¿Kʼu yuʼun ti jech chichʼ jakʼele?

«¿Mi mu persauk skoltaot Dios chavaʼi? Ta smiyonal noʼox jech chaʼi sbaik.» Taje jech tsʼibabil ta jun mukʼta letrero ti jaʼ stojojik li buchʼutik mu xchʼunik ti oy ta melel li Diose. Jamal xvinaj ti mu persauk chaʼiik ti xkoltaatik yuʼun Diose.

Jech xtok, li junantike mu jechuk tspas ta xkuxlejalik ti chalik ti xchʼunojik ta stojolal Diose. Li bankilal ovispo ta Katoliko ti Salvatore Fisichella sbie, xi laj yal ta sventa li buchʼutik te ta srelijione: «Kʼalal ta xkil jbakutike, xuʼ van mu xkakʼkutik venta ti yajtsʼaklomunkutik Cristoe, yuʼun ti kʼu yelan li jkuxlejalkutike koʼol kʼuchaʼal xkuxlejal li buchʼutik maʼuk jchʼunolajele».

Junantike mu noʼox xokob chaʼiik sventa xchʼunik ta stojolal Dios. Tsnopik ti toj nom oy ta stojolalike, jaʼ yuʼun muʼyuk tstsakik ta venta li ta xkuxlejalike. Jaʼ to van tsaʼik kʼalal oy svokolike o kʼalal oy kʼusi chtun yuʼunike jaʼ to tskʼanbeik koltael, xkoʼolaj chilik kʼuchaʼal jun mosoil ti xuʼ spasik ta mantale.

Oy xtoke muʼyuk tspasik li kʼusi chchanike o tsnopik ti muʼyuk mas sbalil mi chakʼ ta xkuxlejalik li kʼusi ch-albatik ta chʼulnae. Liʼe jaʼ noʼox jun skʼelobil, jutuk mu skotoluk li jkatolikoetik ta Alemaniae lek noʼox chilik ti jmoj chnakiik li jun ants xchiʼuk jun vinik ti muʼyuk nupunemike, akʼo mi chalik ta chʼulna xchiʼuk chal Vivlia ti mu lekuke (1 Corintios 6:18; Hebreos 13:4). Pe li jkatolikoetike mu stukikuk yakʼojik venta ti muʼyuk chakʼ ta xkuxlejalik li kʼusi chchanike. Li jnitvanejetik ta jeltos relijione chalik ti muʼyuk xchʼunojik Dios yilel ta xkuxlejalik li buchʼutik te chkʼotik ta xchʼulnaike.

Li chib skʼelobil taje jaʼ chakʼ ti xiuk jakʼbe jbatike: ¿Mi ta melel chtun kuʼuntik ta jkuxlejaltik li Diose? Pe taje mu achʼuk to, yuʼun lik xa onoʼox yichʼ albel skʼoplal ta slikebal slivroal li Vivliae. Sventa jtabetik stakʼobil taje, kalbetik skʼoplal jlom li kʼusitik chal ta Vivlia te ta slivroal Génesis.