Oy kʼusitik yan lik spasik

Ep yajtsʼaklomtak Kristo muʼyuk tspasik li skʼinal Svokʼel Ninyo (Navidad). ¿Mi chopol van chaʼiik ti jech kʼot ta nopel yuʼunike? ¿Mi oy van kʼusi tsnaʼik sutel? ¿Mi tsnopik van ti oy kʼusi muʼyuk yakal tskʼupin li yalab xnichʼnabike? Jkʼeltik kʼusi chalik junantik stestigotak Jeova ti jelajtik slumalike.

Svulesel ta joltik Jesus. «Kʼalal skʼan toʼox xipas ta stestigo Jeovae, bakʼintik onoʼox chikʼot li ta chʼulnae. Jaʼ noʼox chibat ta skʼinal Svokʼel Ninyo o ta Kʼin Koltael, pe mu skotoluk velta xtok. Akʼo mi chikʼot, pe muʼyuk ta jnopbe skʼoplal li Jesuse. Avi ti muʼyuk xa ta jpas li Svokʼel Ninyoe, chaʼkoj ta xemana chikʼot ta tsobajel xchiʼuk ta jchanubtas yantik ta sventa li Jesuse» (EVE, AUSTRALIA).

Yakʼel matanal. «Ximuyubaj tajek kʼalal oy buchʼu chakʼbun junuk jmoton ti muʼyuk jmalaoje. ¡Ta jkʼupin tajek kʼalal jech chakʼbeikune! Jech xtok, lek chkaʼi spasbel starjetaik o sdivujoik li yantike. Taje xmuyubajik˗o xchiʼuk ximuyubaj ek» (REUBEN, IRLANDA DEL NORTE).

Skoltael li buchʼutik oy kʼusi chtun yuʼune. «Ta jkʼupinkutik tajek smeltsanbel sveʼelik li buchʼutik ipike. Bakʼintike chkichʼbekutik batel jutuk kʼusi tslajesik, yuni motonik o xnichimik sventa xmuyubajikuke. Taje jaʼ li kʼusi xuʼ jpastik ta kʼusiuk noʼox kʼakʼale» (EMILY, AUSTRALIA).

Chatsob aba xchiʼuk avutsʼ avalal. «Kʼalal jun yoʼonton chaʼi sbaik kʼalal stsob sba li kutsʼ kalalkutike, li ololetike mas lek xuʼ xojtikinan li sjuntotakike, li smukʼtotakike xchiʼuk li sprimotakike. Ta skoj ti muʼyuk sujbilunkutik ta spasel li kʼusi nopem xaʼiike xchiʼuk li skʼinike, li kutsʼ kalalkutike snaʼojik ti chkʼot jvulaʼankutik ta skoj ti jkʼanojkutike, maʼuk ta skoj ti persa skʼan jech jpaskutike» (WENDY, ISLAS CAIMÁN).

Oyuk jun oʼontonal. «Li ta skʼinal Svokʼel Ninyoe ep toʼox tajek kʼusitik ta jpas ti muʼyuk xa yorail kuʼun sventa jnopbe skʼoplal li jun oʼontonale. Pe avie, laj xa jchan li kʼusi chal Vivlia ta sventa li kʼusi tsta ta tsʼakal li krixchanoetike xchiʼuk laj xa jta li melel jun oʼontonale. La jchan xtok, ti xuʼ xkuxiik ta jun balumil ti bu oy jun oʼontonal li kalabtake» (SANDRA, ESPAÑA).