¿Mi anaʼoj xa?

¿Kʼusi nopem xaʼi spasel judaetik ti chopol tajek laj yil li Jesuse?

JECH kʼuchaʼal chal li Smantal Moisese, bateltike muʼyuk chopol ti xakʼ yeik o stʼabbeik sbi Dios kʼalal oy kʼusi chalik ta jamal li krixchanoetike. Pe li ta skʼakʼalil Jesuse, li judaetike nopem xa ox xaʼiik ti tstʼabbeik sbi Dios akʼo mi jsetʼ juteb noʼox li kʼusi chalike. Yuʼun la jaʼ jech chakʼik ta aʼiel ti melel li kʼusi chalike. Akʼo mi jech, li Jesuse chib to velta laj yal ti chopol tajek ti jech tspasike; laj yal ti mu persauk tstʼabbeik sbi Dios kʼalal oy kʼusi chalike. Jaʼ yuʼun xi laj yale: «‹Jech› mi xachiike, yuʼun jech; ‹Moʼoj› mi xachiike, yuʼun moʼoj›» (Mat. 5:33-37; 23:16-22).

Xi chal li diccionario teológico del Nuevo Testamentoe: «Li ta slivro judaetik ti Talmud sbie jaʼ te chakʼ ta ilel ti nopem onoʼox xaʼi judaetik ti tstʼabbeik sbi Dios kʼalal oy kʼusi chalik ti mu masuk tsots skʼoplale». Li slivro judaetik taje, ta bikʼit ta mukʼ xa chchapbe smelolal li kʼusitik la persa skʼan xkʼot ta pasele xchiʼuk li kʼusitik mu persauke.

Maʼuk noʼox stuk Jesus ti jech chopol laj yil li kʼusi nopem xaʼiik spasel taje. Xi laj yal li j-al-loʼil Flavio Josefo ti jaʼ juda vinike: «Oy jtsop judaetike xchʼunojik ti jaʼ xuʼ to jutuk kʼalal oy buchʼu tsjut kʼope; pe ti jaʼ toj chopol li buchʼu tstʼabbe sbi Dios kʼalal oy kʼusi chal ta jamale. Xchʼunojik ti ta onoʼox stoj smul li buchʼu persa chaʼi tstaʼbbe sbi Dios sventa xchʼunbat yaʼyeje». Xi chal ek li livro apócrifo yuʼun judaetik ti jaʼ la stsʼiba Jesús Ben Sirae: «Li buchʼu tstʼabilanbe tajek sbi Diose, ta stsobilan ep smul» (Eclesiástico 23:11). Jech oxal chaʼa, li kʼusi chopol laj yil Jesuse jaʼ ti ta anil noʼox chakʼ yeik o tstʼabbeik sbi Dios kʼalal oy kʼusi chalike. Yuʼun mi chkʼot onoʼox ta pasel kuʼuntik li kʼusi chkaltike, mu xa persauk ti jtʼabbetik sbi Dios sventa akʼo xchʼunbutik li yantike.