«¿Cʼusi ti melele?»

JAʼJECH la sjakʼ li Poncio Pilato ti laj yakʼ ta aʼyel ti muʼyuk ta yoʼonton ta snaʼel li stakʼobile. Li ajvalil ta Romae muʼyuk ta yoʼonton ta skʼanbe stakʼobil, jech noxtok muʼyuk bu la stakʼbe li Jesuse. Xuʼ van la snop Pilato ti toj tsots ta aʼibel smelolal li melele (Juan 18:38).

Ep krixchanoetik avie, ti te nitajtik skʼoplal li jnitvanejetik ta relijione, li jchanubtasvanejetike xchiʼuk li politikoetike, jaʼ jech chakʼ ta ilel stalelalik ta sventa li melele. Chalik ti melele —jaʼ mas ta sventa li lekil talelal xchiʼuk li ta mantale— muʼyuk te oy-o, yuʼun oy noʼox spajeb xchiʼuk chjel jujulikel. Jaʼ yuʼun tsnopik ti xuʼ la yuʼun tstʼuj stukik li kʼusi leke xchiʼuk li kʼusi chopole (Isaías 5:20, 21). Li talelal taje jaʼ me chakʼ akʼo xichʼ pʼajel li lekil talelaletike xchiʼuk li mantaletik yuʼun jmoltotik ta voʼne ta skoj ti muʼyuk xa stu chichʼ ilele.

Toj tsots skʼoplal li kʼusi laj yichʼ alel sventa jech la sjakʼ-o li Pilatoe. Yuʼun li Jesuse xi onoʼox laj yale: «Jaʼ sventa ti tal vocʼcune, xchiʼuc jaʼ sventa ti lital liʼ ta banamile, yuʼun tal cal li cʼusi melele», xi (Juan 18:37). Li Jesuse muʼyuk bu tsots ta aʼibel smelolal chaʼi li melele. Jech onoʼox, xi laj yalbe li yajchankʼoptake: «Jech chavotquinic o li cʼusi melele. Ta sventa li cʼusi melele chaloqʼuic o ta mozoil», xi (Juan 8:32).

¿Bu van xuʼ jtatik li melel taje? Jun veltae, li Jesuse xi laj yalbe ta orasion li Diose: «Li acʼope jaʼ melel», xi (Juan 17:17). Li Vivliae, ti jaʼ yakʼoj ta naʼel stuk li Diose, chakʼ ta ojtikinel li melel beiltasel chakʼbutike xchiʼuk jun spatobil oʼontonal ti chkʼot ta pasel ta jelavele, jaʼ li kuxlejal sbatel osile (2 Timoteo 3:15-17).

Li Pilatoe la spʼaj li chanubtasel ta sventa li melele. ¿Li voʼote? ¿Kʼu yuʼun mu xa jakʼbe yajrextikotak Jeova kʼusi jaʼ «ti melel» ti laj yakʼ ta chanel Jesuse? Li stukike xmuyubajik ti chakʼik avojtikine.