Laj yichʼ chukel batel li Jesuse

Kʼalal batik ta vits Olivatik li Jesus xchiʼuk yajtakboltake, te echʼik li ta beoʼ Sedrone. Mas xa ox ta oʼlol akʼobal xchiʼuk lek yij li ue. Kʼalal kʼotik li ta nichimaltik Jetsemanie, xi laj yalbe yajtakboltak li Jesuse: «Liʼ to komanike xchiʼuk skʼan vikʼiluk li asatike». Vaʼun, namaj batel xchiʼuk la skejan sba, yuʼun tsvul tajek yoʼonton. Jaʼ yuʼun, xi lik skʼopon li Jeovae: «Jaʼ kʼotuk ta pasel li kʼusi tskʼan avoʼontone». Vaʼun, li Jeovae la stak talel jun yaj-anjel sventa spatbe yoʼonton li Jesuse. Ta tsʼakale, li Jesuse sut batel ti bu oy li oxvoʼ yajtakboltake, pe vayalik kʼot sta. Jaʼ yuʼun, xi laj yalanbee: «¡Julavanik! Yuʼun maʼuk yorail chavayik, yuʼun sta xa yorail ti chkichʼ akʼel ta skʼob li kajkontratake».

Vaʼun, te tal li Judase xchiʼuk yikʼoj talel epal krixchanoetik ti yichʼoj talel s-espadaik xchiʼuk steʼike. Li Judase snaʼoj ti te oy ta vits li Jesuse, yuʼun ep xa onoʼox ta velta te ayemik. Li Judase baʼyel xa onoʼox laj yalbe soltaroetik ti kʼuxi xuʼ xakʼ ta ilel buchʼu jaʼ li Jesuse, vaʼun tukʼ bat ta stojolal li Jesuse, xi kʼot yalbee: «¡Liʼote, Jchanubtasvanej!». Vaʼun la tsʼutsʼ. Pe xi laj yal li Jesuse: «Judas, ¿mi jaʼ jech chavakʼun ta kʼabal?».

Vaʼun, li Jesuse laj yakʼ sba lek ta baʼyuk be xchiʼuk xi la sjakʼbe li viniketike: «¿Buchʼu ti yakal chasaʼike?» Xi la stakʼik li krixchanoetike: «Jaʼ ta jsaʼkutik li jnasaretal Jesuse». Xi la stakʼ li Jesuse: «Voʼon maʼ taje». Vaʼun, li viniketike solel xiʼik tajek, jaʼ yuʼun sutik ta valopat xchiʼuk yalik ta lum. Pe xi la sjakʼ yan velta li Jesuse: «¿Buchʼu van ti chasaʼike?». Xi la stakʼik yan velta li krixchanoetike: «Jaʼ li jnasaretal Jesuse». Xi laj yal li Jesuse: «Pe laj xa kalboxuk ti jaʼ voʼone. Jaʼ yuʼun, akʼik batuk li viniketik liʼe».

Kʼalal laj yil Pedro li kʼusi yakal chkʼot ta pasele, la slokʼes s-espada, vaʼun la xtuchʼbe xchikin li Malko ti jaʼ smoso li mero bankilal palee. Pe li Jesuse la spikbe li xchikin Malkoe xchiʼuk la xpoxtabe. Vaʼun, xi laj yalbe li Pedroe: «Tikʼo ochel ta sna li a-espadae, yuʼun mi chavakʼ espadae, ta espada chalaj ek». Vaʼun, li soltaroetike la stsakik li Jesuse xchiʼuk la xchukbeik batel skʼob, yan li yajtakboltake jatavik batel. Laje, li epal krixchanoetike laj yikʼik batel ta stojolal li mero bankilal pale Anas sventa xichʼ chapanel li Jesuse, kʼalal laj xa ox yichʼ chapanele, laj yichʼ takel batel ta sna li mero bankilal pale Kaifase. Pe ¿kʼusi van kʼot ta stojolalik li jtakboletike?