Akʼo mi oy xa jabilaltik xuʼ xi jtun ta stojolal Jeova
Li ta 2009 laj yichʼik voʼ 2,352 li ta Españae. Taje te tsakal skʼoplal chaʼvoʼ antsetik (meʼil xchiʼuk tsebil) ta Málaga ta sural España ti laj yichʼik voʼ ta 19 yuʼun disiembree. Pe toj labal me sba maʼ taje. ¿Kʼu yuʼun? Yuʼun li meʼile yichʼoj 107 jabil, yan li tsebile yichʼoj 83 jabil ti Ana sbiike.
¿Kʼu yuʼun laj yichʼik voʼ sventa chakʼ ta ilel ti yakʼoj xa sbaik ta stojolal Jeovae? Veno, leʼ xa ta slikebal tal sjabilal 1970, li tsebile albat yuʼun slakʼna ti jaʼ yajrextiko Jeova mi skʼan xbat ta sna ti bu ch-echʼ li Xchanel Livro yuʼun Tsobobbaile. Ay jayibuk velta li Anae, pe muʼyuk xchʼi ta mantal ta skoj yabtel.
Te van lajunebuk jabil ta mas tsʼakale, lik xchanik Vivlia jlom yalab xchiʼuk laj yichʼik voʼ. Jun stseb ti Mari Carmen sbie, laj yakʼbe yipal sventa xkʼot ta yoʼonton mantal yan velta li smeʼe xchiʼuk la skolta sventa xchʼam junuk chanubtasel ta Vivlia. Jaʼ jech li syaya Mari Carmen eke lik kʼotuk ta yoʼonton li kʼusi chal Vivliae. Vaʼun, lajunvoʼ la xchʼamik mantal li ta yutsʼ yalale.
Kʼalal laj yichʼik voʼe xmuyubaj tajek xchaʼvoʼalik li Anae. Xi laj yal li yayaile: «Toj lek yoʼonton ta jtojolal li Jeovae, yuʼun laj yakʼ ti akʼo xkojtikine». Xi laj yal li tsebil eke: «Yoʼ to mu chvul li Paraisoe, oy ta koʼonton chi tun ta stojolal Jeova xchiʼuk ta jchol echʼel li mantal ti bu to kʼalal xuʼ kuʼune».
Li kʼusi tskʼupinik tajek li meʼon antsetik taje jaʼ li tsobajeletike. Xi laj yal jun mol ta stsobobbailike: «Mu snaʼ xpajik mi junuk tsobajel, lek chapalik sventa chakʼ sloʼilik li ta Xchanel Li Jkʼel osil ta toyole».
Li stukʼil talelalike jaʼ tsvules ta joltik li Ana ta skʼakʼalil Vivlia ti jaʼ jun meʼon antse, ti «scotol cʼacʼal tey ta xbatilan ta yamaqʼuil templo. Ta cʼacʼal ta acʼubal tey ta xtun yuʼun Dios yuʼun ta xicta ixim, ta scʼopan Dios». Jech, koliyal ti chkʼotilane la sta smoton, jaʼ ti laj yil li neneʼ Jesuse (Luc. 2:36-38, Achʼ Testamento, ta skʼop Chenalhó). Akʼo mi 84 xa jabil yichʼoj, muʼyuk maʼ ti mu xa xuʼ xtun ta stojolal Jeova ta skoj ti oy xa sjabilale, jech kʼuchaʼal li chaʼvoʼ Ana chkalbetik skʼoplal avie.
¿Mi oy avutsʼ avalal ti oy ta yoʼonton chchikinta li mantal ta Vivliae? ¿O mi oy ataoj ta chol mantal junuk krixchano ti oy xa sjabilal ti oy ta yoʼonton li mantale? Taje xuʼ me jech xkʼotik kʼuchaʼal li ermanaetik laj kalbetik skʼoplale, yuʼun akʼo mi oy xa jabilaltik xuʼ xi jtun ta stojolal li melel Diose, li Jeovae.
[Lokʼol ta pajina 25]
«Toj lek yoʼonton ta jtojolal li Jeovae»
[Lokʼol ta pajina 25]
«Yoʼ to mu chvul li Paraisoe, oy ta koʼonton chi tun ta stojolal Jeova»