¿Mi xvul ta ajol?
¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:
¿Kʼu yelan laj yil Dios li paskʼopetik ta voʼnee?
Toj lek xkʼanvan li Jeovae. Pe kʼalal chichʼ ilbajinel li steklumale chakʼ ti akʼo xbat spasik kʼope. Jaʼ noʼox chal stuk Dios buchʼutik chbatik li ta paskʼope xchiʼuk ti kʼusi orae (w15 1/11, paj. 4, 5).
¿Kʼusi skʼan spas li totil meʼiletik sventa xchanubtas li xchex kerem tsebik sventa xtunik ta stojolal li Jeovae?
Li totil meʼiletike tsots skʼoplal ti xakʼbeik ta ilel ti skʼanoj li yalab xnichʼnabike, ti xakʼ ta ilel ta stalelalik ti bikʼit chakʼ sbaike. Jech xtok, skʼan xakʼik ta ilel ti oy spʼijilike xchiʼuk ti xaʼibeikuk smelolal ti kʼu yelan chaʼi sbaike (w15 15/11, paj. 9-11).
¿Mi jaʼ van xkʼexol Pedro li papae?
Li ta Mateo 16:17 xchiʼuk 18 muʼyuk chal ti jaʼ chkʼot ta jolil ta tsobobbail li Pedroe. Li Vivliae muʼyuk chal ti jaʼ mas tsots yabtel kom li Pedroe, li kʼusi noʼox chale jaʼ ti chkʼot ta «ton» ta tsobobbail li Jesuse (1 Ped. 2:4-8) (w15 1/12, paj. 12-14).
¿Kʼusi skʼan jtsaktik ta venta kʼalal skʼan toʼox xijkʼopoje?
Mi ta jkʼan lek ta jtunes li jkʼopojeltike, skʼan jnoptik liʼe: 1) Bakʼin chijkʼopoj (Ecl. 3:7), 2) kʼusi chkaltik (Prov. 12:18) xchiʼuk 3) ta slekiluk koʼonton xijkʼopoj (Prov. 25:15) (w15 15/12, paj. 19-22).
¿Kʼusitik mu stakʼ spasik li yajtsʼaklomtak Kristoe?
Li melel yajtsʼaklomtak Kristoe muʼyuk tsjutik kʼop xchiʼuk muʼyuk tsabeik smul yantik. Muʼyuk chalik batel li kʼusi mu meleluke xchiʼuk muʼyuk bu manya xa kʼu yelan tsabeik smul junuk krixchano. Muʼyuk bu ch-elkʼajik, mi jaʼuk ti mukul xa kʼusi chelkʼanike (wp16.1, paj. 5).
¿Buchʼutik li «bankilal paleetik» chal ta Tsʼibetik ta Griego Kʼope?
Jaʼik li buchʼutik lek ojtikinbilik li ta paleale, ti te tsakal skʼoplal li mero bankilal paleetik ti jaʼ onoʼox jech akʼbil yabtelike (wp16.1, paj. 10).
¿Kʼu yelan skʼan xkiltik li buchʼutik tsveʼik pan xchiʼuk chuchʼik vinoe?
Li yajtsʼaklomutik Kristoe muʼyuk buchʼu ta jtoybetik skʼoplal. Li buchʼutik tʼujbilik ta melel sventa chbatik ta vinajele, muʼyuk tskʼanik ti stuk xa noʼox jech ichʼbilik ta mukʼe (Mat. 23:8-12). Muʼyuk chalik batel ti tʼujbilike (w16.01, paj. 23, 24).
Ti kʼuxi lik yamigoin sbaik li Abraan xchiʼuk Jeovae, ¿kʼusi chakʼ jchantik?
Jaʼ van ta stojolal Sem ti lek laj yojtikin Jeova li Abraane. Ti kʼu yelan laj yichʼik chabiel yuʼun Jeova xchiʼuk yutsʼ yalale, jaʼ koltae sventa xojtikin mas li Jeovae. Skʼan jech jpastik ek (w16.02, paj. 9, 10).
¿Buchʼu la xchʼak li Vivlia ta kapituloetik xchiʼuk ta versikuloetike?
Li ta siglo 13, li bankilal Ovispo Stephen Langtone jaʼ la xchʼak ta kapituloetik li Vivliae. Leʼ xa onoʼox ta epal sigloetike, li judaetik ti la slokʼtaik li Vivlia ta Evreoe la xchʼakik ta versikuloetik, pe li ta siglo 16, li Robert Estienne jech la xchʼak ek li Achʼ Testamentoe (wp16.2, paj. 14, 15).
Kʼalal akʼe ta preva yuʼun Satanas li Jesuse, ¿mi ta melel laj yichʼ ikʼel batel li ta temploe o mi jaʼ noʼox laj yichʼ akʼbel yil?
Mu jnaʼtik ta melel. Li Mateo 4:5 xchiʼuk Lukas 4:9 xuʼ chakʼ ta aʼiel ti jaʼ noʼox akʼbat ta ilel o ti ikʼe batel ta jol templo ta melel yuʼun Satanas li Jesuse (w16.03, paj. 31, 32).
¿Kʼuxi xkoʼolaj kʼuchaʼal job osil li cholmantale?
Kʼun tajek svitsʼvun chyal li job osile, siket tajek, toj jtunel sventa jkuxlejaltik xchiʼuk jaʼ jun bendision chakʼ li Jeovae (Deut. 33:13). Kʼalal jmoj ta jcholtik mantal xchiʼuk li yan yajtuneltak Jeovae, li lekil aʼyejetik ta jcholtike chkʼot ta «skotol li jteklumetike» (w16.04, paj. 4).