¿Mi anaʼoj xa?

Li ta voʼneal Israele, ¿mi tstunesik toʼox li beiltaseletik ta Smantal Moises sventa xchapan li skʼopike?

LI JUN skʼelobil ta xkalbetik skʼoplal liʼe chakʼ ta ilel ti tstunesik toʼox bakʼintike. Yuʼun xi chal li Deuteronomio 24:14 xchiʼuk 15: «Mu me xavutsʼintaic li bochʼo meʼonique. Mu me jaluc xamacbeic li stojolique, acʼo me jaʼ achiʼilic ta israelal, o me yanlum ti te xa nacal ta alumalique. [...] Me mu jechuc chapasique, xuʼ tscʼanic parteal ta stojol li Mucʼul Diose, jech voʼoxuc oy amulic chcʼot ta stojol Mucʼul Dios».

Li ta stsʼel jteklum Asdode la staik sjepelultak cerámica ti laj yichʼ pasel ta sjabilaltik 700 kʼalal maʼuk toʼox jkʼakʼaliltike. Li sjepelul cerámica taje te tsʼibabil jun loʼil, yuʼun yileluke la stikʼbeik smul jun jtsʼunolajel ti muʼyuk la laj yakʼ ti kʼu yepal skʼan xakʼ li sat stsʼunobe. Xi chale: «Leʼ xa tal jayibuk kʼakʼal kʼalaluk laj koʼonton ta yakʼel li sat jtsʼunobe, ay li xnichʼon Shobay ti jaʼ li Hoshayahue vaʼun laj yichʼbun echʼel li jkʼuʼe. [...] Jaʼ testigoetik kuʼun li jchiʼiltak ta abtele yuʼun jaʼo jmoj te yakal chi-abtejkutik ta kʼakʼaltik xchiʼuk snaʼojik ti melel li kʼusi chkale. Muʼyuk kʼusi chopol jpasoj. [...] Ajvalil, ta jkʼanbot vokol ti xakoltaun sventa oyuk kʼuxi jta sutel li jkʼuʼe, ¡paso jech ta xkʼuxul avoʼonton! Mu teuk noʼox xakʼel ti chʼabal xa jkʼuʼ jpokʼe».

Li j-al-loʼil Simon Schamae xi chal ta sventa li jun loʼile: «Li kʼusi xvokolet la skʼanik liʼe maʼuk noʼox chakʼ ta ilel ti mu xa snaʼ kʼusi tspas li jun jtsʼunolajel sventa stauk sutel li skʼuʼe». Xi to chale: «Li buchʼu la skʼan parte ta stojolal ajvalile chakʼ ta ilel ti xojtikin jutuk li mantaletik chal Vivliae, mas to xojtikin li kʼusi chal Levítico xchiʼuk Deuteronomio yoʼ bu chal ti mu stakʼ xichʼ ilbajinel li buchʼutik povreike».