ «lek spat oʼontonal li ta lekil chanubtasele»? Jaʼ ti «skʼan lek snapʼan sba ta sventa li tukʼil kʼop ta sventa ti kʼu yelan chchanubtasvane» (Tito 1:9). Maʼuk chal li kʼusi tsnop stuke, te tslokʼes ta Skʼop Dios li mantal chale xchiʼuk jaʼ chkoltaat sventa snaʼ lek kʼusi chal. Jaʼ yuʼun, albo yaʼiik kʼusitik sbalil tstabeik mi chchʼunik li tojobtaseletik ta Vivlia ti yakal chavalbee. Teuk ta ajol kʼusi chkʼot ta pasel avi xchiʼuk ta jelavel mi muʼyuk ta jchʼunbetik li smantal Diose, vaʼun jaʼ xavalbe skʼoplal sventa xaʼibeik smelolal ti jaʼ xlokʼ venta spasik li kʼusi leke.

Akʼo persa ti xaʼibeik lek smelolal kʼusi skʼan spasik xchiʼuk kʼu yelan skʼan spasik, jech xtok akʼo persa ti xchʼunik ti ta Vivlia la alokʼes li kʼusi laj avale. Albo yaʼiik bu kʼalal xuʼ spasik mi oy kʼusi chakʼ jnop jtuktik Vivlia ti stakʼ jpastike. Mi tstsuts xaʼox avuʼun li apartee, alo junuk tojobtasel ti jaʼ chtijbat yoʼontonik ta yakʼel ta xkuxlejalik li kʼusi laj xa achanike.

«Lek tajek jamal» xijkʼopoj. Sventa xijtojob ta yakʼel mantale, skʼan ‹lek tajek jamal xijkʼopoj ta sventa li xchʼunel koʼontontike› (1 Tim. 3:13). ¿Kʼusi chkoltaat jun krixchano sventa lek jamal xkʼopoje? Jaʼ ti yakʼojuk ta xkuxlejal ek li kʼusi chalbe ermanoetik akʼo spasike (Tito 2:6, 7; 1 Ped. 5:3). Vaʼun li ermanoetike chakʼik venta ti jech yakʼoj ta xkuxlejal li kʼusi chkʼanbatik akʼo spasike. Chakʼik venta ti xuʼ xchanbeik xchʼunel yoʼonton jech kʼuchaʼal xchanojbe Kristo eke (1 Kor. 11:1; Filip. 3:17).

Ep sbalil chichʼ tabel mi ta kʼanelal chkaltik mantale xchiʼuk mi lokʼem ta Skʼop Diose. Li buchʼu oy ta sbaik chtojobtasvanike skʼan me xakʼik persa ti lekuk xbat yuʼunike (Rom. 12:8).