Jvokʼ ti bu oy sjakʼobile

◼ ¿Kʼusi xuʼ jpastik jkotoltik sventa jaʼuk yavil bu ta jchantik ta sventa Jeova li tsobajeletike? (Deu. 31:12.)

Jkotoltik chkichʼtik albel ti sob xi jkʼot li ta tsobajeletike xchiʼuk ti chapalukutik sventa xkichʼtik chanubtasel yuʼun li Jeovae, mi jech ta jpastike chkakʼtik ta ilel ti chkichʼtik ta mukʼ li Jeovae xchiʼuk ti tsots skʼoplal chkiltik li tsobajeltike. Mas me lek ti jaʼ te xi jchoti li ta baʼyel chotlebaletik ta stsʼel plataformae, li ta spate jaʼ komuk sventa li buchʼutik oy bikʼit yalab xnichʼnabike xchiʼuk li buchʼutik likem xaʼox tsobajel chkʼotik bateltike. Mi oy kichʼojtik batel kʼusitik ti xuʼ tsots chbakʼe, kʼuchaʼal selular o yan kʼusitik, kʼalal skʼan toʼox xlik li tsobajele skʼan jkʼeltik kʼusi xuʼ jpasbetik sventa mu xchʼaybe yoʼonton li yantike. Mi jkotoltik ta jkʼan chkichʼtik ta mukʼ Dios li ta tsobajeletike, mas me jutuk kʼusitik xuʼ xchʼay-o koʼontontik (Ecl. 5:1; Fili. 2:4).

Kʼalal jaʼ to sba velta oy buchʼutik chkʼotik ta salone, jun buchʼu te ta tsobajel ti xojtikinan li jvulaʼaletike xuʼ xalbe ti chchiʼinan ta chotleje. Taje mas to chtun yuʼunik li buchʼutik oy yalab xnichʼnabik ti naka to chvul xchʼulelike. Xuʼ van jaʼ to sba velta chbat skʼupinik tsobajel, jech oxal mas van lek ta xaʼi sbaik mi ta slajebtik to chotlebal chchotiike. Kʼalal jeche muʼyuk mas chchʼayik oʼontonal ta salon kʼalal chlokʼ skʼelik kʼusitik chtun yuʼun yalab xnichʼnabik li totil-meʼiletike (Pro. 22:6, 15). Li utsʼ-alaliletik taje skʼan mu xbat chotiikuk ti bu xuʼ x-ochik ta tajimol li ololetike. Jaʼ me mas lek ti xchiʼin lokʼel jlikeluk yalab xnichʼnabik li totil-meʼiletike xchiʼuk ti xalbeik mantal o skʼelik kʼusi chtun yuʼun li yalab xnichʼnabike, ta tsʼakale skʼan xikʼik ochel ta yut salon.

Li jcholvanejetike xuʼ skolta sbaik sventa lekuk noʼox ch-echʼ tsobajel li ta snail yichʼobil ta mukʼ Diose. Ta skoltaik sabel yavilik li utsʼ-alaliletike xchiʼuk li buchʼutik likem xaʼox tsobajel chkʼotik bateltike, jech xtok lek noʼox smelol chikʼik batel ta yavilik li buchʼu chkʼotik ta tsobajele xchiʼuk chichʼ smelolik sventa mu xchʼayik oʼontonal. Chakʼ ta ilel spʼijilik kʼalal oy kʼusi anil tsots chkʼot ta pasele. Mi oy junuk uni olol yakal ta xchʼaybe yoʼonton yantike, ta slekil yoʼonton chkoltavanik.

Kʼuchaʼal chkiltike, skotol li buchʼutik oyik ta tsobajele xuʼ xkoltavanik sventa lekuk noʼox yavil bu xuʼ ta jchantik ta sventa Jeova xchiʼuk li kʼusitik tskʼan tspas ta achʼ balumil ti bu naka tukʼilal xchiʼuk lekilal xa noʼox oye (Heb. 10:24, 25).