¿Mi anaʼoj xa?
¿Kʼusi toʼox sbainoj spasel li buchʼu chtun ta jchabinae?
LI TA voʼnee, li buchʼu chtun ta jchabinae tskʼel jpʼej na o li kʼusitik x-ayan yuʼun yan krixchanoe.
Kʼalal jaʼo te mosoinbil ta Ejipto li skerem Jakob ti jaʼ li Josee, vaʼanat ta jchabina yuʼun li Potifare xchiʼuk akʼbat sventain «scotol li cʼusitic oy yuʼune» (Gén. 39:2-6). Ta mas tsʼakal kʼalal och ta tsatsal ajvalil ta Ejipto li Josee, oy buchʼu chabibat li sna eke (Gén. 44:4).
Li ta skʼakʼalil Jesuse, li buchʼutik ep yosilik ti nomik tajeke nopem xaʼi tsabeik yajval sventa xkʼelbat li kʼusitik oy yuʼunik ta skoj ti te nakalik ta jteklumetike. Li jchabinaetike jaʼ tskʼelik li kʼusitik skʼan spasik yaj-abteltak li yajvalike.
¿Kʼu yelan skʼan stalelal li jun jchabinae? Li ta skʼakʼalil jtakboletike, oy jun jtsʼibajom ta Roma ti Columela sbie laj yal ti buchʼu chkʼot ta jun jchabinae skʼan lek xchanoj abtel. Skʼan lekuk stalelal, ti oyuk noʼox smelolal kʼu yelan tspasvan ta mantale xchiʼuk ti mu toj jpʼeluk xa xal ta stojolal li yaj-abteltak yajvale. Xi to laj yal xtoke: «Li jun jchabinae tsots skʼoplal ti mu snop ti lek xa snaʼ spasel skotole. Li kʼusi mas leke jaʼ ti skʼan oyuk ta yoʼonton xchanel mase».
Li Vivliae tskoʼoltas ta jun jchabina li kʼusitik chichʼ pasel li ta stsobobbail yajtsʼaklomtak Kristoe. Jech kʼuchaʼal liʼe, xi la stijbe yoʼonton ermanoetik li jtakbol Pedro ta sventa li kʼusitik xtojobik spasele: «Tunesik me sventa chakolta abaik ta jujuntal ti jaʼoxuk lekil jchabina ta sventa li slekil yutsil yoʼonton [Diose]» (1 Ped. 4:10).
Li Jesus eke laj yalbe skʼoplal jun jchabina kʼalal laj yal li lokʼolkʼop ta Lukas 16:1 kʼalal ta 8. Jech xtok, kʼalal laj yalbe skʼoplal li albil kʼop ta sventa li senyail kʼalal liʼ xa ox oye, te laj yalbe yajtsʼaklomtak ti tsvaʼan jun «tukʼil xchiʼuk pʼijil mosoil» o «tukʼil jchabina». Pe ¿kʼusi tspas li vaʼ tukʼil jchabinae? Jaʼ chakʼbutik jveʼeltik ta mantal ti chtun xa tajek kuʼuntik avi ta skoj ti kuxulutik xa ta slajebal kʼakʼale (Mat. 24:45-47; Luk. 12:42). Xijmuyubaj tajek ta jchʼamtik li vunetik chakʼbutik tal «li tukʼil [jchabinae]» xchiʼuk ti tspuk batel ta spʼejel balumil sventa tsotsuk lek li xchʼunel koʼontontike.