Li Jonatane mu snaʼ xiʼ xchiʼuk tukʼ laj yakʼ sba

Jonatan sbi li sbankilal kerem Saule xchiʼuk lek tsots yoʼonton ta paskʼop. Jun veltae, li Davide laj yal ti jaʼ mas tsots ch-anilaj li Jonatane, jaʼ mu sta li jkot aguilae xchiʼuk ti jaʼ mas tsots yipe, jaʼ mu sta li jkot leone. Jun kʼakʼale, li Jonatane laj yil batel ta jpʼej vits ti oy jayibuk soltaroetik ti likemik ta Filisteae. Vaʼun, xi laj yalbe li jun yajkoltaobba ti jaʼ li buchʼu ch-ichʼbat batel li yabtejebtake: «‹Muyanik tal li’e›, mi xiike, jaʼ svinajeb ti yakʼojbutik xa ta jkʼobtik li Jeovae, vaʼun xuʼ xbat jtsaktik ta kʼop un bi». Vaʼun, li jfilisteaetike xi laj yalike: «Muyanik tal li’e». Vaʼun, li Jonatane muyik batel xchiʼuk la smilik 20 jfilisteaetik.

Ta skoj ti jaʼ bankilal li Jonatane, jaʼ ch-och jechuk ta ajvalil kʼalal mi cham li stote. Pe li Jonatane snaʼoj ti jaʼ yichʼoj tʼujel David sventa xkʼot ta ajvalile, jaʼ yuʼun muʼyuk x-itʼixaj yoʼonton. Li kʼusie jaʼ ti lek tajek laj yamigoin sbaik li Jonatan xchiʼuk Davide. Jech xtok, laj yalbe sbaik ti chchabi sbaik ta jujuntale. Sventa chakʼ ta ilel ti jaʼ yamigo David li Jonatane, la skʼelanbe jlik skʼuʼ, jun s-espada, jun stʼilesobil flecha xchiʼuk jlik xchuk.

Kʼalal jatav batel David ta skoj ti chichʼ nutsel yuʼun li Saule, li Jonatane bat skʼel li Davide xchiʼuk xi laj yalbee: «Skʼan tsotsuk avoʼonton xchiʼuk oyuk avipal. Li jtote snaʼoj ti jaʼ la stʼujot Jeova sventa xa-och ta ajvalile». ¿Mi chakʼan junuk avamigo jech kʼuchaʼal li Jonatane?

Li Jonatane ep ta velta laj yakʼ ta vokol xkuxlejal ta skoj ti tskʼan tskolta li yamigoe. Yuʼun li stote tskʼan tsmil li Davide, jaʼ yuʼun xi laj yalbe stot li Jonatane: «Mi chamil li Davide, jaʼ noʼox chasaʼ tsots amul, yuʼun li stuke muʼyuk kʼusi chopol spasoj». Pe li Saule ilin tajek ta stojolal Jonatan ta skoj ti jech laj yale. Kʼalal echʼ jayibuk jabile, li Saul xchiʼuk Jonatane chamik ta jun paskʼop.

Kʼalal chamem xa ox li Jonatane, li Davide ay skʼoponbe li skerem Jonatan ti Mefiboset sbie. Kʼalal laj xa ox stae, xi laj yalbee: «Voʼon ta jchabiot ti kʼu sjalil kuxulote, yuʼun li atot Jonatane jaʼ toʼox jlekil amigo. Te chanaki li ta jpasob mantale xchiʼuk ta jchiʼin jbatik ta veʼel ta jmexa skotol kʼakʼal». Li Davide muʼyuk bu xchʼay ta sjol li Jonatane, yuʼun lek tajek laj yamigoin sbaik.