Kʼalal mu xa stsʼik chkaʼitik li kʼusi ta jnuptantike

Jaʼ jech kʼot ta stojolal li Salya ta Estados Unidose, laj skotol li kʼusitik oy yuʼun ta skoj li jun tsatsal ikʼaloʼ echʼe, xi chale: «Kaloj mi mu xa xkuch batel kuʼun. Ep ta velta laj kaʼi ti muʼyuk xa stsatsal koʼontone».

Kʼalal oy buchʼu chcham kuʼuntike, toj echʼ noʼox kʼux chkaʼitik. Xi chal li Janice ta Australiae: «Kʼalal cham xchaʼvoʼal li jkeremtake, solel lilijem kom li koʼontone, pe laj kakʼ persa sventa xitsatsub yan velta. Xi la jkʼanbe vokol li Diose: ‹Avokoluk, Kajval, ¡mu xa stsʼik chkaʼi! Jaʼ noʼox ta jkʼan ti teuk xa vayal xikom xchiʼuk ti mu xa xijulav-oe›».

Kʼalal mukul satiat yuʼun yajnil li Daniele, toj echʼ noʼox kʼux laj yaʼi, xi chale: «Kʼalal laj yalbun kajnil ti la smukul satiune, xkoʼolaj ti laj kichʼ pajbel kuchilu ta koʼontone. Toj kʼux tajek laj kaʼi, xkoʼolaj ti te yakal tspajilanbeikun-oe, taje oy jayibuk u jech laj kaʼi jba».

¿Mi yakal chavil-o avokol ta jtosuk liʼe?

• Kʼalal ch-echʼ nojelal ta voʼ o yan kʼusitike

• Kʼalal oy buchʼu chcham avuʼune

• Kʼalal tsmukul satiot li anup achiʼile

• Kʼalal tstsakot tsatsal chamele

• Kʼalal muʼyuk abalil chavaʼi abae

Mi jech yakal chavil avokole, li revista liʼe tskoltaot yoʼ xavakʼ venta ti oy sbalil li akuxlejale.