¿Kʼu yelan chavil li tsatsal abtelale?

Maʼuk noʼox Alex ti mu skʼupin li tsatsal abtele. Li Aaron ti ch-abtej ta mekanikoe, xi chale: «Jutuk mu skotoluk li krixchanoetike chalik ti kʼexlal la sba ti kʼalal mu masuk tsots skʼoplal li kabteltike. Xkoʼolaj ti xi chalik yaʼeluke: ‹Ta skoj ti chʼabal to jtaoj yan kabtele chkakʼ to persa chi-abtej liʼe›».

Epal krixchanoetike tsnopik ti maʼuk la sventaik li tsatsal abtele. ¿Kʼu yuʼun? Yuʼun yikʼaluk van chchʼunik li kʼusitik chlokʼ ta television, ta Internet o ta yan kʼusitik ti lek noʼox xkuxlejalike xchiʼuk ti oy noʼox kʼusi x-ayan yuʼunik yileluke. Li Matthew ti ch-abtej ta mantenimiento, xi chale: «Chalik ti muʼyuk la tsots skʼoplal li buchʼutik muʼyuk lek staoj yabtelike». Jech yakʼoj venta ek li Shane ti ch-abtej ta chabiej nae. Xi chale: «Li krixchanoetike tskʼan jech-o tspasik kanal kʼuchaʼal ta voʼnee, pe ti jutukuk noʼox la ch-abtejike».

Li kʼusi labal sbae jaʼ ti oy ep krixchanoetik ti tskʼupinik li tsatsal abtele. Li Daniel ti 25 sjabilal ti tsmeltsan naetik xchiʼuk yan kʼusitike, xi chale: «Chakʼ jun oʼontonal kʼalal tsots chij-abteje, mas to kʼalal jnaʼojtik ti jaʼ sventa skoltael yantike». Jech tsnop ek li Andre ti 23 sjabilale, xi chale: «Jnaʼoj lek ti jaʼ noʼox xuʼ xakʼbun muyubajel xchiʼuk jun oʼontonal mi tsots chi-abteje. Maʼuk chakʼ muyubajel mi jutuk chij-abteje, jaʼ noʼox chakʼ chʼaj».

¿Kʼusi koltabilik-o Daniel xchiʼuk Andre sventa skʼupinik li tsatsal abtele? Jaʼ ti chchʼunik li beiltaseletik chakʼ Vivliae. Yuʼun li Vivliae tstij koʼontontik ti tsotsuk xij-abteje xchiʼuk chal kʼuxi xuʼ jkʼupintik li kʼusitik ta jpastike.

¿Kʼusi beiltaseletik ta Vivlia xuʼ skoltaot sventa xakʼupin li avabtele? Ta xkalbotkutik ti xakʼel batel li ta yan mantal chtale.