MANTAL TA SLIKEBALTIK PAJINA: XUʼ XANOPAJ TA STOJOLAL DIOS
¿Mi xanaʼ kʼusi sbi li Diose?
¿Mi xuʼ van xkaltik ti jaʼ kamigotik jun krixchano ti mi mu jnabetik sbie? Ta melel moʼoj. Jech kʼuchaʼal laj yal jun ants ti likem ta Bulgaria ti Irina sbie: «Mu xuʼ lek xkil jbatik xchiʼuk Dios mi mu jnabetik li sbie». Pe jech kʼuchaʼal laj kiltik li ta baʼyel mantale, li Diose tskʼan ti xijnopajutik ta stojolale. Jaʼ yuʼun, li Vivliae chal ti Jeova sbi li Diose (Éxodo 3:14, Ch, kʼelo li tsʼib ta yok vune).
Li Vivliae chal ti Jeova sbi li Diose (Éxodo 3:14, Ch, kʼelo li tsʼib ta yok vune)
Pe, ¿mi oy van ta yoʼonton ta melel ti xkojtikinbetik xchiʼuk jtunesbetik sbi li Jpasvanej kuʼuntike? Nopo noʼox avaʼi liʼe: li sbi Diose —ti ta chanib letra laj yichʼ tsʼibael li ta hebreo ti ojtikinbil kʼuchaʼal Tetragrámaton— te van vukmiluk ta velta chvinaj li ta voʼne Tsʼibetik ta Hebreo Kʼope, ti ojtikinbil kʼuchaʼal Pokoʼ Testamentoe. Li biil taje jaʼ li mas chichʼ alel ta Vivliae. Ta melel, taje jaʼ jun sprevail ti oy ta yoʼonton Jeova ti jnabetik xchiʼuk ti jtunesbetik li sbie.a
Kʼalal chojtikin sbaik ta baʼyel velta chaʼvoʼ krixchanoetike, chalbe sba sbiik ta jujuntal. ¿Mi xanaʼ kʼusi sbi li Diose?
Ta skoj ti chʼul xchiʼuk skotol xuʼ yuʼun li Diose oy buchʼutik tsnop ti mu jtatik-o ti jtunesbetik li sbie. Jech ta melel; muʼyuk onoʼox lek mi chopol ta jtunesbetik li sbie. Xkoʼolaj kʼuchaʼal kʼalal muʼyuk lek ta jtunesbetik sbi junuk jlekil amigotike. Akʼo mi jech, li Jeovae tskʼan ti akʼo kʼuxubinbatuk sbi yuʼun li yajtuneltake xchiʼuk ti xakʼik ta ojtikinele (Salmo 69:30, 31; 96:2, 8). Vuleso ta ajol ti xi la xchanubtas ta spasel orasion yajtsʼaklomtak li Jesuse: «Li voʼoxuque jaʼ jech xacʼopanic Dios chac liʼi: ‹Jtotic Dios, te oyot ta vinajel, ichʼbiluc ta mucʼ abi›». Chkichʼbetik ta mukʼ sbi kʼalal chkakʼtik ta ojtikinele, vaʼun chijnopaj-o mas ta stojolal (Mateo 6:9).
Li Vivliae chal ti Diose chakʼ tajek ta yoʼonton xchikintabel skʼop li ‹buchʼutik tsnopik (o chkʼuxubinbeik) li sbie› (Malaquías 3:16, TNM). Skotol li buchʼutik jech tspas taje, xi ch-albatik yuʼun li Jeovae: «Vuʼun ta jcolta loqʼuel ta sventa scotol cʼusiuc noʼox, yuʼun xiyotquinun [o «xojtikinik jbi» TNM], xchiʼuc vuʼun noʼox yichʼojun ta mucʼ. Cʼalal chiscʼanbun vocole, ta jtacʼbe li scʼope; cʼalal oy ep svocole, te ta jchiʼin o» (Salmo 91:14, 15). Jech kʼuchaʼal chkiltike, mi ta jkʼantik xijkʼot ta yamigo li Diose, skʼan xkojtikinbetik xchiʼuk jtunesbetik li sbie.
a Kʼux ta alel, pe ep li buchʼutik tsjelubtasik ta yan kʼopetik li Vivliae muʼyuk tstunesbeik li sbi Diose, sjelojik ta Kajval, Dios o Mukʼul Dios. Mi chakʼanbe to mas yaʼyejal ta sventa taje, kʼelo li pajina 195 kʼalal ta 197 ta livro ¿Kʼusi chchanubtasvan ta melel li Vivliae?, ti pasbil yuʼun stestigotak Jeovae.