Ta jtatik bendision kʼalal oy slekil koʼontontike

VOʼNE xa onoʼox tajek ti tsots skʼoplal chilik ti xakʼik milbil matanal kʼalal chichʼik ta mukʼ li Jeovae. Jech kʼuchaʼal li j-israeletik ta voʼnee chakʼik chonbolometik sventa xchikʼbeik smoton li Diose. Jaʼ yuʼun, li yajtuneltak Diose lek ojtikinbilik ta skoj ti chakʼik matanal sventa «skʼupil kʼoptael li Diose». Pe oy to yan matanaletik xtok ti kʼupil tajek chil li Jeovae (Evr. 13:15, 16). ¿Kʼusi sbalil ta jtatik mi laj kakʼtik li matanaletik taje? Jaʼ ti xkuxet noʼox koʼontontike xchiʼuk ta jtatik mas bendision. Jaʼ yuʼun jkʼelbetik batel junchibuk skʼelobiltak.

Baʼyel kalbetik skʼoplal li Anae, li stuke jaʼ jun j-israel ants ti tukʼ yakʼoj sbae, pe ti kʼusi une mu snaʼ x-alaj, pe oy tajek ta yoʼonton ti x-ayan junuk skereme. Jaʼ yuʼun la skʼanbe Jeova ti akʼo x-akʼbat junuk skereme xchiʼuk xi laj yalbe ta jamale: «Me laj avacʼbune, ta xcacʼ tunuc o avuʼun ti jayib cʼacʼal cuxule» (1 Sam. 1:10, 11). Akʼbat onoʼox yuʼun Jeova li kʼusi la skʼanbee, lik xchiʼin yol, xchiʼuk Samuel laj yakʼbe sbi. Vaʼun kʼalal laj yikta xchuʼ li Samuele, laj yikʼ batel ta chʼulna pasbil ta nukul jech kʼuchaʼal yaloj onoʼoxe sventa te xtun ta stojolal Jeova. ¿Mi akʼbat bendision yuʼun Jeova li Anae? Akʼbat, yuʼun ta mas tsʼakale laj to yil voʼob yalabtak. Li Samuel eke kʼot ta jun j-alkʼop xchiʼuk ta jun jtsʼibajom li ta Vivliae (1 Sam. 2:21).

Jech kʼuchaʼal li Ana xchiʼuk Samuele, li voʼotik eke xuʼ me xkakʼbe jkuxlejaltik sventa xijtun ta stojolal li Jpasvanej kuʼuntike. Li Jesuse laj yal ti ta jtatik mas bendision kʼalal chkakʼtik persa spasbel yabtel li Stote (Mar. 10:28-30).

Avie jaʼ xa kalbetik skʼoplal li Dorkase, ti jaʼ jun yajtsʼaklom Kristo ta baʼyel siglo ti lek ojtikinbil ta skoj ti «lekik tajek kʼusitik tspas xchiʼuk ep matanaletik chakʼ ta xkʼuxul yoʼonton», jaʼ xkaltik, oy kʼusitik lek tspas ta stojolal li yantike. Pe li Dorkase oy kʼusi la snuptan ti kʼux tajek laj yaʼi li ermanoetike, yuʼun «tsakat ta chamel, vaʼun cham». Kʼalal laj yaʼi ermanoetik ti te nopol oy li Pedroe, bat skʼanbeik vokol ti akʼo taluk ta ora yoʼ bu oyike. ¿Kʼusi la spas li Pedroe? Jaʼ ti la xchaʼkuxes li Dorkase. ¡Nopo xa noʼox avaʼi kʼu to yelan xkuxet yoʼonton komik li ermanoetike! Yuʼun jaʼ to sba velta laj yilik ti jech la spas jun jtakbole (Ech. 9:36-41). Li Jeovae mi jsetʼuk la xchʼay ta sjol li kʼusitik la spas Dorkase (Evr. 6:10). Yuʼun li sloʼil xkuxlejale te tsʼibabil kom li ta Vivliae xchiʼuk xuʼ jchanbetik li slekil kʼelobil laj yakʼ ta ilele.

Toj lek ta chanbel stalelal li jtakbol Pablo eke, yuʼun li stuke ta slekil yoʼonton la xchʼak skʼakʼal ta stojolal li yantike xchiʼuk la xchikintabe lek li kʼusi chalike. Xi la stsʼibabe batel li yajtsʼaklomtak Kristo ta Korintoe: «Ta sjunul koʼonton ta jlajes kipal ta aventaik, ta xkakʼ sjunlej jkuxlejal ta atojolalik» (2 Kor. 12:15). Li Pabloe laj yil ta sat stuk ti chakʼ tajek jmuyubajeltik kʼalal ta jkoltatik li yantike. Xchiʼuk oy to yan kʼusi ta jtatik ti mas tsots skʼoplale, ¿kʼusi jaʼ? Jaʼ ti chakʼbutik sbendision xchiʼuk ti lek chilutik li Jeovae (Ech. 20:24, 35).

Ta melel, kʼupil tajek sba chil Jeova kʼalal chkakʼ kipaltik xchiʼuk kʼalal ta jchʼak jkʼakʼaltik ta spasbel li yabtele xchiʼuk kʼalal ta jkolta li kermanotaktike. Pe, ¿mi oy to yan kʼusi stakʼ xkakʼbetik Jeova sventa xkichʼtik-o ta mukʼ? Oy ta melel. Jaʼ ti xkakʼtik li matanal takʼine. Toj ep sbalil mi jech la jkakʼtike, yuʼun toj jtunel sventa jechuk-o xichʼ cholel mantal ta spʼejel Balumil. Taje te smakojbe skʼoplal ti chichʼ akʼbel jutuk stakʼinik sventa sman li kʼusi chtun yuʼunik li misioneroetike xchiʼuk li yan ermanoetik ti chtunik ta tsʼakal ora ti stuk noʼox jeche. Li matanal takʼin xtoke, jaʼ chkoltavan sventa xichʼ jelubtasel ta yan kʼopetik li jvuntike xchiʼuk li videoetike. Jech xtok, jaʼ sventa xichʼ vaʼanel li Salonetik sventa Tsobobbaile xchiʼuk ti xichʼ koltael ermanoetik kʼalal chil svokolik ta tsatsal nikel, nojelal ta voʼ o yan kʼusi tsnuptanik. Jaʼ yuʼun, mi laj kakʼtik ta ilel ti oy slekil koʼontontike, xuʼ me jchʼuntik ta melel ti ta jtatik li bendisione xchiʼuk jaʼ me jech chkichʼtik ta mukʼ Jeova «ta sventa li cʼusitic oy [kuʼuntike]» (Prov. 3:9; 22:9).

Ep kʼutik yelan xuʼ xkoltavanik jlom krixchanoetik ta sventa li Abtelal ta spʼejel Balumile

Jech kʼuchaʼal ta skʼakʼalil li jtakbol Pabloe, li avi eke ep buchʼutik ‹parte chakʼ stakʼinik ti kʼu yepal xuʼ yuʼunik› sventa tstikʼik ta kaja ta tsobobbail ti bu xi chale: «Obra mundial» (Abtelal ta spʼejel Balumil) (1 Kor. 16:2). Li takʼin tstsobik ta tsobobbailetike tstakik batel jujun u ta Betel yuʼun stestigotak Jeova ti jaʼ sventainoj slumalike. Mi oy ta avoʼonton chavakʼ li matanal takʼine, xuʼ te xatak batel ta sbi ti kʼu yelan ojtikinbil ta stojolal ajvalil li s-organisasion stestigotak Jeova ta jujun lume. Mi chakʼan chanaʼ lek bu jotukal xkome, kʼopojan batel ta Betel ti jaʼ sventainoj alumale. Sventa xanaʼe, xuʼ xasaʼ ta Internet ta www.jw.org/tzo. Li kʼusitik chkalbetik skʼoplal liʼe, jaʼ li kʼusitik xuʼ tukʼ xkakʼtik batel jtuktike:

DONACIONES INCONDICIONALES

Xuʼ xichʼ akʼel takʼin ti jaʼ noʼox xuʼ xichʼ takel batel ta Internete o ta tarjeta de débito xchiʼuk ta tarjeta de crédito. Junantik Beteletike jaʼ tstunesik li jw.org o yan pajinaetik ta Internet ti jaʼ oy ta sba xchʼamele.
Xuʼ xavakʼ matanal takʼin, natsʼiletik o yan kʼusitik avuʼun ti toyol stojole. Skʼan me xichʼ alel batel ta jlik karta ti jaʼ donación incondicional li kʼusitik laj yichʼ akʼele.

DONACIONES CONDICIONALES

Taje jaʼ smelolal ti xuʼ xichʼ akʼel takʼin ti xuʼ skʼan sutel mi chtun yuʼun li yajvale.
Mi jech chichʼ akʼele, skʼan me xichʼ alel batel ta jlik karta ti jaʼ donacion condicionale.

DONACIONES PLANIFICADAS

Chkalbetik batel skʼoplal ti oy to yan kʼuxi xuʼ jkolta jbatik ta spasel li abtelal ta spʼejel Balumil ta sventa li Ajvalilal yuʼun Diose. Mi chakʼan chatunes jtosuke, kʼopojan batel li ta Betele, sventa xanaʼ mi xuʼ jech xapas. Ta skoj ti jelajtik li mantaletik yuʼun ajvalile xchiʼuk ti jelajtik ta sventa li patane, skʼan me xasaʼ koltael ta stojolal li buchʼu lek chanem ta sventa li mantaletik xchiʼuk patanetik yuʼun ajvalile sventa jaʼ xatunes ti bu mas lek chavaʼie.

Seguros xchiʼuk planes de jubilación: Xuʼ jaʼ xkom ta sbi ti kʼu yelan ojtikinbil ta stojolal ajvalil li s-organisasion stestigotak Jeova ta sventa li seguro de vida chij-akʼbate o li koltael chkichʼtik kʼalal mi la jpastik juvilare.

Cuentas bancarias: Li cuentas bancariase xuʼ xichʼ akʼel ta sbi ti kʼu yelan ojtikinbil ta stojolal ajvalil li s-organisasion stestigotak Jeova kʼalal mi lijchame, jaʼ ti kʼu yelan li mantaletik ta vanko ti bu jlumaltike.

Acciones xchiʼuk bonos: Xuʼ xichʼ akʼbel ta sbi ti kʼu yelan ojtikinbil ta stojolal ajvalil li s-organisasion stestigotak Jeovae. O xuʼ xichʼ pasel firmar junuk vun ti bu chal ti chakʼ komel stakʼin kʼalal mi chame.

Bienes raíces: Xuʼ xichʼ akʼel osil o na ti stakʼ chonele. Xuʼ xichʼ akʼbel ta sbi ti kʼu yelan ojtikinbil ta stojolal ajvalil li s-organisasion stestigotak Jeovae, jaʼ to yuʼun li yosil o sna ti buchʼu laj yakʼe, jaʼ xkaltik, xuʼ to te xnaki ti kʼu sjalil kuxule.

Testamentos xchiʼuk fideicomisos: Xuʼ xkakʼbe kosiltik, jnatik o jtakʼintik ta sbi ti kʼu yelan ojtikinbil ta stojolal ajvalil li s-organisasion stestigotak Jeova mi bat jpasbetik lek svunal o stestamentoal ta jun notario o ti ta xkaltik ti jaʼ tstabe sbalil li ta fideicomiso la jpastike. Ti jech chichʼ pasel taje xuʼ me xjutukaj yuʼun li patane.

Li «donaciones planificadas» xie, jaʼ skʼan xal ti skʼan xchapanbe lek skʼoplal li buchʼu chakʼ matanale. Sventa chichʼ koltael li buchʼutik tskʼan chakʼ uni matanal kʼuchaʼal taje, ti chtun sventa xichʼ pasel li abtelal yuʼunik ta spʼejel Balumil li stestigotak Jeovae, yichʼoj chapanel ta inglés xchiʼuk ta español li foyeto Donaciones planificadas para favorecer el servicio del Reino en todo el mundo. Li foyeto taje te chalbe skʼoplal jeltos kʼu yelan xuʼ xkakʼtik matanaletik o ti chkakʼtik li kʼusitik oy kuʼuntike. Yikʼal mu sta-o skotol ta alumal li kʼusi laj yichʼ alel liʼe, yuʼun jelajtik li mantaletik xchiʼuk li patanetik ta jujun lume. Koliyal ti oy ep kʼutik yelan xuʼ xakʼik li matanal takʼine, ep krixchanoetik skoltaoj sbaik li ta abtelal sventa relijion xchiʼuk ta sventa li skoltael krixchanoetik ti yakal ta jpastik ta spʼejel Balumile, xchiʼuk ep staojbeik sbalil xtok ti jech tspasike (beneficios fiscales). Mi oy li foyeto ta alumale, xuʼ xakʼanbe li sekretario ta atsobobbaile.

Mi chakʼan to chanabe mas skʼoplale, akʼbo klik ti bu chal: «Akʼo uni matanal takʼin ta sventa li abtelal kuʼuntik ta spʼejel Balumile», te chata ta yolon li slikebal pajina ta jw.org, o kʼopojan batel ta Betel ti jaʼ sventainoj alumale.