¿Kʼusi tspas Dios ta sventa li choplejale?

Li Vivliae jamal chal li kʼusi tspas Jeova xchiʼuk Xnichʼon ta sventa li vokolil yakʼoj Satanase. «Jaʼ yuʼun ital ta banamil li Xnichʼon Diose, jaʼ tal slajesbe stsatsal yabtel li pucuje.» (1 Juan 3:8.) Li balumil avi —ti meʼinem ta pichʼ oʼontonal, ta pʼajbail xchiʼuk ta choplejale— chlaj skʼoplal. Jech xtok, li Jesuse chal ti chichʼ «jipel loqʼuel li banquilal jpasmantal [Satanás] liʼ ta banamile», chichʼ lajesel (Juan 12:31). Kʼalal mi chʼabal xaʼox tsokesvan li chopol anjel taje, li Diose tslikes jun achʼ balumil, vaʼun ta x-ayan lekilal xchiʼuk jun oʼontonal (2 Pedro 3:13).

Pe, ¿kʼusi chkʼot ta stojolalik li buchʼutik jpʼel mu skʼan sjel stalelalik ti jaʼ noʼox batem ta yoʼontonik spasel li choplejale? Xi jamal chal li Vivliae: «Yuʼun li bochʼotic tucʼ yoʼntonique te chnaquiic o ta banamil; li bochʼotic lequique jʼechʼel te oyic o», pe li buchʼutik chopolike ta «xichʼic nutsel loqʼuel; [...] ta xichʼic bulel loqʼuel» ta Balumil (Proverbios 2:21, 22). Ta melel chlaj skʼoplal li kʼusitik tsokesutike xchiʼuk ch-ayan lekilal. Kʼalal mi kʼot xaʼox ta pasel taje, li jchʼunej mantal krixchanoetike ta kʼunkʼun chkolik lokʼel li ta mulil ti mosoinbilike (Romanos 6:17, 18; 8:21).

Sventa tslajes choplejal li Diose muʼyuk tskʼatajesutik kʼuchaʼal jun rovot ti mu xa stakʼ jnop jtuktik li kʼusi ta jpastike. Moʼoj, yuʼun li stuke chchanubtasutik ta smantaltak xchiʼuk tskoltautik ta yiktael li kʼusitik chopol toʼox ta jnoptike xchiʼuk ta jpastike.

Pe, ¿kʼusi chkʼot ta pasel ta sventa li kʼusitik muʼyuk malabil chkʼot ta pasel ti chakʼ ep vokolile? Li Diose yaloj ti poʼot xa tsventain Jbalumiltik li Ajvalilal yuʼune, li buchʼu ch-och li ta ajvalil taje jaʼ li Jesucristoe, ti oy sjuʼel sventa xpoxta li buchʼutik ipike (Mateo 14:14). Li Xnichʼone oy sjuʼel xtok sventa tspajes nojelal ta voʼ, nikel o yan kʼusitik (Marcos 4:35-41). Jech xtok, tslajesbe skʼoplal li vokolil chakʼ «li yorail xchiʼuk li kʼusitik muʼyuk malabil chkʼot ta pasele» (Eclesiastés 9:11, TNM). Kʼalal mi tsventain xaʼox li Balumile muʼyuk xa me chtal ta stojolalik jtosuk choplejal li krixchanoetike (Proverbios 1:33).

Jech xtok, ta smiyonal noʼox li buchʼutik ep laj yil svokolik ti muʼyuk smulike, oy spatobil yoʼontonik. Kʼalal skʼan toʼox jutuk xchaʼkuxes Lázaro li Jesuse, ti jaʼ yamigoe, xi laj yale: «Vuʼun jchaʼcuxesvanejun, xchiʼuc vuʼun jʼacʼcuxlejalun» (Juan 11:25). Ta melel li Jesuse oy sjuʼel sventa chchaʼkuxes skotol li buchʼutik ep laj yil svokolik ti muʼyuk smulike.

Mi chakʼan chakuxi ta jun Balumil ti bu chʼabal xa kʼusi chopol tsnuptan li lekil krixchanoetike, ¿kʼu yuʼun mu xachan li Vivliae? Li tee chachan mas ta sventa li melel Diose xchiʼuk ta sventa li kʼusitik tskʼan tspase. Li stestigotak Jeova ti bu nakalote ta sjunul yoʼontonik tskoltaoxuk. Ta jtijkutik avoʼonton ti xachiʼin ta loʼile o tsʼibabo batel li jtsʼibajometik yuʼun li revista liʼe.