Sventa li buchʼu tskʼele

Li revista atsakoje jaʼo lik lokʼuk ta julio ta 1879. Vaʼun ep xa kʼusitik jelem liʼ ta Balumile, jaʼ jech li revista liʼ eke (kʼelo li lokʼoletik ta akʼole). Jaʼ yuʼun chaʼa, li ta revistaetik liʼe chlik avil ti oy kʼusitik chichʼ jelele. ¿Kʼusitik ta xjel?

Ta epal lumetike epal krixchanoetik ep kʼusitik tsaʼik ta Internet xchiʼuk lek tajek chaʼiik saʼel. Jaʼ noʼox mi laj yakʼbe klike toj ep kʼusitik xuʼ sta. Li avie xuʼ xa xichʼ chanel epal livroetik, revistaetik xchiʼuk periodikoetik li ta Internete.

Ta skoj ti toj ep xa buchʼu tstunes li Internete, laj xa jchaʼachʼubtaskutik li jpajinakutik ta Internete (www.jw.org), taje jaʼ sventa alakʼuk sba xvinaj xchiʼuk ti mu toj vokoluk chij-och li ta pajina taje. Li buchʼutik ch-ochik li ta pajina taje xuʼ te staik vunetik ti oy mas ta 430 kʼopetike, jech xtok jujun u oy jaytos mantaletik ti chichʼ toʼox pasel imprimire jaʼ xa noʼox xuʼ xichʼ kʼelel li ta jpajinakutik ta Internete. Taje jech chlik yichʼ pasel batel ta enero.a

Ta skoj ti jaʼ xa noʼox chlokʼ ta Internet junantik mantaletike, li revista Li Jkʼel osil ta toyole ti jaʼ sventa skotol krixchanoetike jaʼ xa noʼox ta 16 pajina ta xichʼ pasel, jech xa chlik-o batel li ta eneroe, maʼuk xa ta 32 pajina chlokʼ. Avi li revista liʼe, chichʼ jelubtasel ta 204 kʼopetik, ta skoj ti jutukaj xa li mantaletik chichʼ pasel imprimire xuʼ xa xichʼ jelubtasel mas ta yantik kʼopetik.

Ta skoj li kʼusitik achʼ yichʼ jelele ta jmalakutik ti mas to xkʼot ta stojolal yan krixchanoetik li lekil aʼyej ta Skʼop Diose, ti jaʼ chakʼ kuxlejale. Oy ta koʼontonkutik ta yakʼel mas mantaletik ti tsjambe smelolal kʼusitike xchiʼuk ti kʼupil sba ta kʼelele, xuʼ van ta vun o ta Internet, sventa stabeik sbalil li epal krixchanoetik ti ta xichʼik ta mukʼ li Vivliae xchiʼuk ti tskʼan tsnaʼik li kʼusi ta xchanubtasvan ta melele.

Li jtsʼibajometike