MANTAL TA SLIKEBALTIK PAJINA: NOPBIL KʼOPETIK TI TSNAMAJESUTIK TA STOJOLAL DIOSE
Nopbil kʼop ti muʼyuk sbi li Diose
LI KʼUSI XCHʼUNOJIKE
«Muʼyuk kʼotem ta nopel kuʼunkutik ti xuʼ xkalbekutik li sbi Diose, mi oy onoʼox van li sbie mu stakʼ naʼel lek.» (Jchanubtasvanej David Cunningham, Theological Studies.)
LI KʼUSI CHAL TA MELEL LI VIVLIAE
Li Vivliae chal ti Jeova sbi li Diose (Éxodo 3:14, tsʼib ta yok vun, Ch). Li smelolal ta hebreo li biil Jeovae jaʼ skʼan xal «Jaʼ Tspas akʼo Kʼotuk ta Pasel» (Génesis 2:4, tsʼib ta yok vun, TNM).
Li Jeovae tskʼan ti jtunesbetik li sbie. Xi chal li Vivliae: «Kʼanbeik vokol ta sbi. Akʼik ta ojtikinel ta stojolal lumetik li kʼusi mukʼtik spasoje. Akʼik ta naʼel ti jaʼ noʼox stuk toj toyol oy li sbie» (Isaías 12:4, TNM).
Li Jesuse la stunesbe sbi li Diose xchiʼuk laj yakʼbe yojtikin li yajtsʼaklomtake. Xi laj yalbe ta orasion li Stote: «Li voʼone kakʼojbeik yojtikin li abie, xchiʼuk chkakʼ ta ojtikinel». ¿Kʼu yuʼun laj yakʼbe yojtikin sbi Dios yajtsʼaklomtak li Jesuse? Xi to laj yale: «Sventa jechuk xkʼanvanik jech kʼuchaʼal akʼanojune, xchiʼuk ti jmojuk oyun xchiʼukike» (Juan 17:26, TNM).
TI KʼU YUʼUN TSOTS SKʼOPLALE
Xi la stsʼiba Walter Lowrie ti chchanbe skʼoplal Diose (teólogo): «Li jun krixchano ti mu snabe sbi li Diose mu xojtikin ta melel, jech xtok, mu xuʼ skʼan mi jaʼ noʼox jun tsatsal juʼelal ti muʼyuk kuxul chile».
Kʼalal chichʼ lokʼesel o tupʼbel sbi li Diose xkoʼolaj xchiʼuk chichʼ tuchʼel lokʼel li ta Vivliae
Jun vinik ti Victor sbie chkʼotilan jujun xemana ta chʼulna, pe mu xojtikin chaʼi ta melel li Diose. Xi chale: «Ta tsʼakale la jchan ti Jeova sbi li Diose, laj yakʼ sba lek ta ojtikinel stuk yaʼeluk. Laj kaʼi ti jaʼ to laj kojtikin ti Buchʼu kabinojbe xa onoʼox tajek skʼoplale. Te laj kakʼ venta ti oy ta melele xchiʼuk ti xuʼ lek xkil jbakutike».
Jech xtok, li Jeovae chnopaj ta stojolal ti buchʼu tstunesbe li sbie. «Li buchʼutik tsnopik ta sventa li sbie» xi ch-albatik yuʼun li Diose: «Ta xakʼuxubajik ta koʼonton jech kʼuchaʼal chkʼuxubaj ta yoʼonton xnichʼon li totil ti chchʼunbat smantale» (Malaquías 3:16, 17, TNM). Jech xtok, ch-akʼbatik bendision yuʼun Dios li buchʼutik tskʼoponik ta sbie. Xi chal li Vivliae: «Scotol li bochʼotic tscʼanbeic vocol Cajvaltique [«ta sbi Jeova», TNM] jaʼ ta xcolic» (Romanos 10:13).