¿Kʼu yuʼun skʼan oy ta avoʼonton xchanel li Vivliae?

Li livro ti mas lek ojtikinbil ta skotole jaʼ li Vivliae. ¿Kʼu yuʼun? Jtose jaʼ ta skoj ti chalbe skʼoplal li kʼusitik oy ta jkuxlejaltike. Chalbe skʼoplal xkuxlejal jlom krixchanoetik ti kuxiik ta voʼnee, ti kʼuyelan laj yil sbaik xchiʼuk yantike xchiʼuk ti kʼuyelan laj yil sbaik xchiʼuk Diose. Oy kʼusi tsots skʼoplal chakʼ jchantik li loʼiletik taje xchiʼuk kʼunik ta aʼiel ti xuʼ xichʼ jelubtasel ta sienal noʼox kʼopetike, ti xaʼibeik smelolal skotol krixchanoetik ti buyuk noʼox nakalike xchiʼuk ti kʼusiuk noʼox ora chkuxiike. Jech xtok, li beiltaseletik ta Vivliae chichʼ tabel sbalil skotol ora.

Li kʼusi mas tsots skʼoplale maʼuk ti chalbe skʼoplal Dios li Vivliae, jaʼ ti te likem tal ta stojolale. Te chal kʼusi sbi li Diose, li stalelaltake xchiʼuk ti kʼusi tskʼan tspas ti muʼyuk jelem-o ta sventa li Balumil xchiʼuk krixchanoetike. Jech xtok, li Vivliae chal ti jal tajek skontrainoj sbaik li kʼusi lek xchiʼuk kʼusi chopole: li kʼusi kʼot ta pasel ta sjunul vinajelbalumile chakʼ muyubajel ti kʼuyelan tstsutse. Kʼalal ta sjunul avoʼonton chakʼel li Vivliae te chata spatobil avoʼonton xchiʼuk chchʼi li xchʼunel avoʼontone.

Li ta Vivliae te ta jtatik mantaletik ti muʼyuk bu yan xuʼ jtatike. Liʼe jaʼ jlom skʼelobiltak ti melel kʼusi chal Vivlia ta sventa liʼe:

• Ti bu likemutik tal xchiʼuk kʼu yuʼun chkil jvokoltike

• Ti kʼusi spasoj Dios sventa tspojutike

• Ti kʼusi spasoj ta jtojolaltik li Jesuse

• Ti kʼusi chkʼot ta pasel ta jelavel ta sventa li Balumil xchiʼuk krixchanoetike

¿Kʼu yuʼun mu xachʼakbe yorail sventa xakʼel li mantaletik chtal sventa xanaʼ li kʼusi chal Vivliae?