Aʼibo lek smelolal

Mu toj kʼunuk ta saʼel li melel aʼyejetik ta sventa jlom li kʼusitik chkʼot ta pasele. Li ajvaliletike xchiʼuk li empresaetike muʼyuk bu jamal lek snaʼ xkʼopojik. Li radio, television xchiʼuk li yan kʼusitike nopajtik noʼox chalik ti ep kʼusitik chkʼot ta pasel yuʼunike, pe jecheʼ chalik un. Jech xtok mu skotoluk velta chalik doktoretik ti kʼusi xuʼ chkʼot ta pasel yuʼun ta tsʼakal li poxiletik chakʼike. ¿Mi oy van bu xuʼ jtatik aʼyejetik ti xuʼ lek jpat-o koʼontontike?

Ep krixchanoetik toj lek laj yilik kʼalal vul ta lokʼel li Internete, yuʼun la xuʼ te jtatik aʼyejetik ta spʼejel balumil ti xuʼ jpat-o koʼontontike. Melel maʼ taje, pe skʼan me jnaʼtik bu jotukal ta jnetʼbetik yuni chʼoal li komputadorae. «Kʼalal lek ta xichʼ tunesele xuʼ chchanubtas ta anil ep krixchanoetik, jaʼ mu sta kʼuchaʼal yan kʼusitike. Kʼalal muʼyuk lek chichʼ tunesele, xuʼ ta anil chbolibtasvan», xi laj yal jun periodiko The New York Times.

Xi to laj yal li periodikoe: «Ta skoj ti noj ta kʼusitik achʼ li Internete, li buchʼutik mu masuk kʼusi xojtikinike jaʼ mas spatoj-o yoʼontonik. Mi mu xakʼik venta xchiʼuk mi mu skʼel sbaike, xuʼ me jaʼ stambeik sbelel li yavil ikʼobale: sbelel aʼyejetik ta komputadora ti muʼyuk lek kʼelbil kʼusitik chakʼ jelavuke». Kʼux ta alel, pe muʼyuk junuk programa ta komputadora ti xuʼ chchʼuba lokʼel li kʼaʼepetik kʼuchaʼal laj yal periodikoe.

Buchʼuuk noʼox xuʼ chakʼ ta aʼyel aʼyejetik ta Internet, ta jlikuk revista o ta livro. Jaʼ yuʼun, skʼan me oyuk jpʼijiltik xchiʼuk skʼan me jnabetik lek skʼoplal sventa mu jechuk noʼox jchʼuntik li kʼusi ta jchantike. Mi jaʼ ta jkʼan ta xkaʼitik li melel aʼyejetike, skʼan me jaʼ jsaʼtik ti bu melel snaʼ xkʼopojike. Xuʼ van jal xichʼ kuʼuntik, pe kʼalal baʼyuk lek chkojtikintik jtosuk kʼusie jaʼ me tskoltautik ti oyuk jpʼijiltik ta snopel leke, ti jaʼuk xkʼot ta nopel kuʼuntik li kʼusi leke xchiʼuk ti jun koʼontontik ta jpastik li kʼusi tsots skʼoplal jnopoj ta jpastike.