Li kʼusitik tsjakʼ jkʼel vunetike
¿Kʼu yuʼun ilin Moisés ta stojolal Eleazar xchiʼuk Itamar, li xnichʼnabtak Aarón, kʼalal chamem xaʼox li Nadab xchiʼuk Abiú li xchiʼiltakik ta vokʼele, xchiʼuk kʼuxi laj yoʼonton li Moisese? (Lev. 10:16-20.)
Kʼalal mu toʼox bu jal yochelik ta abtel li paleetik ta chʼulna pasbil ta nukule, li Jeovae la smil li Nadab xchiʼuk Abiú, li xnichʼnabtak Aarón, ta skoj ti «la stsanic yan cʼocʼ[e]» (Lev. 10:1, 2). Li Moisese laj yalbe Eleazar xchiʼuk Itamar, li xnichʼnabtak Aarón, ti mu xuʼ xat-o tajek yoʼontonik li slajel xchiʼiltakik ta vokʼele. Kʼalal mu toʼox bu jal yechʼel taje, li Moisese ilin ta stojolalik yuʼun muʼyuk bu stiʼik li tot tentsun laj yichʼ akʼel ta matanal sventa mulile (Lev. 9:3). ¿Kʼu yuʼun ilin li Moisese?
Li Mantal akʼbat yuʼun Jeova li Moisese chal ti akʼo stiʼ jlomuk matanal li pale ti chakʼ sventa mulil ta yamakʼil chʼulna pasbil ta nukule. Jaʼ jech chvinaj ti tsbainbe smul li buchʼutik chakʼ matanale. Pe mu xuʼ stiʼik li matanal mi laj yichʼbeik batel jlom xchʼichʼel ta Chʼul Kuarto, li ta sbakʼolal chʼulnae. Taje yuʼun persa skʼan chikʼel li matanale (Lev. 6:24-26, 30).
Ta skoj ti xibal sba kʼusi kʼot ta pasel ti vaʼ kʼakʼale, li Moisese tskʼan tsnaʼ yaʼeluk mi laj yichʼ chʼunel skotol li smantaltak Diose. Kʼalal laj yaʼi ti laj yichʼ chikʼel li tot tentsun ti jaʼ li matanal sventa mulile, ch-ilin xa la sjakʼbe li Eleazar xchiʼuk Itamar kʼu yuʼun muʼyuk bu la xchʼunik li mantaletike xchiʼuk kʼu yuʼun ti muʼyuk la stiʼik jlomuk li matanale. Xuʼ ox stiʼik ti jechuke, yuʼun muʼyuk bu laj yakʼik li chʼichʼ ta stojolal Jeova ta Chʼul Kuartoe (Lev. 10:17, 18).
Li buchʼu la stakʼbe Moisese jaʼ li Aarone, jaʼ van ta skoj ti jaʼ laj yalbe mantal ti akʼo jech spas li Eleazar xchiʼuk Itamare. Ta skoj ti milbil xaʼox li chaʼvoʼ xnichʼnabe, yikʼaluk van la sjakʼbe sba mi lek sjol yoʼontonik li paleetik kʼalal chakʼik li matanal sventa mulil li vaʼ kʼakʼale. Laj van snop ti muʼyuk lek chil Jeova ti jech tspasike, manchuk mi maʼuk ta smulik li xchopol talelalik Nadab xchiʼuk Abiue (Lev. 10:19).
Ta skoj ti jaʼ to sba kʼakʼal tspas yabtelik ta paleal li yutsʼ yalaltak Aarone, laj van snop ti skʼan lekuk tajek skʼelbeik smelolal li yabtelik yoʼ smuyubtabeik yoʼonton Diose, akʼo mi jaʼ li kʼusi mu xa masuk tsots skʼoplal yilele. Pe li Nadab xchiʼuk li Abiue la xchopol kʼoptabeik sbi li Jeovae, jaʼ yuʼun ilin Dios ta stojolalik. Li Aarone kʼot ta nopel yuʼun ti mu xuʼ stiʼik chʼul matanal li yan paleetike, yuʼun yutsʼ yalal sbaik xchiʼuk li buchʼutik la saʼ smulike.
Lek xvinaj ti laj yaʼibe smelol Moisés li kʼusi laj yal Aarone, yuʼun li Vivliae xi chale: «Cʼalal laj yaʼay jech li Moisese, jun yoʼnton icom» (Lev. 10:20). Jech xtok, li Jeovae jun yoʼonton laj yaʼi sba ek kʼalal laj yaʼi li kʼusi laj yal Aarone.