«Xvinaj ti oy jun Dios ta sventa ti yabtel spasojane»

¿Mi achʼunoj ti oy li Diose? ¿Mi xuʼ xavalbe jtosuk sprevail ti oy ta melele? Ta melel, skotol li kʼusitik oy ta jpat jxokontike chakʼ ta ilel ti oy jun Jpasvanej ti toj pʼije, ti ep stsatsale xchiʼuk ti chkʼanvane. ¿Kʼusitik jaʼ li sprevailtak taje xchiʼuk kʼuxi chakʼ jchʼuntik ta melel? Sventa jtakʼtik taje jkʼeltik kʼusi la stsʼibabe batel yajtsʼaklomtak Cristo ta Roma li jtakbol Pabloe.

Xi laj yal li Pabloe: «Mi nijil chimil ta snopilane, ta xvinaj ti oy jun Dios ta sventa ti yabtel spasojane. Cʼalal lic meltsajuc talel ti banomile, xvinaj lec ta qʼuelel oy ti Diose, ti sbatel osil muʼyuc stsutseb ti oy smucʼul stsatsale. Laj scʼoplal maʼ ti stacʼ spac scʼoplal ti buchʼu muʼyuc xchʼulel xaʼi sbae» (Romanos 1:20, Ch). Jech kʼuchaʼal laj yal li Pabloe, chakʼ ta ilel ti oy ta melel Dios li kʼusitik spasojane. Jkʼelbetik batel lek skʼoplal taje.

Li Pabloe laj yal ti xuʼ te xvinaj slekil talelaltak Dios «cʼalal lic meltsajuc talel ti banomile». Kʼalal «banomil» xi li ta griego kʼope maʼuk chalbe skʼoplal li Balumil bu nakalutik-oe; jaʼ chalbe skʼoplal li krixchanoetike.a Jaʼ yuʼun, li jtakbol Pabloe laj yal ti kʼalal laj yichʼ pasel li krixchanoetike xuʼ xilbeik stalelal Jpasvanej li ta kʼusitik spasojan xa onoʼoxe.

Li sprevailtak taje jaʼ li kʼusitik oy ta jpat jxokontike. Yuʼun mu stakʼ mukel, «xvinaj lec ta qʼuelel». Skotol li kʼusitik oye akʼo mi bikʼit o mukʼ, jamal chakʼ ta ilel ti oy jun Jpasvaneje, pe maʼuk noʼox, yuʼun chakʼ ta ilel xtok ti toj labalik sba li stalelale. ¿Mi mu jamaluk chakʼ ta ilel ti oy spʼijil Dios ta skotol li spasbentake? ¿Mi mu jechuk ti chakʼ ta ilel sjuʼel Dios li kʼanaletik ta vinajele xchiʼuk ti kʼu yelan stsatsal chanav li yok ukʼume? ¿Mi mu jechuk ti chakʼ ta ilel ti chkʼanvan Dios ti xuʼ jkʼupintik ti jeltos kʼusi ta jlajestike xchiʼuk ti kʼu yutsil chlokʼ talel xchiʼuk chchʼay batel li Kʼakʼale? (Salmo 104:24; Isaías 40:26.)

¿Kʼuxi xuʼ jamal lek xkiltik li sprevailtake? Yuʼun li buchʼu mu skʼan xakʼ venta xchiʼuk chal ti chʼabal Diose mu «stacʼ spac scʼoplal». Jun krixchano ti lek xchanoje laj yal jun skʼelobil, jnoptik noʼox ti oy jun jtsʼot karo ti tspas sba ti mu xil jun senyail ti xi chale: «Liʼ chchʼak sba li bee, joypʼijan batel ta atsʼetkʼob». Vaʼun, pajesat yuʼun jun polisia sventa xakʼ multa. Sventa spak skʼoplal li jtsʼot karoe chal ti muʼyuk la xil li senyail taje. Pe mu kʼu xut spak skʼoplal, yuʼun lek jamal ta kʼelel li senyail taje. Jech xtok, skotol li jtsʼot karoetike skʼan skʼelik lek xchiʼuk xchʼunik li senyailtak akʼbil ta bee. Jaʼ jech oy sprevailtak ek li ta spasbentak Diose. Li «senyail» taje jamal lek ta kʼelel. Ti oy jpʼijiltik akʼbilutike xuʼ xkakʼtik venta li sprevailtak taje, jaʼ yuʼun mu stakʼ jpak jkʼoplaltik ti mu xkiltike.

Li kʼusitik spasoj Diose ep kʼusi chakʼ jchantik ta stojolal li Jpasvanej kuʼuntike. Pe oy jlik livro ti chalbe mas skʼoplal li Diose: jaʼ li Vivliae. Taje te ta jtabetik stakʼobil li sjakʼobil ti toj tsots skʼoplal liʼe: ¿kʼusi van tspas Dios ta sventa li Balumile xchiʼuk ta sventa li krixchanoetik ti te chnakiike? Chanbo li stakʼobile, jaʼ tskoltaot sventa xanopaj ta stojolal li Dios ti xvinaj stalelaltak ta spasbentake.