Li Jesuse la xcholbe skʼoplal li Ajvalilal yuʼun Diose

Kʼalal yichʼoj xa ox voʼ li Jesuse, lik xchol mantal, xi chal batele: «Nopajem xa tal li Ajvalilal yuʼun Diose». Chiʼinat batel yuʼun yajchankʼoptak ta sjunul Galilea xchiʼuk ta Judea. Kʼalal sut batel ta slumal Jesus li ta Nasarete, bat li ta snail tsobobbaile. Vaʼun, la sjam li balbalvun yuʼun j-alkʼop Isaiase xchiʼuk xi tsots la xchane: «¡Liʼ oy ta jtojolal li xchʼul espiritu Jeovae, yuʼun la stʼujun sventa jchol li lekil aʼyejetike!». ¿Kʼusi la skʼan laj yal taje? Veno, li krixchanoetike tskʼan tskʼelik li skʼelobil juʼelal tspas Jesuse. Pe maʼuk laj yichʼ chʼul espiritu sventa jaʼuk noʼox spas taje. Yuʼun li kʼusi mas tsots skʼoplale, jaʼ ti xchol li lekil aʼyeje. Ta slajebe, xi to laj yalbe li buchʼutik te tsobolike: «Chkʼot ta pasel avi li kʼusi tsʼibabil laj avaʼiike».

Ta tsʼakale, bat ta nab Galilea li Jesuse. Te laj yil chanvoʼ viniketik ti jaʼik jtsakchoyetike, xi laj yalanbee: «Laʼ tsʼakliikun, vaʼun krixchanoetik xa chatsakik kuʼun jech kʼuchaʼal chatsakik choye». Kʼalal laj yaʼiik taje ta anil laj yiktaik li snutiʼik sventa tsakob choye. Li viniketik taje jaʼ sbiik Pedro, Andres, Santiago xchiʼuk Juan. Vaʼun, la xcholik li lekil aʼyej ta sventa li Ajvalilal yuʼun Dios ta sjunul Galileae, jaʼ jech la spasik ta snail tsobobbailetik, ta chʼivitetik xchiʼuk ta kayeetik. Xchiʼuk ep krixchanoetik la stsʼakliik batel ti buyuk noʼox chbate. Vaʼun, puk batel skʼoplal ta buyuk noʼox li Jesuse, yuʼun puk batel kʼalal to ta Siria.

Ta mas tsʼakale, li Jesuse laj yakʼbe sjuʼelik li yajchankʼoptak sventa slokʼesik pukujetik xchiʼuk ti xpoxtavanike. Pe li yantik yajchankʼoptake bat xchiʼinik ta cholmantal Jesus li ta mukʼta lumetike. Jech xtok, te chiʼinat batel yuʼun jtsop antsetik ti te skʼoplal li Maria Magdalena, Juana, Susana xchiʼuk yantik sventa skoltaik li Jesus xchiʼuk li yajtakboltake.

Kʼalal laj xa ox xchapan yajchankʼoptak li Jesuse, la stakanan batel ta cholmantal. Kʼalal jaʼo te oyik ta Galileae, oy ep krixchanoetik kʼotik ta yajtsʼaklom Jesus xchiʼuk laj yichʼik voʼ. Ep buchʼutik ti tskʼan tstsʼakliik batele, jaʼ yuʼun li Jesuse la skoʼoltas li krixchanoetik ta tsʼunobil ti chapal xa sventa xichʼ kʼajele. Jaʼ yuʼun, xi laj yal li Jesuse: «Kʼanbeik vokol li Yajval Abtel ti akʼo stak batel j-abteletik ta stsobbel sat li kʼusitik tsʼunbile». Ta tsʼakal une, laj to stʼuj 70 ta voʼ yajchankʼoptak, vaʼun ta chaʼchaʼvoʼ la stak batel ta Judea sventa xcholik mantal. Vaʼun, la xcholbeik mantal skotol krixchanoetik ta sventa li Ajvalilal yuʼun Diose. Kʼalal sutik batele, oy tajek ta yoʼontonik xalbeik Jesus ti kʼu yelan echʼ yuʼunike. Li Satanase muʼyuk spajtsaj yuʼun li cholmantale.

Kʼalal skʼan toʼox xchaʼsut ta vinajel li Jesuse, la xchapan komel lek li abtelal ti toj tsots skʼoplal sventa jechuk-o spasik li yajchankʼoptake, xi laj yalanbee: «Bat cholik mantal ta spʼejel balumil. Chanubtasik li krixchanoetik ta xchʼunel skotol li kʼusitik laj kalboxuke xchiʼuk akʼbeik yichʼ voʼ».